1. Sumala sa Mateo 7:13, 14, nganong makaingon ta nga sama tag nagbiyahe?

KITANG tanan samag nagbiyahe. Ang atong destinasyon, o tumong, mao ang pagpuyo sa bag-ong kalibotan ubos sa mahigugmaong pagmando ni Jehova. Kada adlaw, naningkamot ta sa pagsubay sa dalan nga motultol sa kinabuhi. Pero sama sa giingon ni Jesus, ang maong dalan gamay ug usahay lisod subayon. (Basaha ang Mateo 7:13, 14.) Kita dili hingpit, ug dali ra tang mahitipas sa maong dalan.​—Gal. 6:1.

2. Unsay atong hisgotan niining artikuloha? (Tan-awa sab ang kahong “ Ang Pagkamapainubsanon Makatabang Nato sa Paghimog mga Kausaban.”)

² Aron makapabilin ta sa gamayng dalan nga motultol sa kinabuhi, kinahanglang andam tang mohimog kausaban sa atong panghunahuna, pagbati, ug binuhatan. Si apostol Pablo nagdasig sa mga Kristohanon sa Corinto nga padayong ‘mohimog gikinahanglang mga kausaban.’ (2 Cor. 13:11) Ang maong tambag mapadapat sab kanato. Niining artikuloha, atong hisgotan kon sa unsang paagi ang Bibliya makatabang nato sa paghimog mga kausaban ug kon sa unsang paagi ang hamtong nga mga higala makatabang nato sa pagpabilin diha sa dalan nga motultol sa kinabuhi. Hisgotan sab nato kon kanus-a nga lisod tingaling mosunod sa direksiyon gikan sa organisasyon ni Jehova. Masayran nato kon sa unsang paagi ang pagkamapainubsanon makatabang nato sa paghimog mga kausaban nga dili ra mawala ang atong kalipay sa pag-alagad kang Jehova.

3. Sa unsang paagi makatabang nimo ang Pulong sa Diyos?

³ Dili sayon ang pagsusi sa atong panghunahuna ug pagbati. Ngano? Tungod kay ang atong kasingkasing malimbongon, ug busa lisod tingali natong mahibaloan kon unsay ipabuhat niini kanato. (Jer. 17:9) Dali ra tang malimbongan sa “bakak nga pangatarongan.” (Sant. 1:22) Busa, kinahanglan natong gamiton ang  Pulong sa Diyos sa pagsusi sa atong kaugalingon. Ipadayag sa Pulong sa Diyos kon unsa gyod ta, ang atong kinasulorang “mga hunahuna ug mga intensiyon.” (Heb. 4:12, 13) Ang Pulong sa Diyos samag X-ray machine, nga pinaagi niana makita nato kon unsay naa sa atong kasingkasing. Pero kinahanglang magmapainubsanon ta aron mapadapat nato ang tambag gikan sa Bibliya o sa mga igsoon nga gigamit sa Diyos.

4. Unsay nagpakita nga si Haring Saul nahimong mapahitas-on?

⁴ Ang pananglitan ni Haring Saul nagpakita kon unsay posibleng mahitabo kon dili ta mapainubsanon. Si Saul nahimong mapahitas-on kaayo nga dili siya moangkon, bisan sa iyang kaugalingon, nga kinahanglan niyang usbon ang iyang panghunahuna ug binuhatan. (Sal. 36:1, 2; Hab. 2:4) Nadayag ni dihang si Jehova naghatag kang Saul ug espesipikong direksiyon kon unsay angay niyang himoon human niya mapildi ang mga Amalekanhon. Pero wala sunda ni Saul si Jehova. Ug dihang giestorya siya ni propetang Samuel bahin niana, wala dawata ni Saul ang iyang sayop. Hinunoa, iyang gipakamatarong ang iyang gihimo pinaagi sa pag-ingon nga dili kaayo to seryosong butang ug nga gipugos lang siya sa mga tawo. (1 Sam. 15:13-24) Una pa niana, nagpakita na si Saul ug susamang kinaiya. (1 Sam. 13:10-14) Ikasubo, gitugotan niya nga mahimong mapahitas-on ang iyang kasingkasing. Wala niya usba ang iyang panghunahuna, busa gibadlong siya ni Jehova ug gisalikway.

5. Unsay atong makuhang leksiyon sa pananglitan ni Saul?

⁵ Aron makakuha tag leksiyon sa pananglitan ni Saul, kinahanglan natong pangutan-on ang atong kaugalingon niini nga mga pangutana: ‘Dihang makabasa kog tambag gikan sa Pulong sa Diyos, maghunahuna ba ko nga dili ni mapadapat kanako? Mangrason ba ko nga dili ra man daotan ang akong gihimo? Basolon ba nako ang ubang tawo sa akong gihimo?’ Kon oo ang atong tubag sa bisan hain niana nga mga pangutana, kinahanglan natong usbon ang atong panghunahuna ug pagbati. Kay kon dili, ang atong kasingkasing mahimong mapahitas-on ug isalikway ta ni Jehova ingong iyang higala.​—Sant. 4:6.

6. Unsay kalainan ni Haring Saul ug ni Haring David?

⁶ Matikdi ang kalainan ni Haring Saul ug sa mipuli niya, si Haring David, kinsa nahigugma sa “balaod ni Jehova.” (Sal. 1:1-3) Nahibalo si David nga luwason ni Jehova kadtong mapainubsanon pero Iyang isalikway ang mapahitas-on. (2 Sam. 22:28) Busa gitugotan ni David nga bag-ohon sa balaod sa Diyos ang iyang panghunahuna. Siya misulat: “Dayegon nako si Jehova, nga naghatag kanakog tambag. Bisag panahon sa kagabhion, ang akong kinasulorang mga hunahuna nagtul-id kanako.”​—Sal. 16:7.

7. Unsay atong buhaton kon mapainubsanon ta?

⁷ Kon mapainubsanon ta, tugotan nato ang Pulong sa Diyos sa pagtul-id sa atong sayop nga panghunahuna sa dili pa ta makahimog daotan. Ang Pulong sa Diyos mahisamag tingog nga mag-ingon kanato: “Kini ang dalan. Lakaw mo niini.” Magpasidaan ni nato dihang mahitipas ta sa dalan ug moliko sa tuo o sa wala. (Isa. 30:21) Pinaagi sa pagpaminaw kang Jehova, makabenepisyo ta sa daghang paagi. (Isa. 48:17) Pananglitan, dili ta maulawan kay gibadlong ta sa uban. Ug mas masuod ta kang Jehova kay nahibalo ta nga gitratar ta niya samag pinalanggang anak.​—Heb. 12:7.

8. Sumala sa Santiago 1:22-25, sa unsang paagi magamit nato ang Pulong sa Diyos ingong salamin?

⁸ Ang Pulong sa Diyos samag salamin. (Basaha ang Santiago 1:22-25.) Kadaghanan nato manamin kada buntag sa dili pa mobiya sa balay. Nianang paagiha, makita nato kon unsang mga kausaban ang kinahanglan natong himoon sa atong panagway sa dili pa ta makita sa uban. Sa susama, dihang basahon nato ang Bibliya kada adlaw, makita nato kon unsay kinahanglan natong usbon sa atong panghunahuna ug pagbati.  Daghan ang nakabenepisyo sa pagbasa sa inadlaw nga teksto una sila mobiya sa balay. Gitugotan nila nga maimpluwensiyahan ang ilang hunahuna sa ilang nabasa. Dayon sa tibuok adlaw, mangita silag mga paagi nga mapadapat ang tambag sa Pulong sa Diyos. Kinahanglan pod natong tun-an ug pamalandongon ang Pulong sa Diyos kada adlaw. Morag simple ra ni, pero usa ni sa pinakaimportanteng butang nga atong mahimo aron magpabilin ta sa gamay nga dalan nga motultol sa kinabuhi.

9. Ngano tingaling tul-iron ka sa usa ka higala?

⁹ Diha bay higayon nga misugod na kag subay sa dalan nga makapahilayo nimo kang Jehova? (Sal. 73:2, 3) Kon may hamtong nga higala nga wala mahadlok sa pagtul-id nimo, naminaw ba ka niya ug misunod sa iyang tambag? Kon mao, sakto ang imong gihimo, ug seguradong mapasalamaton ka nga gipasidan-an ka sa maong higala.​—Prov. 1:5.

10. Unsay angay nimong buhaton kon tambagan ka sa imong higala?

¹⁰ Ang Pulong sa Diyos nagpahinumdom kanato: “Ang maunongong higala mohatag ug tambag bisan pag kini sakit paminawon.” (Prov. 27:6) Unsay gipasabot niini? Tagda ni nga ilustrasyon: Imadyina nga naghulat ka nga makatabok sa karsada nga daghag nag-agiagi nga sakyanan ug nalinga ka sa imong cellphone. Motabok na unta ka nga wala magtan-aw sa karsada. Pero gigunitan dayon sa imong higala ang imong bukton ug gibira ka sa daplin. Hugot kaayo ang iyang paggunit nimo maong nabun-og ang imong bukton, pero tungod sa iyang gihimo wala ka mabanggai sa kotse. Bisag nagsakit ang imong bukton sulod sa pipila ka adlaw, masuko ba ka nga gibira ka sa imong higala? Siyempre dili! Magpasalamat hinuon ka sa iyang tabang. Sa susama, kon pasidan-an ka sa usa ka higala nga ang imong sinultihan ug binuhatan dili uyon sa matarong nga mga sukdanan sa Diyos, sa sinugdan masakitan tingali ka. Pero ayawg kasuko nga gitambagan ka. Dili nâ maalamon. (Eccl. 7:9) Hinunoa, angay kang magpasalamat nga ang imong higala wala mahadlok sa pagsulti nimo bahin niana.

11. Ngano kahang isalikway man sa usa ang maayong tambag gikan sa iyang higala?

¹¹ Ngano kahang isalikway man sa usa ang maayong tambag gikan sa mahigugmaong higala? Tungod sa garbo. Gusto sa mga tawong garboso nga “gitikon [sa uban] ang ilang dalunggan.” Sila ‘dili maminaw sa kamatuoran.’ (2 Tim. 4:3, 4) Sila naghunahuna nga sila mas maalamon ug mas importante kay sa uban. Pero, si apostol Pablo misulat: “Kon ang usa naghunahuna nga importante siya apan ang tinuod dili diay, gilimbongan niya ang iyang kaugalingon.” (Gal. 6:3) Gipatin-aw kini ni Haring Solomon. Siya misulat: “Mas maayo pa ang bata nga kabos apan maalamon kay sa tigulang nga hari apan hungog, nga dili na mamati ug tambag.”​—Eccl. 4:13.

12. Unsay atong makat-onan sa gihimo ni apostol Pedro, sumala sa Galacia 2:11-14?

¹² Hunahunaa ang gihimo ni apostol Pedro dihang gibadlong siya ni apostol Pablo atubangan sa tanan. (Basaha ang Galacia 2:11-14.) Puwede untang masuko si Pedro sa giingon ni Pablo, nga magpokus sa iyang paagi sa pagsulti niana ug kon diin nâ niya gisulti. Pero maalamon si Pedro. Gidawat niya ang tambag ug wala siya magdumot kang Pablo. Hinunoa, gitawag niya si Pablo sa ulahi ingong ‘minahal nga igsoon.’​—2 Ped. 3:15.

13. Unsay angay natong hinumdoman sa dili pa motambag?

¹³ Kon gibati nimo nga kinahanglan nimong tambagan ang usa ka higala, unsay angay nimong hinumdoman? Sa dili pa ka makig-estorya sa imong higala, pangutan-a ang kaugalingon, ‘Ako ba naghinobra sa pagkamatarong?’ (Eccl. 7:16) Ang tawo nga naghinobra  sa pagkamatarong mohukom sa uban, dili sumala sa sukdanan ni Jehova, kondili sa iyang kaugalingong sukdanan, ug tingali dili kaayo siya maluluy-on. Human nimo masusi ang kaugalingon unya makita nimo nga kinahanglan gihapon kang makig-estorya sa imong higala, isulti kaniya kon unsay problema ug paggamit ug mga pangutana aron masabtan niya kon unsay iyang nahimong sayop. Seguroa nga ang imong isulti gibase sa Kasulatan, ug hinumdomi nga ang imong higala manubag, dili kanimo, kondili kang Jehova. (Roma 14:10) Gamita ang kaalam nga naa sa Pulong sa Diyos, ug dihang magtambag ka, sundoga ang pagkamaluluy-on ni Jesus. (Prov. 3:5; Mat. 12:20) Ngano? Tungod kay si Jehova magtratar kanato sa paagi nga gitratar nato ang uban.​—Sant. 2:13.

14. Unsay gitagana kanato sa organisasyon sa Diyos?

¹⁴ Si Jehova naggiya kanato diha sa dalan nga motultol sa kinabuhi pinaagi sa yutan-ong bahin sa iyang organisasyon. Kini nagtaganag mga video, publikasyon, ug tigom nga makatabang natong tanan sa pagpadapat sa tambag nga naa sa Pulong sa Diyos. Ang maong impormasyon kasaligan kay gibase nâ sa Kasulatan. Dihang ang Nagamandong Lawas modesisyon bahin sa kinamaayohang paagi sa pagsangyaw, sila mosalig sa balaang espiritu. Bisan pa niana, regular nga ginasusi sa Nagamandong Lawas ang ilang mga desisyon maylabot sa paagi nga ginahimo ang buluhaton. Ngano? Tungod kay “ang talan-awon niining kalibotana nagakausab,” ug ang organisasyon sa Diyos kinahanglang mo-adjust sa bag-ong mga kahimtang.​—1 Cor. 7:31.

15. Sa unsa tingali malisdan ang pipila ka igsoon?

¹⁵ Segurado nga mosunod dayon ta sa binase sa Bibliya nga direksiyon nga atong madawat bahin sa mga doktrina o moral nga mga sukdanan. Pero unsay atong buhaton kon ang organisasyon sa Diyos mohimog mga kausaban nga makaapektar sa ubang bahin sa atong kinabuhi? Pananglitan, sa di pa dugayng katuigan, dako na kaayo ang galastohan sa pagtukod ug pagmentinar sa atong mga dapit sa pagsimba. Busa ang Nagamandong Lawas naghatag ug direksiyon nga gamiton pag-ayo ang mga Kingdom Hall. Tungod niini, ang mga kongregasyon gitapo ug ang pipila ka Kingdom Hall gibaligya. Ang pondo gigamit sa pagtukod ug Kingdom Hall sa mga dapit nga nagkinahanglan kaayo niana. Kon sa inyong lugar, gipamaligya na ang Kingdom Hall ug gitapo ang mga kongregasyon, basin malisdan ka sa pag-adjust sa bag-ong kahimtang. Ang pipila ka igsoon kinahanglan nang mobiyaheg  layo aron makatambong sa tigom. Ang uban nga naghago sa pagtukod ug pagmentinar sa usa ka Kingdom Hall maghunahuna tingali kon nganong ibaligya na kana. Mobati tingali sila nga nasayang ang ilang panahon ug paningkamot. Bisan pa niana, misunod sila niining bag-ong kahikayan ug angay silang komendahan.

16. Sa unsang paagi ang pagpadapat sa tambag sa Colosas 3:23, 24 makatabang nato nga padayong magmalipayon?

¹⁶ Padayon tang magmalipayon kon atong hinumdoman nga ang tanan natong ginahimo alang kang Jehova, ug siya maoy naggiya sa iyang organisasyon. (Basaha ang Colosas 3:23, 24.) Si Haring David nagpakitag maayong ehemplo dihang miamot siya para sa pagtukod sa templo. Siya miingon: “Kinsa ba ko ug kinsa ang akong katawhan nga kami makahatag ug kinabubut-ong mga halad sama niini? Kay ang tanang butang gikan kanimo, ug ang among gihatag gikan mismo sa imong kamot.” (1 Cron. 29:14) Dihang moamot ta, gihatag sab nato kang Jehova kon unsay gihatag niya kanato. Bisan pa niana, pabilhan ni Jehova ang panahon, kusog, ug kuwarta nga atong iamot sa pagsuportar sa iyang buluhaton.​—2 Cor. 9:7.

17. Nganong dili ka angayng maluya kon makita nimo nga kinahanglan kang mohimog mga kausaban?

¹⁷ Aron makapabilin sa gamayng dalan nga motultol sa kinabuhi, kitang tanan kinahanglang mosunod pag-ayo sa mga tunob ni Jesus. (1 Ped. 2:21) Kon makita nimo nga kinahanglan kang mohimog mga kausaban, ayawg kaluya. Sa tinuod lang, maayo nâ nga timailhan kay nagpakita kana nga gusto kang mosunod sa direksiyon ni Jehova. Hinumdomi nga si Jehova nahibalo nga kita dili hingpit, busa dili siya magdahom nga hingpit natong masundog si Jesus.

18. Unsay atong himoon aron makab-ot ang atong tumong?

¹⁸ Hinaot nga kitang tanan magpokus sa umaabot ug andam nga mohimog kausaban sa atong panghunahuna, pagbati, ug binuhatan. (Prov. 4:25; Luc. 9:62) Magpabilin tang mapainubsanon, nga ‘magpadayon sa pagsadya, sa paghimog gikinahanglang mga kausaban.’ (2 Cor. 13:11) Kon himoon nato kana, “ang Diyos sa gugma ug sa kalinaw mag-uban [kanato].” Ug gawas nga makaabot ta sa atong destinasyon nga bag-ong kalibotan, ma-enjoy pa gyod nato ang biyahe padulong didto.