1-2. Unsang mga inhustisya ang posible natong maeksperyensiyahan?

 SI Jesus naghisgot ug ilustrasyon bahin sa babayeng balo nga nagsigeg hangyo sa maghuhukom nga hatagan siyag hustisya. Seguradong nasabtan sa mga tinun-an ni Jesus ang maong ilustrasyon kay daghan ang nakasinatig inhustisya niadtong panahona. (Luc. 18:​1-5) Kita pod karon makasabot sa gibati sa babayeng balo kay naa tingali mga higayon nga makasinati tag inhustisya.

² Komon kaayo karon ang diskriminasyon, dili patas nga pagtratar, ug pagdaogdaog, maong dili ikatingala nga makaeksperyensiya pod ta niana. (Eccl. 5:8) Pero komosta kon igsoon ang mohimog dili maayo nato? Basin lahi ang atong reaksiyon kay wala tingali nato na dahoma. Pero ang tinuod, posible gyod nang mahitabo. Siyempre dili sama sa mga magsusupak, dili gyod tuyo sa atong mga igsoon nga pasakitan ta; dili lang gyod sila hingpit. Daghan tag makat-onan sa reaksiyon ni Jesus dihang nakasinati siyag inhustisya gikan sa daotang mga magsusupak. Kon makapailob ta sa mga magsusupak nga dili maayog pagtratar kanato, mas angay nga magpailob ta sa atong mga igsoon! Pero unsa kahay bation ni Jehova kon makasinati tag inhustisya gikan sa igsoon o sa uban? Naa kaha siyay pagtagad nato?

3. Naa ba gyoy pagtagad si Jehova sa iyang mga alagad nga nakasinatig inhustisya, ug nganong makaingon ta niana?

³ Interesado kaayo si Jehova kanato, ug nakita niya kon giunsa ta pagtratar sa uban. “Si Jehova nahigugma sa hustisya.” (Sal. 37:28) Gipasaligan ta ni Jesus nga “ipatuman dayon [ni  Jehova] ang hustisya” sa Iyang gitakdang panahon. (Luc. 18:​7, 8) Ug sa dili madugay, wad-on Niya ang tanang pag-antos ug ang tanang klase sa inhustisya.—Sal. 72:​1, 2.

4. Unsang tabang ang gihatag ni Jehova kanato karon?

⁴ Samtang nagpaabot ta nga wad-on na ni Jehova ang pagkadaotan, gitabangan pod ta niya nga makalahutay sa mga inhustisya karon. (2 Ped. 3:13) Pananglitan, gitudloan ta niya kon unsay angay natong reaksiyon aron dili mosamot ang situwasyon. Pinaagi sa iyang Anak, gitagan-an ta ni Jehova ug hingpit nga ehemplo kon unsaon pag-atubang ang inhustisya. Ug naghatag siyag praktikal nga tambag nga makatabang nato sa ingon niana nga mga situwasyon.

PAG-AMPING SA IMONG REAKSIYON SA INHUSTISYA

5. Nganong angay tang mag-amping sa atong reaksiyon sa inhustisya?

⁵ Masakitan gyod tingali ta ug maguol pag-ayo kon makasinati tag inhustisya. (Eccl. 7:7) Mao pod nay gibati sa matinumanong mga alagad sama ni Job ug Habacuc. (Job 6:​2, 3; Hab. 1:​1-3) Normal lang nga mobati ta ana. Pero angay tang mag-amping sa atong reaksiyon aron dili ta makahimog dili maayo.

6. Unsay atong makat-onan sa gihimo ni Absalom? (Tan-awa sab ang hulagway.)

⁶ Dihang makaatubang tag inhustisya, makahunahuna tingali ta nga manimalos. Pero kon himoon nato na, basin mas mosamot hinuon ang situwasyon. Konsideraha ang gihimo sa anak ni Haring David nga si Absalom. Puwerte niyang sukoa dihang ang iyang igsoon nga si Tamar gilugos ni Amnon, nga ilang igsoon sa amahan. Base sa Moisesnong Balaod, angay gyong patyon si Amnon tungod sa iyang gihimo. (Lev. 20:17) Normal lang nga masuko si Absalom, pero wala siyay katungod nga manimalos ug mangunay sa pagpatay kang Amnon.—2 Sam. 13:​20-23, 28, 29.

7. Unsay gibati sa usa ka salmista tungod sa inhustisya?

⁷ Dihang makita nato nga kadtong naghimog daotan morag wala ra siloti, makapangutana tingali ta kon naa bay pulos ang paghimog maayo. Konsideraha ang gibati sa salmista dihang nakita niya nga gidaogdaog sa mga daotan ang mga matarong ug morag hayahay pa gyod silag kinabuhi. Siya miingon: “Sila ang mga daotan, nga kanunayng hamugaway.” (Sal. 73:12) Nadismayar pod kaayo siya sa inhustisya nga iyang nakita maong nakapangutana siya kon naa ba gyoy pulos ang iyang pag-alagad kang Jehova. Siya  miingon: “Dihang gipaningkamotan nako kinig sabot, natugaw ko niini.” (Sal. 73:​14, 16) Gani, siya miangkon: “Kon bahin kanako, hapit nang mahisalaag ang akong mga tiil; hapit nang maligas ang akong mga lakang.” (Sal. 73:2) Ingon niana pod ang nahitabo sa brader nga si Alberto. a

8. Unsay nahitabo sa usa ka brader tungod sa inhustisya nga iyang nasinatian?

⁸ Si Alberto gipasanginlan nga nangawat ug kuwarta gikan sa pondo sa kongregasyon. Tungod ana, nawad-an siyag mga pribilehiyo ug daghan sa mga igsoon nga nahibalo sa iyang kaso ang wala nay pagtahod niya. Siya miingon: “Nasakitan kaayo ko, nasuko, ug naglagot.” Kay nagpadala siya sa iyang gibati, mihuyang ang iyang espirituwalidad ug gani nahimo siyang dili aktibo sulod sa lima ka tuig. Kini nga eksperyensiya nagpakita kon unsay posibleng mahitabo kon magpadala ta sa atong gibati tungod sa inhustisya.

SUNDOGA KON GIUNSA PAGLAHUTAY NI JESUS ANG INHUSTISYA

9. Unsang mga inhustisya ang nasinatian ni Jesus? (Tan-awa sab ang hulagway.)

⁹ Si Jesus nagpakitag hingpit nga ehemplo kon unsaon paglahutay ang inhustisya. Konsideraha ang dili maayong pagtratar nga iyang naeksperyensiyahan gikan sa iyang pamilya ug  sa uban. Giingnan siya sa iyang dili magtutuong mga paryente nga nabuang na siya. Giakusahan siya sa relihiyosong mga lider nga ang iyang gahom naggikan kuno sa mga demonyo. Giyagayagaan, gipasakitan, ug gipatay siya sa Romanong mga sundalo. (Mar. 3:​21, 22; 14:55; 15:​16-20, 35-37) Pero gilahutay ni Jesus ang tanang inhustisya ug wala gyod siya manimalos. Unsay atong makat-onan sa iyang ehemplo?

10. Unsay gihimo ni Jesus dihang nakaatubang siyag inhustisya? (1 Pedro 2:​21-23)

¹⁰ Basaha ang 1 Pedro 2:​21-23. b Si Jesus naghatag ug hingpit nga ehemplo nga makatabang nato dihang makaatubang tag inhustisya. Nahibalo siya kon kanus-a mohilom ug kon kanus-a mosulti. (Mat. 26:​62-64) May mga higayon nga magpakahilom ra siya bisag sayop ang mga akusasyon batok niya. (Mat. 11:19) Dihang motubag siya sa iyang mga maglulutos, wala niya sila insultoha o hulgaa. Nagpakita gyod siyag pagpugong sa kaugalingon kay “gisalig niya ang iyang kaugalingon sa Usa nga nagahukom sa matarong nga paagi.” Nahibalo siya nga nakita ni Jehova kining tanan. Misalig siya nga tul-iron ra ni Jehova ang mga inhustisya sa hustong panahon.

11. Unsa ang pipila ka paagi nga makontrol nato ang atong sinultihan? (Tan-awa sab ang mga hulagway.)

¹¹ Masundog nato si Jesus pinaagi sa pagkontrol sa atong sinultihan dihang makasinati tag dili maayong pagtratar. Kon ginagmay ra ang inhustisya, basin puwede ra nato ning palabyon. O kaha puwede tang maghilom aron dili mosamot ang situwasyon. (Eccl. 3:7; Sant. 1:​19, 20) Pero sa ubang mga higayon, basin kinahanglan tang mosulti aron depensahan ang uban o ang kamatuoran. (Buh. 6: 1, 2) Kon mosulti ta, angay tang maningkamot nga magpabiling kalmado ug matinahoron.—1 Ped. 3:15. c

12. Unsaon nato pagpakita nga gisalig nato ang atong kaugalingon sa “Usa nga nagahukom sa matarong nga paagi”?

¹² Masundog sab nato si Jesus kon isalig nato ang atong kaugalingon sa “Usa nga nagahukom sa matarong nga paagi.” Kon akusahan o buhatan ta ug dili maayo sa uban, may pagsalig ta nga nahibalo si Jehova kon unsay tinuod. Makatabang na nato nga malahutay ang dili maayong pagtratar kay nahibalo ta nga sa ngadtongadto tul-iron ra ni Jehova ang mga butang. Kon isalig nato kang Jehova ang tanan, malikayan nato nga maghambin ug kasuko o pagdumot. Sa laing bahin, kon magpadala ta niini nga mga pagbati, basin makahimo tag mga butang nga dili maayo, mawala ang atong kalipay, ug madaot ang atong relasyon kang Jehova.—Sal. 37:8.

13. Unsay makatabang nato nga padayong molahutay sa inhustisya?

¹³ Siyempre, dili gyod nato bug-os masundog ang ehemplo ni Jesus. Usahay, naa tingali tay mahimo o masulti nga atong mahayan sa ulahi. (Sant. 3:2) Naa poy mga inhustisya nga basin nakahatag natog grabeng kasakit ug dili gyod nato malimtan sa tibuok natong kinabuhi niini nga sistema. Kon kanay imong kahimtang, makasalig ka nga nahibalo gyod si Jehova sa tanan nimong kasakit. Ug si Jesus, nga nakasinati sab ug mga inhustisya, nakasabot sa imong gibati. (Heb. 4:​15, 16) Gawas pa sa hingpit nga ehemplo ni Jesus, si Jehova naghatag pod ug praktikal nga mga tambag nga makatabang nato kon makasinati tag inhustisya. Atong hisgotan ang duha ka teksto sa basahon sa Roma nga makatabang nato.

“PASAGDI ANG DIYOS NGA MAGPAKITA SA IYANG KASUKO”

14. Unsay gipasabot sa tambag nga “pasagdi ang Diyos nga magpakita sa iyang kasuko”? (Roma 12:19)

¹⁴ Basaha ang Roma 12:19. Gitambagan ni apostol Pablo ang mga Kristohanon: “Pasagdi ang Diyos nga magpakita sa iyang kasuko.” Mapadapat nato ni nga tambag kon tugotan nato si Jehova nga magpatuman sa hustisya sa iyang gitakdang panahon ug sa iyang kaugalingong paagi. Ang brader nga si John nga nakasinatig inhustisya miingon: “Kinahanglan gyod nakong pugngan ang akong kaugalingon aron dili manimalos. Ang Roma 12:19 nakatabang nako nga maghulat kang Jehova.”

15. Nganong maayo gyod nga hulaton nato nga si Jehova maoy motul-id sa inhustisya?

¹⁵ Makabenepisyo ta kon hulaton nato nga si Jehova ang motul-id sa inhustisya. Kon buhaton nato na, malikayan nato nga mabug-atan ug ma-stress sa pagsigeg hunahuna nga sulbaron ang problema. Si Jehova gusto gyong motabang nato. Samag miingon siya, ‘Ako nay bahala sa inhustisya; sulbaron nako ni.’ Kon mosalig ta sa giingon ni Jehova nga “baslan nako sila,” dili na ta magsigeg hunahuna sa gihimo niadtong nakapasakit nato, kay kombinsido ta nga sulbaron kini ni Jehova sa pinakamaayong paagi. Mao nay nakatabang kang John, nga gihisgotan ganiha. Siya miingon: “Maayo gyod ang resulta kon maghulat ko kang Jehova, imbes akoy mosulbad sa problema.”

“PADAYONG DAOGA ANG DAOTAN PINAAGI SA MAAYO”

16-17. Sa unsang paagi ang pag-ampo makatabang nato nga ‘padayong madaog ang daotan pinaagi sa maayo’? (Roma 12:21)

¹⁶ Basaha ang Roma 12:21. Gitambagan sab ni Pablo ang mga Kristohanon nga ‘padayong daogon ang daotan pinaagi sa maayo.’ Sa Wali  sa Bukid, si Jesus miingon: “Padayon sa paghigugma sa inyong mga kaaway ug sa pag-ampo alang niadtong naglutos kaninyo.” (Mat. 5:44) Mao gyod nay gihimo ni Jesus. Hunahunaa ang grabeng pag-antos ni Jesus dihang gilansang siya sa Romanong mga sundalo diha sa estaka. Imadyina kon unsa to ka sakit para niya ug kon unsa ka grabe ang pagpakaulaw ug inhustisya nga iyang naagoman.

¹⁷ Bisan pa niana, si Jesus wala gyod magpadaog sa inhustisya nga iyang nasinatian. Imbes mohangyo nga silotan ang maong mga sundalo, siya miampo: “Amahan, pasayloa sila, kay wala sila mahibalo sa ilang ginabuhat.” (Luc. 23:34) Kon iampo nato kadtong mga nakapasakit nato, makatabang ni aron mahimo tang kalmado ug anam-anam nga mawala ang atong kasuko. Makatabang pa gani ni aron mausab ang atong panglantaw kanila.

18. Sa unsang paagi ang pag-ampo nakatabang kang Alberto ug John aron malahutay ang inhustisya?

¹⁸ Ang pag-ampo nakatabang kang Alberto ug John aron malahutay ang mga inhustisya nga ilang nasinatian. Si Alberto miingon: “Akong giampo ang mga igsoon nga nakapasakit nako. Kadaghan kong nag-ampo kang Jehova nga tabangan ko nga makalimtan na ang nahitabo.” Makapalipay kay karon si Alberto aktibo nang nag-alagad kang Jehova. Si John miingon: “Kadaghan nakong giampo ang brader nga nakapasakit nako. Ang maong mga pag-ampo nakatabang nga mahimong positibo ang akong panglantaw niya. Nakatabang pod ni aron mabatonan nako ang kalinaw sa hunahuna.”

19. Unsay kinahanglan natong buhaton hangtod nga dili pa matapos kini nga sistema? (1 Pedro 3:​8, 9)

¹⁹ Posibleng makaatubang pa ta ug daghang inhustisya hangtod nga dili pa matapos kini nga sistema. Bisag unsa pay atong masinatian, dili gyod ta moundang sa pagpangayog tabang kang Jehova pinaagi sa pag-ampo. Dugang pa, hinaot sundogon nato ang ehemplo ni Jesus sa pag-atubang sa inhustisya ug padayong ipadapat ang mga prinsipyo sa Bibliya. Kon ato nang himoon, seguradong panalanginan gyod ta ni Jehova.—Basaha ang 1 Pedro 3:​8, 9.