1. Unsay gipasabot sa paghupot ug maayong panghunahuna? (2 Timoteo 4:5)

 DIHANG mag-atubang tag mga kalisdanan, mahimong masulayan ang atong pagkamaunongon kang Jehova ug sa iyang organisasyon. Unsay atong himoon aron dili ta madaog sa mga kalisdanan? Kinahanglan natong huptan ang maayong panghunahuna ug magpabiling nagtukaw, nga mobarog nga lig-on sa pagtuo. (Basaha ang 2 Timoteo 4:5.) Mahuptan nato ang maayong panghunahuna kon magpabilin tang kalmado, malinawon tag hunahuna, ug maningkamot ta nga sundogon ang panglantaw ni Jehova. Kon himoon nato nâ, ang atong panghunahuna dili madaog sa atong emosyon.

2. Unsay hisgotan nato niini nga artikulo?

² Sa nag-unang artikulo, gihisgotan nato ang tulo ka pagsulay nga atong maatubang sa gawas sa kongregasyon. Niining artikuloha, hisgotan nato ang tulo ka kahimtang sa sulod sa kongregasyon nga magsulay sa atong pagkamaunongon kang Jehova: (1) dihang dili maayo ang pagtratar kanato sa isigka-Kristohanon, (2) dihang disiplinahon ta, ug (3) dihang maglisod tag sunod sa mga kausaban sa organisasyon. Sa unsang paagi mahuptan nato ang maayong panghunahuna ug makapabilin tang maunongon kang Jehova ug sa iyang organisasyon dihang mag-atubang ta niana nga mga kahimtang?

3. Unsa tingali ang atong hunahunaon kon dili maayo ang pagtratar kanato sa usa ka igsoon?

³ Nakasulay na ba ka nga dili maayo ang pagtratar kanimo sa usa ka igsoon, tingali igsoon nga may pribilehiyo? Lagmit dili intensiyon sa igsoon nga pasakitan ka. (Roma 3:23; Sant. 3:2) Pero nasakitan ka sa iyang gihimo. Basin ganig wala na ka makatulog sa pagsigeg hunahuna sa nahitabo. Basig makaingon ka, ‘Kon organisasyon gyod ni sa Diyos, nganong naa may igsoon nga ingon ana?’ Mao nay gusto ni Satanas nga hunahunaon nato. (2 Cor. 2:11) Ang maong panghunahuna puwedeng mahimong hinungdan nga mobulag ta kang Jehova ug sa iyang organisasyon. Kon dili maayo ang pagtratar kanato sa usa ka igsoon, sa unsang paagi mahuptan nato ang maayong panghunahuna?

4. Sa unsang paagi nahuptan ni Jose ang maayong panghunahuna dihang nakasinati siyag dili maayong pagtratar, ug unsay atong makat-onan kaniya? (Genesis 50:19-21)

⁴ Ayaw paghambin ug kasuko. Dihang si Jose tin-edyer pa, dili maayo ang pagtratar kaniya sa iyang mga magulang. Ilang gidumtan siya, ug ang uban nila gusto pa ganing mopatay niya. (Gen. 37:4, 18-22) Sa ngadtongadto, ila siyang gibaligya aron mahimong ulipon. Tungod adto, nakaatubang si Jose ug grabeng mga pagsulay sulod sa mga 13 ka tuig. Puwede untang maghunahuna si Jose nga wala siya higugmaa ni Jehova ug nga gibiyaan siya ni Jehova panahon nga iya Siyang gikinahanglan. Pero wala maghambin ug kasuko si Jose. Iyang gihuptan ang maayong panghunahuna pinaagi sa pagpabiling kalmado. Dihang naa unta siyay kahigayonan nga mobalos sa iyang mga igsoon, wala to niya himoa. Hinuon, iya silang gipakitaag gugma ug gipasaylo. (Gen. 45:4, 5) Nahimo to ni Jose kay malinawon siyag hunahuna. Nagpokus siya sa katuyoan ni Jehova, dili sa iyang mga problema. (Basaha ang Genesis 50:19-21.) Unsay atong makat-onan? Kon nakasinati kag dili maayong pagtratar, ayawg kasuko kang Jehova, ug ayaw hunahunaa nga gibiyaan ka niya. Hinuon pamalandonga kon giunsa ka niya pagtabang nga makalahutay sa pagsulay. Dugang pa, tabonig gugma ang kasaypanan sa uban.​—1 Ped. 4:8.

5. Sa unsang paagi nahuptan ni Miqueas ang maayong panghunahuna dihang nakasinati siyag dili maayong pagtratar?

⁵ Konsideraha ang eksperyensiya ni Miqueas, b usa ka ansiyano sa South America. Dihay higayon nga dili maayo ang pagtratar kaniya sa pipila ka brader nga may mga pribilehiyo. Siya miingon: “Wa pa gyod ko sukad makasinati ug ingon adto nga stress. Nabalaka ko. Dili ko katulog, ug maghilak ko kay wala ko mahibalo kon unsay himoon.” Pero gihuptan ni Miqueas ang maayong panghunahuna ug naningkamot siya nga makontrol ang iyang gibati. Nagsige siyag ampo kang Jehova nga hatagan siyag balaang espiritu ug kusog aron makalahutay. Nag-research sab siya sa atong mga publikasyon. Unsay atong makat-onan? Kon dili maayo ang pagtratar kanimo sa usa ka igsoon, pabiling kalmado ug kontrolaha ang imong negatibong pagbati. Wala ka mahibalo kon ngano tingaling nasulti o nabuhat to niya. Busa ampo kang Jehova ug hangyoa siya nga tabangan ka nga masabtan ang panglantaw sa igsoon. Makatabang nâ aron dili ka maghunahuna nga intensiyon sa igsoon nga pasakitan ka. Makatabang pod nâ nga mapasaylo nimo siya. (Prov. 19:11) Hinumdomi nga nahibalo si Jehova sa imong kahimtang ug hatagan ka niyag kusog aron makalahutay.​—2 Cron. 16:9; Eccl. 5:8.

6. Nganong importanteng masabtan nga ang disiplina maoy paagi ni Jehova sa pagpakitag gugma? (Hebreohanon 12:5, 6, 11)

⁶ Ang disiplina sakit. Pero kon magpokus lang  ta sa kasakit, basig pakamenoson nato ang disiplina ug maghunahuna ta nga dili ni makataronganon o sobra ra ni ka bug-at. Tungod ana, dili na nato makita nga ang disiplina maoy paagi ni Jehova sa pagpakitag gugma kanato. (Basaha ang Hebreohanon 12:5, 6, 11.) Ug kon magpadaog ta sa atong emosyon, puwede nang pahimuslan ni Satanas. Gusto niya nga isalikway nato ang disiplina ug mobiya ta kang Jehova ug sa kongregasyon. Kon gidisiplina ka, unsaon nimo paghupot ang maayong panghunahuna?

7. (a) Diha sa hulagway, sa unsang paagi gigamit ni Jehova si Pedro human niya dawata ang disiplina? (b) Unsay atong makat-onan kang Pedro?

⁷ Dawata ang disiplina ug himoa ang gikinahanglang mga kausaban. Dihay mga higayon nga gibadlong ni Jesus si Pedro atubangan sa ubang apostoles. (Mar. 8:33; Luc. 22:31-34) Naulaw gyod tingali adto si Pedro! Pero nagmaunongon siya kang Jesus. Iyang gidawat ang disiplina ug nakakat-on siya sa iyang mga sayop. Gipanalanginan ni Jehova ang pagkamaunongon ni Pedro ug gihatagan siyag bug-at nga mga responsibilidad sa kongregasyon. (Juan 21:15-17; Buh. 10:24-33; 1 Ped. 1:1) Unsay atong makat-onan kang Pedro? Makabenepisyo ta ug ang uban kon dili ta magpokus sa kaulaw nga atong gibati tungod sa disiplina. Hinuon, dawaton nato ni ug himoon ang gikinahanglang mga kausaban. Pinaagi niini, mas magamit ta ni Jehova ug mas makatabang ta sa mga igsoon.

8-9. Dihang nadisiplina si Bernardo, unsay iyang gibati sa primero, pero unsay nakatabang niya nga mausab ang iyang panghunahuna?

⁸ Konsideraha ang nahitabo kang Bernardo, brader nga taga-Mozambique. Natangtang siya sa pagkaansiyano. Unsay iyang gibati sa primero? Siya miingon, “Naglagot ko kay wala ko kaangay sa disiplina nga akong nadawat.” Nabalaka siya kon unsa na lay hunahunaon sa mga igsoon kaniya. Siya midugang, “Naabtan pag pipila ka bulan ayha nako naapresyar ang disiplina ug nabalik ang akong pagsalig kang Jehova ug sa iyang organisasyon.” Unsay nakatabang kang Bernardo nga makabaton ug hustong panglantaw?

⁹ Giusab ni Bernardo ang iyang panghunahuna. Siya miingon: “Niadtong ansiyano pa ko, gigamit nako ang Hebreohanon 12:7 aron tabangan ang uban nga makabaton ug hustong panglantaw sa disiplina ni Jehova. Karon, akong gipangutana ang akong kaugalingon, ‘Kinsay kinahanglang magpadapat niini nga  teksto?’ Ang tanang alagad ni Jehova​—apil ko.” Dayon naningkamot si Bernardo nga mabalik ang iyang pagsalig kang Jehova ug sa Iyang organisasyon. Migahin siyag mas dakong panahon sa pagbasa sa Bibliya ug pagpamalandong. Bisan pag nabalaka gihapon siya kon unsay panglantaw sa mga igsoon kaniya, nakig-uban siya nila sa ministeryo ug nakigbahin sa mga tigom. Sa ngadtongadto, natudlo siya pag-usab ingong ansiyano. Kon sama kang Bernardo nadisiplina ka, ayaw pagpokus sa kaulaw. Hinuon dawata ang tambag ug himoa ang gikinahanglang mga kausaban. c (Prov. 8:33; 22:4) Kon imo nang himoon, makaseguro ka nga panalanginan ni Jehova ang imong pagkamaunongon kaniya ug sa iyang organisasyon.

10. Unsang kausaban sa organisasyon ang posibleng nagsulay sa pagkamaunongon sa ubang Israelinhon?

¹⁰ Ang mga kausaban sa organisasyon mahimong magsulay sa atong pagkamaunongon. Kon dili ta mag-amping, basig mahimo ning hinungdan nga mobulag ta kang Jehova. Pananglitan, hunahunaa ang usa ka kausaban dihang nadawat sa mga Israelinhon ang Moisesnong Balaod. Sa wala pa ihatag ang Balaod, ang mga ulo sa pamilya ang nagahimo sa buluhaton sa mga saserdote. Nagtukod silag mga halaran ug nagtanyag ug mga halad kang Jehova para sa ilang pamilya. (Gen. 8:20, 21; 12:7; 26:25; 35:1, 6, 7; Job 1:5) Pero dihang gipatuman na ang Balaod, wala na tugoti ang mga ulo sa pamilya sa paghimo ana. Nagtudlo si Jehova ug mga saserdote gikan sa banay ni Aaron aron motanyag ug mga halad. Sukad adto, kon ang ulo sa pamilya nga dili kaliwat ni Aaron mohimo sa buluhaton sa mga saserdote, puwede siyang patyon. d (Lev. 17:3-6, 8, 9) Usa kaha ni sa mga hinungdan kon nganong si Kore, Datan, Abiram, ug 250 ka pangulo mirebelde kang Moises ug Aaron? (Num. 16:1-3) Dili ta makaseguro ana. Pero nahibalo ta nga si Kore ug ang iyang mga kauban wala magmaunongon kang Jehova. Kon ang mga kausaban sa organisasyon magsulay sa imong pagkamaunongon, unsay imong himoon?

11. Unsay atong makat-onan sa ehemplo sa pipila ka Kohatnon?

¹¹ Bug-os nga suportahi ang mga kausaban sa organisasyon. Panahon sa pagpanaw sa mga Israelinhon sa kamingawan, ang mga Kohatnon naay espesyal nga asaynment. Matag higayon nga ang katawhan mobalhig kampo, ang pipila sa mga Kohatnon maoy modayong sa kaban sa pakigsaad ug makita sila sa tanang tawo. (Num. 3:29, 31; 10:33; Jos. 3:2-4) Dako kaayo to nga pribilehiyo! Pero nausab ang kahimtang dihang ang mga Israelinhon nagpuyo na sa Yutang Saad. Ang Kaban dili na kinahanglang ibalhinbalhin. Busa panahon sa paghari ni Solomon, ang ubang Kohatnon giasayn ingong mag-aawit, ang uban mga magbalantay sa ganghaan, ug ang uban pod tig-atiman sa mga balay-tipiganan. (1 Cron. 6:31-33; 26:1, 24) Wala tay mabasa nga ang mga Kohatnon nangreklamo o nangayog mas prominenteng trabaho kay espesyal ang ilang asaynment kaniadto. Unsay atong makat-onan? Bug-os suportahi ang mga kausaban sa organisasyon ni Jehova, apil ang mga kausaban nga nakaapektar sa imong asaynment. Magmalipayon sa bisan unsang asaynment nga ihatag kanimo. Hinumdomi nga dili ni basehanan kon unsa ka ka bililhon kang Jehova. Mas gipabilhan ni Jehova ang  imong pagkamasinugtanon kay sa bisan unsang asaynment.​—1 Sam. 15:22.

12. Unsay gibati ni Zaina dihang nareasayn siya?

¹² Konsideraha si Zaina, sister nga taga-Middle East kinsa nakadawat ug kausaban sa asaynment ug nawad-ag pribilehiyo nga gimahal kaayo niya. Nareasayn siya ingong espesyal payunir human makaalagad sa Bethel sa kapig 23 ka tuig. Siya miingon: “Nakurat kaayo ko. Gibati nako nga wala na koy pulos, ug nagsige kog pangutana sa akong kaugalingon, ‘Unsay akong nahimong sayop?’” Ang ubang igsoon nakadugang pa gyod sa iyang kasakit kay ila siyang giingnan: “Kon maayo pa ka sa imong asaynment, dili unta ka buhian sa organisasyon.” Taudtaod pod nga naguol pag-ayo si Zaina nga magsige siyag hilak kada gabii. Pero siya miingon: “Wa gyod nako kuwestiyona ang organisasyon o ang gugma ni Jehova.” Unsay nakatabang kang Zaina aron mahuptan ang maayong panghunahuna?

13. Unsay gihimo ni Zaina aron madaog ang iyang negatibong mga pagbati?

¹³ Nadaog ni Zaina ang iyang negatibong mga pagbati. Sa unsang paagi? Nagbasa siyag mga artikulo sa atong mga publikasyon nga naghisgot sa iyang mga naeksperyensiyahan, ug nakatabang ni niya nga makalahutay. Dako kaayog tabang niya ang artikulong “Mahimo Nimong Masagubang ang Pagkaluya!” sa Pebrero 1, 2001 nga Bantayanang Torre. Ang maong artikulo naghisgot nga ang magsusulat sa Bibliya nga si Marcos posibleng mibatig kaluya dihang nakadawat ug mga kausaban sa asaynment. Si Zaina miingon, “Ang ehemplo ni Marcos nakatabang gyod nako nga madaog ang kaluya.” Si Zaina sab nagpabiling suod sa iyang mga higala. Wala niya ilain ang iyang kaugalingon, ug wala sab siya mobati nga makaluluoy siya. Nahibalo siya nga ang balaang espiritu naggiya sa mga desisyon sa organisasyon ni Jehova ug gimahal siya pag-ayo sa mga brader nga nagapanguna. Pero naamgohan pod niya nga angayng himoon sa organisasyon sa Diyos kon unsa gyoy gikinahanglan aron molampos ang buluhaton ni Jehova.

14. Unsang kausaban sa organisasyon ang nalisdan si Vlado sa pagsunod, ug unsay nakatabang niya?

¹⁴ Si Vlado, 73 anyos nga ansiyano sa Slovenia, nalisdan dihang gitapo ang ilang kongregasyon sa laing kongregasyon ug wala na ipagamit ang ilang Kingdom Hall. Siya miingon: “Wala ko kasabot kon nganong dili na ipagamit ang among nindot nga Kingdom Hall. Nasakitan ko kay bag-o ra namo to gi-renovate. Gani akoy  naghimo sa ubang bag-ong gamit didto kay panday ko. Tungod sab sa maong pagtapo, daghan nag kausaban nga lisod para namong mga edaran.” Unsay nakatabang kang Vlado nga mosuportar sa mga kausaban? Siya miingon: “Ang pagsunod sa mga kausaban sa organisasyon ni Jehova kanunayng moresultag mga panalangin. Nag-andam ni nato para sa mas dagkong kausaban sa umaabot.” Naglisod ba kag sunod sa mga kausaban, sama sa pagtapo sa mga kongregasyon o kausaban sa asaynment? Makasalig ka nga nakasabot si Jehova sa imong gibati. Kon imong suportahan ang maong mga kausaban ug magmaunongon ka kang Jehova ug sa iyang organisasyon, makadawat gyod kag mga panalangin.​—Sal. 18:25.

15. Unsay atong buhaton dihang makaatubang tag mga kahimtang sulod sa kongregasyon nga magsulay sa atong pagkamaunongon?

¹⁵ Samtang nagkaduol ta sa kataposan niining sistema sa mga butang, makadahom tag mga kahimtang sulod sa kongregasyon nga puwedeng magsulay sa atong pagkamaunongon kang Jehova. Busa kinahanglang huptan nato ang maayong panghunahuna. Kon dili maayo ang pagtratar kanimo sa isigka-Kristohanon, ayaw paghambin ug kasuko. Kon gidisiplina ka, ayaw pagpokus sa kaulaw. Dawata ang tambag ug himoa ang gikinahanglang mga kausaban. Ug dihang maapektohan ka sa mga kausaban sa organisasyon ni Jehova, dawata ni nga kinasingkasing ug sunda ang direksiyon.

16. Unsay imong himoon aron dili mawala ang imong pagsalig kang Jehova ug sa iyang organisasyon?

¹⁶ Makapakita kag pagsalig kang Jehova ug sa iyang organisasyon bisan dihang masulayan ang imong pagkamaunongon. Pero aron mahimo nâ, kinahanglang huptan nimo ang maayong panghunahuna, sa ato pa, pabiling kalmado, paningkamot nga magmalinawon ang imong hunahuna, ug sundoga ang panglantaw ni Jehova. Tun-i ang mga karakter sa Bibliya nga malamposong nakasagubang sa samang mga kalisdanan ug pamalandonga ang ilang ehemplo. Ampo kang Jehova alang sa tabang, ug ayaw gyod ilain ang imong kaugalingon sa kongregasyon. Kon imo nang himoon, makasalig ka nga bisag unsa pay mahitabo, si Satanas dili gyod makapabulag nimo kang Jehova o sa Iyang organisasyon.​—Sant. 4:7.