1. Nganong daghan ang naglibog?

DAGHANG relihiyon karon ang nag-angkon nga Kristohanon sila ug nagsimba kuno sila sa Diyos sa paagi nga makapalipay kaniya. Kanay hinungdan nga daghan ang naglibog! Mangutana sila, “Usa lang ba ang tinuod nga relihiyon, o ang tanan bang relihiyon giuyonan sa Diyos?” Ingong mga Saksi ni Jehova, kombinsido ba gyod ta nga kita nagtudlo sa kamatuoran ug nga ang atong paagi sa pagsimba maoy giuyonan ni Jehova? Posible ba gyod nga makabaton niana nga kombiksiyon? Konsiderahon nato ang ebidensiya.

2. Base sa 1 Tesalonica 1:5, nganong kombinsido si apostol Pablo sa kamatuoran?

² Si apostol Pablo kombinsido kaayo sa kamatuoran. (Basaha ang 1 Tesalonica 1:5.) Ang iyang pagtuo wala ibase sa emosyon; gitun-an gyod niya pag-ayo ang Pulong sa Diyos. Kombinsido siya nga “ang tibuok Balaang Kasulatan gisulat pinaagi sa paggiya sa Diyos.” (2 Tim. 3:16) Unsay iyang nasayran sa iyang pagtuon? Diha sa Kasulatan, nakita ni Pablo ang klaro kaayong ebidensiya nga si Jesus ang gisaad nga Mesiyas—ebidensiya nga gibalewala sa Hudiyong mga lider sa relihiyon. Ang maong salingkapaw nga mga lider sa relihiyon nangangkon nga nagrepresentar sila sa Diyos, pero gibuhat nila ang mga butang nga iyang gidumtan. (Tito 1:16) Si Pablo dili parehas nila kay wala niya pilia kon unsang mga bahina sa Pulong sa Diyos ang iyang tuohan. Andam niyang itudlo ug ipadapat ang “tanang kabubut-on sa Diyos.”—Buh. 20:27.

3. Kinahanglan bang mahibaloan nato ang tubag sa tanan natong pangutana aron makombinsir ta pag-ayo nga ang atong gituohan mao ang kamatuoran? (Tan-awa sab ang kahong “ Mga Buhat ug Gihunahuna ni Jehova—‘Dili Masugid sa Kadaghan.’”)

³ Ang pipila naghunahuna nga ang tinuod nga relihiyon kinahanglang  makatubag sa tanang pangutana, bisan sa mga pangutana nga walay espesipikong tubag ang Bibliya. Pero realistiko ba nâ nga pagdahom? Tagda ang pananglitan ni Pablo. Gidasig niya ang iyang mga isigkamagtutuo nga ‘seguroon ang tanang butang,’ pero giangkon sab niya nga daghang butang ang wala niya masabti. (1 Tes. 5:21) Siya misulat: “Dili pa bug-os ang atong kahibalo.” Dayon, siya midugang: “Hanap pa ang atong makita nga daw kita nagtan-aw sa metal nga salamin.” (1 Cor. 13:9, 12) May mga butang nga wala masabti ni Pablo; mao man sab kita. Pero nasabtan ni Pablo ang pangunang mga kamatuoran bahin sa katuyoan ni Jehova. Igo na ang iyang nahibaloan aron makombinsir siya nga ang iyang gituohan mao ang kamatuoran!

4. Sa unsang paagi makombinsir ta pag-ayo nga nakaplagan nato ang kamatuoran, ug unsay atong hisgotan bahin sa tinuod nga mga Kristohanon?

⁴ Ang usa ka paagi nga makombinsir ta pag-ayo nga nakaplagan nato ang kamatuoran mao ang pagtandi sa sumbanan sa pagsimba nga gitudlo ni Jesus nianang ginahimo sa mga Saksi ni Jehova karon. Niining artikuloha, atong mahibaloan nga ang tinuod nga mga Kristohanon (1) nagsalikway sa idolatriya, (2) nagtahod sa ngalan ni Jehova, (3) nahigugma sa kamatuoran, ug (4) nahigugma pag-ayo sa usag usa.

5. Unsay atong makat-onan kang Jesus bahin sa hustong paagi sa pagsimba sa Diyos, ug unsaon nato pagpadapat ang iyang gitudlo?

⁵ Kay gihigugma pag-ayo ni Jesus si Jehova nga Diyos, si Jehova lang ang iyang gisimba, niadtong didto siya sa langit ug dihang dinhi siya sa yuta. (Luc. 4:8) Gitudloan niya ang iyang mga tinun-an nga himoon sab kana. Si Jesus ug ang iyang matinumanong mga tinun-an wala gyod mogamit ug mga imahen diha sa pagsimba. Ang Diyos maoy Espiritu, busa walay tawong makahimog bisan unsa nga  puwedeng magrepresentar sa himaya ni Jehova! (Isa. 46:5) Pero komosta ang paghimog mga imahen niadtong giisip sa pipila ingong mga santos ug pag-ampo niana? Sa ikaduhang sugo sa Napulo ka Sugo, si Jehova miingon: “Ayaw pagbuhat ug kinulit nga larawan o simbolo sa bisan unsang butang nga naa sa langit o sa yuta . . . Ayawg yukbo nila.” (Ex. 20:4, 5) Kining mga pulonga nagpakita nga kadtong gustong mapalipay ang Diyos dili angayng mosimba ug mga imahen.

6. Unsang sumbanan sa pagsimba ang gisunod sa mga Saksi ni Jehova karon?

⁶ Ang mga historyano nag-ingon nga ang Diyos ray gisimba sa mga Kristohanon sa unang siglo. Pananglitan, ang librong History of the Christian Church nag-ingon nga ang mga Kristohanon sa unang siglo dili gyod mouyon sa ideya nga mogamit ug mga imahen diha sa mga dapit sa pagsimba. Karon, ang mga Saksi ni Jehova nagsunod sa sumbanan nga gihatag sa mga Kristohanon sa unang siglo. Kita dili moampo sa imahen sa mga “santos” o sa mga anghel; dili gani ta moampo kang Jesus. Ug dili ta mohimog bisan unsang buhat sa pagsimba ngadto sa mga simbolo sa nasod. Bisag unsa pay mahitabo, determinado tang motuman sa giingon ni Jesus: “Si Jehova nga imong Diyos ang angay nimong simbahon.”—Mat. 4:10.

7. Nganong lahi kaayo ang mga Saksi ni Jehova sa ubang relihiyon?

⁷ Karon, daghan ang ganahang maminaw sa popular nga mga lider sa relihiyon. Nakadayeg kaayo sila sa maong mga lider nga halos simbahon na nila kini. Daghan ang mangadto sa ilang mga simbahan, mopalit sa ilang mga libro, ug mohatag ug dagkong donasyon sa ilang mga kawsa o sa mga organisasyon nga ilang gisuportahan. Ang pipila motuo sa tanan nilang isulti. Malipay kaayo silang makita ang maong mga lider, nga mora bag si Jesus mismo ang ilang nakita! Pero ang tinuod nga mga magsisimba ni Jehova walay tawhanong mga lider. Bisag gitahod nato kadtong mga nagapanguna, atong gisunod ang klarong gitudlo ni Jesus: “Kamong tanan managsoon.” (Mat. 23:8-10) Dili ta moidolog mga tawo, lider man sila sa relihiyon o sa politika. Ug dili ta mosuportar sa ilang mga kawsa. Hinunoa, kita nagpabiling neyutral ug bulag sa kalibotan. Busa niining tanan, lahi kaayo ta sa daghang relihiyon nga nag-angkong Kristohanon.—Juan 18:36.

8. Giunsa nato pagkahibalo nga gusto ni Jehova nga ang iyang ngalan mahimaya ug mahibaloan sa tanan?

⁸ Dihay higayon nga si Jesus miampo: “Amahan, himayaa ang imong ngalan.” Gitubag mismo ni Jehova ang maong pag-ampo pinaagig kusog nga tingog gikan sa langit, nga nagsaad nga iyang himayaon ang iyang ngalan. (Juan 12:28) Sa tibuok niyang ministeryo, gihimaya ni Jesus ang ngalan sa iyang Amahan. (Juan 17:26) Busa, ang tinuod nga mga Kristohanon angay lang mobati nga dakong pribilehiyo ang paggamit sa ngalan sa Diyos ug pagpahibalo niini sa uban.

9. Giunsa pagpakita sa mga Kristohanon sa unang siglo nga ilang gitahod ang ngalan sa Diyos?

⁹ Sa unang siglo C.E., wala madugay human matukod ang Kristohanong kongregasyon, “giliso [ni Jehova] ang iyang pagtagad ngadto sa kanasoran aron magkuha gikan kanila ug usa ka katawhan alang sa iyang ngalan.” (Buh. 15:14) Ang maong mga Kristohanon mibati nga usa ka dakong pribilehiyo ang paggamit sa ngalan sa Diyos ug ang pagpaila niini ngadto sa uban. Kanunay nilang gigamit ang ngalan sa Diyos diha sa ilang ministeryo ug sa ilang mga sinulat. * Pinaagi niini, ilang gipamatud-an nga sila ang katawhan nga nagpaila sa ngalan sa Diyos.—Buh. 2:14, 21.

10. Unsay ebidensiya nga ang mga Saksi ni Jehova mao ang katawhan nga nagpaila sa iyang ngalan?

 ¹⁰ Ang mga Saksi ni Jehova ba mao ang katawhan nga nagpaila sa iyang ngalan? Konsideraha ang ebidensiya. Karon, daghang lider sa relihiyon ang naningkamot pag-ayo nga itago ang kamatuoran nga ang Diyos dunay personal nga ngalan. Ila ning gitangtang sa ilang mga hubad sa Bibliya ug, sa pipila ka kahimtang, gidili ang paggamit niining ngalana sa ilang relihiyosong mga serbisyo. * Klaro nga ang mga Saksi ni Jehova lang ang naghatag ug nahiangayng pagtahod ug pasidungog sa ngalan ni Jehova. Wala nay laing relihiyon gawas nato ang nagpaila pag-ayo sa ngalan sa Diyos! Naningkamot ta pag-ayo nga barogan ang atong ngalan—mga Saksi ni Jehova. (Isa. 43:10-12) Nakaimprenta tag kapin sa 240 ka milyong kopya sa Bag-ong Kalibotang Hubad sa Balaang Kasulatan, nga naggamit sa ngalan ni Jehova diha sa mga teksto diin kana gitangtang sa ubang maghuhubad sa Bibliya. Ug kita nag-imprentag binase sa Bibliya nga mga publikasyon nga naggamit sa ngalan ni Jehova diha sa kapig 1,000 ka pinulongan!

11. Sa unsang paagi gipakita sa mga Kristohanon sa unang siglo nga ilang gihigugma ang kamatuoran?

¹¹ Si Jesus nahigugma sa kamatuoran—ang kamatuoran bahin sa Diyos ug sa Iyang mga katuyoan. Si Jesus nagkinabuhi sumala niana nga kamatuoran, ug gipaila niya kana sa uban. (Juan 18:37) Ang tinuod nga mga sumusunod ni Jesus nahigugma sab pag-ayo sa  kamatuoran. (Juan 4:23, 24) Gani, gitawag ni apostol Pedro ang Kristiyanidad ingong “dalan sa kamatuoran.” (2 Ped. 2:2) Kay gihigugma nila pag-ayo ang kamatuoran, ang mga Kristohanon sa unang siglo nagsalikway sa relihiyosong mga ideya, tradisyon, ug opinyon nga dili uyon sa kamatuoran. (Col. 2:8) Sa susama, ang tinuod nga mga Kristohanon karon naningkamot nga ‘magpadayon sa paglakaw sa kamatuoran’ pinaagi sa pagbase sa tanan nilang pagtulon-an ug sa ilang paagi sa pagkinabuhi diha sa Pulong ni Jehova.—3 Juan 3, 4.

12. Unsay himoon niadtong nagapanguna dihang maamgohan nila nga kinahanglang klarohon ang atong pagsabot sa usa ka punto sa kamatuoran, ug nganong buhaton nila kana?

¹² Ang katawhan sa Diyos karon wala mag-ingon nga bug-os na nilang nasabtan ang kamatuoran. Dihay mga higayon nga nasayop sila sa ilang pagpatin-aw sa usa ka pagtulon-an sa Bibliya ug sa ilang organisasyonal nga mga direksiyon. Dili ta angayng matingala niana, kay ang Bibliya klarong nag-ingon nga mas masabtan sa katawhan sa Diyos ang kamatuoran paglabay sa panahon. (Col. 1:9, 10) Si Jehova anam-anam nga nagpadayag sa kamatuoran, ug kinahanglang mapailobon tang maghulat hangtod nga mas mohayag ang atong pagsabot sa kamatuoran. (Prov. 4:18) Sa dihang maamgohan sa mga nagapanguna nga ang atong pagsabot sa usa ka punto sa kamatuoran kinahanglang klarohon, dili sila magduhaduha sa paghimo sa gikinahanglang mga kausaban. Daghang relihiyon sa Kakristiyanohan ang naghimog mga kausaban aron mapalipay ang ilang mga membro o aron mahimong popular sa kalibotan, pero ang mga Saksi ni Jehova naghimog mga kausaban aron mas masuod sa Diyos ug mas masunod ang sumbanan sa pagsimba nga gitudlo ni Jesus. (Sant. 4:4) Naghimo tag mga kausaban, dili tungod sa kon unsay uso o gusto sa kadaghanan, kondili tungod sa mas klarong pagsabot sa Kasulatan. Gihigugma nato ang kamatuoran!—1 Tes. 2:3, 4.

13. Unsa ang labing importanteng hiyas nga gipakita sa tinuod nga mga Kristohanon, ug sa unsang paagi gipakita kana sa mga Saksi ni Jehova karon?

¹³ Ang mga Kristohanon sa unang siglo nailhan tungod sa daghan nilang maayong mga hiyas, pero labaw silang nailhan tungod sa ilang gugma. Si Jesus miingon: “Kon kamo dunay gugma sa usag usa, ang tanan makaila nga kamo akong mga tinun-an.” (Juan 13:34, 35) Karon, ang mga Saksi ni Jehova sa tibuok kalibotan nakatagamtam ug tinuod nga gugma ug panaghiusa. Lahi ta sa ubang mga organisasyon kay suod kaayo ang atong panag-igsoonay bisan pag lainlain tag nasod ug kultura. Makita nato ang ebidensiya sa tinuod nga gugma diha sa atong mga tigom, asembliya, ug kombensiyon. Ang maong ebidensiya nakatabang nato nga mas makombinsir nga ang atong paagi sa pagsimba mao ang giuyonan ni Jehova.

14. Sumala sa Colosas 3:12-14, unsa ang usa ka importanteng paagi nga atong ikapakita nga gihigugma nato pag-ayo ang usag usa?

¹⁴ Ang Bibliya nag-awhag kanato nga ‘batonan ang init nga gugma sa usag usa.’ (1 Ped. 4:8) Ang usa ka paagi nga ikapakita nato ang maong gugma mao ang pagpasaylo ug pagpailob sa kasaypanan sa usag usa. Mangita sab tag mga kahigayonan nga mahimong mahinatagon ug maabiabihon sa tanan diha sa kongregasyon, bisan niadtong nakapahiubos tingali kanato. (Basaha ang Colosas 3:12-14.) Dihang ipakita nato ang maong gugma, atong gipamatud-an nga kita tinuod nga mga Kristohanon.

15. Sa unsang uban pang mga paagi nga atong gisunod ang sumbanan sa pagsimba nga giestablisar sa mga Kristohanon sa unang siglo?

¹⁵ Duna pay laing mga paagi nga atong gisunod  ang sumbanan sa pagsimba nga giestablisar sa Kristohanong kongregasyon sa unang siglo. Pananglitan, atong gisunod ang organisasyonal nga kahikayan nga giestablisar sa mga apostoles sa unang siglo. Sama nila, duna tay nagapanawng mga tigdumala, mga ansiyano, ug ministeryal nga mga alagad. (Filip. 1:1; Tito 1:5) Ang atong panglantaw bahin sa sekso ug kaminyoon, ang atong pagtahod sa pagkasagrado sa dugo, ug ang atong tinguha nga protektahan ang kongregasyon gikan sa dili mahinulsolong mga makasasala gibase tanan sa sumbanan nga giestablisar sa unang siglo.—Buh. 15:28, 29; 1 Cor. 5:11-13; 6:9, 10; Heb. 13:4.

16. Unsay atong makat-onan sa giingon sa Efeso 4:4-6?

¹⁶ Si Jesus miingon nga daghan ang mangangkon nga iyang mga tinun-an, pero dili tanan ang tinuod niyang sumusunod. (Mat. 7:21-23) Ang Kasulatan nagpasidaan sab nga sa kataposang mga adlaw, daghan ang “diyosnon [lang] tan-awon.” (2 Tim. 3:1, 5) Pero ang Bibliya klarong nag-ingon nga duna lay “usa ka pagtuo,” o relihiyon, nga giuyonan sa Diyos.—Basaha ang Efeso 4:4-6.

17. Kinsa karon ang nagsunod kang Jesus ug sa tinuod nga relihiyon?

¹⁷ Kinsa karon ang nagsunod sa tinuod nga relihiyon? Ato nang nasusi ang ebidensiya. Ato nang gihisgotan ang sumbanan sa pagsimba nga gitudlo ni Jesus ug gisunod sa mga Kristohanon sa unang siglo. Usa lang ang tubag—mga Saksi ni Jehova. Dako kaayong pribilehiyo nga nahimo tang bahin sa katawhan ni Jehova ug nahibaloan nato ang kamatuoran maylabot kaniya ug sa iyang mga katuyoan! Hinaot nga padayon tang makombinsir pag-ayo nga atong nabatonan ang kamatuoran.