TUN-ANANG ARTIKULO 45
AWIT 138 Ang Katahom sa Ulo nga Ubanon
Maalamong mga Tambag Gikan sa Matinumanong mga Alagad
“Dili ba ang kaalam anaa sa mga tigulang, ug dili ba ang pagsabot anaa niadtong taas ug kinabuhi?”—JOB 12:12.
POKUS
Ang pagkamasinugtanon kang Jehova nga Diyos moresultag mga panalangin karon ug kinabuhing walay kataposan sa umaabot.
1. Nganong makakat-on ta sa mga edaran?
KITANG tanan nagkinahanglag giya sa paghimog importanteng mga desisyon. Sagad madawat nato ni nga giya gikan sa mga ansiyano ug uban pang hamtong nga mga Kristohanon. Kon mas edaran sila kay kanato, dili ta angayng maghunahuna nga ang ilang mga tambag kinaraan na. Gusto ni Jehova nga makakat-on ta gikan sa mga edaran. Mas daghan na silag eksperyensiya, ug sagad mas lalom na ang ilang pagsabot ug kaalam kon itandi kanato.—Job 12:12.
2. Unsay atong hisgotan niini nga artikulo?
2 Sa panahon sa Bibliya, si Jehova migamit ug matinumanon ug edaran nga mga alagad sa pagdasig ug paggiya sa iyang katawhan. Konsideraha pananglitan si Moises, David, ug apostol Juan. Nagkinabuhi sila sa managlahi nga panahon, ug managlahi pod kaayo ang ilang kahimtang. Sa dihang hapit na matapos ang ilang kinabuhi, naghatag silag maalamong tambag sa mga mas bata nila. Gipasiugda niining matinumanon ug edaran nga mga alagad ang kaimportante sa pagkamasinugtanon sa Diyos. Gipasulat ni Jehova ang ilang maalamong mga tambag aron makabenepisyo ta karon. Batan-on man ta o tigulang, daghan tag makat-onan sa pagkonsiderar sa ilang mga tambag. (Roma 15:4; 2 Tim. 3:16) Niining artikuloha, konsiderahon nato ang kataposang mga tambag niining tulo ka edarang mga alagad ug ang mga leksiyon nga atong makat-onan gikan niana.
“MAGDUGAY MO SA YUTA”
3. Unsay mga responsibilidad ni Moises?
3 Si Moises bug-os nga nag-alagad kang Jehova. Siya nag-alagad ingong propeta, maghuhukom, komandante, ug historyano. Si Moises daghan gyod ug eksperyensiya sa kinabuhi! Siya ang nanguna sa pagpagawas sa nasod sa Israel gikan sa pagkaulipon sa Ehipto ug nasaksihan niya ang daghang milagro ni Jehova. Siya ang gigamit ni Jehova sa pagsulat sa unang lima ka basahon sa Bibliya, sa Salmo 90, ug tingali sa Salmo 91. Lagmit siya pod ang nagsulat sa basahon sa Job.
4. Kinsay gipalig-on ni Moises, ug ngano?
4 Sa dihang hapit nang mamatay si Moises sa edad nga 120, gitigom niya ang tanang Israelinhon ug gipahinumdoman sila sa mga butang nga ilang nakita ug naeksperyensiyahan. Daghang tuig sa miagi, ang pipila nila nakasaksi sa mga ilhanan ug milagro nga gihimo ni Jehova apil na sa iyang mga paghukom sa Ehipto. (Ex. 7:3, 4) Milabang sila sa nabahin nga tubig sa Pulang Dagat ug nakita nila ang kalaglagan sa kasundalohan sa Paraon. (Ex. 14:29-31) Sa kamingawan, nasinatian nila ang proteksiyon ug pag-atiman ni Jehova. (Deut. 8:3, 4) Karon nga ang Israel hapit nang mosulod sa Yutang Saad, gipahimuslan ni Moises ang kahigayonan aron palig-onon sila sa kataposang higayon. a
5. Unsang pasalig ang giingon ni Moises sa mga Israelinhon nga mabasa sa Deuteronomio 30:19, 20?
5 Unsay giingon ni Moises? (Basaha ang Deuteronomio 30:19, 20.) Gipahinumdoman ni Moises ang nasod sa Israel nga naa silay nindot nga paglaom sa umaabot. Uban sa panalangin ni Jehova, ang mga Israelinhon puwedeng mabuhig dugay sa yuta nga gisaad kanila. Nindot ug mabungahon kaayo to nga yuta! Bahin niini, si Moises miingon: “Dagko ug nindot nga mga siyudad nga dili ikaw ang nagtukod, mga balay nga punog maayong mga butang nga wala nimo hagoi, mga gahong nga pondohanag tubig nga wala nimo kubkoba, mga ubasan ug kaolibohan nga wala nimo itanom.”—Deut. 6:10, 11.
6. Nganong gitugotan sa Diyos nga masakop sa ubang mga nasod ang Israel?
6 Si Moises naghatag pod ug pasidaan sa mga Israelinhon. Aron padayon silang makapuyo sa mabungahong yuta, kinahanglan nilang sundon ang mga sugo ni Jehova. Gidasig sila ni Moises nga ‘pilion gayod ang kinabuhi’ pinaagi sa pagpaminaw kang Jehova ug sa “pag-unong kaniya.” Pero, gisalikway sa mga Israelinhon si Jehova. Mao nga sa ngadtongadto, gitugotan sa Diyos ang mga taga-Asirya ug sa ulahi ang mga taga-Babilonya nga sakopon ug dad-on sila ingong binihag.—2 Hari 17:6-8, 13, 14; 2 Cron. 36:15-17, 20.
7. Unsay atong makat-onan sa giingon ni Moises? (Tan-awa sab ang hulagway.)
7 Unsay atong makat-onan? Ang pagkamasinugtanon moresultag kinabuhing walay kataposan. Sama nga ang mga Israelinhon kaniadto hapit nang makasulod sa Yutang Saad, kita pod hapit nang mosulod sa gisaad sa Diyos nga bag-ong kalibotan, diin atong makita nga mahimong paraiso ang yuta. (Isa. 35:1; Luc. 23:43) Ang Yawa ug ang iyang mga demonyo mawala na. (Pin. 20:2, 3) Wala na ang bakak nga relihiyon nga magpahilayo sa katawhan gikan kang Jehova. (Pin. 17:16) Wala nay mga gobyerno nga magdaogdaog sa ilang mga sakop. (Pin. 19:19, 20) Kadtong dili magpasakop kang Jehova dili niya tugotan nga magpuyo sa Paraiso. (Sal. 37:10, 11) Nianang panahona, ang tanang tawo mosunod sa matarong nga mga balaod ni Jehova, nga moresultag panaghiusa ug kalinaw. Busa sila maghigugmaay ug mosalig sa usag usa. (Isa. 11:9) Pagkanindot niana nga paglaom! Ug dili kay kana lang. Kon magmasinugtanon ta kang Jehova, padayon tang mabuhi sa paraisong yuta dili lang sa gatosan ka tuig kondili hangtod sa hangtod.—Sal. 37:29; Juan 3:16.
Kon magmasinugtanon ta kang Jehova, mabuhi ta sa paraisong yuta dili lang sa gatosan ka tuig kondili hangtod sa hangtod (Tan-awa ang parapo 7)
8. Sa unsang paagi ang saad nga kinabuhing walay kataposan nakatabang sa usa ka dugay nang misyonaryo? (Judas 20, 21)
8 Kon kanunay natong hunahunaon ang gisaad sa Diyos nga kinabuhing walay kataposan, mapalihok gyod ta nga mounong niya bisag unsa pang pagsulay ang atong maatubang. (Basaha ang Judas 20, 21.) Kana nga saad motabang pod nato sa pagsukol sa atong mga kahuyangan. Ang usa ka dugay nang misyonaryo sa Africa nga nakigbisog sa iyang kahuyangan miingon: “Nahibalo ko nga kon magpadaog ko sa akong kahuyangan, posibleng mawala ang akong paglaom nga mabuhi hangtod sa hangtod. Mao nga naningkamot gyod ko nga masuklan kini. Kanunay kong nag-ampo kang Jehova. Ug pinaagi sa iyang tabang, nadaog ra gyod nako ang akong kahuyangan.”
“IKAW MAGMALAMPOSON”
9. Unsang mga pagsulay ang naeksperyensiyahan ni David?
9 Si David maayo kaayo nga hari. Usa pod siya ka musikero, magbabalak, sundalo, ug propeta. Nakaeksperyensiya si David ug daghang pagsulay. Sulod sa daghang tuig, nagtagotago siya tungod kang Haring Saul nga gustong mopatay niya. Dihang hari na si David, may higayon nga kinahanglan na pod siyang moikyas kay gustong ilogon sa iyang anak nga si Absalom ang iyang trono. Bisan pa sa mga kalisdanan ug kasaypanan ni David, nagmaunongon siya sa Diyos sa tibuok niyang kinabuhi. Si Jehova miingon nga siya “usa ka tawo nga gikahimut-an sa [Iyang] kasingkasing.” Busa haom lang gyod nga paminawon ang tambag ni David!—Buh. 13:22; 1 Hari 15:5.
10. Nganong gitambagan ni David ang iyang anak ug manununod sa trono nga si Solomon?
10 Konsideraha pananglitan ang tambag nga gihatag ni David sa iyang anak ug manununod sa trono nga si Solomon. Kini nga batan-on ang gipili ni Jehova nga padayong manguna sa matuod nga pagsimba ug sa pagtukod ug templo nga magpasidungog sa Diyos. (1 Cron. 22:5) Si Solomon makaatubang ug mga kalisdanan. Unsay gitambag ni David kaniya? Atong tan-awon.
11. Base sa 1 Hari 2:2, 3, unsang pasalig ang gihatag ni David kang Solomon, ug sa unsang paagi natinuod ni? (Tan-awa sab ang hulagway.)
11 Unsay giingon ni David? (Basaha ang 1 Hari 2:2, 3.) Giingnan ni David ang iyang anak nga kon magmasinugtanon siya kang Jehova, molampos gyod siya. Ug sulod sa daghang tuig, mao gyod nay nasinatian ni Solomon. (1 Cron. 29:23-25) Pananglitan, nakatukod siya ug nindot kaayo nga templo ug nakasulat ug pipila ka basahon sa Bibliya. Nailado pod siya tungod sa iyang kaalam ug kadato. (1 Hari 4:34) Pero sama sa giingon ni David, magmalamposon lang si Solomon kon padayon siyang magmasinugtanon kang Jehova nga Diyos. Makapaguol kay sa dihang natigulang na si Solomon, misimba siya sa laing mga diyos. Busa wala na siya uyoni ni Jehova ug wala na hatagig kaalam. Tungod niana, dili na matarong ug dili na patas ang iyang paagi sa pagmando sa katawhan.—1 Hari 11:9, 10; 12:4.
Ang tambag nga gihatag ni David sa iyang anak nga si Solomon motabang nato nga makita nga kon magmasinugtanon ta kang Jehova, hatagan ta Niyag kaalam sa paghimog maayong mga desisyon (Tan-awa ang parapo 11-12) b
12. Unsay atong makat-onan sa giingon ni David?
12 Unsay atong makat-onan? Ang pagkamasinugtanon moresultag kalamposan. (Sal. 1:1-3) Siyempre, si Jehova wala magsaad nga himoon ta niyang dato ug ilado sama kang Solomon. Pero kon magmasinugtanon ta sa atong Diyos, hatagan ta niyag kaalam aron makahimo tag maayong mga desisyon. (Prov. 2:6, 7; Sant. 1:5) Ang iyang mga prinsipyo makagiya nato dihang maghimo tag mga desisyon bahin sa trabaho, edukasyon, kalingawan, ug kuwarta. Ang pagpadapat niana nga mga prinsipyo manalipod sa atong relasyon kang Jehova. (Prov. 2:10, 11) Makatabang pod ni aron makabaton tag maayong mga higala ug magmalipayon ang atong pamilya.
13. Unsay nakatabang kang Carmen nga magmalamposon sa kinabuhi?
13 Si Carmen, nga taga-Mozambique, nagtuo nga ang taas nga edukasyon mao ang makatabang niya nga magmalamposon. Mieskuwela siya sa unibersidad aron mahimong architect. Siya miingon: “Ganahan kaayo ko sa akong kurso. Pero nakahurot ni sa akong panahon ug kusog. Naa ko sa eskuwelahan gikan sa alas 7:30 sa buntag hangtod sa alas 6 sa gabii. Naglisod na kog tambong sa mga tigom ug naapektohan gyod ang akong espirituwalidad. Naamgohan nako nga nag-alagad ko sa duha ka agalon.” (Mat. 6:24) Giampo niya ang iyang kahimtang ug nag-research sa atong mga publikasyon. Siya midugang: “Nakadawat kog maayong tambag gikan sa mga ansiyano ug sa akong mama, maong nakadesisyon ko nga moundang sa pag-eskuwela ug moalagad kang Jehova sa bug-os panahon. Nakatabang ni nako sa paghimog maayong mga desisyon sa kinabuhi, ug wala gyod ko magmahay.”
14. Unsa ang pangunang mensahe ni Moises ug David?
14 Si Moises ug David nahigugma kang Jehova ug nahibalo sila kon unsa ka importante ang pagsunod kaniya. Sa wala pa sila mamatay, gidasig nila ang uban nga sundogon ang ilang ehemplo pinaagi sa pagpabiling matinumanon kang Jehova nga Diyos. Parehas pod silang nagpasidaan nga kadtong mobiya kang Jehova mawad-an sa iyang pag-uyon ug sa mga panalangin nga iyang gisaad. Ang ilang tambag mapuslanon pod karon. Daghang tuig sa ulahi, naay laing alagad ni Jehova nga naghisgot sa kaimportante sa pagpabiling matinumanon sa Diyos.
“WALA NAY MAS MAKAPALIPAY”
15. Unsay mga naeksperyensiyahan ni apostol Juan?
15 Si Juan maoy suod nga apostol ni Jesu-Kristo. (Mat. 10:2; Juan 19:26) Si Juan miuban kang Jesus sa tibuok niyang ministeryo, nakasaksi sa iyang mga milagro, ug miunong niya sa lisod nga mga panahon. Nakita niya si Jesus nga gipatay ug nakita pod niya siya human mabanhaw. Nasaksihan pod ni Juan ang pag-uswag sa Kristohanong kongregasyon sa unang siglo, gikan sa usa lang ka gamayng grupo sa mga matinumanon hangtod nga ang maayong balita ‘nasangyaw sa tibuok kalibotan.’—Col. 1:23.
16. Kinsay nakabenepisyo sa mga sulat ni Juan?
16 Dihang tigulang na kaayo si Juan, nakapribilehiyo siya sa pagsulat ug pipila ka basahon sa Bibliya. Iyang gisulat ang makapahinam nga “pinadayag pinaagi ni Jesu-Kristo.” (Pin. 1:1) Gisulat pod ni Juan ang usa sa mga Ebanghelyo. Ug siya ang nagsulat sa Una, Ikaduha, ug Ikatulong Juan. Sa Ikatulong Juan, gisulatan niya ang matinumanong Kristohanon nga si Gayo, nga giisip ni Juan ingong iyang minahal nga espirituwal nga anak. (3 Juan 1) Gawas kang Gayo, seguradong naa pay uban nga giisip niya ingong espirituwal nga mga anak. Ang gisulat niining maong matinumanon ug tigulang nga lalaki nakapalig-on gyod sa tanang sumusunod ni Jesus hangtod sa atong panahon karon.
17. Base sa 3 Juan 4, unsay makahatag ug dakong kalipay?
17 Unsay gisulat ni Juan? (Basaha ang 3 Juan 4.) Si Juan nagsulat bahin sa kalipay nga resulta sa pagkamasinugtanon sa Diyos. Sa panahon nga gihimo ni Juan ang iyang ikatulong sulat, dunay pipila nga nagpakaylap ug sayop nga mga pagtulon-an ug nagpahinabog pagkabahinbahin. Pero ang uban padayong “nagsubay sa kamatuoran.” Nagmasinugtanon pod sila kang Jehova ug ‘naglakaw sumala sa iyang mga sugo.’ (2 Juan 4, 6) Kining maong matinumanong mga Kristohanon nakapalipay pag-ayo kang Juan ug ilabina kang Jehova.—Prov. 27:11.
18. Unsay atong makat-onan sa giingon ni Juan?
18 Unsay atong makat-onan? Ang pagkamatinumanon moresultag kalipay. (1 Juan 5:3) Pananglitan, malipayon ta kay napalipay nato si Jehova. Malipay siya dihang makita niya nga atong gisuklan ang mga tentasyon sa kalibotan ug gidawat ang kamatuoran. (Prov. 23:15) Malipay pod ang mga anghel sa langit. (Luc. 15:10) Malipay sab ta nga makita ang atong mga igsoon nga nagpabiling matinumanon bisan pag nag-atubang ug mga pagsulay ug tentasyon. (2 Tes. 1:4) Ug dihang matapos na kini nga sistema, magmalipayon gyod ta kay nahibalo ta nga nagmaunongon ta kang Jehova bisan pag ang kalibotan gimandoan ni Satanas.
19. Unsay giingon sa sister nga si Rachel bahin sa pagtudlo sa kamatuoran sa uban? (Tan-awa sab ang hulagway.)
19 Malipay gyod ta kon atong isulti sa uban ang kamatuoran. Si Rachel, nga taga-Dominican Republic, miingon nga dako gyod kaayong pribilehiyo ang pagtudlo sa uban bahin kang Jehova nga Diyos. Daghan siyag natabangan, ug sila nahimong iyang espirituwal nga mga anak. Siya miingon: “Makapalipay kaayo nga makita nga ang akong mga gitudloan anam-anam nga nakakat-on sa paghigugma kang Jehova, misalig na kaniya, ug nag-usab sa ilang kinabuhi aron mapalipay siya. Ang bisan unsang sakripisyo nga akong gihimo sa pagtudlo nila gamay ra kon itandi sa kalipay nga akong gibati sa pagtabang nila.”
Magmalipayon ta kon atong tudloan ang uban nga higugmaon ug sundon si Jehova (Tan-awa ang parapo 19)
MAKABENEPISYO TA SA GISULTI SA MATINUMANONG MGA LALAKI
20. Sa unsang paagi ang atong kahimtang parehas nianang kang Moises, David, ug Juan?
20 Si Moises, David, ug Juan nagkinabuhi sa panahon ug kahimtang nga lahi sa atoa. Pero parehas ta nila sa daghang paagi. Sama nila, kita nag-alagad sa matuod nga Diyos. Kita nag-ampo kang Jehova, nagsalig niya, ug nagpagiya niya. Ug parehas nila, masaligon ta nga si Jehova dagayang magpanalangin niadtong magmasinugtanon kaniya.
21. Unsang mga panalangin ang mabatonan niadtong magpadapat sa tambag ni Moises, David, ug Juan?
21 Busa hinaot nga ipadapat nato ang tambag niining tigulang nga mga lalaki pinaagi sa pagtuman sa mga sugo ni Jehova. Kon himoon nato na, magmalamposon gyod ta. Mabuhi pod tag dugay, oo, hangtod sa hangtod! (Deut. 30:20) Ug magmalipayon ta kay nahibalo ta nga napalipay nato ang atong mahigugmaong langitnong Amahan, kinsa magtuman sa iyang mga saad sa paagi nga labaw pa sa atong gidahom o gihunahuna.—Efe. 3:20.
AWIT 129 Kita Padayong Molahutay
a Ang kadaghanan sa mga Israelinhon nga nakakita sa mga milagro ni Jehova sa Pulang Dagat wala makasulod sa Yutang Saad. (Num. 14:22, 23) Si Jehova midesisyon nga kadtong narehistro nga 20 anyos pataas mamatay sa kamingawan. (Num. 14:29) Pero si Josue, Caleb, ug kadaghanan sa mas batabata nga henerasyon ug sa tribo ni Levi naluwas ug nakakita sa katumanan sa saad ni Jehova dihang ang Israel mitabok sa suba sa Jordan ug misulod sa Canaan.—Deut. 1:24-40.
b HULAGWAY: Wala: Sa wala pa mamatay si David, gihatagan niyag maalamong tambag ang iyang anak nga si Solomon. Tuo: Mga estudyante sa Pioneer Service School natudloan sa kaalam ni Jehova.
