1. Unsay pagbati ni apostol Pablo bahin sa ministeryal nga mga alagad?

 ANG ministeryal nga mga alagad naay importanteng mga buluhaton diha sa kongregasyon. Giapresyar gyod ni apostol Pablo kining maunongong mga lalaki. Pananglitan, sa iyang sulat sa mga Kristohanon sa Filipos, espesipiko niyang gihisgotan ang ministeryal nga mga alagad uban sa mga ansiyano.—Filip. 1:1.

2. Unsay gibati sa brader nga si Luis bahin sa iyang asaynment ingong ministeryal nga alagad?

² Batan-on man o edaran, daghang bawtismadong mga brader ang nalipay pag-ayo sa pag-alagad ingong mga ministeryal. Pananglitan, si Devan 18 anyos dihang natudlo ingong ministeryal. Sa laing bahin, ang brader nga si Luis mga 50 anyos na dihang natudlo siya. Unsay iyang gibati? Siya miingon: “Pribilehiyo kaayo nga mag-alagad ingong ministeryal, ilabina dihang maghunahuna ko sa gugma nga gipakita kanako sa kongregasyon!” Mao pod nay gibati sa daghang ministeryal nga alagad.

3. Unsa nga mga pangutana ang atong konsiderahon?

³ Kon bawtismado ka nga brader ug dili pa ministeryal nga alagad, puwede ba nimo ni himoong tumong? Unsay magpalihok nimo nga mangab-ot? Ug unsa nga mga kuwalipikasyon diha sa Bibliya ang angay nimong kab-oton? Niining artikuloha, atong konsiderahon ang tubag sa maong mga pangutana. Pero hisgotan una nato kon unsay mga responsibilidad sa ministeryal nga alagad.

UNSAY MGA RESPONSIBILIDAD SA MINISTERYAL NGA ALAGAD?

4. Unsay mga responsibilidad sa ministeryal nga alagad? (Tan-awa sab ang hulagway.)

⁴ Ang ministeryal nga alagad maoy bawtismadong brader nga gitudlo sa balaang espiritu aron tabangan ang mga ansiyano sa  praktikal nga paagi diha sa kongregasyon. Ang ubang ministeryal nga alagad giasayn sa pagseguro nga ang mga magmamantala naay teritoryo nga masangyawan ug igong literatura nga magamit. Ang uban nagtabang sa paghinlo ug pagmentinar sa Kingdom Hall. Nag-alagad pod sila ingong mga attendant ug tig-operate sa audio/video panahon sa tigom. Busa sagad, ginahimo sa ministeryal nga mga alagad ang praktikal nga mga buluhaton diha sa kongregasyon. Pero labaw sa tanan, ang ministeryal nga mga alagad maoy espirituwal nga mga tawo; ilang gihigugma si Jehova ug nagkinabuhi sila uyon sa iyang matarong nga mga sukdanan. Ug gimahal kaayo nila ang mga igsoon. (Mat. 22:​37-39) Unsay kinahanglang himoon sa usa ka bawtismadong brader aron mahimong ministeryal nga alagad?

5. Unsay kinahanglang himoon sa usa ka brader aron makab-ot ang iyang tumong nga mahimong ministeryal?

⁵ Gihisgotan sa Bibliya ang mga kuwalipikasyon aron ang usa mahimong ministeryal nga alagad. (1 Tim. 3:​8-10, 12, 13) Kon gusto kang mahimong ministeryal, puwede nimong tun-an kini nga mga kuwalipikasyon ug maningkamot nga makab-ot kini. Pero kinahanglang susihon una nimo ang imong motibo kon nganong gusto nimong mahimong ministeryal.

UNSAY MAGPALIHOK NIMO NGA MANGAB-OT?

6. Unsay angayng magpalihok nimo sa pag-alagad sa mga igsoon? (Mateo 20:28; tan-awa sab ang hulagway.)

⁶ Hunahunaa ang atong pinakamaayong ehemplo, si Jesu-Kristo. Ang tanan niyang gihimo maoy tungod sa iyang gugma sa iyang Amahan ug sa mga tawo. Kana nga gugma ang rason kon nganong nagkugi siya ug mihimog mga butang nga giisip sa uban nga ubos. (Basaha ang Mateo 20:28; Juan 13:​5, 14, 15) Kon tungod sa gugma gusto kang mahimong ministeryal nga alagad, panalanginan ug tabangan ka ni Jehova nga makab-ot kana.—1 Cor. 16:14; 1 Ped. 5:5.

7. Nganong dili maayo nga ang mga brader mangab-ot ug pribilehiyo tungod sa hakog nga motibo?

⁷ Sa kalibotan, sagad nga ginadayeg sa mga tawo kadtong taas ug panglantaw sa ilang kaugalingon. Pero dili ingon ana sa organisasyon ni Jehova. Sama kang Jesus, ang brader nga gipalihok sa gugma dili mangandoy nga molabaw o magharihari sa uban o kaha magpakaimportante sa kaugalingon. Kon hakog ang motibo sa  usa nga matudlo sa kongregasyon, posible nga dili niya himoon ang ubos nga mga buluhaton nga gikinahanglan sa pag-atiman sa bililhong mga karnero ni Jehova. Maghunahuna tingali siya nga importante ra kaayo siya para himoon ang maong mga butang. (Juan 10:12) Dili gyod panalanginan ni Jehova ang mga paningkamot niadtong mga mapahitas-on o hakog ug motibo.—1 Cor. 10:​24, 33; 13:​4, 5.

8. Unsang tambag ang gihatag ni Jesus sa iyang mga apostoles?

⁸ Dihay mga panahon nga bisan gani ang pinakasuod nga mga higala ni Jesus nangab-ot ug mga pribilehiyo tungod sa sayop nga mga motibo. Pananglitan, ang duha sa mga apostoles ni Jesus, si Santiago ug Juan, mihangyo niya nga hatagan silag espesyal nga posisyon sa iyang Gingharian. Wala sila komendahi ni Jesus sa ilang gihimo. Hinuon, giingnan niya ang iyang 12 ka apostoles: “Kadtong buot mahimong labaw kaninyo kinahanglang mag-alagad kaninyo, ug kadtong buot mahimong una kaninyo kinahanglang magpaulipon sa tanan.” (Mar. 10:​35-37, 43, 44) Ang mga brader nga mangab-ot ug mga pribilehiyo uban ang hustong motibo—ang pag-alagad sa uban—mahimo gyong panalangin sa kongregasyon.—1 Tes. 2:8.

UNSAY MAKAPALIG-ON SA IMONG TINGUHA NGA MANGAB-OT UG MGA PRIBILEHIYO?

9. Unsaon nimo pagpalig-on ang imong tinguha nga mangab-ot ug mga pribilehiyo?

⁹ Segurado nga gimahal nimo si Jehova ug gusto nimong alagaran ang uban. Pero basig dili pa ingon ana ka lig-on ang imong tinguha sa paghimog dugang sa pag-alagad ingong ministeryal. Kon mao, unsay imong mahimo? Puwede nimong hunahunaon ang kalipay nga resulta sa imong pag-alagad sa mga igsoon. Si Jesus miingon: “Dunay labaw nga kalipay sa paghatag kay sa pagdawat.” (Buh. 20:35) Ug nagkinabuhi gyod siya uyon niini nga prinsipyo. Nabatonan niya ang tinuod nga kalipay sa pag-alagad sa uban, ug mabatonan sab na nimo.

10. Giunsa pagpakita ni Jesus nga nalipay siya nga alagaran ang uban? (Marcos 6:​31-34)

¹⁰ Konsideraha ang usa ka pananglitan kon giunsa pagpakita ni Jesus nga nalipay siya nga alagaran ang uban. (Basaha ang Marcos 6:​31-34.) Dihay higayon nga gikapoy si Jesus ug ang iyang mga apostoles maong nangadto sila sa usa ka mingaw nga dapit aron mopahulay kadiyot. Pero ang mga tawo nga gustong magpatudlo kang Jesus una pang nakaabot didto. Puwede unta siyang mobalibad kay siya ug ang iyang mga tinun-an “wala [nay] higayon bisan sa pagpangaon.” Puwede pod unta niya silang palakwon human siya makatudlo nilag pipila ka kamatuoran. Pero kay napalihok si Jesus sa gugma, “gitudloan niya sila ug daghang butang.” Ug nagpadayon siyag tudlo kanila bisag “hapon na kaayo.” (Mar. 6:35) Iya nang gihimo, dili tungod kay obligado siya, kondili tungod kay “naluoy siya kanila.” Gusto niya silang tudloan kay gimahal niya sila. Ang pag-alagad sa uban nakapalipay gyod kang Jesus.

11. Unsang praktikal nga tabang ang gihatag ni Jesus sa mga tawo? (Tan-awa sab ang hulagway.)

¹¹ Wala lang basta tudloi ni Jesus ang mga tawo. Giatiman pod niya ang ilang pisikal nga panginahanglan. Iya silang gitagan-an ug pagkaon sa milagrosong paagi, ug dayon gisugo niya ang iyang mga tinun-an nga iapod-apod kini. (Mar. 6:41) Pinaagi niana, gitudloan ni Jesus ang iyang mga tinun-an sa pag-alagad sa uban. Gipakita pod niya nga importante ang paghatag ug praktikal nga tabang, sama nianang ginahimo sa mga ministeryal. Imadyina ang kalipay sa mga apostoles kay nakatabang sila kang Jesus sa pagtaganag pagkaon hangtod nga ang “tanan nangaon ug nangabusog.” (Mar. 6:42) Siyempre, dili lang kini ang higayon nga giuna ni Jesus ang kaayohan sa  uban kay sa iyang kaugalingon. Gigamit niya ang iyang kinabuhi dinhi sa yuta sa pag-alagad sa uban. (Mat. 4:23; 8:16) Nalipay pag-ayo si Jesus sa pagtudlo kanila ug sa pag-atiman sa ilang panginahanglan. Seguradong maeksperyensiyahan pod nimo ang maong kalipay kon mangab-ot ka nga mahimong ministeryal nga alagad uban ang hustong motibo.

12. Nganong dili ta angayng mobati nga wala kaayo tay mahimo para sa kongregasyon?

¹² Kon gibati nimo nga wala kay espesyal nga katakos, ayawg kaluya. Seguradong naa kay mga hiyas nga dakog ikatabang sa kongregasyon. Makabenepisyo ka sa pagpamalandong sa giingon ni Pablo sa 1 Corinto 12:​12-30 ug sa pag-ampo bahin niana. Ang giingon ni Pablo klarong nagpakita nga ikaw, sama sa tanang alagad ni Jehova, naay importanteng papel sa kongregasyon. Pero kon wala pa nimo makab-ot ang mga kuwalipikasyon sa pag-alagad ingong ministeryal, ayawg kaluya. Hinuon, himoa ang imong maarangan sa pag-alagad kang Jehova ug sa pagtabang sa mga igsoon. Makasalig ka nga konsiderahon sa mga ansiyano ang imong mga katakos ug limitasyon ug hatagan kag asaynment nga kaya nimong himoon.—Roma 12:​4-8.

13. Unsay atong ikaingon bahin sa mga kuwalipikasyon para sa tinudlong mga lalaki?

¹³ Niay usa pa ka rason kon nganong angay kang mangab-ot nga mokuwalipikar ingong ministeryal nga alagad: Ang mga kuwalipikasyon dili lisod kab-oton kay kadaghanan niini maoy mga kuwalipikasyon para sa tanang Kristohanon. Ang tinuod, ang tanang Kristohanon kinahanglang makigsuod kang Jehova, malipay sa pagpanghatag, ug magpakitag maayong ehemplo sa pagkinabuhi ingong Kristohanon. Busa unsay kinahanglang himoon sa usa ka brader aron makab-ot ang tumong nga mahimong ministeryal nga alagad?

KON UNSAY HIMOON ARON MOKUWALIPIKAR INGONG MINISTERYAL

14. Unsay gipasabot sa pagkahimong “seryoso”? (1 Timoteo 3:​8-10, 12)

¹⁴ Karon, atong konsiderahon ang pipila sa mga kuwalipikasyon nga gihisgotan sa 1 Timoteo 3:​8-10, 12. (Basaha.) Ang usa ka ministeryal nga alagad kinahanglang “seryoso.” Ang maong pulong puwede sab hubaron nga “takos sa pagtahod” o “responsable.” Wala ni magpasabot nga dili na ka puwedeng mokatawa o mangomedya. (Eccl. 3:​1, 4) Pero kinahanglang seryoso nimong tumanon ang tanan nimong  responsibilidad. Kon nailhan ka nga kasaligan, madawat nimo ang pagtahod sa kongregasyon.

15. Unsay kahulogan sa “dili duhay sinultihan” ug “dili magtinguha nga mamentaha”?

¹⁵ Ang mga pulong nga “dili duhay sinultihan” nagpasabot nga sinsero ka, matinud-anon, ug kasaligan. Motuman ka sa imong mga saad, ug dili nimo ilaron ang uban. (Prov. 3:32) Ang “dili magtinguha nga mamentaha” nagpasabot nga matinud-anon ka sa imong mga transaksiyon sa negosyo ug sa paggunit ug kuwarta. Dili nimo pahimuslan ang imong maayong relasyon sa mga igsoon aron lang makakuwarta.

16. (a) Unsay gipasabot sa “dili magpalabig inom ug bino”? (b) Unsay gipasabot sa pagbaton ug “hinlong konsensiya”?

¹⁶ Ang “dili magpalabig inom ug bino” nagpasabot nga dili ka palahubog ug wala pod ka nailhan nga palainom. Ang pagbaton ug “hinlong konsensiya” nagpasabot nga nagkinabuhi ka uyon sa mga sukdanan ni Jehova. Bisag dili ka hingpit, naa kay kalinaw sa hunahuna tungod sa imong maayong relasyon sa Diyos.

17. Unsaon pagpakita sa brader nga kasaligan siya dihang siya “sulayan kon angayan ba”? (1 Timoteo 3:10; tan-awa sab ang hulagway.)

¹⁷ Ang “sulayan kon angayan ba” nagpasabot nga imo nang napamatud-an nga masaligan ka ug mga responsibilidad. Mao nga kon hatagan ka sa mga ansiyano ug asaynment, sunda pag-ayo ang ilang instruksiyon ug ang giya nga gitagana sa organisasyon. Seguroa nga nasabtan nimo kon unsay kinahanglan nimong himoon ug kon kanus-a nimo ni angayng humanon. Samtang magkugi ka sa imong mga asaynment, mamatikdan ni sa kongregasyon ug ilang makita ang imong pag-uswag. Mga ansiyano, magmaabtik sa pagbansay sa bawtismadong mga brader. (Basaha ang 1 Timoteo 3:10.) Naa bay mga tin-edyer o batabata pa nga bawtismadong mga brader sa inyong kongregasyon? Naa ba silay maayong rutina sa personal nga pagtuon? Regular ba silang mokomento sa mga tigom ug makigbahin sa ministeryo? Kon mao, hatagi silag mga asaynment nga haom sa ilang edad ug kahimtang. Niining paagiha, kini nga mga brader ‘masulayan kon angayan ba.’ Dayon pag-abot sa panahon, bisag batan-on pa sila, basin puwede na silang mokuwalipikar ingong ministeryal nga mga alagad.

18. Unsay gipasabot sa “walay akusasyon”?

¹⁸ Ang “walay akusasyon” nagpasabot nga walay balidong sumbong bahin sa usa ka seryosong sala ang mapasaka batok nimo. Siyempre, ang usa ka Kristohanon posibleng  butangbutangan. Gani si Jesus gibutangbutangan pod, ug iyang gitagna nga ang iyang mga sumusunod makasinati sab niana. (Juan 15:20) Pero kon maningkamot ka nga magpabiling hinlo sa moral sama kang Jesus, makabaton kag maayong reputasyon sa kongregasyon.—Mat. 11:19.

19. Unsay gipasabot sa “usa ray asawa”?

¹⁹ “Usa ray asawa.” Kon minyo ka, kinahanglang sundon nimo ang orihinal nga sukdanan ni Jehova sa kaminyoon—usa ka lalaki para sa usa ka babaye. (Mat. 19:​3-9) Ang Kristohanong lalaki dili gyod angayng mohimog seksuwal nga imoralidad. (Heb. 13:4) Gawas pa niana, kinahanglang maunongon sab ka sa imong asawa ug dili magpakitag romantikong interes sa laing babaye.—Job 31:1.

20. Sa unsang paagi madumala sa usa ka brader ang iyang pamilya “sa maayong paagi”?

²⁰ “Nagdumala sa ilang mga anak ug panimalay sa maayong paagi.” Kon ulo ka sa pamilya, kinahanglang atimanon gyod nimo ang imong mga responsibilidad. Himoang regular ang inyong pamilyahanong pagsimba. Pakigpartner sa kada membro sa imong pamilya diha sa pagsangyaw kutob sa imong maarangan. Tabangi ang imong mga anak nga makaugmad ug suod nga relasyon kang Jehova. (Efe. 6:4) Kon ang brader makaatiman sa iyang pamilya, nagpakita ni nga makaatiman sab siya sa kongregasyon.—Itandi ang 1 Timoteo 3:5.

21. Kon dili pa ka ministeryal nga alagad karon, unsay puwede nimong himoon?

²¹ Mga brader, kon dili pa mo ministeryal nga alagad karon, pamalandonga pag-ayo kini nga artikulo ug iampo ni kang Jehova. Tun-i ang mga kuwalipikasyon para sa ministeryal nga alagad ug paningkamot nga makab-ot kini. Hunahunaa kon unsa ka dako ang imong gugma kang Jehova ug sa mga igsoon. Palig-ona ang imong tinguha nga alagaran sila. (1 Ped. 4:​8, 10) Kon alagaran nimo ang mga igsoon, mobati gyod kag dakong kalipay. Hinaot dagayang panalanginan ni Jehova ang imong mga paningkamot nga makab-ot ang imong tumong!—Filip. 2:13.