1. Unsay kinahanglang himoon sa bawtismadong mga Kristohanon?

BAWTISMADO ka ba? Kon mao, gipahayag na nimo sa publiko ang imong pagtuo kang Jehova ug ang imong pagkaandam nga moalagad uban sa iyang organisasyon. * Siyempre, kinahanglan nga padayong molig-on ang imong pagtuo kang Jehova. Ug kinahanglan nga padayon nimong palig-onon ang imong pagsalig nga si Jehova naggamit sa iyang organisasyon karon.

2-3. Sa unsang paagi si Jehova naggiya sa iyang organisasyon karon? Paghatag ug mga pananglitan.

² Karon, si Jehova naggiya sa iyang organisasyon sa paagi nga nagpakita sa iyang personalidad, katuyoan, ug mga sukdanan. Hisgotan nato ang tulo ka hiyas ni Jehova nga atong makita sa iyang organisasyon.

³ Una, “ang Diyos dili mapihigon.” (Buh. 10:34) Tungod sa gugma, gihatag ni Jehova ang iyang Anak ingong “lukat para sa tanan.” (1 Tim. 2:6; Juan 3:16) Si Jehova naggamit sa iyang katawhan sa pagsangyaw sa maayong balita ngadto sa tanan nga maminaw, aron daghan ang matabangan nga makabenepisyo sa lukat. Ikaduha, si Jehova maoy Diyos sa kahapsay ug kalinaw. (1 Cor. 14:33, 40) Busa, makadahom ta nga ang iyang mga magsisimba mag-alagad niya ingong hapsay ug malinawon nga grupo. Ikatulo, si Jehova ang “Dakong Instruktor.” (Isa. 30:20, 21) Busa, ang iyang organisasyon naningkamot sa pagtudlo sa uban bahin sa iyang Pulong, ang Bibliya, diha sa kongregasyon ug sa publikong ministeryo. Sa unsang paagi ang maong tulo ka hiyas  ni Jehova makita diha sa unang siglong kongregasyon? Sa unsang paagi kining mga hiyasa makita sa modernong panahon? Ug sa unsang paagi ang balaang espiritu makatabang nimo samtang nag-alagad ka uban sa organisasyon ni Jehova karon?

4. Sumala sa Buhat 1:8, unsay gisugo ni Jesus sa iyang mga sumusunod, ug unsang tabang ang ilang madawat?

⁴ Sa unang siglo. Ang mensahe nga gisangyaw ni Jesus naghatag ug paglaom sa tanan. (Luc. 4:43) Iyang gisugo ang iyang mga sumusunod nga ipadayon ang buluhaton nga iyang gisugdan, aron sa paghatag ug pamatuod “hangtod sa kinalay-ang bahin sa yuta.” (Basaha ang Buhat 1:8.) Siyempre, dili nila ni mahimo sa kaugalingon nilang paningkamot. Magkinahanglan sila sa balaang espiritu, “ang magtatabang” nga gisaad ni Jesus kanila.​—Juan 14:26; Zac. 4:6.

5-6. Sa unsang mga paagi gitabangan sa balaang espiritu ang mga sumusunod ni Jesus?

⁵ Ang mga sumusunod ni Jesus nakadawat sa balaang espiritu niadtong Pentekostes 33 C.E. Sa tabang niana nga espiritu, sila misugod dayon sa pagsangyaw, ug sa mubo lang nga panahon, linibo ang midawat sa maayong balita. (Buh. 2:41; 4:4) Dihang mitungha ang paglutos, ang mga tinun-an wala magpadaog sa kahadlok kondili nangayo silag tabang sa Diyos. Sila nag-ampo: “Tabangi ang imong mga ulipon nga padayong mosulti sa imong pulong uban ang bug-os nga kaisog.” Unya, sila napuno sa balaang espiritu ug padayong “nagsulti sa pulong sa Diyos nga may kaisog.”​—Buh. 4:18-20, 29, 31.

⁶ Ang mga tinun-an ni Jesus may lain pang mga problema. Pananglitan, pipila lang ang kopya sa Kasulatan. Wala silay mga publikasyon sama sa atong nabatonan karon. Ug ang mga tawo nga ilang sangyawan lainlaig pinulongan. Bisan pa niana, nahimo sa madasigong mga tinun-an ang daw imposible​—sa mga 30 lang ka tuig ilang nasangyaw ang maayong balita “sa tibuok kalibotan.”​—Col. 1:6, 23.

7. Kapig 100 ka tuig kanhi, giunsa pagkahibalo sa mga alagad ni Jehova kon unsay gusto niyang ipabuhat kanila, ug unsay ilang gihimo?

⁷ Sa modernong panahon. Si Jehova padayong naggiya sa iyang katawhan ug naghatag kanilag kusog sa paghimo sa iyang kabubut-on. Siyempre, sagad naggiya siya sa iyang katawhan pinaagi sa Bibliya, nga gisulat sa tabang sa balaang espiritu. Sa Bibliya, mabasa nato ang rekord sa ministeryo ni Jesus ug ang gisugo niya sa iyang mga sumusunod nga ipadayon ang buluhaton nga iyang gisugdan. (Mat. 28:19, 20) Niadto pang Hulyo 1881, kining magasina nag-ingon: “Kita wala tawga, o dihogi aron pasidunggan ug madato kondili aron gamiton ang tanan natong nabatonan sa pagsangyaw sa maayong balita.” Ang booklet nga To Whom the Work Is Entrusted, nga giimprenta niadtong 1919, nag-ingon: “Ang buluhaton dako kaayo, pero buluhaton ni sa Ginoo, ug hatagan ta niyag kusog sa paghimo niini.” Oo, sama sa mga Kristohanon sa unang siglo, kining mga igsoona nagmaisogon ug naghago pag-ayo sa buluhaton, kay masaligon sila nga ang balaang espiritu motabang nila sa pagsangyaw ngadto sa tanang klase sa tawo. Kita sab masaligon nga tabangan ta sa balaang espiritu.

8-9. Unsang mga pamaagi ang gigamit sa organisasyon ni Jehova aron mas daghan pa ang masangyawan?

⁸ Ang organisasyon ni Jehova naggamit sa kinamaayohang mga galamiton sa pagsangyaw sa maayong balita. Apil niini ang inimprentang mga publikasyon, “Photo-Drama of Creation,” phonograph, sound car, radio broadcast ug, niining bag-o pa, ang computer ug Internet. Ang organisasyon sa Diyos naghimo sab sa kinadak-ang buluhaton sa paghubad sukad masukad! Ngano? Gihimo nila kana  aron ang tanang klase sa tawo makadungog sa maayong balita sa ilang kaugalingong pinulongan. Si Jehova dili mapihigon; siya nagtagna nga ang maayong balita ipahayag “ngadto sa matag nasod ug tribo ug pinulongan ug katawhan.” (Pin. 14:6, 7) Gusto niya nga ang mensahe sa Gingharian madunggan sa tanan.

⁹ Komosta kadtong dili nato masangyawan sa ilang balay, tingali tungod kay nagpuyo sila sa mga apartment nga dili pasudlan? Aron masangyawan ang mas daghan pa kanila, gipalihok ni Jehova ang iyang organisasyon nga sugdan ang lainlaing klase sa publikong pagsangyaw. Pananglitan, niadtong 2001, giaprobahan sa Nagamandong Lawas ang paggamit ug mga literature cart ug ubang display sa France, ug sa ulahi, sa uban pang lugar. Maayo ang mga resulta. Niadtong 2011, gisugdan sa United States ang bag-ong programa diha sa usa sa kinabisihang lugar sa New York City. Sa unang tuig, 102,129 ka libro ug 68,911 ka magasin ang napahimutang. Ug 4,701 ka tawo ang gustong magpa-Bible study! Klaro nga gipaluyohan sa balaang espiritu kining buluhatona. Busa giaprobahan sa Nagamandong Lawas ang paggamit ug mga literature display sa tibuok kalibotan.

10. Unsay atong mahimo aron mouswag sa ministeryo?

¹⁰ Ang imong mahimo. Pahimuslig maayo ang pagbansay nga gitagana ni Jehova diha sa mga tigom. Sangyaw nga regular uban sa imong grupo sa pagsangyaw. Ang mga igsoon sa imong grupo makatabang nimo nga mouswag sa pagsangyaw ug pagpanudlo ug makadasig nimo pinaagi sa ilang maayong mga ehemplo. Lahutay sa ministeryo. Ingon sa gipahinumdom sa atong temang teksto, mahimo nato ang kabubut-on sa Diyos, dili sa atong kaugalingong kusog, kondili pinaagi sa balaang espiritu. (Zac. 4:6) Kon buot hunahunaon, buluhaton sa Diyos ang atong ginahimo.

11. Sa unsang paagi nagtinabangay ang nagamandong lawas sa unang siglo aron magpabiling organisado ang katawhan sa Diyos?

¹¹ Sa unang siglo. Ang nagamandong lawas sa Jerusalem nagtinabangay aron mamentinar ang kahapsay ug kalinaw sa katawhan sa Diyos. (Buh. 2:42) Pananglitan, sa mga tuig 49 C.E.,  daghang Kristohanon ang wala magkauyon bahin sa isyu sa pagtuli. Busa ubos sa paggiya sa balaang espiritu, gihisgotan sa nagamandong lawas ang maong isyu. Kon ang kongregasyon dili magkahiusa bahin niini, mababagan ang buluhatong pagsangyaw. Ang mga apostoles ug mga ansiyano maoy mga Hudiyo, pero wala sila magpaimpluwensiya sa Hudiyohanong tradisyon o niadtong nagtudlo niana. Hinunoa, nagpagiya sila sa Pulong sa Diyos ug sa balaang espiritu. (Buh. 15:1, 2, 5-20, 28) Unsay resulta? Gipanalanginan ni Jehova ang ilang desisyon, namentinar ang kalinaw ug panaghiusa, ug nagpadayon ang buluhatong pagsangyaw.​—Buh. 15:30, 31; 16:4, 5.

12. Unsay nagpakita nga organisado ug malinawon ang organisasyon ni Jehova karon?

¹² Sa modernong panahon. Ang organisasyon ni Jehova naningkamot nga mamentinar ang kahapsay ug kalinaw sa katawhan ni Jehova. Niadto pang 1895, ang Nobyembre 15 nga Zion’s Watch Tower and Herald of Christ’s Presence may artikulo nga nag-ulohang “Hapsay ug Pinaagig Kahikayan,” nga gibase sa 1 Corinto 14:40. Ang artikulo nag-ingon: “Ang mga apostoles daghag gisulat ngadto sa unang kongregasyon bahin sa kahapsay . . . Importante nga sundon gyod nato ‘ang tanang gisulat kaniadto sa pagtudlo kanato.’” (Roma 15:4) Ang organisasyon ni Jehova karon naningkamot nga magpabiling organisado ug malinawon ang mga kongregasyon sama niadtong unang siglo. Sa pag-ilustrar: Kon motambong kag Pagtuon sa Bantayanang Torre sa laing kongregasyon​—bisan sa laing nasod—​mahibalo ka kon unsaon kini pagdumala ug kon unsang artikuloha ang tun-an. Dili ka mabag-ohan! Kining talagsaong panaghiusa naposible lang tungod sa espiritu sa Diyos.​—Sof. 3:9.

13. Base sa Santiago 3:17, unsay angay natong ipangutana sa kaugalingon?

¹³ Ang imong mahimo. Gusto ni Jehova nga ang iyang katawhan ‘makigdinaitay aron mamentinar ang panaghiusa nga ilang nabatonan pinaagi sa balaang espiritu.’ (Efe. 4:1-3) Busa pangutan-a ang imong kaugalingon: ‘Naningkamot ba ko nga mamentinar ang panaghiusa ug kalinaw diha sa kongregasyon? Masinundanon ba ko sa mga nagapanguna? Masaligan ba ko sa uban, ilabina kon duna koy mga  responsibilidad sa kongregasyon? Ako ba kanunayng moabot sa hustong oras, matinabangon, ug malipayng moalagad?’ (Basaha ang Santiago 3:17.) Dihang makita nimo nga duna kay angayng pauswagon, pangayog balaang espiritu. Kon tugotan nimo kini nga moimpluwensiya sa imong personalidad ug panggawi, mas higugmaon ug pabilhan ka sa mga igsoon tungod sa imong ginahimo diha sa kongregasyon.

14. Sumala sa Colosas 1:9, 10, sa unsang paagi gitudloan ni Jehova ang iyang katawhan sa unang siglo?

¹⁴ Sa unang siglo. Si Jehova ganahan kaayong motudlo sa iyang katawhan. (Sal. 32:8) Gusto niya nga sila makaila kaniya, mahigugma kaniya, ug mabuhi sa walay kataposan ingong iyang pinalanggang mga anak. Kining tanan mahimong imposible kon wala ta niya tudloi. (Juan 17:3) Gigamit ni Jehova ang unang siglong kongregasyon sa pagtudlo sa iyang katawhan. (Basaha ang Colosas 1:9, 10.) Ang balaang espiritu​—ang “magtatabang” nga gisaad ni Jesus—​mitabang sab sa mga tinun-an. (Juan 14:16) Nakatabang ni kanila nga mas masabtan ang Pulong sa Diyos ug mahinumdoman ang tanang gisulti ug gitudlo ni Jesus, nga sa ulahi girekord diha sa mga Ebanghelyo. Kini nga kahibalo nakapalig-on sa pagtuo sa unang siglong mga Kristohanon ug sa ilang gugma sa Diyos, sa iyang Anak, ug sa usag usa.

15. Sa unsang mga paagi nakita nimo nga gituman ni Jehova ang iyang saad sa Isaias 2:2, 3?

¹⁵ Sa modernong panahon. Si Jehova nagtagna nga “sa kaulahiang bahin sa mga adlaw,” ang katawhan sa tanang kanasoran manungas ngadto sa iyang simbolikong bukid aron matudloan bahin sa iyang mga dalan. (Basaha ang Isaias 2:2, 3.) Nakita nato nga natuman ang maong tagna. Ang matuod nga pagsimba labaw gyod kaayo kay sa tanang klase sa bakak nga pagsimba. Ug abunda kaayo ang espirituwal nga tagana ni Jehova! (Isa. 25:6) Ang espirituwal nga pagkaon nga gitagana ni Jehova pinaagi  sa “matinumanon ug maalamong ulipon” dili lang abunda, klaseklase pa gyod. Pananglitan, dunay mga artikulo, pakigpulong, digital animation, ug video. (Mat. 24:45) Parehas tag gibati sa amigo ni Job nga si Elihu, kinsa miingon: “Kinsa ba nga magtutudlo ang sama [sa Diyos]?”​—Job 36:22.

16. Sa unsang paagi mouswag ka sa espirituwal?

¹⁶ Ang imong mahimo. Ang espiritu sa Diyos motabang nimo sa pagpadapat sa imong nabasa ug nakat-onan sa Bibliya. Pag-ampo sama sa salmista, kinsa miingon: “Oh Jehova, tudloi ko bahin sa imong dalan. Mosubay ko sa imong kamatuoran. Bug-osa ang akong kasingkasing aron mahadlok ko sa imong ngalan.” (Sal. 86:11) Busa padayong pahimusli ang espirituwal nga pagkaon nga gitagana ni Jehova pinaagi sa iyang Pulong ug sa iyang organisasyon. Siyempre, ang imong tumong dili lang ang pagkuhag kahibalo. Gusto nimo nga ang kamatuoran masilsil sa imong kasingkasing ug mapadapat sa imong kinabuhi. Ang espiritu ni Jehova makatabang nimo sa paghimo niana. Gusto sab nimong dasigon ang mga igsoon. (Heb. 10:24, 25) Ngano? Tungod kay bahin sila sa imong espirituwal nga pamilya. Pangayoa ang espiritu sa Diyos aron makahatag kag kinasingkasing nga mga komento sa tigom ug mahimo nimo ang imong kinamaayohan kon duna kay bahin. Pinaagi niini imong gipakita kang Jehova ug sa iyang Anak nga gimahal nimo ang ilang bililhong “mga karnero.”​—Juan 21:15-17.

17. Sa unsang mga paagi ikapakita nimo nga maunongon kang nagsuportar sa organisasyon ni Jehova?

¹⁷ Sa dili madugay, ang bugtong organisasyon nga magpabilin sa yuta mao kanang gigiyahan sa espiritu sa Diyos. Busa, suportahi gyod ang organisasyon ni Jehova. Sundoga ang dili mapihigong gugma sa Diyos pinaagi sa pagsangyaw sa maayong balita sa tanan nimong maestorya. Kay gipabilhan ni Jehova ang kahapsay ug kalinaw, sundoga siya pinaagi sa pagpaningkamot nga mamentinar ang panaghiusa sa kongregasyon. Ug paminawa ang imong Dakong Instruktor pinaagi sa pagpahimulos pag-ayo sa tanang impormasyon nga iyang gitagana. Unya, sa dihang taposon na ang kalibotan ni Satanas, dili ka mahadlok. Hinunoa, maisogon kang mobarog apil niadtong maunongong nag-alagad uban sa organisasyon ni Jehova.