1-2. (a) Nganong ang mga magtiayon nga bag-ong minyo angayng mosalig kang Jehova? (Salmo 37:3, 4) (b) Unsay atong hisgotan niining artikuloha?

HAPIT na ba kang magminyo, o bag-o ba kang minyo? Kon mao, seguradong naghinamhinam ka sa malipayong kinabuhi uban sa tawo nga gimahal nimo pag-ayo. Siyempre, ang kaminyoon dunay mga kalisdanan, ug dunay importanteng mga desisyon nga kinahanglang himoon. Ang inyong paagi sa pag-atubang sa maong mga kalisdanan ug ang mga desisyon nga inyong himoon makaapektar sa inyong kalipay ingong magtiayon sulod sa daghang katuigan. Kon mosalig mo kang Jehova, makahimo mog maalamong mga desisyon, mas molig-on ang inyong kaminyoon, ug mas magmalipayon mo. Kon dili ninyo sundon ang tambag sa Diyos, posibleng makaatubang mog mga problema nga makapalisod sa inyong kaminyoon ug makapawala sa inyong kalipay.—Basaha ang Salmo 37:3, 4.

² Bisag kining artikuloha nagpokus sa mga magtiayon nga bag-ong minyo, maghisgot ni sa mga problema nga posibleng atubangon sa tanang magtiayon. Ipasiugda niini kon unsay atong makat-onan sa ehemplo sa pipila ka matinumanong lalaki ug babaye sa Bibliya. Kini nga mga ehemplo magtudlo natog mga leksiyon nga mapadapat nato sa lainlaing bahin sa kinabuhi, apil na sa kaminyoon. Hisgotan sab nato kon unsay atong makat-onan sa eksperyensiya sa pipila ka magtiayon karon.

3-4. Unsang mga kalisdanan ang posibleng atubangon sa mga bag-ong minyo?

³ Dasigon tingali sa uban ang mga bag-ong minyo nga magkinabuhi sama sa kadaghanang tawo karon. Pananglitan, mahimong  presyuron sa mga ginikanan ug ubang paryente ang magtiayon nga manganak dayon. O ang maayog motibo nga mga higala ug mga membro sa pamilya magdasig tingali sa magtiayon nga mopalit ug bag-ong balay ug daghang nindot nga mga butang.

⁴ Kon dili mag-amping, ang magtiayon posibleng makahimog mga desisyon nga makalubong nila sa utang. Busa, silang duha kinahanglan na tingaling motrabahog daghang oras aron mabayran ang maong mga utang. Tungod niana, posibleng makuhaan ang panahon nga angay unta nilang igahin sa personal nga pagtuon sa Bibliya, pamilyahanong pagsimba, ug pagsangyaw. Basin mopalta na gani sila sa mga tigom ug mag-obertaym aron lang mokitag dugang kuwarta o aron maseguro nga dili sila matangtang sa trabaho. Ingong resulta, dili nila mapahimuslan ang nindot nga mga kahigayonan sa pagpauswag sa ilang pag-alagad kang Jehova.

5. Unsay imong nakat-onan kang Klaus ug Marisa?

⁵ Daghang pananglitan ang nagpakita nga ang pagpangagpas ug materyal nga mga butang dili makahatag ug kalipay. Konsideraha kon unsay nakat-onan sa magtiayon nga si Klaus ug Marisa niining bahina. * Sa bag-o pa silang minyo, full-time silang nagtrabaho aron mahimong komportable ang ilang kinabuhi. Pero dili gyod sila tinuod nga malipayon. Si Klaus miingon: “Wala mi problema sa pinansiyal, pero wala pod mi espirituwal nga mga tumong. Sa tinuod lang, komplikado ang among kinabuhi ug na-stress kaayo mi.” Tingali namatikdan sab ninyo nga ang pagpangagpas ug materyal nga mga butang wala makahatag ninyog katagbawan. Kon mao, ayawg kaluya. Ang pagkonsiderar sa maayong ehemplo sa uban makatabang ninyo niining bahina. Una, hisgotan nato kon unsay makat-onan sa mga bana kang Haring Jehosapat.

6. Nahiuyon sa tambag sa Proverbio 3:5, 6, unsay gihimo ni Haring Jehosapat dihang nakaatubang siyag dakong problema?

⁶ Mga bana, mobati ba mo usahay nga bug-at ra kaayo ang inyong mga responsibilidad? Kon mao, makakat-on mo kang Haring Jehosapat. Ingong hari, responsibilidad ni Jehosapat nga panalipdan ang tibuok nasod! Unsay iyang gihimo aron matuman ang maong bug-at kaayo nga responsibilidad? Gihimo niya ang iyang maarangan aron panalipdan ang katawhan. Giparilan niya ang mga siyudad sa Juda ug nagtigom siyag kapin sa 1,160,000 ka sundalo. (2 Cron. 17:12-19) Sa ulahi, si Jehosapat nakaatubang ug dakong problema. Gisulong sila sa dakong kasundalohan nga gikan sa Ammon, Moab, ug sa kabukiran sa Seir. Busa nameligro siya, ang iyang pamilya, ug ang iyang katawhan. (2 Cron. 20:1, 2) Unsay gihimo ni Jehosapat? Nangayo siyag tabang ug kusog kang Jehova. Nahiuyon ni sa maalamong tambag sa Proverbio 3:5, 6. (Basaha.) Ang mapainubsanong pag-ampo ni Jehosapat, nga narekord  sa 2 Cronicas 20:5-12, nagpakita kon unsa ka dako ang iyang pagsalig sa iyang mahigugmaon nga langitnong Amahan. Giunsa pagtubag ni Jehova ang pag-ampo ni Jehosapat?

7. Giunsa pagtubag ni Jehova ang pag-ampo ni Jehosapat?

⁷ Si Jehova nakig-estorya kang Jehosapat pinaagi sa Levihanon nga si Jahaziel. Si Jehova miingon: “Pahimutang mo, pabiling nagbarog, ug tan-awa ang kaluwasan nga ihatag ni Jehova kaninyo.” (2 Cron. 20:13-17) Dili gyod nâ ang kasagarang paagi sa pagpakiggubat! Pero kadto nga instruksiyon dili gikan sa tawo; gikan to kang Jehova. Uban ang bug-os nga pagsalig sa iyang Diyos, gihimo ni Jehosapat ang gisugo kaniya. Dihang siya ug ang katawhan migula aron makiggubat sa mga kaaway, iyang gibutang sa atubangan, dili ang banggiitan nga mga manggugubat, kondili ang walay armas nga mga mag-aawit. Gituman ni Jehova ang iyang saad kang Jehosapat; Iyang gipildi ang mga kaaway.—2 Cron. 20:18-23.

8. Unsay makat-onan sa mga bana sa pananglitan ni Jehosapat?

⁸ Mga bana, makakat-on mo sa pananglitan ni Jehosapat. Responsibilidad ninyo ang pag-atiman sa inyong pamilya, busa naningkamot mo nga protektahan ug suportahan sila. Dihang mag-atubang ug mga problema, bation tingali ninyo nga masulbad ra ninyo kini sa kaugalingon ninyong paningkamot. Pero, sukli ang tendensiya nga mosalig sa kaugalingon. Hinunoa, pag-ampo mo alang sa tabang ni Jehova. Dugang pa, pag-ampo nga kinasingkasing uban sa inyong asawa. Pangayog giya kang Jehova pinaagi sa pagtuon sa Bibliya ug sa mga publikasyon nga gitagana sa organisasyon sa Diyos, ug ipadapat ang tambag nga inyong makita. Ang uban dili tingali mouyon sa inyong mga desisyon nga binase sa Bibliya, ug maghunahuna pa gani sila nga binuang kana. Moingon tingali sila nga ang kuwarta ug ang mga butang nga mapalit niini maoy makahatag ug kinamaayohang proteksiyon sa inyong pamilya. Pero hinumdomi ang pananglitan ni Jehosapat. Siya misalig kang Jehova ug gipamatud-an niya kini pinaagi sa iyang mga buhat. Wala biyai ni Jehova ang maong maunongong tawo, ug dili sab mo niya biyaan. (Sal. 37:28; Heb. 13:5) Unsay mahimo sa mga magtiayon aron maseguro nga magmalipayon ang ilang kinabuhi?

9. Unsay atong ikaingon bahin kang propetang Isaias ug sa iyang asawa?

⁹ Si propetang Isaias ug ang iyang asawa nagpokus sa pag-alagad kang Jehova. Si Isaias usa ka propeta, ug posible nga ang iyang asawa nanagna pod, kay siya gitawag sab ug “propeta.” (Isa. 8:1-4) Ingong magtiayon, dayag nga ang pagsimba kang Jehova mao ang pinakaimportante sa ilang kinabuhi. Maayo gyod sila nga ehemplo para sa mga magtiayon karon!

10. Sa unsang paagi ang pagtuon sa mga tagna sa Bibliya makatabang sa mga magtiayon nga mahimong determinado sa paghimo sa ilang maarangan para kang Jehova?

¹⁰ Mauna sa mga magtiayon karon ang pagsimba kang Jehova pinaagi sa paghimo sa ilang maarangan sa pag-alagad kaniya. Mapalig-on nila ang ilang pagsalig kang Jehova kon tun-an nila nga magkauban ang mga tagna sa Bibliya ug makita nila nga natuman gyod ni. * (Tito 1:2) Puwede nilang pamalandongon kon sa unsang paagi makaamot sila sa katumanan sa pipila ka tagna sa Bibliya. Pananglitan, makaamot sila sa katumanan sa tagna ni Jesus  nga ang maayong balita isangyaw sa tibuok yuta sa dili pa moabot ang kataposan. (Mat. 24:14) Kon mas makita sa magtiayon nga nagakatuman ang tagna sa Bibliya, mas molig-on ang ilang determinasyon nga himoon ang ilang maarangan para kang Jehova.

11. Unsay nahimo ni Priscila ug Aquila, ug ngano?

¹¹ Ang mga batabata pang magtiayon makakat-on kang Priscila ug Aquila, usa ka Hudiyong magtiayon nga nagpuyo sa siyudad sa Roma. Nadunggan nila ang maayong balita bahin kang Jesus ug nahimo silang mga Kristohanon. Walay duhaduha, kontento na sila sa ilang kahimtang. Pero kalit nga nausab ang ilang kinabuhi dihang gimando ni Emperador Claudio nga ang tanang Hudiyo mobiya sa Roma. Hunahunaa kon unsay epekto niana kang Aquila ug Priscila. Kinahanglan silang mobiya sa ilang naandang lugar, mangitag laing puy-anan, ug magsugod na pod sa ilang negosyo nga paghimog mga tolda diha sa bag-ong lokasyon. Mohunong na ba sila sa pag-una sa Gingharian tungod niana nga mga kausaban? Kabalo na tingali mo sa tubag. Sa ilang bag-ong puy-anan sa Corinto, si Aquila ug Priscila nakig-uban sa kongregasyon didto ug mitabang kang apostol Pablo sa pagpalig-on sa mga igsoon. Sa ulahi, namalhin sila sa laing mga lugar nga nanginahanglag dugang magsasangyaw. (Buh. 18:18-21; Roma 16:3-5) Nagkugi gyod sila sa buluhaton sa Gingharian, ug seguradong nakapalipay to nila!

12. Nganong ang mga magtiayon angayng magtakdag espirituwal nga mga tumong?

¹² Masundog sa mga magtiayon karon si Priscila ug Aquila pinaagi sa pag-una sa Gingharian. Mas maayo nga sa trato pa lang sila, mahisgotan na nila ang ilang mga tumong sa kinabuhi. Kon hisgotan nila ang ilang mga tumong sa pag-alagad ug maningkamot nga makab-ot kana, mas dako silag kahigayonan nga makita ang tabang ni Jehova sa ilang kinabuhi. (Eccl. 4:9, 12) Konsideraha ang eksperyensiya ni Russell ug Elizabeth. Si Russell miingon, “Sa trato pa lang mi, gihisgotan na namo ang among espirituwal nga mga tumong.” Si Elizabeth miingon, “Gihimo to namo aron nga  sa ulahi dihang kinahanglan ming mohimog mga desisyon, maseguro namo nga ang among mga desisyon dili makapugong namo sa pagkab-ot sa maong mga tumong.” Si Russell ug Elizabeth nakahimo sa pagbalhin sa Micronesia aron mag-alagad diin mas dako ang panginahanglan alang sa mga magsasangyaw.

13. Sumala sa Salmo 28:7, unsay resulta kon mosalig ta kang Jehova?

¹³ Sama kang Russell ug Elizabeth, daghang magtiayon ang midesisyon nga pasimplehon ang ilang kinabuhi aron makagahin ug dakong panahon sa buluhatong pagsangyaw ug pagpanudlo. Kon ang magtiayon magtakdag mga tumong sa pag-alagad kang Jehova ug magtinabangay sa pagkab-ot niana, daghan gyod nig maayong resulta. Makita nila kon sa unsang paagi si Jehova nag-atiman kanila, modako ang ilang pagsalig kaniya, ug mobati silag tinuod nga kalipay.—Basaha ang Salmo 28:7.

14. Sa unsang paagi gipakita ni apostol Pedro ug sa iyang asawa nga nagsalig sila sa saad nga narekord sa Mateo 6:25, 31-34?

¹⁴ Ang mga magtiayon makakat-on sab sa ehemplo ni apostol Pedro ug sa iyang asawa. Mga unom ka bulan ngadto sa usa ka tuig human niya makaila si Jesus, si apostol Pedro kinahanglang mohimog importanteng desisyon. Si Pedro nagtrabaho ingong mangingisda aron tagan-an ang panginahanglan sa iyang panimalay. Busa dihang gidapit siya ni Jesus nga mahimong iyang sumusunod, kinahanglang konsiderahon ni Pedro ang iyang asawa. (Luc. 5:1-11) Midesisyon si Pedro nga mouban kang Jesus sa iyang buluhatong pagsangyaw. Maalamon gyod to nga desisyon! Ug duna tay maayong rason nga mohinapos nga ang asawa ni Pedro misuportar sa iyang desisyon. Gipakita sa Bibliya nga human mabanhaw si Jesus, ang asawa ni Pedro mikuyog niya sa pipila ka panahon. (1 Cor. 9:5) Segurado nga ang iyang ehemplo ingong Kristohanong asawa nakahatag kang Pedro ug kagawasan sa pagsulat ug tambag alang sa Kristohanong mga bana ug asawa. (1 Ped. 3:1-7) Dayag nga si Pedro ug ang iyang asawa misalig sa saad ni Jehova nga Siya magtagana sa ilang panginahanglan kon unahon nila ang Gingharian.—Basaha ang Mateo 6:25, 31-34.

15. Unsay imong nakat-onan sa eksperyensiya ni Tiago ug Esther?

¹⁵ Kon taudtaod na mong minyo, sa unsang paagi padayon ninyong maugmad ang tinguha nga magpalapad sa inyong ministeryo? Ang usa ka paagi mao ang pagkat-on gikan sa eksperyensiya sa ubang magtiayon. Pananglitan, puwede ninyong basahon ang seryeng “Sila Kinabubut-ong Nagtanyag sa Ilang Kaugalingon.” Ang maong mga artikulo nakatabang kang Tiago ug Esther, magtiayong taga-Brazil, nga maugmad ang tinguha nga mag-alagad diin mas dako ang panginahanglan. Si Tiago miingon: “Samtang magbasa mig mga eksperyensiya kon sa unsang paagi gitabangan ni Jehova ang iyang mga alagad karon, gusto pod namong maeksperyensiyahan ang iyang giya ug tabang.” Sa ngadtongadto mibalhin sila sa Paraguay ug, sukad niadtong 2014, nagsangyaw sila sa mga tawo didto nga nagsultig Portuguese. Si Esther miingon: “Paborito namong teksto ang Efeso 3:20. Kadaghan namo nakita nga tinuod gyod ni sa among pag-alagad kang Jehova.” Niana nga sulat ngadto sa mga taga-Efeso, si Pablo nagsaad nga ihatag gyod ni Jehova ang labaw pa sa atong gipangayo. Tinuod gyod nâ nga saad!

16. Kang kinsa makapangayog tambag ang batabatang mga magtiayon dihang susihon nila ang ilang mga tumong?

¹⁶ Ang batabatang mga magtiayon karon makabenepisyo sa eksperyensiya niadtong nakakat-on  sa pagsalig kang Jehova. Ang pipila ka magtiayon tingali daghang tuig nang nag-alagad sa bug-os panahon. Puwede mong mangayog tambag nila kon gibati ninyo nga kinahanglan ninyong susihon ang inyong mga tumong. Kini maoy laing paagi sa pagpakita nga nagsalig mo kang Jehova. (Prov. 22:17, 19) Ang mga ansiyano sab makatabang sa batabata pang mga magtiayon sa pagtakda ug pagkab-ot ug espirituwal nga mga tumong.

17. Unsay nahitabo kang Klaus ug Marisa, ug unsay atong makat-onan sa ilang eksperyensiya?

¹⁷ Pero usahay, ang resulta sa atong desisyon sa pagpauswag sa atong pag-alagad lahi tingali sa atong gidahom. Mao nay nahitabo kang Klaus ug Marisa, nga gihisgotan sa sinugdan. Paglabayg tulo ka tuig human sila maminyo, mibiya sila sa ilang lugar ug miboluntaryo sa buluhaton sa konstruksiyon didto sa sangang buhatan sa Finland. Pero ilang nahibaloan nga dili sila puwedeng mopuyo didto ug kapig unom ka bulan. Sa sinugdan, nadismayar sila. Pero wala madugay, gidapit sila nga magtuon ug Arabic nga pinulongan, ug karon malipayon silang nag-alagad sa laing nasod diha sa teritoryo nga nagsultig Arabic. Dihang mahinumdom si Marisa sa ilang mga naeksperyensiyahan, siya moingon: “Hadlok kaayong mohimog mga butang nga wala pa nimo mahimo sukad ug bug-os nga mosalig kang Jehova. Pero nakita nako nga kanunay ming gitabangan ni Jehova sa mga paagi nga wala namo damha. Human nako ni maeksperyensiyahi, mas milig-on ang akong pagsalig kang Jehova.” Ingon sa gipakita niini nga pananglitan, makaseguro mo nga si Jehova kanunayng magpanalangin kaninyo kon bug-os mong mosalig kaniya.

18. Unsay mahimo sa mga magtiayon aron padayon nilang mapakita ang ilang pagsalig kang Jehova?

¹⁸ Ang kaminyoon regalo gikan kang Jehova. (Mat. 19:5, 6) Gusto niya nga ang mga magtiayon malipay niana nga regalo. (Prov. 5:18) Mga batabatang magtiayon, susiha kon unsay inyong ginahimo sa inyong kinabuhi. Gihimo ba ninyo ang inyong maarangan aron ipakita kang Jehova nga giapresyar gyod ninyo ang regalo nga iyang gihatag kaninyo? Pakig-estorya mo kang Jehova diha sa pag-ampo. Pangitag mga prinsipyo diha sa iyang Pulong nga mapadapat sa inyong kahimtang. Dayon sunda ninyo ang tambag nga gihatag ni Jehova. Makaseguro mo nga makabaton mog malipayon ug makapatagbawng kinabuhi kon himoon ninyong prayoridad sa inyong kaminyoon ang pag-alagad kang Jehova!