1-2. (a) Unsang mga pangutana ang atong hisgotan? (b) Unsay nagpakita nga andam gyod si Jehova sa pagtabang nato?

 SI Jehova makatabang nato nga masagubang ang atong mga problema ug magmalipayon sa pag-alagad. Sa unsang mga paagi ginatabangan ta ni Jehova? Ug unsay atong buhaton aron makabenepisyo ta pag-ayo sa iyang tabang? Atong tubagon kini nga mga pangutana niining artikuloha. Pero konsiderahon una nato kini nga pangutana: Andam ba gyod si Jehova nga motabang nato?

² Aron matubag nâ, atong hisgotan ang pulong nga gigamit ni apostol Pablo sa iyang sulat sa mga Hebreohanon. Si Pablo misulat: “Si Jehova ang akong magtatabang; dili ko mahadlok. Unsay mabuhat sa tawo kanako?” (Heb. 13:6) Ang mga reperensiya nag-ingon nga ang pulong “magtatabang,” nga gigamit niini nga bersikulo, nagtumong sa tawo nga nagdalidalig dagan aron tabangan ang usa ka tawo nga nangayog tabang. Imadyina si Jehova nga nagdalidalig dagan aron luwason ang tawo nga nagpakitabang. Seguradong mouyon ka nga nagpakita gyod ni kon unsa ka andam si Jehova nga mahimong atong Magtatabang. Kay andam si Jehova nga motabang nato, malahutay nato nga malipayon ang atong mga pagsulay.

3. Unsa ang tulo ka paagi nga ginatabangan ta ni Jehova aron malahutay nato nga malipayon ang mga pagsulay?

³ Unsa ang pipila ka paagi nga ginatabangan ta ni Jehova aron malahutay nato nga malipayon ang mga pagsulay? Aron matubag nâ, konsiderahon nato ang basahon sa Isaias. Ngano? Kay daghan sa mga tagna nga gisulat ni Isaias mapadapat sa mga alagad sa Diyos karon. Dugang pa, dihang maghisgot si  Isaias bahin kang Jehova, pirme siyang mogamit ug mga pulong nga daling masabtan. Tagda pananglitan ang Isaias kapitulo 30. Niini nga kapitulo, si Isaias migamit ug nindot nga mga pulong nga nagpakita kon giunsa ta pagtabang ni Jehova pinaagi sa (1) pagpaminaw pag-ayo ug pagtubag sa atong mga pag-ampo, (2) paggiya kanato, ug (3) paghatag natog mga panalangin karon ug sa umaabot. Atong hisgotan kining tulo ka paagi.

4. (a) Unsay giingon ni Jehova bahin sa mga Hudiyo sa panahon ni Isaias, ug unsay Iyang gitugotan nga mahitabo? (b) Unsang paglaom ang gihatag ni Jehova sa matinumanong mga binihag? (Isaias 30:18, 19)

⁴ Sa unang bersikulo sa Isaias kapitulo 30, gitawag ni Jehova ang mga Hudiyo nga “mga anak nga gahig ulo,” nga ‘nagdugang ug sala sa sala.’ Si Jehova miingon sab: “Rebelyoso sila nga katawhan, . . . nga dili gustong mamati sa balaod ni Jehova.” (Isa. 30:1, 9) Kay dili sila maminaw, si Isaias mitagna nga itugot ni Jehova nga mag-antos sila. (Isa. 30:5, 17; Jer. 25:8-11) Ug mao gyod nay nahitabo dihang gibihag sila ngadto sa Babilonya. Pero apil sa gibihag ang matinumanong mga Hudiyo, ug si Isaias naay mensahe sa paglaom para nila. Iya silang giingnan nga moabot ang panahon nga pakitaan sila ni Jehova ug pabor. (Basaha ang Isaias 30:18, 19.) Ug nahitabo gyod nâ kay gipagawas sila ni Jehova gikan sa pagkabihag. Pero ang teksto nag-ingon: “Si Jehova mapailobong naghulat nga pakitaan mog pabor.” Nagpakita nâ nga molabay pa ang taastaas nga panahon una mapagawas ang matinumanong mga binihag. Gani, 70 ka tuig na silang nabihag sa Babilonya ayha pa gitugtan ang pipila kanila nga mobalik sa Jerusalem. (Isa. 10:21; Jer. 29:10) Dihang nakabalik na sila sa ilang yutang natawhan, ang ilang luha sa kagul-anan tungod sa pagkabihag napulihag luha sa kalipay.

5. Unsay gipasalig kanato sa Isaias 30:19?

⁵ Kita sab mahupayan niining mga pulonga: “Pakitaan gyod ka niyag pabor dihang madunggan niya ang imong pagtuaw alang sa tabang.” (Isa. 30:19) Gipasaligan ta ni Isaias nga maminaw gyod si Jehova dihang mangamuyo ta Niya alang sa tabang, ug molihok dayon Siya para nato. Si Isaias miingon sab: “Iya kang tubagon dayon inigkadungog niya niini.” Kining makapahupay nga mga pulong nagpahinumdom nato nga ang atong Amahan andam gyong motabang niadtong moduol niya. Kon ato ning hinumdoman, makatabang ni nga makalahutay ta nga malipayon.

6. Giunsa pagpakita sa mga pulong ni Isaias nga si Jehova maminaw sa pag-ampo sa matag usa nato?

⁶ Unsa pa nga pasalig ang gihatag niini nga teksto bahin sa atong mga pag-ampo? Si Jehova maminaw pag-ayo sa pag-ampo sa kada usa nato. Nganong makaingon ta ana? Sa unang bahin sa Isaias kapitulo 30, migamit si Jehova ug plural nga pulong nga “kamo” sa pagtumong sa iyang katawhan ingong grupo. Pero sa bersikulo 19, singular na ang gigamit kay ang gitumong dinhi mao ang matag indibiduwal. Si Isaias misulat: “Ikaw dili gayod mohilak”; “pakitaan gyod ka niyag pabor”; “iya kang tubagon.” Kay si Jehova mahigugmaong Amahan, dili niya sultihan ang iyang naguol nga anak, “Kinahanglang lig-on ka sama sa imong mga igsoon.” Hinuon, iyang gipangga ang matag usa nato ug iyang paminawon ang pag-ampo sa kada usa nato.​—Sal. 116:1; Isa. 57:15.

7. Giunsa pagpakita ni Isaias ug Jesus ang kaimportante sa pagpadayon sa pag-ampo?

⁷ Dihang moampo ta kang Jehova bahin sa atong gikabalak-an, ang una tingali niyang himoon mao ang paghatag natog kusog sa pag-atubang sa atong mga problema. Ug  kon ang atong problema dili dayon mawala, kinahanglan tingali tang balikbalik nga mohangyo kang Jehova nga hatagan tag kusog nga makalahutay. Mao nay gusto niya nga atong buhaton. Gani mao nay gipakita sa mga pulong ni Isaias: ‘Ayaw gyod papahulaya si Jehova.’ (Isa. 62:7) Unsay gipasabot ana? Kinahanglang dili ta mohunong sa pag-ampo kang Jehova, nga mora bag dili nato siya papahulayon. Ang giingon ni Isaias nagpahinumdom nato sa mga ilustrasyon ni Jesus bahin sa pag-ampo, diha sa Lucas 11:8-10, 13. Gidasig ta ni Jesus nga ‘magsigeg hangyo’ ug ‘magpadayon sa pagpangayo’ sa balaang espiritu. Makahangyo sab ta kang Jehova nga giyahan ta sa paghimog hustong mga desisyon.

8. Sa unsang paagi ang Isaias 30:20, 21 natuman kaniadto?

⁸ Basaha ang Isaias 30:20, 21. Dihang gilikosan sa mga Babilonyanhon ang Jerusalem sulod sa usa ka tuig ug tunga, ang kasakit nga naeksperyensiyahan sa mga tawo nahimong sama ka komon sa tinapay ug tubig. Pero sumala sa bersikulo 20 ug 21, gisaaran ni Jehova ang mga Hudiyo nga kon maghinulsol sila ug magbag-o, iya silang luwason. Gitawag ni Isaias si Jehova nga ilang “Dakong Instruktor,” ug iyang gisaaran ang mga tawo nga tudloan sila ni Jehova kon unsaon Siya pagsimba sa dalawatong paagi. Natuman ni dihang napagawas ang mga Hudiyo sa pagkabihag. Gipamatud-an ni Jehova nga siya ang ilang Dakong Instruktor, ug iyang gigiyahan ang iyang katawhan sa pagpasig-uli sa putling pagsimba. Malipayon kaayo ta nga si Jehova ang atong Dakong Instruktor.

9. Unsay usa ka paagi nga gigiyahan ta ni Jehova?

⁹ Gipakasama ta ni Isaias sa mga estudyante nga gitudloan ni Jehova sa duha ka paagi. Una, si Isaias miingon: “Makita nimo ang imong Dakong Instruktor pinaagi sa imo mismong mga mata.” Niini nga ilustrasyon, ang instruktor nagtindog atubangan sa iyang mga estudyante. Pribilehiyo kaayo nato nga matudloan sa Diyos. Sa unsang paagi ta niya gitudloan? Pinaagi sa iyang organisasyon. Mapasalamaton kaayo ta sa tin-awng giya nga atong nadawat gikan sa organisasyon ni Jehova! Ang instruksiyon nga gihatag diha sa mga tigom, kombensiyon, mga publikasyon, JW Broadcasting^®, ug uban pa makatabang nato sa paglahutay nga malipayon bisan sa lisod nga mga kahimtang.

10. Sa unsang paagi ta ‘makadungog ug tingog sa atong luyo’?

¹⁰ Gihisgotan ni Isaias ang ikaduhang paagi  nga gitudloan ta ni Jehova. Siya miingon: “Makadungog kag tingog sa imong luyo.” Dinhi, iyang gihulagway si Jehova ingong instruktor nga naa sa luyo sa iyang mga estudyante, nga naggiya ug nagtudlo nila sa dalan nga angay nilang lakwan. Karon, madungog nato ang tingog sa Diyos diha sa atong luyo. Sa unsang paagi? Ang mga pulong sa Diyos nasulat sa Bibliya dugay na kanhi, nga layo na kaayo sa atong panahon. Busa dihang mobasa ta sa Bibliya, sama rag naminaw ta sa tingog sa Diyos gikan sa atong luyo.​—Isa. 51:4.

11. Aron makalahutay ta nga malipayon, unsay kinahanglan natong himoon, ug ngano?

¹¹ Sa unsang paagi ta bug-os makabenepisyo sa giya nga gitagana ni Jehova pinaagi sa iyang organisasyon ug sa iyang Pulong? Matikdi ang giingon ni Isaias. Una, “kini ang dalan.” Ikaduha, “lakaw mo niini.” (Isa. 30:21) Dili igo nga mahibalo lang ta sa “dalan.” Kinahanglan sab nga ‘molakaw ta niini.’ Pinaagi sa Pulong ni Jehova nga gipatin-aw sa iyang organisasyon, makat-onan nato kon unsay gusto ni Jehova nga atong buhaton. Mahibaloan sab nato kon unsaon pagpadapat ang atong nakat-onan. Aron makalahutay ta nga malipayon sa atong pag-alagad kang Jehova, kinahanglang himoon nato kining duha ka butang. Pinaagi lang niini nga madawat nato ang panalangin ni Jehova.

12. Sumala sa Isaias 30:23-26, sa unsang paagi gipanalanginan ni Jehova ang iyang katawhan?

¹² Basaha ang Isaias 30:23-26. Sa unsang paagi natuman ni nga tagna ngadto sa mga Hudiyo nga namalik sa Israel human sila mabihag sa Babilonya? Nakadawat silag abundang panalangin—sa pisikal ug espirituwal. Gipanalanginan ni Jehova ang iyang katawhan ug daghang pisikal nga pagkaon. Pero labaw sa tanan, gihatagan niya silag abundang espirituwal nga pagkaon samtang anam-anam nga napasig-uli ang putling pagsimba. Ang espirituwal nga panalangin nga natagamtam sa katawhan sa Diyos adtong panahona labaw kaayo sa bisan unsa nga ilang naeksperyensiyahan kaniadto. Sa gipakita sa bersikulo 26, gipadan-ag pag-ayo ni Jehova ang espirituwal nga kahayag. (Isa. 60:2) Ang mga panalangin ni Jehova nakatabang sa iyang katawhan nga makapadayon sa pag-alagad kaniya nga may kalipay ug kalig-on “tungod sa maayong kahimtang sa kasingkasing.”—Isa. 65:14.

13. Sa unsang paagi natuman karon ang tagna sa pagpasig-uli?

¹³ Ang tagna ba bahin sa pagpasig-uli sa  putling pagsimba natuman karon? Oo! Sa unsang paagi? Sukad niadtong 1919 C.E., minilyon ang napahigawas sa pagkabihag sa Bantogang Babilonya, ang tibuok kalibotang imperyo sa bakak nga relihiyon. Naa na sila karon sa dapit nga mas maayo pa kay sa Yutang Saad sa Israel. Nagpuyo na sila karon sa espirituwal nga paraiso. (Isa. 51:3; 66:8) Unsa ang espirituwal nga paraiso?

14. Unsa ang espirituwal nga paraiso, ug kinsay nagpuyo didto karon? (Tan-awa ang Termino Gipatin-aw.)

¹⁴ Sukad niadtong 1919 C.E., ang mga dinihogan nagpuyo sa espirituwal nga paraiso. b Sa ngadtongadto, kadtong may yutan-ong paglaom, ang “ubang mga karnero,” nagpuyo na pod niining espirituwal nga paraiso ug nagtagamtam sa abundang panalangin ni Jehova.​—Juan 10:16; Isa. 25:6; 65:13.

15. Asa ang espirituwal nga paraiso?

¹⁵ Asa karon ang espirituwal nga paraiso? Ang mga magsisimba ni Jehova naa sa tanang bahin sa kalibotan. Busa ang espirituwal nga paraiso nga ilang gipuy-an naa pod sa tibuok kalibotan. Karon, bisan asa ta nagpuyo, mahimo tang bahin sa espirituwal nga paraiso kon suportahan nato ang matuod nga pagsimba.

16. Unsay atong himoon aron padayon natong makita ang kanindot sa espirituwal nga paraiso?

¹⁶ Aron makapabilin sa espirituwal nga paraiso, kinahanglang padayon natong apresyahon pag-ayo ang atong tibuok kalibotang panag-igsoonay. Unsaon nato nâ paghimo? Pinaagi sa pagpokus sa nindot nga mga hiyas sa mga nagpuyo niini, dili sa ilang pagkadili-hingpit. (Juan 17:20, 21) Nganong importante kaayo nâ? Hunahunaa ni: Makakita tag lainlaing mga kahoy sa usa ka nindot nga lasang. Ingon ana pod ang espirituwal nga paraiso diha sa mga kongregasyon karon. Daghan nig klaseklaseng mga tawo nga gipakasamag mga kahoy. (Isa. 44:4; 61:3) Kinahanglang padayon tang magpokus sa kanindot sa tibuok “lasang” imbes sa nakita nato nga dili maayo sa matag “kahoy” duol nato. Dili nato gusto  nga ang atong pagkadili-hingpit o ang pagkadili-hingpit sa uban diha sa kongregasyon mahimong hinungdan nga dili na nato maapresyar ang kanindot sa atong nagkahiusa ug tibuok kalibotang panag-igsoonay.

17. Unsay mahimo sa matag usa nato aron makaamot sa panaghiusa sa kongregasyon?

¹⁷ Sa unsang paagi ang kada usa nato makaamot niini nga panaghiusa? Pinaagi sa pagkahimong makigdaiton. (Mat. 5:9; Roma 12:18) Matag higayon nga maningkamot ta nga mamentinar ang atong maayong relasyon sa uban diha sa kongregasyon, makadugang ta sa kanindot sa espirituwal nga paraiso. Atong hinumdoman nga si Jehova ang nagkabig sa matag usa nga nagpuyo sa espirituwal nga paraiso. (Juan 6:44) Imadyina kon unsa ka malipayon si Jehova dihang iyang makita nga naningkamot ta nga mapalig-on ang kalinaw ug panaghiusa sa iyang mga alagad nga giisip niyang bililhon!​—Isa. 26:3; Hag. 2:7.

18. Unsay angay natong pamalandongon kanunay, ug ngano?

¹⁸ Sa unsang paagi bug-os tang makabenepisyo sa mga panalangin nga atong nadawat ingong mga alagad sa Diyos? Pamalandongon nato ang atong natun-an sa Pulong sa Diyos ug sa atong mga publikasyon. Pinaagi sa pagtuon ug pagpamalandong, maugmad nato ang maayong mga hiyas nga makatabang nato sa pagpakitag inigsoong gugma diha sa kongregasyon. (Roma 12:10) Kon mamalandong ta sa atong mga panalangin karon, molig-on ang atong relasyon kang Jehova. Ug kon pamalandongon nato ang mga panalangin nga ihatag ni Jehova sa umaabot, mahimong tinuod kaayo para nato ang paglaom nga makaalagad kaniya hangtod sa hangtod. Kining tanan makatabang nato nga mas magmalipayon sa pag-alagad kang Jehova karon.

19. (a) Sumala sa Isaias 30:18, sa unsa ta makasalig? (b) Unsay makatabang nato sa paglahutay nga malipayon?

¹⁹ Si Jehova “motindog” para nato dihang iyang laglagon kining daotang kalibotan. (Isa. 30:18) Kay si Jehova “Diyos sa hustisya,” makasalig ta nga dili niya tugotan nga madugangan pag usa ka adlaw kay sa gikinahanglan ang paglungtad sa kalibotan ni Satanas. (Isa. 25:9) Sama kang Jehova, mapailobon tang naghulat nga moabot na ang adlaw sa kaluwasan. Sa pagkakaron, maningkamot ta nga padayong pabilhan ang pribilehiyo sa pag-ampo, magtuon ug magpadapat sa Pulong sa Diyos, ug mamalandong sa atong mga panalangin. Kon himoon nato nâ, tabangan ta ni Jehova sa paglahutay nga malipayon sa atong pagsimba kaniya.