1. Nganong nahibalo ta nga gusto ni Jehova nga makigsuod nato?

 GIDAPIT ta ni Jehova nga makigsuod kaniya. (Sant. 4:8) Gusto niya nga mahimo nato siyang atong Diyos, Amahan, ug Higala. Iyang ginatubag ang atong mga pag-ampo ug ginatabangan ta panahon sa kalisdanan. Ug iyang gigamit ang iyang organisasyon aron tudloan ug panalipdan ta. Pero unsay angay natong himoon aron masuod ta kang Jehova?

2. Sa unsang paagi masuod ta kang Jehova?

² Masuod ta kang Jehova pinaagi sa pag-ampo ug sa pagbasa ug pagpamalandong sa iyang Pulong. Kon himoon nato nâ, molalom ang atong gugma ug apresasyon kaniya. Madasig ta nga magmasinugtanon kang Jehova ug ihatag ang pagdayeg nga angay gyod kaniya. (Pin. 4:11) Kon mas mailhan nato si Jehova, mas mosalig ta niya ug sa organisasyon nga iyang gigamit sa pagtabang nato.

3. Unsay gipaningkamotan sa Yawa aron mabulag ta kang Jehova, pero unsay makatabang aron dili gyod ta mobiya sa atong Diyos ug sa iyang organisasyon? (Salmo 31:13, 14)

³ Pero naningkamot ang Yawa nga mabulag ta kang Jehova ilabina dihang duna tay mga problema. Giunsa nâ niya paghimo? Naningkamot siya nga anam-anam nga mawala ang atong pagsalig kang Jehova ug sa iyang organisasyon. Pero masuklan nato ang iyang mga paagi. Kon lig-on ang atong pagtuo ug pagsalig kang Jehova, dili nato biyaan ang atong Diyos ug ang iyang organisasyon.—Basaha ang Salmo 31:13, 14.

4. Unsay atong hisgotan niini nga artikulo?

 ⁴ Niining artikuloha, hisgotan nato ang tulo ka pagsulay nga naggikan sa gawas sa kongregasyon. Ang kada usa niini posibleng makapawala sa atong pagsalig kang Jehova ug sa iyang organisasyon. Sa unsang paagi makapabulag ni nato kang Jehova? Ug unsay atong mahimo aron masuklan ang mga paningkamot ni Satanas?

5. Nganong ang mga kalisdanan makapawala sa atong pagsalig kang Jehova ug sa iyang organisasyon?

⁵ Usahay makaatubang tag mga kalisdanan, sama nianang supakon ta sa atong pamilya o mawad-an tag trabaho. Nganong makapawala ni sa atong pagsalig sa organisasyon ni Jehova ug makapabulag nato kaniya? Kon dugay na tang nag-atubang ug kalisdanan, tingali maluya ta ug mawad-ag paglaom. Pahimuslan ni Satanas ang maong mga kahimtang aron magduhaduha ta kon gimahal ba ta ni Jehova. Gusto sa Yawa nga maghunahuna ta nga si Jehova o ang Iyang organisasyon maoy hinungdan sa atong pag-antos. Ingon ana ang nahitabo sa ubang Israelinhon sa Ehipto. Sa primero, nagtuo sila nga gipadala ni Jehova si Moises ug Aaron aron luwason sila gikan sa pagkaulipon. (Ex. 4:29-31) Pero sa ulahi, dihang mas gipalisod sa Paraon ang ilang kahimtang, ilang gibasol si Moises ug Aaron ug giingnan sila: “Tungod ninyo nasuko namo ang Paraon ug ang iyang mga opisyal ug gihatagan ninyo silag rason nga patyon mi.” (Ex. 5:19-21) Ilang gibasol ang maunongong mga alagad sa Diyos. Makapaguol gyod to! Kon dugay na kang nag-atubang ug kalisdanan, unsay imong himoon aron magpabiling lig-on ang imong pagsalig kang Jehova ug sa iyang organisasyon?

6. Unsay atong makat-onan kang propetang Habacuc dihang mag-atubang tag kalisdanan? (Habacuc 3:17-19)

⁶ Isulti kang Jehova ang tanan nimong gibati pinaagig pag-ampo, ug pangayog tabang kaniya. Ang propetang si Habacuc nakaatubang ug daghang kalisdanan. Dihay higayon nga morag nagduhaduha na siya kon gimahal ba siya ni Jehova. Busa miampo siya kang Jehova ug gisulti ang tanan niyang gibati. Siya miingon: “Oh Jehova, hangtod kanus-a ko mangayog tabang ug dili ka maminaw? . . . Nganong gitugotan nimo ang pagdaogdaog?” (Hab. 1:2, 3) Gitubag ni Jehova ang kinasingkasing nga pag-ampo sa iyang maunongong alagad. (Hab. 2:2, 3) Gipamalandong ni Habacuc kon giunsa pagluwas ni Jehova ang Iyang katawhan, busa nabalik ang iyang kalipay. Kombinsido na siya nga si Jehova nagmahal niya ug motabang niya nga malahutay ang bisan unsang pagsulay. (Basaha ang Habacuc 3:17-19.) Unsay atong makat-onan niini? Kon mag-atubang kag kalisdanan, ampo kang Jehova ug isulti kaniya ang imong gibati. Dayon pangayog tabang kaniya. Kon imo nang himoon, makasalig ka nga hatagan ka ni Jehova ug kusog aron makalahutay. Dihang makita nimo nga iya kang gitabangan, mas molig-on ang imong pagtuo.

7. Unsay gusto sa igsoon ni Shirley nga iyang hunahunaon, ug unsay nakatabang niya nga dili mawad-ag pagtuo kang Jehova?

⁷ Ipadayon ang imong espirituwal nga rutina. Mao nay nakatabang kang Shirley, sister nga taga-Papua New Guinea, dihang nakaatubang siyag kalisdanan. b Pobre ang iyang pamilya ug usahay dili igo ang ilang pagkaon. Ang iyang igsoon nagtanom ug pagduhaduha sa iyang hunahuna ug miingon: “Ingon ka motabang nimo ang balaang espiritu sa  Diyos? Pobre man lagi gihapon ang inyong pamilya? Nag-usik-usik lang ka sa imong panahon sa pagsangyaw.” Si Shirley miingon: “Nakahunahuna ko, ‘Gimahal ba gyod ta sa Diyos?’ Busa miampo dayon ko kang Jehova ug akong gisulti niya ang tanan nga naa sa akong hunahuna. Wa ko moundang sa pagbasa sa Bibliya ug sa atong mga publikasyon, ug mipadayon ko sa pagsangyaw ug pagtambong sa mga tigom.” Nakatabang to niya nga makaamgo nga giatiman ni Jehova ang ilang pamilya. Wala sila magutmi, ug malipayon sila. Si Shirley miingon: “Gitubag ni Jehova ang akong mga pag-ampo.” (1 Tim. 6:6-8) Kon ipadayon nimo ang imong espirituwal nga rutina, ang mga kalisdanan o pagduhaduha dili makapabulag nimo kang Jehova.

8. Unsa tingali ang mahitabo sa mga brader nga nagapanguna sa organisasyon ni Jehova?

⁸ Pinaagi sa media ug social network, ang atong mga kaaway nagpakaylap ug sayop ug bakak nga mga impormasyon bahin sa mga brader nga nagapanguna sa organisasyon ni Jehova. (Sal. 31:13) Ang ubang brader giaresto ug gikasohan ingong kriminal. Ingon sab niana ang nasinatian sa mga Kristohanon sa unang siglo dihang si apostol Pablo sayop nga giakusahan ug gidakop. Unsay ilang gihimo dihang nahitabo to?

9. Unsay gihimo sa ubang Kristohanon dihang napriso si apostol Pablo?

⁹ Ang ubang Kristohanon sa unang siglo mibiya kang apostol Pablo dihang napriso siya sa Roma. (2 Tim. 1:8, 15) Ngano? Gikaulaw ba nila si Pablo kay giisip na siya sa mga tawo ingong kriminal? (2 Tim. 2:8, 9) O nahadlok ba sila nga lutoson pod sila? Bisan unsa pay rason, hunahunaa ang gibati ni Pablo. Nakaatubang siyag daghang kalisdanan ug gipameligro pa gani niya ang iyang kinabuhi para nila. (Buh. 20:18-21; 2 Cor. 1:8) Hinaot dili nato sundogon kadtong mibiya kang Pablo sa panahon nga gikinahanglan niya sila! Unsay angay natong hinumdoman dihang lutoson ang mga brader nga nagapanguna?

10. Unsay angay natong hinumdoman dihang lutoson ang mga brader nga nagapanguna, ug ngano?

 ¹⁰ Hinumdomi kon nganong gilutos ta ug kinsay hinungdan ani. Ang 2 Timoteo 3:12 nag-ingon: “Ang tanan nga nagkinabuhi nga nahiusa kang Kristo Jesus ug may debosyon ngadto sa Diyos lutoson sab.” Busa dili ta matingala nga gipuntirya gyod ni Satanas ang mga brader nga nagapanguna. Gusto niya nga dili na sila magmatinumanon ug gusto sab niya nga mahadlok ta.—1 Ped. 5:8.

11. Unsay atong makat-onan sa gihimo ni Onesiforo? (2 Timoteo 1:16-18)

¹¹ Padayon natong suportahan ang mga igsoon ug mounong ta nila. (Basaha ang 2 Timoteo 1:16-18.) Ang Kristohanon nga si Onesiforo wala mosundog sa gihimo sa uban dihang napriso si Pablo. ‘Wala niya ikaulaw ang mga kadena’ ni Pablo. Iya hinuong gipangita si Pablo, ug dihang nakita niya siya, mihimo siyag mga paagi aron tabangan siya, bisag nagpasabot to nga kinahanglan niyang ipameligro ang iyang kinabuhi. Unsay atong makat-onan? Dili ta angayng magpadaog sa atong kahadlok sa tawo nga tungod ana, dili na ta motabang sa atong mga igsoon nga gilutos. Hinuon, ato silang depensahan ug tabangan. (Prov. 17:17) Gikinahanglan nila ang atong gugma ug suporta.

12. Unsay atong makat-onan sa atong mga igsoon sa Russia?

¹² Hunahunaa kon giunsa pagtabang sa atong mga igsoon sa Russia ang ilang mga isigkamagtutuo nga napriso. Dihang dunay dad-on sa korte, daghang igsoon ang moadto sab aron suportahan sila. Unsay atong makat-onan? Dihang ang mga brader nga nagapanguna akusahan, arestohon, o lutoson, ayawg kahadlok. Iampo sila, tabangi ang ilang pamilya, ug pangitag ubang praktikal nga paagi aron suportahan sila.​—Buh. 12:5; 2 Cor. 1:10, 11.

13. Nganong ang pagbiaybiay makapawala sa atong pagsalig kang Jehova ug sa iyang organisasyon?

¹³ Tingali biaybiayon ta sa atong dili Saksi nga mga paryente, kauban sa trabaho, o eskolmet tungod sa atong pagsangyaw o pagsunod sa taas nga sukdanan ni Jehova bahin sa moralidad. (1 Ped. 4:4) Tingali moingon sila: “Maayo man ka nga tawo, pero estrikto o kinaraan ra kaayo ang inyong relihiyon.” Tingali sawayon ta sa uban tungod sa atong pagsunod sa kahikayan bahin sa pag-disfellow, ug moingon sila: “Ingon ana ba ang himoon sa mahigugmaong tawo?” Kini nga mga komento puwedeng mahimong hinungdan nga magduhaduha na ta sa mga balaod ni Jehova. Basin maghunahuna na ta: ‘Sobra ra ba ang gidahom ni Jehova kanako? Estrikto ra ba kaayo ang iyang organisasyon?’ Kon mao nay situwasyon nimo karon, unsay makatabang nimo nga makapabiling suod kang Jehova ug sa iyang organisasyon?

14. Unsay atong himoon dihang biaybiayon ta kay nagsunod ta sa mga sukdanan ni Jehova? (Salmo 119:50-52)

¹⁴ Magmadeterminado nga sundon ang mga sukdanan ni Jehova. Gisunod ni Job ang mga sukdanan ni Jehova bisan pag gibiaybiay siya tungod ana. Usa sa iyang mga higala kunohay misulay pa ganig kombinsir niya nga balewala lang sa Diyos kon mosunod ba siya sa mga sukdanan sa Diyos o dili. (Job 4:17, 18; 22:3) Pero wala motuo si Job niini. Nahibalo siya nga husto gyod ang mga sukdanan ni Jehova ug determinado siya nga sundon kini. Wala siya magpadala sa uban, ug gihuptan niya ang iyang integridad. (Job 27:5, 6) Unsay atong makat-onan? Ayawg  padala sa pagbiaybiay kay basig kuwestiyonon na hinuon nimo ang mga sukdanan ni Jehova. Hunahunaa ang imong kaugalingong eksperyensiya. Seguradong kadaghan na nimong nakita nga husto gyod ang mga sukdanan ni Jehova ug nakabenepisyo ka niini. Magmadeterminado nga suportahan ang organisasyon nga nagsunod sa maong mga sukdanan. Kon imo ning himoon, bisag unsa pang pagbiaybiay ang imong maeksperyensiyahan, dili ka mobulag kang Jehova.​—Basaha ang Salmo 119:50-52.

15. Nganong gibiaybiay si Brizit?

¹⁵ Konsideraha ang nahitabo kang Brizit, sister nga taga-India. Gibiaybiay siya sa iyang pamilya tungod sa iyang pagtuo. Wala madugay human sa iyang bawtismo niadtong 1997, nawad-ag trabaho ang iyang bana nga dili Saksi. Busa ang bana midesisyon nga sila ug ang ilang mga anak moipog puyo sa iyang ginikanan nga naa sa laing siyudad. Pero dili lang kana ang kalisdanan ni Brizit. Kay wala may trabaho ang iyang bana, kinahanglan siyang motrabahog full-time aron masuportahan ang iyang pamilya. Dugang pa, ang gilay-on sa kinadul-ang kongregasyon maoy mga 350 kilometros (220 milya). Makapaguol kay gisupak siya sa pamilya sa iyang bana tungod sa iyang pagtuo. Grabe kaayo ang pagsupak maong midesisyon ang pamilya ni Brizit nga mobalhin na sab ug puyo. Dayon, wala damha nga namatay ang iyang bana. Unya ang iyang ikatulong anak nga 12 anyos pa lang namatay tungod sa kanser. Ang nakapait pa gyod kay gibasol siya sa iyang mga paryente tungod sa mga nahitabo. Miingon sila nga kon wala pa siya mag-Saksi, dili unta mahitabo kadto nga mga trahedya. Bisan pa niana, padayon siyang misalig kang Jehova ug nagpabiling suod sa iyang organisasyon.

16. Sa unsang paagi gipanalanginan si Brizit sa iyang pagpabiling suod kang Jehova ug sa organisasyon?

¹⁶ Kay ang gipuy-an ni Brizit layo sa kongregasyon, gidasig siya sa tigdumala sa sirkito nga mosangyaw sa ilang lugar ug magdumalag mga tigom sa ilang balay. Sa primero, nalisdan siya. Pero gisunod gihapon niya ang  maong sugyot. Misangyaw siya, nagpahigayog mga tigom sa ilang balay, ug regular nga nagdumalag pamilyahanong pagsimba sa iyang mga anak. Unsay resulta? Si Brizit nakadumalag daghang Bible study, ug daghan nila ang nabawtismohan. Niadtong 2005, nagregular payunir siya. Gipanalanginan ang iyang pagsalig kang Jehova ug pagkamaunongon sa organisasyon. Ang iyang mga anak matinumanong nag-alagad kang Jehova, ug karon naa nay duha ka kongregasyon sa ilang dapit! Kombinsido si Brizit nga gihatagan siya ni Jehova ug kusog aron makalahutay sa mga kalisdanan ug pagbiaybiay.

17. Unsay angay natong determinasyon?

¹⁷ Gusto ni Satanas nga patuohon ta nga biyaan ta ni Jehova panahon sa atong kalisdanan ug mas makapalisod lang sa atong kinabuhi ang atong pagsuportar sa organisasyon ni Jehova. Gusto ni Satanas nga mahadlok ta dihang akusahan, lutoson, o prisohon ang mga brader nga nagapanguna. Ug pinaagi sa pagbiaybiay, gusto niya nga mawala ang atong pagsalig sa mga sukdanan ni Jehova ug sa Iyang organisasyon. Pero nahibalo ta pag-ayo sa mga paagi ni Satanas ug dili ta magpalimbong niya. (2 Cor. 2:11) Magmadeterminado nga isalikway ang mga bakak ni Satanas ug magmaunongon kang Jehova ug sa Iyang organisasyon. Hinumdomi nga dili gyod ka biyaan ni Jehova. (Sal. 28:7) Busa ayaw tugoti nga naay makapabulag nimo kang Jehova!—Roma 8:35-39.

18. Unsay hisgotan nato sa sunod nga artikulo?

¹⁸ Niining artikuloha, nahisgotan nato ang mga pagsulay gikan sa gawas sa kongregasyon. Pero ang atong pagsalig kang Jehova ug sa iyang organisasyon puwede sab masulayan tungod sa mga kahimtang sa sulod sa kongregasyon. Unsay atong himoon aron dili ta madaog sa maong mga pagsulay? Hisgotan nato nâ sa sunod nga artikulo.