1. Nganong takos si Jehova sa atong eksklusibong debosyon?

SI Jehova takos sa atong eksklusibong debosyon kay siya ang atong Maglalalang ug Maghahatag ug Kinabuhi. (Pin. 4:11) Pero, dunay kapeligrohan. Bisag atong gihigugma ug gitahod si Jehova, basin dili nato mahatag ang eksklusibong debosyon nga angay kaniya. Kinahanglang masabtan nato kon sa unsang paagi posibleng mahitabo kana. Pero, hisgotan una nato kon unsay ipasabot sa paghatag kang Jehova ug eksklusibong debosyon.

² Sa Bibliya, ang paghatag ug debosyon sa Diyos nagpasabot nga gihigugma nato siya pag-ayo. Kon eksklusibo ang atong debosyon kang Jehova, siya lang ang atong simbahon. Dili nato tugotan si bisan kinsa o ang bisan unsa nga mopuli sa iyang dapit diha sa atong kasingkasing.​—Basaha ang Exodo 34:14.

3. Nganong may lig-ong basehanan ang atong debosyon kang Jehova?

³ Ang atong debosyon kang Jehova may lig-ong basehanan. Ngano? Tungod kay gibase kini sa kamatuoran nga atong nakat-onan bahin kaniya. Nakadayeg ta sa iyang nindot nga mga hiyas. Nahibalo ta kon unsay iyang gusto ug dili gusto, ug gisundog nato siya. Atong nasabtan ug gipaluyohan ang iyang katuyoan para kanato. Giisip natong pribilehiyo nga gitugotan ta niya nga mahimong iyang higala. (Sal. 25:14) Ang tanan nga  atong nahibaloan bahin sa atong Maglalalang mas nakapasuod nato kaniya.​—Sant. 4:8.

4. (a) Unsay gigamit sa Yawa aron dili ta makahatag kang Jehova ug eksklusibong debosyon? (b) Unsay atong hisgotan niining artikuloha?

⁴ Ang Yawa maoy nagkontrolar niining sistemaha sa mga butang, ug gigamit niya kini aron pukawon ang atong natural nga mga tinguha ug mga kahuyangan. (Efe. 2:1-3; 1 Juan 5:19) Gusto niya nga mabahin ang atong kasingkasing aron dili na eksklusibo ang atong debosyon kang Jehova. Hisgotan nato ang duha ka paagi nga gihimo niya kini. Una, tentalon ta niya sa pagpangagpas ug bahandi, ug ikaduha, impluwensiyahan ta niya sa pagpilig dili maayong kalingawan.

5. Nganong angay tang magbantay batok sa pag-ugmad ug gugma sa kuwarta?

⁵ Gusto natong tanan ug igong pagkaon, haom nga sinina, ug maayong puy-anan. Pero, kinahanglan tang magbantay nga dili makaugmad ug gugma sa kuwarta. Daghan niadtong bahin sa kalibotan ni Satanas ang “mahigugmaon sa kuwarta” ug sa mga butang nga mapalit niana. (2 Tim. 3:2) Si Jesus nahibalo nga mahimong tentalon ang iyang mga sumusunod sa pag-ugmad niini nga gugma. “Walay ulipon nga makaalagad sa duha ka agalon,” miingon si Jesus, “kay dumtan niya ang usa ug higugmaon ang lain, o unongan niya ang usa ug tamayon ang lain. Dili mahimo nga magpaulipon mo sa Diyos ug sa Bahandi.” (Mat. 6:24) Ang usa nga nagsimba kang Jehova pero naggugol sab ug daghan kaayong panahon ug kusog aron madato sama rag nag-alagad sa duha ka agalon. Wala niya ihatag kang Jehova ang eksklusibong debosyon.

6. Unsay atong makat-onan sa giingon ni Jesus sa kongregasyon sa Laodicea?

⁶ Sa hinapos sa unang siglo C.E., ang mga membro sa kongregasyon sa siyudad sa  Laodicea nanghambog: “Dato ko ug nakabatog mga bahandi ug wala na manginahanglan ug bisan unsa pa.” Pero sa panglantaw ni Jehova ug Jesus, sila “alaot, makaluluoy, kabos, buta, ug hubo.” Gitambagan sila ni Jesus, dili tungod kay dato sila, kondili tungod kay ang ilang gugma sa bahandi nakadaot sa ilang relasyon kang Jehova. (Pin. 3:14-17) Kon atong mamatikdan nga nagsugod na pagturok sa atong kasingkasing ang tinguha sa pagpangagpas ug bahandi, kinahanglang molihok dayon ta sa pagtul-id sa atong panghunahuna. (1 Tim. 6:7, 8) Kay kon dili, ang atong kasingkasing mabahin ug dili dawaton ni Jehova ang atong pagsimba. Siya “nangayog eksklusibong debosyon.” (Deut. 4:24) Sa unsang paagi tingali mawala ang atong balanseng panglantaw sa kuwarta?

7-9. Unsay imong nakat-onan sa eksperyensiya sa ansiyano nga si David?

⁷ Tagda pananglitan ang usa ka kugihang ansiyano sa United States, si David. Siya miingon nga kugihan siya nga empleyado. Siya napromot sa kompaniya nga iyang gitrabahoan ug giisip ingong usa sa kinamaayohan sa iyang nasod nianang trabahoa. “Nianang panahona, naghunahuna ko nga ang akong kalamposan maoy pamatuod sa panalangin ni Jehova,” matod ni David. Pero panalangin ba gyod?

⁸ Anam-anam nga naamgohan ni David nga ang iyang trabaho nakadaot sa iyang relasyon kang Jehova. “Panahon sa tigom ug bisan sa ministeryo, maghunahuna ko sa mga problema sa trabahoan,” miingon siya. “Dako kog suweldo, pero nagkagrabe pod ang akong stress, ug naapektohan na ang akong kaminyoon.”

⁹ Naamgohan ni David nga kinahanglan niyang susihon pag-usab ang iyang mga prayoridad. “Nakadesisyon ko nga tul-iron ang akong kahimtang,” siya miingon. Gusto ni David nga usbon ang iyang eskedyul sa trabaho, busa  nakig-estorya siya sa iyang boss. Unsay resulta? Natangtang si David sa trabaho! Unsay iyang gihimo? “Pagkaugma dayon, miaplay ko ingong continuous auxiliary pioneer,” siya miingon. Aron masuportahan ang ilang kaugalingon, si David ug ang iyang asawa nagtrabaho ingong mga tighinlo. Wala madugay, nagregular payunir siya, ug ngadtongadto ang iyang asawa nagregular payunir pod. Kini nga magtiayon mipilig sekular nga trabaho nga gipakamenos sa uban, pero wala nâ nila igsapayan. Bisag ang ilang kita 10 porsiyento na lang sa ilang kita kaniadto, makasapar na kana sa ilang mga galastohan kada bulan. Gusto nilang unahon si Jehova, ug ilang naeksperyensiyahan nga giatiman niya kadtong nag-una sa intereses sa Gingharian.​—Mat. 6:31-33.

10. Unsaon nato pagbantay ang atong kasingkasing?

¹⁰ Dato man ta o pobre, kinahanglan natong bantayan ang atong kasingkasing. Sa unsang paagi? Ayawg ugmara ang gugma sa bahandi. Ug ayawg tugoti nga mahimong mas importante ang imong sekular nga trabaho kay sa imong pag-alagad kang Jehova. Unsaon nimo pagkahibalo nga ingon niana na ang imong kahimtang? Puwede nimong pangutan-on ang imong kaugalingon: ‘Pirme ba kong maghunahuna sa akong sekular nga trabaho panahon sa tigom o sa ministeryo? Magsige ba kog kabalaka kon duna pa ba koy igong kuwarta sa umaabot? Nakaapektar ba sa akong kaminyoon ang kuwarta ug kabtangan? Andam ba kong modawat ug trabaho nga gipakamenos sa uban aron makagugol kog mas dakong panahon sa pag-alagad kang Jehova?’ (1 Tim. 6:9-12) Dihang atong konsiderahon kanang mga pangutanaha, angay natong hinumdoman nga si Jehova nagmahal kanato ug nagsaad niadtong naghatag ug debosyon kaniya: “Dili gyod ka nako biyaan, ug dili gyod ka nako talikdan.” Kanay rason nga si apostol Pablo misulat: “Ayaw ninyog higugmaa ang kuwarta.”​—Heb. 13:5, 6.

11. Unsay posibleng epekto sa kalingawan diha sa usa ka tawo?

¹¹ Gusto ni Jehova nga magmalipayon ta, ug ang kalingawan makatabang nato nianang bahina. Gani, ang Pulong sa Diyos nag-ingon nga “wala nay mas maayo pa alang sa tawo kay sa mokaon ug moinom ug malipay sa iyang paghago.” (Eccl. 2:24) Pero, kadaghanan sa kalingawan sa kalibotan dili maayog epekto kanato. Kini makapaubos sa moral nga mga sukdanan sa tawo, nga mag-awhag nila sa pagkonsentir​—o paghigugma pa gani—​sa mga butang nga gihukman sa Pulong sa Diyos.

12. Sumala sa 1 Corinto 10:21, 22, nganong angay tang magmaalamon sa pagpilig kalingawan?

 ¹² Gusto natong ihatag kang Jehova ang eksklusibong debosyon, busa dili puwede nga mokaon ta sa “lamesa ni Jehova” ug sa “lamesa sa mga demonyo.” (Basaha ang 1 Corinto 10:21, 22.) Ang pagkaon uban sa usa ka tawo sagad maoy timailhan nga managhigala mo. Kon mopili tag kalingawan nga nagpasiugdag kapintasan, espiritismo, imoralidad, o ubang unodnong tinguha ug panghunahuna, sama rag nakigsalo ta sa mga kaaway sa Diyos ug mikaon sa pagkaon nga ilang gipreparar. Makadaot ni dili lang sa atong kaugalingon kondili sa ato pong relasyon kang Jehova.

13-14. Base sa Santiago 1:14, 15, nganong angay tang magbantay sa atong pilion nga kalingawan? Iilustrar.

¹³ Tagda ang pipila ka paagi nga ang kalingawan samag pagkaon. Dihang mokaon ta, makapili ta kon unsay ihungit. Pero dihang tunlon na nato ang pagkaon, kini awtomatikong maproseso ug ang mga sustansiya niini sa ngadtongadto makaapektar sa atong lawas. Ang maayong pagkaon mas makapahimsog nato; ang dili maayong pagkaon makadaot sa atong panglawas. Dili tingali dayon mamatikdan ang epekto, pero makita ni paglabay sa panahon.

¹⁴ Sa susama, dihang mopili tag kalingawan, makapili tag unsay isulod sa atong hunahuna. Human niana, kini awtomatikong maproseso ug maapektohan ang atong hunahuna ug kasingkasing. Ang maayong kalingawan makaayo kanato; ang dili maayong kalingawan makadaot kanato. (Basaha ang Santiago 1:14, 15.) Dili tingali dayon mamatikdan ang epekto sa dili maayong kalingawan, pero makita ni paglabay sa panahon. Kanay hinungdan nga ang Bibliya nagpasidaan kanato: “Ayaw palimbong: Ang Diyos dili malimbongan. Kay kon unsay gipugas sa usa ka tawo, mao pod ang iyang anihon; kay siya nga nagpugas maylabot sa iyang unod moanig daotan nga resulta sa iyang makasasalang mga tinguha.” (Gal. 6:7, 8) Busa importante gyod nga likayan nato ang tanang kalingawan nga nagpasiugda sa mga butang nga gidumtan ni Jehova!​—Sal. 97:10.

15. Unsang regalo gikan kang Jehova ang atong mapahimuslan?

¹⁵ Daghan sa katawhan ni Jehova ang malingawng motan-aw sa JW Broadcasting^®, ang atong Internet television station. Ang sister nga si Marilyn miingon: “Ang JW Broadcasting nakatabang nako nga mahimong mas positibo, ug kay pulos man maayo ang sulod niini, matan-aw nako ang tanan. Dihang magmingaw ko o maguol, makapaminaw kog makapadasig nga pakigpulong o programa sa Morning Worship. Nakapasuod nâ nako kang Jehova ug sa iyang organisasyon. Ang JW Broadcasting nakausab gyod sa akong kinabuhi.” Gipahimuslan ba nimo ang regalo ni Jehova? Gawas pa sa bag-ong programa kada bulan, ang JW Broadcasting dunay daghang audio recording, video, ug makapadasig nga mga kanta nga puwedeng tan-awon ug paminawon bisan kanus-a.

16-17. Nganong angay natong kontrolahon ang gidaghanon sa panahon nga atong gamiton sa paglingawlingaw, ug unsaon nato nâ paghimo?

¹⁶ Angay tang mag-amping dili lang sa pagpilig klase sa kalingawan kondili sa gidaghanon sab sa panahon nga atong gigahin niana. Kay kon dili, mas daghang panahon ang magamit sa paglingawlingaw kay sa pag-alagad kang Jehova. Daghan ang nalisdan sa pagkontrolar sa panahon nga ilang gigamit sa paglingawlingaw. Ang 18 anyos nga sister, si Abigail, miingon: “Ang pagtan-awg  TV makaparelaks nako human sa tibuok adlawng buluhaton. Pero kon dili ko magbantay, makagugol kog daghang oras sa pagtan-aw.” Ang batan-ong brader nga si Samuel miingon: “Usahay motan-aw kog daghang mugbo nga video diha sa Internet. Sa sinugdan, usa lang ka video ang akong tan-awon, ug dili na nako mamatikdan nga tulo o upat ka oras na diay ang milabay.”

¹⁷ Unsaon nimo pagkontrolar ang gidaghanon sa panahon nga imong gamiton sa paglingawlingaw? Ang unang tikang mao ang pagsusi kon unsa gyod ka daghang panahon ang imong gigugol niana. Sulayi kana pagrekord sulod sa usa ka semana. Isulat sa kalendaryo kon pila ka oras kang nagtan-awg TV, nag-Internet, ug nagdula diha sa imong gadyet. Kon gibati nimo nga daghan na kaayong panahon ang imong gigugol niana, sulayi ang paghimog eskedyul. Unahag eskedyul ang mas importanteng mga butang, ug dayon paggahin ug panahon para sa kalingawan. Sunod, hangyoa si Jehova nga tabangan ka nga masunod ang imong eskedyul. Nianang paagiha, makagahin kag panahon ug kusog para sa personal nga pagtuon sa Bibliya, pamilyahanong pagsimba, pagtambong sa mga tigom, ug pag-alagad kang Jehova diha sa kanataran. Ug mas malipay ka sa imong paglingawlingaw kay giuna nimo si Jehova.

18-19. Unsaon nato pagpakita nga eksklusibo ang atong debosyon kang Jehova?

¹⁸ Human magsulat bahin sa kataposan sa kalibotan ni Satanas ug sa pag-abot sa bag-ong kalibotan, si apostol Pedro miingon: “Mga minahal, sanglit nagpaabot mo niining mga butanga, buhata ang inyong maarangan aron sa kataposan makaplagan mo niya nga walay buling ug walay lama ug may malinawong relasyon kaniya.” (2 Ped. 3:14) Kon sundon nato ang maong tambag ug maningkamot ta sa pagpabiling hinlo sa moral ug espirituwal, atong gipakita nga eksklusibo ang atong debosyon kang Jehova.

¹⁹ Si Satanas ug ang iyang sistema padayong magtental nato nga unahon ang ubang butang imbes si Jehova. (Luc. 4:13) Pero dili nato tugotan si bisan kinsa o ang bisan unsa nga mopuli kang Jehova diha sa atong kasingkasing. Determinado tang ihatag kang Jehova ang butang nga siya lang ang angayng modawat​—ang atong eksklusibong debosyon!