1. Unsay puwede natong ipangutana sa kaugalingon?

MABALAKA ka ba usahay dihang maghunahuna bahin sa mga butang nga hapit nang mahitabo—ang kalaglagan sa bakak nga relihiyon, pag-atake ni Gog sa Magog, ug ang gubat sa Armagedon? Nakapangutana ka na ba sa imong kaugalingon, ‘Dihang moabot na kining makahahadlok nga panahon, makapabilin kaha kong matinumanon?’ Kon misantop nâ sa imong hunahuna, kini nga paghisgot bahin sa giingon ni Jesus, nga narekord sa atong temang teksto, makatabang gyod nimo. Giingnan ni Jesus ang iyang mga tinun-an: “Ayaw mog kabalaka. Pagpakita mog pagtuo.” (Juan 14:1) Ang lig-ong pagtuo makatabang nato sa pagpabiling kalmado bisag unsa pay mahitabo sa umaabot.

2. Sa unsang paagi mapalig-on nato ang atong pagtuo, ug unsay atong hisgotan niining artikuloha?

² Kon hunahunaon nato ang atong ginahimo karon dihang makaatubang tag mga pagsulay, mapalig-on nato ang atong pagtuo aron makalahutay ta sa umaabot nga mga pagsulay. Dihang hunahunaon nato ang atong reaksiyon sa mga pagsulay nga atong giatubang karon, mahibaloan nato kon unsang mga bahina sa atong pagtuo ang kinahanglan natong palig-onon. Matag higayon nga malahutay nato ang usa ka pagsulay, mas molig-on ang atong pagtuo. Makatabang ni nato nga malahutay ang umaabot nga mga pagsulay. Niining artikuloha, hisgotan nato ang upat ka situwasyon nga giatubang sa mga tinun-an ni Jesus nga nagpakita nga kinahanglan nilang palig-onon ang ilang pagtuo. Dayon atong hisgotan kon sa unsang paagi malahutay nato ang susamang mga problema karon ug kon sa unsang paagi kini mag-andam nato sa mga panghitabo sa umaabot.

3. Unsay atong makat-onan sa gipatin-aw ni Jesus sa Mateo 6:30, 33?

³ Natural lang nga gusto sa usa ka ulo sa pamilya nga matagan-ag pagkaon, sinina, ug puy-anan ang iyang asawa ug mga anak.  Dili ni kanunayng sayon niining lisod nga panahon. Sa pipila ka kahimtang, ang atong mga igsoon nawad-ag trabaho ug, bisan pa sa ilang mga paningkamot, wala sila makakitag trabaho. Ang uban wala modawat ug trabaho nga dili haom para sa mga Kristohanon. Niana nga mga kahimtang, gikinahanglan nato ang lig-ong pagtuo nga dunay himoon si Jehova aron matagan-an ang panginahanglan sa atong pamilya. Gipatin-aw kini ni Jesus sa iyang mga tinun-an diha sa iyang Wali sa Bukid. (Basaha ang Mateo 6:30, 33.) Kon kombinsido gyod ta nga dili ta pasagdan ni Jehova, makapokus ta sa kon unsay pinakaimportante—ang mga buluhaton sa Gingharian. Dihang makita nato kon sa unsang paagi si Jehova nagtabang nato sa atong materyal nga panginahanglan, mahimo siyang mas tinuod kanato ug mas molig-on ang atong pagtuo.

4-5. Unsay nakatabang sa usa ka pamilya sa pag-atubang sa ilang mga kabalaka bahin sa materyal nga panginahanglan?

⁴ Konsideraha kon sa unsang paagi naeksperyensiyahan sa usa ka pamilya sa Venezuela ang tabang ni Jehova dihang nag-atubang silag mga kabalaka bahin sa ilang materyal nga panginahanglan. Kaniadto, ang kita sa pamilyang Castro gikan sa ilang uma igong makasapar sa ilang panginahanglan. Pero giilog sa usa ka armadong grupo ang ilang uma ug gipapahawa sila. Ang amahan nga si Miguel miingon: “Karon, nagdepende na lang mi sa abot sa gamayng lunà nga gipatikad kanamo. Sugdan nako ang matag adlaw pinaagi sa paghangyo kang Jehova nga itagana ang among panginahanglan nianang adlawa.” Lisod ang kinabuhi niining pamilyaha, pero uban ang bug-os nga pagtuo nga ang atong mahigugmaong Amahan makatagana sa ilang panginahanglan kada adlaw, ang pamilyang Castro regular nga nagatambong sa mga tigom ug nakigbahin sa ministeryo. Giuna nila ang Gingharian, ug si Jehova nagtagana sa ilang panginahanglan.

⁵ Bisan pa sa ilang lisod nga kahimtang, si Miguel ug ang iyang asawa nga si Yurai nagpokus kon giunsa sila pag-atiman ni Jehova. Usahay, gamiton ni Jehova ang mga igsoon sa pagtagana sa pipila nila ka materyal nga panginahanglan o sa pagtabang kang Miguel nga makakitag trabaho. May mga higayon sab nga gitagana ni Jehova ang ilang panginahanglan pinaagi sa hinabang gikan sa sangang buhatan. Wala gyod sila pasagdi ni Jehova. Tungod niana, mas milig-on ang ilang pagtuo. Human maghisgot ug espesipikong pananglitan kon giunsa sila pag-atiman ni Jehova, ang kamagulangang anak nga babaye nga si Yoselin miingon: “Makapatandog kaayong makita kon giunsa mi pagtabang ni Jehova. Giisip nako siya ingong higala nga kanunay nakong masaligan.” Siya midugang: “Ang mga problema nga naagian sa among pamilya nag-andam kanamo sa mas lisod nga mga problema sa umaabot.”

6. Unsaon nimo pagpalig-on ang imong pagtuo dihang maglisod ka sa pinansiyal?

⁶ Naglisod ka ba sa pinansiyal? Kon mao, dili gyod nâ lalim. Pero bisag lisod ang imong kahimtang, magamit nimo kining panahona sa pagpalig-on sa imong pagtuo. Pag-ampo kang  Jehova ug basaha ang giingon ni Jesus sa Mateo 6:25-34 ug palandonga kana. Hunahunaa ang mga pananglitan sa atong panahon nga nagpamatuod nga si Jehova nagtagana sa panginahanglan niadtong nagkugi sa pag-alagad kaniya. (1 Cor. 15:58) Ang paghimo niana magpalig-on sa imong pagsalig nga sama nga ang imong langitnong Amahan nagtabang sa uban nga parehas nimog kahimtang, tabangan sab ka niya. Nahibalo siya kon unsay imong gikinahanglan, ug nahibalo siya kon unsaon kana pagtagana. Dihang maeksperyensiyahan nimo ang tabang ni Jehova, mas molig-on ang imong pagtuo ug makalahutay ka sa mas lisod nga mga pagsulay sa umaabot.—Hab. 3:17, 18.

7. Sumala sa Mateo 8:23-26, sa unsang paagi ang “kusog nga unos” nagsulay sa pagtuo sa mga tinun-an?

⁷ Dihang si Jesus ug ang iyang mga tinun-an naabtan ug kusog nga unos diha sa dagat, gigamit ni Jesus ang maong hitabo sa pagtabang kanila nga makita kon unsang bahina sa ilang pagtuo ang kinahanglang palig-onon. (Basaha ang Mateo 8:23-26.) Samtang mihuros ang unos ug nasudlag tubig ang sakayan, si Jesus nahinanok. Dihang ang iyang nangahadlok pag-ayo nga mga tinun-an nagpukaw niya ug naghangyo nga luwason sila, ang Ginoo nangutana kanila: “Nganong nangalisang man mo, kamong diyutay ug pagtuo?” Angay unta nilang mahunahunaan nga si Jehova makahimo gyod sa pagpanalipod kang Jesus ug sa iyang mga kauban. Unsay atong makat-onan niini? Ang lig-ong pagtuo makatabang nato sa paglahutay sa bisan unsang “kusog nga unos,” literal man o simbolikal.

8-9. Sa unsang paagi nasulayan ang pagtuo ni Anel, ug unsay nakatabang niya?

⁸ Konsideraha kon sa unsang paagi milig-on ang pagtuo ni Anel, usa ka tagsaanong sister sa Puerto Rico, human siya makalahutay sa usa ka lisod nga pagsulay. Siya nakasinatig literal nga “kusog nga unos.” Nahitabo ni niadtong 2017 dihang giguba sa bagyong Maria ang balay ni Anel. Tungod sa bagyo, nawad-an siyag trabaho. “Niadtong lisod nga mga panahon, nabalaka ko,” miingon si Anel, “pero nakakat-on ko sa pagsalig kang Jehova pinaagi sa pag-ampo, ug wala nako tugoti nga madaog ko sa kabalaka.”

⁹ Duna pay gihisgotan si Anel nga nakatabang niya nga madaog ang maong kalisdanan—ang pagkamasinugtanon. Siya miingon: “Ang pagsunod sa direksiyon sa organisasyon nakatabang nako nga magpabiling kalmado. Gitabangan ko ni Jehova pinaagi sa espirituwal nga pagdasig ug materyal nga tabang gikan sa mga igsoon.” Siya midugang: “Gihatag ni Jehova ang labaw pa sa akong gipangayo, ug napalig-on gyod ang akong pagtuo.”

10. Unsay imong buhaton kon makaatubang kag “kusog nga unos”?

¹⁰ Nag-atubang ba kag “kusog nga unos”? Tingali nag-antos ka tungod sa natural nga kalamidad. O basin nag-antos ka tungod sa simbolikal nga unos, sama sa grabeng sakit nga nakapaguol pag-ayo nimo ug wala ka mahibalo kon unsay buhaton. Usahay, mabalaka tingali ka, pero  ayawg tugoti nga ang imong kabalaka makapugong nimo sa pagsalig kang Jehova. Pakigsuod kaniya pinaagi sa kinasingkasing nga pag-ampo. Palig-ona ang imong pagtuo pinaagi sa pagpamalandong sa mga higayon nga gitabangan ka ni Jehova. (Sal. 77:11, 12) Makaseguro ka nga dili gyod ka niya pasagdan—karon o sa umaabot.

11. Nganong angay tang magmadeterminado nga mosunod niadtong mga nagapanguna?

¹¹ Unsa pay makatabang nimo sa paglahutay sa mga kalisdanan? Sumala ni Anel, ang pagkamasinugtanon. Pagkat-on nga mosalig niadtong gisaligan ni Jehova ug ni Jesus. Usahay, kadtong gitudlo nga manguna mohatag tingalig mga direksiyon nga para nato dili praktikal. Pero panalanginan ni Jehova ang atong pagkamasinugtanon. Nahibalo ta gikan sa iyang Pulong ug sa eksperyensiya sa matinumanong mga alagad nga ang pagkamasinugtanon makaluwas ug kinabuhi. (Ex. 14:1-4; 2 Cron. 20:17) Palandonga ang maong mga pananglitan. Ang paghimo niana magpalig-on sa imong determinasyon nga mosunod sa mga kahikayan sa organisasyon karon ug sa umaabot. (Heb. 13:17) Kon imo nang himoon, dili ka mahadlok sa mas kusog nga unos nga hapit nang moabot.—Prov. 3:25.

12. Sa unsang paagi gipakita sa Lucas 18:1-8 ang koneksiyon sa pagtuo ug paglahutay sa inhustisya?

¹² Si Jesus nahibalo nga ang inhustisya magsulay sa pagtuo sa iyang mga tinun-an. Aron tabangan sila sa pag-atubang niana, naghatag siyag ilustrasyon nga narekord sa basahon sa Lucas. Si Jesus nag-estorya bahin sa usa ka babayeng balo nga nagsigeg hangyo sa usa ka dili matarong nga maghuhukom nga hatagan siyag hustisya. Masaligon siya nga magbunga ra ang iyang pagsigeg hangyo. Ngadtongadto, gihatagan ra gyod siya sa maghuhukom ug hustisya. Unsay atong makat-onan? Si Jehova maoy Diyos sa hustisya. Busa si Jesus miingon: “Labaw nang hatagan sa Diyos ug hustisya ang iyang mga pinili nga nagatuaw kaniya adlaw ug gabii.” (Basaha ang Lucas 18:1-8.) Dayon, siya midugang: “Inig-abot sa Anak sa tawo, makaplagan ba gayod niya kini nga pagtuo sa yuta?” Dihang mag-antos tag inhustisya, kinahanglan natong pamatud-an pinaagi sa atong pagpailob ug paglahutay nga lig-on ang atong pagtuo sama nianang sa babayeng balo. Kon duna ta niana nga pagtuo, makasalig ta nga sa madugay o sa madali, tabangan ta ni Jehova. Kinahanglan sab tang mosalig sa gahom sa pag-ampo. Usahay, tubagon niya ang atong mga pag-ampo sa mga paagi nga wala nato damha.

13. Sa unsang paagi ang pag-ampo nakatabang sa usa ka pamilya nga nakasinatig inhustisya?

¹³ Tagda ang eksperyensiya sa sister nga si Vero, kinsa nagpuyo sa Democratic Republic of the Congo. Si Vero, ang iyang dili Saksing bana, ug ang ilang 15 anyos nga anak nga babaye kinahanglang mobiya sa ilang baryo dihang giatake ni sa usa ka grupo sa mga sundalo. Dayon, ang pamilya nakaabot sa usa ka tsekpoint diin gibabagan sila sa mga sundalo ug gihulga nga patyon. Dihang misugod paghilak si Vero, gisulayan siya pagpakalma sa iyang anak pinaagi sa pag-ampog kusog ug balikbalik nga paggamit sa  ngalan ni Jehova diha sa iyang pag-ampo. Pagkahuman niyag ampo, ang komander sa mga sundalo nangutana, “Day, kinsa may nagtudlo nimog ampo?” Siya mitubag, “Si Mama, gamit ang sumbanan diha sa Mateo 6:9-13.” Ang komander miingon, “Lakaw nga malinawon uban sa imong ginikanan, ug hinaot nga si Jehova nga inyong Diyos manalipod kaninyo!”

14. Unsay puwedeng magsulay sa atong pagtuo, ug unsay makatabang nato sa paglahutay?

¹⁴ Ang maong mga eksperyensiya nagtudlo nato nga dili gyod pakamenoson ang gahom sa pag-ampo. Pero komosta kon ang imong mga pag-ampo wala dayon matubag o kaha wala tubaga sa talagsaong paagi? Sama sa babayeng balo sa ilustrasyon ni Jesus, padayon sa pag-ampo, nga masaligon nga dili ka pasagdan sa atong Diyos ug sa ngadtongadto, tubagon ra niya ang imong pag-ampo. Padayong pangayoa kang Jehova ang iyang balaang espiritu. (Filip. 4:13) Hinumdomi nga sa dili madugay, dagaya kang panalanginan ni Jehova ug imong malimtan ang bisan unsang pag-antos nga imong nasinati. Kon matinumanon kang molahutay sa mga pagsulay uban sa tabang ni Jehova, mapalig-on ka sa pag-atubang sa umaabot nga mga pagsulay.—1 Ped. 1:6, 7.

15. Sumala sa Mateo 17:19, 20, unsang problema ang giatubang sa mga tinun-an ni Jesus?

¹⁵ Gitudloan ni Jesus ang iyang mga tinun-an nga ang pagtuo makatabang nila sa paglahutay sa mga problema. (Basaha ang Mateo 17:19, 20.) Dihay higayon nga wala nila mapalayas ang usa ka demonyo bisag nahimo na nila kana sa laing mga higayon. Unsay problema? Si Jesus miingon nga nagkinahanglan silag dugang pagtuo. Giingnan niya sila nga kon duna silay igong pagtuo, mapabalhin nila ang samag bukid nga mga problema! Karon, kita sab makaatubang tingalig mga problema nga morag di gyod nato malahutay.

16. Sa unsang paagi ang pagtuo nakatabang kang Geydi sa paglahutay bisan pa sa usa ka trahedya ug sa grabeng kaguol?

¹⁶ Hunahunaa ang ehemplo ni Geydi, sister nga taga-Guatemala. Ang iyang bana nga si Edi gipatay dihang namauli sila gikan sa tigom. Sa unsang paagi ang pagtuo ni Geydi nakatabang niya sa paglahutay bisan pa sa grabeng kaguol? Siya miingon: “Ang pag-ampo nakatabang nako sa pagtugyan sa akong palas-anon kang Jehova, nga nakahatag nakog kalinaw sa hunahuna. Nakita nako nga giatiman ko ni Jehova pinaagi sa akong pamilya ug sa mga igsoon sa kongregasyon. Ang pagpabiling aktibo diha sa pag-alagad kang Jehova nakapamenos sa kasakit nga akong gibati ug nakatabang nako nga molahutay kada adlaw nga dili kaayo mabalaka sa ugma. Akong nakat-onan niini nga kasinatian nga bisag unsang pagsulay ang mahitabo sa umaabot, makalahutay ko sa tabang ni Jehova, ni Jesus, ug sa organisasyon.”

17. Unsay atong mahimo dihang mag-atubang tag samag bukid nga problema?

¹⁷ Naguol ka ba tungod sa kamatayon sa usa ka minahal? Paggahin ug panahon sa pagpalig-on sa imong pagtuo sa pagkabanhaw pinaagi  sa pagbasa sa mga asoy sa Bibliya bahin niadtong gibanhaw. Naguol ka ba kay na-disfellow ang usa ka membro sa imong pamilya? Pagtuon aron makombinsir ka nga ang paagi sa Diyos sa pagpahamtang ug disiplina mao gyod ang kinamaayohan. Bisag unsang problema ang imong giatubang, gamita kana ingong kahigayonan sa pagpalig-on sa imong pagtuo. Isulti kang Jehova kon unsa gyoy imong gibati. Ayawg ilain ang imong kaugalingon. Hinunoa, magpabiling suod sa mga igsoon. (Prov. 18:1) Pakigbahin sa mga kalihokan nga makatabang nimo sa paglahutay, bisan pag himoon nimo kana uban ang mga luha. (Sal. 126:5, 6) Padayon sa pagtambong sa mga tigom, pagsangyaw, ug pagbasa sa Bibliya. Ug kanunayng hunahunaa ang nindot nga mga panalangin nga gisaad ni Jehova. Sa dihang makita nimo kon giunsa ka pagtabang ni Jehova, mas molig-on pa ang imong pagtuo kaniya.

18. Kon mamatikdan nimo nga dunay bahin sa imong pagtuo nga kinahanglan pang palig-onon, unsay imong himoon?

¹⁸ Kon ang mga kalisdanan nga imong giatubang kaniadto ug karon nagpakita nga dunay bahin sa imong pagtuo nga kinahanglan pang palig-onon, ayawg kaluya. Isipa kini ingong kahigayonan sa pagpalig-on sa imong pagtuo. Sundoga ang mga apostoles ni Jesus, kinsa mihangyo: “Hatagi mig dugang pagtuo.” (Luc. 17:5) Hunahunaa sab ang mga ehemplo nga atong nahisgotan niining artikuloha. Sama kang Miguel ug Yurai, hinumdomi ang tanang higayon nga gitabangan ka ni Jehova. Sama sa anak nga babaye ni Vero ug kang Anel, pag-ampo nga kinasingkasing kang Jehova, ilabina dihang mag-atubang ug bug-at nga problema. Ug sama kang Geydi, ilha nga si Jehova mahimong motaganag tabang pinaagi sa atong pamilya o sa mga igsoon. Kon tugotan nimo si Jehova sa pagtabang nimo nga makalahutay sa imong mga kalisdanan karon, mahimo kang mas masaligon nga tabangan ka niya sa paglahutay sa bisan unsang kalisdanan sa umaabot.

19. Sa unsa masaligon si Jesus, ug sa unsa ka makaseguro?

¹⁹ Gitabangan ni Jesus ang iyang mga tinun-an nga makita kon unsang bahina sa ilang pagtuo ang kinahanglan nilang palig-onon. Pero wala gyod siya magduhaduha nga sa tabang ni Jehova, malahutay nila ang umaabot nga mga pagsulay. (Juan 14:1; 16:33) Masaligon siya nga dunay dakong panon nga makalabang sa dakong kasakitan tungod sa lig-ong pagtuo. (Pin. 7:9, 14) Apil ba unya ka sa makalabang? Sa tabang ni Jehova, mahimong apil ka sa makalabang kon pahimuslan nimo ang tanang kahigayonan karon sa pag-ugmad ug pagpalig-on sa imong pagtuo!—Heb. 10:39.