MALISDAN ba ka usahay sa pagtuon nga regular? Naa bay panahon nga laayan kang magtuon? Tingali ingon ana ta usahay. Pero hunahunaa ang ubang butang nga regular natong ginahimo, sama sa pagkaligo. Ang paghinlo sa atong kaugalingon nagkinahanglag panahon ug paningkamot, pero marepreskohan gyod ta pagkahuman! Ingon ana pod ang pagtuon sa Bibliya. Makarepresko ni, kay samag gihinloan nato ang atong kaugalingon “pinaagi sa paghugas niini sa pulong sa Diyos.” (Efe. 5:26) Hunahunaa ang pipila ka sugyot nga makatabang nato:

• Paghimog eskedyul. Ang personal nga pagtuon apil sa “mas importanteng mga butang” nga dili angayng balewalaon sa usa ka Kristohanon. (Filip. 1:10) Aron masunod nimo ang imong eskedyul, puwede nimo ning ibutang kon asa ni mas daling makita, sama sa bulletin board o sa gawas sa refrigerator. Makatabang pod kon mag-set kag alarm sa imong gadget aron mapahinumdoman ka nga hapit na ang oras sa imong pagtuon.

• Ipahaom sa imong kahimtang. Mas makapokus ba ka kon mogahin kag taastaas nga panahon sa pagtuon, o mas ganahan ka nga kadali lang ka magtuon pero pipila ka beses? Ikaw ang nahibalo kon unsay mas pabor nimo, maong planoha ang imong eskedyul sa pagtuon base sa kon unsay mohaom sa imong kahimtang. Komosta kon oras na sa imong pagtuon pero wala kay gana? Puwede nimong sulayan nga magtuon bisag 10 minutos lang. Mas maayong magtuon bisag ingon ana lang ka mubo kay sa wala gyod kay matun-an. Ug human sa 10 minutos, basin diay ganahan pa kang mopadayon ug tuon.—Filip. 2:13.

• Pagpili daan ug mga topiko. Kon molingkod na ka aron magtuon pero wala pa ka kabalo kon unsay tun-an, basin dili nimo ‘magamit ang imong panahon sa kinamaayohang paagi.’ (Efe. 5:16) Busa unsa kaha kon maglista kag mga artikulo o topiko nga gusto nimong tun-an? Kon naa pod kay mahunahunaan nga mga pangutana, isulat ni. Ug kada human sa pagtuon, basin naa pa kay madugang sa mga topiko nga gusto nimong tun-an.

• Paghimog mga kausaban kon gikinahanglan. Kon nakita nimo nga naa kay kinahanglang usbon, sama pananglitan kon unsa ka dugay kang magtuon o kon unsang mga topiko ang imong pilion, himoa kana. Ang importante, dili kon kanus-a, unsa ka taas, o unsay atong tun-an, kondili kon regular ba ang atong pagtuon.

Makabenepisyo gyod ta kon regular tang magtuon. Mas masuod ta kang Jehova, makahimo tag maalamong mga desisyon, ug mapalig-on ta.—Jos. 1:8.