1-2. (a) Unsay hapit nang ideklarar sa mga lider sa kalibotan? (b) Unsang mga pangutana ang kinahanglang tubagon?

IMADYINA nga gihimo na sa mga lider sa kalibotan ang dugay na natong gipaabot nga pagdeklarar ug “kalinaw ug kasegurohan.” Manghambog tingali sila nga malinawon ug luwas na kaayo ang kalibotan. Patuohon ta nila nga nasulbad na nila ang tanang problema sa kalibotan. Pero dili nila mapugngan ang sunod nga mahitabo! Ngano? Sumala sa tagna sa Bibliya, ang “kalit nga kalaglagan modangat kanila . . . , ug dili gyod sila makaikyas.”​—1 Tes. 5:3.

² Dunay importanteng mga pangutana nga kinahanglang tubagon: Unsay mahitabo panahon sa “dakong kasakitan”? Unsay dahomon ni Jehova nga buhaton nato nianang panahona? Ug sa unsang paagi maandam nato ang kaugalingon aron makapabilin tang matinumanon panahon sa dakong kasakitan?​—Mat. 24:21.

3. Sumala sa Pinadayag 17:5, 15-18, sa unsang paagi laglagon sa Diyos ang “Bantogang Babilonya”?

³ Basaha ang Pinadayag 17:5, 15-18. Ang “Bantogang Babilonya” laglagon! Sa gihisgotan na, ang mga lider sa kalibotan dili makapugong sa mahitabo nianang panahona. Ngano? Tungod kay ‘ibutang kini sa Diyos sa ilang kasingkasing aron buhaton ang iyang hunahuna.’ Unsa kana nga hunahuna? Ang paglaglag sa tibuok kalibotang imperyo sa bakak nga relihiyon, apil  ang Kakristiyanohan. * Ibutang sa Diyos ang iyang hunahuna ngadto sa kasingkasing sa “10 ka sungay” sa “hayag-pula nga pintas nga mananap.” Ang 10 ka sungay nagrepresentar sa tanang gobyerno nga nagsuportar sa “pintas nga mananap”​—ang United Nations. (Pin. 17:3, 11-13; 18:8) Dihang ang maong mga gobyerno mobalitok sa bakak nga relihiyon, ilhanan kana nga nagsugod na ang dakong kasakitan. Kini maoy kalit ug makahahadlok gayod nga panghitabo nga makaapektar sa tanan dinhi sa yuta.

4. (a) Unsang mga rason ang tingali ihatag sa mga lider sa kalibotan aron pakamatarongon ang ilang pag-atake sa bakak nga relihiyon? (b) Unsay lagmit himoon sa kanhing mga membro sa maong mga relihiyon?

⁴ Wala ta mahibalo sa mga rason nga ihatag unya sa mga lider sa kalibotan aron pakamatarongon ang ilang pag-atake sa Bantogang Babilonya. Tingali moingon sila nga ang relihiyosong mga organisasyon babag sa kalinaw ug pirmeng mag-apil-apil sa politika. O basin moingon sila nga ang maong mga relihiyon nakatigom ug daghang bahandi ug propidad. (Pin. 18:3, 7) Morag makataronganon nga kini nga pag-atake dili magpasabot nga ilang laglagon ang tanang membro sa maong mga relihiyon. Hinunoa, lagmit ang ilang laglagon mao ang relihiyosong mga organisasyon. Dihang malaglag na ang maong mga organisasyon, maamgohan sa kanhing mga membro niini nga gipakyas sila sa ilang mga lider ug lagmit mobulag na sila sa maong mga relihiyon.

5. Unsay gisaad ni Jehova bahin sa dakong kasakitan, ug ngano?

⁵ Wala hisgoti sa Bibliya kon unsa ka dugay ang paglaglag sa Bantogang Babilonya, pero nahibalo ta nga mubo ra ni nga panahon. (Pin. 18:10, 21) Si Jehova nagsaad nga “pamub-on niya ang mga adlaw” niana nga kasakitan aron nga ang iyang “mga pinili” ug ang tinuod nga relihiyon magpabilin. (Mar. 13:19, 20) Pero unsay dahomon ni Jehova nga atong buhaton inigsugod sa dakong kasakitan hangtod sa gubat sa Armagedon?

6. Nganong dili igo ang pagbiya lang sa bakak nga relihiyon?

⁶ Sa nahisgotan na sa miaging artikulo, gidahom ni Jehova nga ang iyang mga magsisimba mobulag sa Bantogang Babilonya. Pero dili igo ang pagbiya lang sa bakak nga relihiyon. Kinahanglang determinado ta nga paluyohan ang tinuod nga relihiyon​—ang putling pagsimba kang Jehova. Tagda ang duha ka paagi nga mahimo nato kana.

7. (a) Sa unsang paagi masunod gyod nato ang matarong nga moral nga mga sukdanan ni Jehova? (b) Sa unsang paagi ang Hebreohanon 10:24, 25 nagpasiugda sa kaimportante sa pagtambong sa tigom, ilabina karon?

⁷ Una, kinahanglang sundon gyod nato ang matarong nga moral nga mga sukdanan ni Jehova. Dili gyod ta mouyon sa imoral nga panggawi sa kalibotan. Pananglitan, dili ta mouyon sa bisan unsang seksuwal nga imoralidad, apil sa pagminyo sa duha ka tawo nga parehas ug sekso ug sa ubang homoseksuwal nga buhat. (Mat. 19:4, 5; Roma 1:26, 27) Ikaduha, kinahanglang padayon tang magsimba kauban sa atong mga isigka-Kristohanon. Himoon nato ni bisan asa nga posible, sa Kingdom Hall man, o kon gikinahanglan, sa pribadong mga balay o bisan sa tinagotago. Bisag unsay mahitabo, dili gyod ta moundang sa pagtambong sa tigom. Gani, kinahanglan tang magtigom “ilabina gyod samtang makita [nato] nga ang adlaw nagkaduol na.”​—Basaha ang Hebreohanon 10:24, 25.

8. Sa umaabot, sa unsang paagi lagmit mausab ang atong mensahe?

⁸ Panahon sa dakong kasakitan, ang mensahe nga atong isangyaw lagmit mausab. Karon, kita nagsangyaw sa maayong balita bahin sa Gingharian ug kita naningkamot sa paghimog mga tinun-an. Pero nianang panahona, basin magsangyaw na tag bug-at nga mensahe nga samag ulan nga yelo. (Pin. 16:21) Basin isangyaw nato nga hapit na gyong laglagon ang kalibotan ni Satanas. Sa takdang panahon, mahibaloan ra nato kon unsay atong mensahe ug kon unsaon nâ pagsangyaw. Gamiton kaha nato ang mao rang pamaagi sa pagsangyaw ug pagpanudlo nga atong gigamit sa gatosan ka tuig? O mogamit ba kaha tag ubang pamaagi? Wala ta mahibalo. Bisag unsa pay pamaagi, dayag nga duna tay pribilehiyo nga maisogong magmantala sa mensahe ni Jehova sa paghukom!​—Ezeq. 2:3-5.

9. Unsa tingaliy reaksiyon sa mga nasod sa atong mensahe, pero sa unsa ta makaseguro?

⁹ Lagmit ang atong mensahe makaaghat sa mga lider sa kalibotan sa pagpahilom kanato sa dayon. Sama nga nagsalig ta sa tabang ni Jehova karon, kinahanglan pod tang mosalig kaniya nianang panahona. Makaseguro ta nga ang atong Diyos maghatag natog kusog sa pagtuman sa iyang kabubut-on.​—Miq. 3:8.

10. Sumala sa gitagna sa Lucas 21:25-28, unsa unyay reaksiyon sa kadaghanan sa katawhan panahon sa dakong kasakitan?

¹⁰ Basaha ang Lucas 21:25-28. Panahon sa dakong kasakitan, ang mga tawo makurat dihang makita nila nga magsugod nag kahugno ang mga butang nga ilang gisaligan. Sila maguol ug mahadlok nga basig mamatay sila nianang kinalisdang panahon sa kasaysayan sa tawo. (Sof. 1:14, 15) Nianang panahona, lagmit mahimong mas lisod pa ang kinabuhi bisan para sa katawhan ni Jehova. Kay nagpabilin tang dili bahin sa kalibotan, lagmit makasinati tag mga kalisdanan. Basin dili nato mabatonan ang pipila ka pangunang panginahanglan.

11. (a) Nganong ang mga Saksi ni Jehova mahimong sentro sa atensiyon? (b) Nganong dili nato angayng kahadlokan ang dakong kasakitan?

¹¹ Posible nga ang mga tawo kansang mga relihiyon gilaglag masuko kay ang relihiyon sa mga Saksi ni Jehova wala malaglag. Seguradong  ipahibalo nila sa uban ang ilang kalagot, pinaagi pananglitan sa social media. Ang mga lider sa kalibotan ug ang ilang magmamando, si Satanas, maglagot nato kay kita ray nahibilin nga relihiyon. Wala nila makab-ot ang ilang tumong nga wad-on ang tanang relihiyon sa yuta. Busa masentro kanato ang ilang atensiyon. Niining panahona, ang mga lider sa kalibotan mahimong Gog sa Magog. * Maghiusa sila ug bug-os nilang atakehon ang katawhan ni Jehova. (Ezeq. 38:2, 14-16) Basig mabalaka ta sa paghunahuna sa mga posibleng mahitabo, ilabina kay wala ta mahibalo sa eksaktong mga detalye. Pero, usa ka butang ang segurado: Dili nato angayng kahadlokan ang dakong kasakitan. Hatagan ta ni Jehova ug mga instruksiyon aron maluwas ta. (Sal. 34:19) Makahimo ta sa ‘pagtindog nga tul-id ug paghangad sa atong mga ulo’ kay nahibalo ta nga “nagkaduol na ang [atong] kaluwasan.” *

12. Sa unsang paagi ginaandam ta sa “matinumanon ug maalamong ulipon” sa umaabot nga mga panghitabo?

¹² Ginaandam ta sa “matinumanon ug maalamong ulipon” aron makapabilin tang matinumanon panahon sa dakong kasakitan. (Mat. 24:45) Ginahimo ni sa daghang paagi, ug usa niini mao ang tukma sa panahong mga programa sa kombensiyon gikan sa 2016 hangtod sa 2018. Pinaagi niana nga mga programa, gidasig ta sa pagpalig-on sa mga hiyas nga atong gikinahanglan samtang nagkaduol ta sa adlaw ni Jehova. Atong hisgotan kadiyot kini nga mga hiyas.

13. Sa unsang paagi mapalig-on nato ang atong pagkamaunongon kang Jehova, ug nganong angay nato ning buhaton karon?

¹³ Pagkamaunongon: Ang tema sa 2016 nga programa sa kombensiyon maoy “Magmaunongon Kang Jehova!” Niini nga programa, gitudloan ta nga kon duna tay suod nga relasyon kang Jehova, magmaunongon ta kaniya. Gipahinumdoman ta nga makapakigsuod ta kang Jehova pinaagi sa kinasingkasing nga pag-ampo ug makugihong pagtuon sa iyang Pulong. Makapalig-on ni nato sa paglahutay bisan sa kinalisdang mga pagsulay. Samtang magkaduol ang kataposan sa sistema ni Satanas, makadahom ta nga makasinati tag mas lisod nga mga pagsulay sa atong pagkamaunongon sa Diyos ug sa iyang Gingharian. Lagmit padayon tang biaybiayon sa mga tawo. (2 Ped. 3:3, 4) Ilabinang mahitabo ni kay wala ta mosuportar sa bisan unsang bahin sa kalibotan ni Satanas. Kinahanglan natong palig-onon ang atong pagkamaunongon karon aron makapabilin tang maunongon panahon sa dakong kasakitan.

14. (a) Unsang kausaban ang mahitabo maylabot sa mga brader nga nagapanguna dinhi sa yuta? (b) Nganong kinahanglan tang magmaunongon nianang panahona?

¹⁴ Panahon sa dakong kasakitan, dunay mahitabong kausaban maylabot sa mga brader nga nagapanguna dinhi sa yuta. Moabot ang panahon nga ang tanang dinihogan nga nia pa sa yuta moadto na sa langit aron moapil sa gubat sa Armagedon. (Mat. 24:31; Pin. 2:26, 27) Nagpasabot ni nga dili na nato kauban sa yuta ang Nagamandong Lawas. Pero ang dakong panon magpabiling organisado. Ang kuwalipikadong mga brader nga membro sa ubang mga karnero maoy manguna. Kinahanglan natong ipakita ang atong pagkamaunongon pinaagi sa  pagsuportar niini nga mga brader ug pagsunod sa instruksiyon nga gihatag sa Diyos kanila. Magdepende niana ang atong kaluwasan!

15. Sa unsang paagi mapalig-on nato ang atong pagkamalahutayon, ug nganong importante nga ato nang buhaton karon?

¹⁵ Pagkamalahutayon: Ang tema sa 2017 nga programa sa kombensiyon maoy “Padayon sa Paglahutay!” Niini nga programa, gitabangan ta sa pagpalig-on sa atong katakos sa paglahutay sa mga pagsulay. Nahibaloan nato nga ang atong paglahutay wala magdepende sa maayong kahimtang. Mapalig-on nato ang atong pagkamalahutayon pinaagi sa pagsalig kang Jehova. (Roma 12:12) Hinaot dili nato kalimtan ang gisaad ni Jesus: “Siya nga makalahutay hangtod sa kataposan maluwas.” (Mat. 24:13) Kini nga saad nagpasabot nga kinahanglan tang magpabiling matinumanon bisag unsa pang kalisdanan ang atong giatubang. Kon molahutay ta sa matag pagsulay karon, mas molig-on ta sa dili pa magsugod ang dakong kasakitan.

16. Sa unsa nagdepende ang atong kaisog, ug sa unsang paagi mahimo tang mas maisogon karon?

¹⁶ Kaisog: Ang tema sa 2018 nga programa sa kombensiyon maoy “Magmaisogon!” Nagpahinumdom ni kanato nga ang atong kaisog wala magdepende sa atong mga katakos. Sama sa paglahutay, mahimo tang tinuod nga maisogon kon mosalig ta kang Jehova. Sa unsang paagi mapalig-on nato ang atong pagsalig kaniya? Mapalig-on nato ni pinaagi sa pagbasa sa iyang Pulong kada adlaw ug pagpamalandong kon giunsa pagluwas ni Jehova ang iyang katawhan kaniadto. (Sal. 68:20; 2 Ped. 2:9) Dihang atakehon ta sa kanasoran panahon sa dakong kasakitan, ilabina gyong gikinahanglan nga magmaisogon ta ug mosalig kang Jehova. (Sal. 112:7, 8; Heb. 13:6) Kon mosalig ta kang Jehova karon, mabatonan nato ang kaisog nga atong gikinahanglan dihang atakehon ta ni Gog. *

17. Nganong dili ta angayng mahadlok sa Armagedon? (Tan-awa ang hulagway sa atubangan sa magasin.)

¹⁷ Sa gihisgotan sa miaging artikulo, kadaghanan kanato naggugol sa tibuok natong kinabuhi niining kataposang mga adlaw. Pero naglaom sab ta nga makalabang sa dakong kasakitan.  Ang gubat sa Armagedon mao ang kataposang panghitabo nga magtapos niining sistemaha sa mga butang. Pero wala tay angayng kahadlokan. Ngano? Tungod kay ang Diyos maoy makig-away. (Prov. 1:33; Ezeq. 38:18-20; Zac. 14:3) Dihang ihatag na ni Jehova ang mando, pangunahan ni Jesu-Kristo ang kasundalohan sa Diyos sa pagpakiggubat. Kauban niya ang nabanhawng mga dinihogan ug ang tinagpulo ka libong mga anghel. Sila makig-away kang Satanas, sa iyang mga demonyo, ug sa ilang kasundalohan sa yuta.​—Dan. 12:1; Pin. 6:2; 17:14.

18. (a) Unsay gipasalig ni Jehova? (b) Sa unsang paagi ang Pinadayag 7:9, 13-17 makahatag nimog rason sa pagsalig nga maluwas ka sa umaabot?

¹⁸ Si Jehova nagpasalig: “Walay hinagiban nga gibuhat batok kanimo ang magmalamposon.” (Isa. 54:17) “Usa ka dakong panon” sa matinumanong mga magsisimba ni Jehova ang makalabang sa dakong kasakitan! Unya padayon silang maghatag kaniyag sagradong pag-alagad. (Basaha ang Pinadayag 7:9, 13-17.) Ang Bibliya naghatag natog daghang rason sa pagsalig nga maluwas ta sa umaabot. Nahibalo ta nga “panalipdan ni Jehova ang mga matinumanon.” (Sal. 31:23) Ang tanang nahigugma ug nagdayeg kang Jehova malipay dihang makita nila nga ibindikar niya ang iyang balaang ngalan.​—Ezeq. 38:23.

19. Unsang nindot nga paglaom ang atong masinati sa dili madugay?

¹⁹ Hunahunaa kon unsa nay masulat sa 2 Timoteo 3:2-5 kon maghisgot kini sa kinaiya sa mga tawo sa bag-ong kalibotan nga wala nay impluwensiya ni Satanas. (Tan-awa ang Kahong “ Ang Kinaiya sa mga Tawo Nianang Panahona.”) Si Brader George Gangas, * nga membro kaniadto sa Nagamandong Lawas, naghubit niana niining paagiha: “Pagkanindot unya sa kalibotan kon ang tanan ato nang igsoon sa pagtuo! Sa dili madugay, makapribilehiyo ka sa pagpuyo sa bag-ong sistema sa mga butang. Mabuhi ka samtang buhi si Jehova. Mabuhi ta hangtod sa hangtod.” Pagkanindot niana nga paglaom!