GISUSI sa tigbalita sa panahon ang hulagway nga na-detect sa radar. Nakita niya ang usa ka peligrosong bagyo nga paspas nga nagpaingon sa lugar nga daghag namuyo. Kay nabalaka siya sa mga tawo, gihimo niya ang iyang maarangan aron pasidan-an sila sa dili pa ulahi ang tanan.

Sa susama, si Jehova nagpasidaan karon sa mga tawo sa tibuok yuta bahin sa usa ka “bagyo” nga mas peligroso kay sa bisan unsa nga ilang madungog sa balita sa panahon. Giunsa niya kana paghimo? Ug nganong makaseguro ta nga naghatag siyag igong panahon aron masunod sa mga tawo ang maong pasidaan? Alang sa tubag, ato unang konsiderahon ang pipila ka pasidaan nga gihatag ni Jehova kaniadto.

Sa kapanahonan sa Bibliya, si Jehova nagpasidaan bahin sa lainlaing “bagyo,” o buhat sa paghukom, nga iyang ipahamtang niadtong tinuyong mosupak sa iyang mga sugo. (Prov. 10:25; Jer. 30:23) Sa matag kahimtang, abante kaayo niyang gipahibalo ang mga tawong maapektohan sa iyang paghukom ug gisugo sila sa paghimog mga kausaban nga uyon sa iyang kabubut-on. (2 Hari 17:12-15; Neh. 9:29, 30) Aron tabangan sila sa paghimo niana, sagad gamiton niya ang iyang maunongong mga alagad sa yuta aron ipahibalo ang iyang paghukom ug masabtan sa mga tawo nga kinahanglan silang molihok dayon.​—Amos 3:7.

Usa si Noe nianang matinumanong mga alagad. Sa daghang katuigan, wala siya mahadlok sa pagpasidaan sa imoral ug bayolenteng mga tawo sa iyang panahon bahin sa nagsingabot nga tibuok yutang Lunop. (Gen. 6:9-13, 17) Naningkamot sab siya sa pagsulti kanila kon unsay kinahanglang buhaton aron maluwas​—nga tungod niana gitawag siya sa ulahi ug “magwawali sa pagkamatarong.”​—2 Ped. 2:5.

Bisan pa sa mga paningkamot ni Noe, gibalewala sa mga tawo ang mensahe nga gikan sa Diyos. Wala gyod silay pagtuo. Busa nangamatay sila dihang “miabot ang Lunop ug gibanlas silang tanan.” (Mat. 24:39; Heb. 11:7) Samtang nagkaduol ang ilang kalaglagan, dili gyod sila makaingon nga wala sila pasidan-i sa Diyos.

Sa ubang kahimtang, si Jehova naghatag ug pasidaan dihang hapit nang mohapak ang “bagyo” sa iyang paghukom. Bisan pa niana, giseguro niya nga kadtong maapektohan mahatagan ug igong panahon sa pagsunod sa pasidaan. Pananglitan, naghatag siyag mga pasidaan sa wala pa niya ipahinabo sa karaang Ehipto ang Napulo ka Hampak. Usa ka pananglitan niana mao ang pagpadala ni Jehova kang Moises ug Aaron aron pasidan-an ang Paraon ug ang iyang mga alagad bahin sa ikapitong hampak, ang makamatayng ulan nga yelo. Kay mobundak na man ang ulan nga yelo pagkaugma, igo ba ang panahon nga gihatag sa Diyos aron makakita silag kapasilongan ug makaikyas sa ulan nga yelo? Ang Bibliya nag-ingon: “Kadtong mga alagad sa Paraon nga nahadlok sa giingon ni Jehova nagpasilong dayon sa ilang mga alagad ug mga hayop. Apan ang uban wala motuo sa giingon ni Jehova. Gipasagdan nila sa kapatagan ang ilang mga alagad ug mga hayop.” (Ex. 9:18-21) Klaro nga naghatag si Jehova ug igong pasidaan, mao nga kadtong misunod dayon nakaikyas sa hampak.

Sa susama, ang Paraon ug ang iyang mga alagad gipasidan-an sab sa wala pa ipahamtang ang ika-10 nga hampak. Pero wala nila sunda ang maong pasidaan. (Ex. 4:22, 23) Ingong resulta, nangamatay ang ilang panganayng mga anak nga lalaki. Makapaguol gayod kadto! (Ex. 11:4-10; 12:29) Igo ba ang panahon nga gihatag kanila aron masunod nila ang pasidaan? Oo! Gipahibalo dayon ni Moises ang mga Israelinhon bahin sa ika-10 nga hampak nga hapit nang ipahamtang ug gisultihan sila kon sa unsang paagi maluwas ang  ilang pamilya. (Ex. 12:21-28) Pilay misunod sa pasidaan? Sumala sa mga banabana, tulo ka milyong tawo—mga Israelinhon ug “dakong panon sa nagkasagol” nga mga dili Israelinhon ug mga Ehiptohanon​—ang naluwas sa paghukom sa Diyos ug mibiya sa Ehipto.​—Ex. 12:38; footnote.

Ingon sa gipakita niini nga mga pananglitan, kanunayng giseguro ni Jehova nga mahatagag igong panahon ang mga tawo sa pagsunod sa iyang mga pasidaan. (Deut. 32:4) Nganong gihimo kana sa Diyos? Gipatin-aw ni apostol Pedro nga dili gusto ni Jehova “nga naay malaglag kondili gusto niya nga ang tanan maghinulsol.” (2 Ped. 3:9) Klaro nga ang Diyos may pagtagad sa mga tawo. Gusto niyang maghinulsol sila ug magbag-o sa dili pa niya ipahamtang ang paghukom.​—Isa. 48:17, 18; Roma 2:4.

Karon, ang mga tawo kinahanglan pong mosunod sa importanteng pasidaan nga ginapahibalo sa tibuok yuta. Samtang dinhi pa si Jesus sa yuta, siya nagpasidaan nga kining presenteng sistema sa mga butang sa ngadtongadto malaglag panahon sa usa ka “dakong kasakitan.” (Mat. 24:21) Bahin nianang umaabot nga paghukom, siya naghatag ug tagna nga nagdetalye kon unsay madahom ug masinati sa iyang mga sumusunod samtang magkaduol ang maong panahon. Busa, gihisgotan ni Jesus ang dagkong panghitabo sa kalibotan nga atong nakita karon.​—Mat. 24:3-12; Luc. 21:10-13.

Uyon niana nga tagna, si Jehova nag-awhag karon sa tanan sa pagpasakop sa Iyang mahigugmaong pagmando. Gusto niya nga ang masinugtanong mga tawo makatagamtam ug mas maayong kinabuhi karon ug makapahimulos sa umaabot nga mga panalangin sa iyang matarong nga bag-ong kalibotan. (2 Ped. 3:13) Aron motuo ang mga tawo sa iyang mga saad, si Jehova naghatag ug makaluwas sa kinabuhi nga mensahe​—ang “maayong balita sa Gingharian,” nga gitagna ni Jesus nga “isangyaw sa tibuok yuta sa pagpamatuod ngadto sa tanang kanasoran.” (Mat. 24:14) Giorganisar sa Diyos ang iyang tinuod nga mga magsisimba aron ipahibalo kini nga ‘pamatuod,’ o isangyaw kini nga mensahe sa Diyos, ngadto sa mga 240 ka kayutaan. Gusto ni Jehova nga daghang tawo kutob sa mahimo ang mosunod sa pasidaan ug makaikyas sa nagsingabot nga “bagyo” sa iyang matarong nga paghukom.​—Sof. 1:14, 15; 2:2, 3.

Busa ang importanteng pangutana dili kon naghatag ba si Jehova ug igong panahon aron masunod sa mga tawo ang iyang mga pasidaan. Gipakita sa ebidensiya nga kanunay nâ niyang gihimo. Hinunoa, ang importanteng pangutana mao: Sundon ba sa mga tawo ang pasidaan sa Diyos samtang may panahon pa? Hinaot nga ingong mga mensahero sa Diyos, magpadayon ta sa pagtabang sa daghang tawo kutob sa mahimo aron maluwas sila sa kataposan niining sistema sa mga butang.