1-2. Nganong ang mga Kristohanon karon angayng mainteres sa Levitico?

GIPAHINUMDOMAN ni apostol Pablo ang iyang batan-ong amigo, si Timoteo, nga “ang tibuok Balaang Kasulatan gisulat pinaagi sa paggiya sa Diyos ug mapuslanon.” (2 Tim. 3:16) Apil niana ang Levitico. Unsay imong hunahuna nianang basahona? Ang uban tingali naghunahuna nga kini naundan ug daghang balaod nga dili na mapadapat sa atong adlaw, pero lahi ang panghunahuna sa tinuod nga mga Kristohanon.

² Ang Levitico gisulat mga 3,500 ka tuig kanhi, pero gipreserbar kini ni Jehova “aron tudloan ta.” (Roma 15:4) Kay kining basahona naghatag natog ideya sa panghunahuna ni Jehova, angay tang mainteres sa pagsusi niini. Ang tinuod, daghan tag makat-onan niining basahona. Hisgotan nato ang upat niini.

3. Nganong gihimo ang pagtanyag ug mga halad sa tinuig nga Adlaw sa Pagtabon sa Sala?

³ Unang leksiyon: Kinahanglang mabatonan nato ang pag-uyon ni Jehova aron dawaton niya ang atong mga halad. Sa tinuig nga Adlaw sa Pagtabon sa Sala, ang katawhan sa Israel magtigom, ug ang hataas nga saserdote maghalad ug mga hayop. Ang maong mga halad magpahinumdom sa mga Israelinhon nga kinahanglang mahinloan ang ilang mga sala! Pero sa dili pa dad-on sa hataas nga saserdote ang dugo sa gihalad nga hayop didto sa Labing Balaan nianang adlawa, duna pa siyay kinahanglang himoon nga mas importante kay sa kapasayloan sa mga sala sa katawhan.

4. Sumala sa Levitico 16:12, 13, unsay himoon sa hataas nga saserdote sa una niyang pagsulod sa Labing Balaan sa Adlaw sa Pagtabon sa Sala? (Tan-awa ang hulagway sa atubangan sa magasin.)

⁴ Basaha ang Levitico 16:12, 13. Imadyina ang panghitabo sa Adlaw sa Pagtabon sa Sala: Ang hataas nga saserdote mosulod sa tabernakulo. Kini ang una sa tulo ka higayon nga siya kinahanglang  mosulod sa Labing Balaan nianang adlawa. Ang usa niya ka kamot maggunit ug sudlanan nga punog humot nga insenso, ug ang pikas niyang kamot maggunit ug bulawang insensaryo nga punog baga. Mohunong siya sa atubangan sa kortina nga nagtabon sa entrada sa Labing Balaan. Matinahoron kaayo siyang mosulod sa Labing Balaan ug motindog atubangan sa kaban sa pakigsaad. Sa simbolikong paagi, siya nagtindog atubangan ni Jehova nga Diyos! Unya maampingong ibubo sa saserdote ang balaang insenso diha sa baga, ug ang lawak mapunog humot nga alimyon. * Dayon, mosulod siya pag-usab sa Labing Balaan dala ang dugo sa gihalad nga mga hayop. Matikdi nga magsunog siyag insenso una pa niya itanyag ang dugo sa gihalad nga mga hayop.

5. Unsay atong makat-onan sa paggamit ug insenso sa Adlaw sa Pagtabon sa Sala?

⁵ Unsay atong makat-onan sa paggamit ug insenso sa Adlaw sa Pagtabon sa Sala? Gipakita sa Bibliya nga ang dalawatong mga pag-ampo sa matinumanong mga alagad ni Jehova samag insenso. (Sal. 141:2; Pin. 5:8) Hinumdomi nga matinahoron kaayo ang hataas nga saserdote dihang dad-on niya ang insenso sa presensiya ni Jehova. Sa susama, angayng matinahoron sab kaayo ta dihang mag-ampo kang Jehova. Giapresyar kaayo nato nga gitugotan ta sa Maglalalang sa uniberso sa pagduol ug pagpakigsuod kaniya, samag anak ngadto sa amahan. (Sant. 4:8) Dawaton ta niya ingong iyang mga higala! (Sal. 25:14) Gipabilhan gyod nato kini maong dili nato gustong mohimog bisan unsa nga makapasuko kaniya.

6. Unsay atong makat-onan sa gihimo sa hataas nga saserdote nga pagsunog ug insenso una pa maghalad?

⁶ Hinumdomi nga kinahanglang magsunog ang hataas nga saserdote ug insenso una pa siya makatanyag ug mga halad. Nianang paagiha, iyang maseguro nga mabatonan niya ang pag-uyon sa Diyos dihang maghalad siya. Unsay atong makat-onan niana? Sa dinhi pa si Jesus sa yuta, may importanteng butang nga kinahanglan niyang himoon una pa niya ikahalad ang iyang kinabuhi. Mas importante pa kana kay sa pagtaganag kaluwasan sa katawhan. Unsa kana? Si Jesus kinahanglang magmaunongon kang Jehova sa tibuok niyang kinabuhi sa yuta aron dawaton ni Jehova ang iyang halad. Nianang paagiha, mapamatud-an ni Jesus nga ang pagsunod kang Jehova mao ang hustong paagi sa pagkinabuhi. Iyang mabindikar​—o mapamatud-ang matarong ug husto—​ang pagkasoberano, o paagi sa pagmando, sa iyang Amahan.

7. Nganong ang tibuok kinabuhi ni Jesus sa yuta nakapahimuot sa iyang Amahan?

⁷ Sa tibuok kinabuhi ni Jesus sa yuta, gisunod gayod niya ang matarong nga mga sukdanan ni Jehova. Walay tentasyon o pagsulay​—bisan ang sakit nga kamatayon nga iyang maagoman—​ang makapaluya sa iyang tinguha sa pagdepensa sa paagi sa pagmando sa iyang Amahan. (Filip. 2:8) Dihang nag-atubang siyag mga pagsulay, siya miampo “sa kusog nga tingog nga inubanag mga luha.” (Heb. 5:7) Ang iyang sinserong mga pag-ampo naggikan sa maunongong kasingkasing ug kini nakapalig-on sa iyang tinguha nga magpabiling matinumanon. Para kang Jehova, ang mga pag-ampo ni Jesus samag alimyon sa humot nga insenso. Ang tibuok kinabuhi ni Jesus sa yuta nakapahimuot pag-ayo sa iyang Amahan ug nagbindikar sa Iyang pagkasoberano.

8. Sa unsang paagi masundog nato ang pagkinabuhi ni Jesus?

⁸ Atong masundog si Jesus pinaagi sa paghimo sa atong maarangan sa pagsunod kang Jehova ug pag-unong Kaniya. Dihang makaatubag mga pagsulay, kinasingkasing tang mangayog  tabang kang Jehova kay gusto natong pahimut-an siya. Nianang mga paagiha, gipakita nato nga atong gisuportahan ang iyang paagi sa pagmando. Nahibalo ta nga dili dawaton ni Jehova ang atong mga pag-ampo kon nagbuhat ta sa mga butang nga iyang gidumtan. Pero kon nagsunod ta sa mga sukdanan ni Jehova, makaseguro ta nga ang atong kinasingkasing nga mga pag-ampo mahisamag humot nga insenso para kang Jehova. Makaseguro sab ta nga ang atong pagkamatinumanon ug pagkamaunongon makapahimuot sa atong langitnong Amahan.​—Prov. 27:11.

9. Nganong ang mga Israelinhon magtanyag ug mga halad sa panag-ambit?

⁹ Ikaduhang leksiyon: Nag-alagad ta kang Jehova kay mapasalamaton ta kaniya. Aron ipasiugda kini, atong hisgotan ang mga halad sa panag-ambit, nga laing importanteng bahin sa matuod nga pagsimba sa karaang Israel. * Sa Levitico, atong makat-onan nga ang usa ka Israelinhon makatanyag ug halad sa panag-ambit “ingong pagpasalamat.” (Lev. 7:11-13, 16-18) Magtanyag siya niini nga halad, dili tungod kay obligado siya, kondili tungod kay gusto niya. Kinabubut-on niya kining itanyag kay gihigugma niya ang iyang Diyos, si Jehova. Ang naghalad, ang iyang pamilya, ug ang mga saserdote mokaon sa karne sa gihalad nga hayop. Pero may mga parte sa gihalad nga hayop nga para lang kang Jehova. Unsa kana?

10. Sa unsang paagi ang mga halad sa panag-ambit nga gihisgotan sa Levitico 3:6, 12, 14-16 susama sa pag-alagad ni Jesus kang Jehova?

¹⁰ Ikatulong leksiyon: Atong ihatag kang Jehova ang atong kinamaayohan kay gihigugma nato  siya. Para kang Jehova, ang tambok ang pinakamaayong parte sa usa ka hayop. Miingon sab siya nga espesyal kaayo ang importanteng mga organo, sama sa amimislon (o, kidney). (Basaha ang Levitico 3:6, 12, 14-16.) Busa malipay gyod si Jehova dihang kinabubut-ong ihalad sa usa ka Israelinhon ang importanteng mga organo ug ang tambok. Gipakita sa Israelinhong naghalad niana nga gusto gyod niyang ihatag ngadto sa Diyos ang kinamaayohan. Sa samang paagi, kinabubut-ong gihalad ni Jesus kang Jehova ang iyang kinamaayohan pinaagi sa pag-alagad Kaniya nga bug-os kalag tungod sa iyang gugma Kaniya. (Juan 14:31) Para kang Jesus, makapalipay ang pagbuhat sa kabubut-on sa Diyos; gihigugma niya pag-ayo ang balaod sa Diyos. (Sal. 40:8) Seguradong nalipay si Jehova nga makita si Jesus nga kinabubut-ong nag-alagad kaniya!

11. Sa unsang paagi ang atong pag-alagad susama sa mga halad sa panag-ambit, ug nganong kana makapadasig kanato?

¹¹ Sama sa mga halad sa panag-ambit, ang atong pag-alagad kang Jehova nagpakita kon unsay atong gibati kaniya. Atong ihatag kang Jehova ang atong kinamaayohan, ug ato nang himoon kay gimahal nato siya pag-ayo. Seguradong malipay si Jehova nga makita nga milyonmilyon ang kinabubut-ong nagsimba kaniya tungod sa ilang lawom nga gugma kaniya ug sa iyang mga paagi! Mahupayan ta kon atong hinumdoman nga nakita ug gipabilhan ni Jehova dili lang ang atong ginahimo kondili ang ato pong motibo. Pananglitan, kon tigulang ka ug dili na nimo mahimo ang gusto nimong himoon, makaseguro ka nga si Jehova nakasabot sa imong kahimtang. Tingali mobati ka nga wala na kaayo kay ikahatag kang Jehova, pero nakita ni Jehova ang imong lawom nga gugma nga nagpalihok nimo sa paghimo sa kon unsay imong maarangan. Malipay siya sa pagdawat sa imong kinamaayohan.

12. Unsay gibati ni Jehova bahin sa mga halad sa panag-ambit, ug nganong kana makapadasig kanato?

¹² Unsay atong makat-onan sa mga halad sa panag-ambit? Samtang gisunog sa kalayo ang kinamaayohang parte sa hayop, ang aso mosaka ug si Jehova malipay. Busa makasalig ka nga si Jehova malipay sa imong kinabubut-on, tibuok kalag nga pag-alagad. (Col. 3:23) Hunahunaa lang kon unsa ka dako ang iyang kalipay. Ang imong mahigugmaong mga paningkamot sa pag-alagad kaniya, dako man o gamay, bililhon kaayo para kaniya ug iya nang hinumdoman hangtod sa hangtod.​—Mat. 6:20; Heb. 6:10.

13. Sumala sa Levitico 9:23, 24, giunsa pagpakita ni Jehova ang iyang pag-uyon sa mga saserdote?

¹³ Ikaupat nga leksiyon: Gipanalanginan ni Jehova ang yutan-ong bahin sa iyang organisasyon. Konsideraha kon unsay nahitabo niadtong 1512 B.C.E. dihang ang tabernakulo gipatindog sa tiilan sa Bukid sa Sinai. (Ex. 40:17) Gipangunahan ni Moises ang seremonyas diin giordinahan ingong mga saserdote si Aaron ug ang iyang mga anak. Ang nasod sa Israel nagtigom aron masaksihan ang pagtanyag sa mga saserdote sa ilang unang halad nga mga hayop. (Lev. 9:1-5) Giunsa pagpakita ni Jehova ang iyang pag-uyon niining bag-ong natudlo nga mga saserdote? Samtang gipanalanginan ni Aaron ug Moises ang katawhan, si Jehova nagpadalag kalayo aron bug-os nga masunog ang halad diha sa halaran.​—Basaha ang Levitico 9:23, 24.

14. Nganong ang pag-uyon ni Jehova sa mga saserdote sa Israel importante kanato karon?

¹⁴ Unsay gipakita sa kalayo gikan sa langit? Pinaagi niana, gipakita ni Jehova nga bug-os niyang gisuportahan ang natudlo nga mga saserdote, si Aaron ug ang iyang mga anak. Dihang nakita sa mga Israelinhon kining klarong ebidensiya sa pagsuportar ni Jehova sa mga  saserdote, duna gyod silay maayong rason nga bug-os nga mosuportar kanila. Nganong ang pag-uyon ni Jehova sa mga saserdote sa Israel importante kanato karon? Kay kana nga pagkasaserdote nagrepresentar sa mas maayo ug mas importante nga pagkasaserdote. Si Kristo, ang labawng Hataas nga Saserdote, dunay 144,000 ka kaubang mga hari ug saserdote nga mag-alagad uban kaniya sa langit.​—Heb. 4:14; 8:3-5; 10:1.

15-16. Giunsa pagpakita ni Jehova nga giuyonan niya ang “matinumanon ug maalamong ulipon”?

¹⁵ Niadtong 1919, gitudlo ni Jesus ang gamayng grupo sa dinihogang mga brader ingong “matinumanon ug maalamong ulipon.” Kini nga ulipon nanguna sa buluhatong pagsangyaw ug naghatag sa mga sumusunod sa Kristo ug “pagkaon sa hustong panahon.” (Mat. 24:45) Nakita ba nato ang klarong ebidensiya nga giuyonan sa Diyos ang matinumanon ug maalamong ulipon?

¹⁶ Si Satanas ug ang iyang kalibotan naningkamot sa pagpahunong sa buluhaton sa matinumanong ulipon. Kon wala pa ang tabang ni Jehova, imposibleng mahimo sa ulipon ang maong buluhaton. Bisan pa sa duha ka dagkong gubat sa kalibotan, way hunong nga paglutos, tibuok kalibotang kalisod sa ekonomiya, ug inhustisya, ang matinumanon ug maalamong ulipon padayong nagtaganag espirituwal nga pagkaon para sa mga sumusunod sa Kristo sa yuta. Hunahunaa kon unsa ka daghan ang espirituwal nga pagkaon nga libreng mabatonan karon sa kapig 900 ka pinulongan! Kini maoy klarong ebidensiya sa pagsuportar ni Jehova. Konsideraha ang laing ebidensiya sa panalangin sa Diyos: ang buluhatong pagsangyaw. Sa pagkatinuod, ang maayong balita ginasangyaw “sa tibuok yuta.” (Mat. 24:14) Sa walay duhaduha, si Jehova naggiya ug dagayang nagpanalangin sa iyang organisasyon karon.

17. Unsaon nato pagpakita ang atong pagsuportar sa organisasyon nga gigamit ni Jehova?

 ¹⁷ Maayong pangutan-on nato ang kaugalingon, ‘Mapasalamaton ba ko nga nakig-uban ko sa yutan-ong bahin sa organisasyon ni Jehova?’ Si Jehova naghatag kanatog ebidensiya, nga sama ka makapakombinsir sa kalayo gikan sa langit sa panahon ni Moises ug Aaron. Daghan gyod tag angayng pasalamatan kang Jehova. (1 Tes. 5:18, 19) Unsaon nato pagpakita ang atong pagsuportar sa organisasyon nga gigamit ni Jehova? Pinaagi sa pagsunod sa binase sa Bibliyang instruksiyon nga gihatag kanato diha sa atong mga publikasyon ug sa atong mga tigom, asembliya, ug kombensiyon. Dugang pa, atong ikapakita ang atong pagsuportar pinaagi sa paghimo sa bug-os natong maarangan diha sa buluhatong pagsangyaw ug pagpanudlo.​—1 Cor. 15:58.

18. Unsay determinado nimong himoon?

¹⁸ Magmadeterminado ta sa pagpadapat sa mga leksiyon nga atong nakat-onan sa Levitico. Hinaot mabatonan nato ang pag-uyon ni Jehova aron dawaton niya ang atong mga halad. Hinaot mag-alagad ta kang Jehova tungod sa atong pagkamapasalamaton kaniya. Hinaot magpadayon ta sa paghatag kang Jehova sa atong kinamaayohan kay gihigugma nato siya sa bug-os natong kasingkasing. Ug hinaot himoon nato ang atong maarangan sa pagsuportar sa organisasyon nga iyang gigamit karon. Nianang mga paagiha, atong ikapakita kang Jehova nga atong gipabilhan ang pribilehiyo sa pag-alagad kaniya ingong iyang mga Saksi!