Kay midaghan ang nagsangyaw, midako ang panginahanglan para sa mga literatura. Ang mga igsoon sa Brooklyn Bethel maoy nag-imprenta sa mga magasin, pero nagpaimprenta gihapon silag mga libro sa komersiyal nga mga kompaniya. Dayon sulod sa daghang bulan, kulang kaayo ang gisuplay nga inimprentang mga libro nga gamiton sa pagsangyaw. Busa gipangutana ni Brader Rutherford si Robert Martin, ang brader nga nagdumala sa factory, kon posible ba nga silay mag-imprenta sa mga libro.

Si Brader Martin nahinumdom, “Nindot kaayo to nga ideya, kay nagpasabot to nga mag-operate mig factory nga maggamag libro.” Ang mga brader miabang ug luna sa 18 Concord Street sa Brooklyn ug mipalit sa gikinahanglang gamit.

Pero dili tanan ang nalipay nga ang mga igsoon na ang mag-imprenta sa mga libro. Ang presidente sa usa sa mga kompaniya nga nag-imprenta sa atong mga libro mibisita sa bag-ong pasilidad. Siya miingon: “First class ning inyong imprentahanan, pero di mo kamaong mogamit ini. Dili ra ni abtan ug unom ka bulan, madaot na ni.”

Si Brader Martin miingon, “Morag sakto pod, pero nahibalo mi nga tabangan mi sa Ginoo, nga maoy kanunay niyang ginahimo.” Husto si Brader Martin. Wala madugay, ang bag-ong imprentahanan nakagamag 2,000 ka libro kada adlaw.

Gawas nga ang katawhan ni Jehova nag-imprenta nag mga libro, nagsugod silag gamit ug bag-ong paagi sa pagsangyaw sa maayong balita​—ang pag-broadcast sa radyo. Niadtong Dominggo sa hapon sa Pebrero 26, 1922, si Brader Rutherford mipakigpulong diha sa radyo sa unang higayon. Iyang gihatag ang pakigpulong nga “Minilyong Buhi Karon Dili na Gayod Mamatay,”  sa KOG nga estasyon sa radyo sa Los Angeles, California, U.S.A.

Gibanabana nga 25,000 ang nakadungog sa programa. Ang uban nila nagpadalag mga sulat aron magpasalamat. Usa sa mga misulat mao si Willard Ashford, nga nagpuyo sa Santa Ana, California. Iyang gipasalamatan si Brader Rutherford sa “makalingaw ug nindot” nga presentasyon. Miingon pod siya: “Diri sa balay, naay tulo nga nasakit ug dili makagawas. Kon dili pa tungod sa radyo, dili mi makapaminaw nimo, bisag naa ra ka sa silingan mipakigpulong.”

Nasundan pa nig mga programa nga gi-broadcast sa misunod nga mga semana. Sa kataposan sa tuig, ang The Watch Tower miingon nga “labing menos 300,000 ang nakadawat sa mensahe sa maayong balita pinaagig radyo.”

Tungod sa apresasyon sa mga mamiminaw, ang mga Estudyante sa Bibliya midesisyon sa paghimog estasyon sa radyo sa Staten Island, duol sa Brooklyn Bethel. Sa misunod nga mga tuig, ang mga Estudyante sa Bibliya migamit niini nga estasyon, ang WBBR, aron isangyaw ang mensahe sa Gingharian ngadto sa daghang tawo sa daghang lugar.

Sa Hunyo 15, 1922 nga isyu sa The Watch Tower, gipahibalo nga naay kombensiyon nga ipahigayon sa Cedar Point, Ohio, sa Septiyembre 5 ngadto sa 13, 1922. Eksayted kaayo ang mga Estudyante sa Bibliya pag-abot nila sa Cedar Point.

Sa pangbukas nga pakigpulong ni Brader Rutherford, siya miingon: “Dako ang akong pagsalig nga [panalanginan sa Ginoo] kini nga kombensiyon ug ipahinabo niya ang kinadak-ang pagpamatuod sukad masukad.” Kadaghan gipasiugda sa mga mamumulong niana nga kombensiyon ang buluhatong pagsangyaw.

Dayon sa Biyernes, Septiyembre 8, mga 8,000 ang nanulod sa awditoryum, nga naghinamhinam sa pakigpulong ni Brader Rutherford. Naghulat sila nga iyang isulti ang kahulogan sa “ADV” nga makita sa mga imbitasyon. Dihang nanglingkod sila, daghan nila ang nakamatikod sa dakong linukot nga trapal ibabaw sa entablado. Si Arthur Claus, nga mibiyahe gikan pa sa Tulsa, Oklahoma, U.S.A., nakakitag puwesto diin madunggan pag-ayo ang  mga pakigpulong. Maayo to nga puwesto kay adtong panahona, dili pa komon ang paggamit ug mikropono o trompa.

Aron dili mabalda ang pakigpulong, gipahibalo sa tsirman nga kadtong maulahi dili pasudlon sa awditoryum dihang magsugod na si Brader Rutherford. Sa alas 9:30 sa buntag, gisugdan ni Brader Rutherford ang iyang pakigpulong pinaagi sa pagkutlo sa giingon ni Jesus sa Mateo 4:17: “Ang Gingharian sa langit haduol na.” Dihang iyang gihisgotan kon sa unsang paagi mahibaloan sa mga tawo ang Gingharian, siya miingon: “Si Jesus mismo nag-ingon nga panahon sa iyang presensiya, naa siyay himoong espirituwal nga pagpangani. Iyang tigomon ang mga matinumanon ug maunongon.”

Si Brader Claus, nga naglingkod sulod sa awditoryum, nahinumdom: “Naminaw mi pag-ayo sa matag pulong.” Pero kalit lang nga naglain ang iyang pamati ug kinahanglan siyang mogawas sa awditoryum. Migawas si Arthur nga kontra sa iyang buot kay nahibalo siya nga dili na siya pasudlog balik.

Pagkataudtaod, miarang-arang ang iyang pamati. Siya miingon nga pagpadulong niya sa awditoryum, nakadungog siyag kusog nga pagpalakpak. Tungod adto, naeksayted siya! Nakahunahuna siya nga tiwason niyag paminaw ang nindot nga pakigpulong bisan pag kinahanglan siyang mokatkat sa atop. Si Brader Claus, nga 23 anyos adtong panahona, nakakitag paagi nga makakatkat sa atop. Abli ang mga bentana sa may atop, ug dihang miduol siya niini, iyang namatikdan nga “madungog pag-ayo ang pakigpulong.”

Pero dili lang si Arthur ang tua sa atop. Tua pod ang uban niyang mga higala. Ang usa nila, si Frank Johnson, midalig duol niya ug nangutana, “Naa kay hait nga pocket knife?”

“Naa,” miingon si Arthur.

“Ikaw ang tubag sa among mga pag-ampo,” miingon si Frank. “Nakita nimo ning dakong linukot  nga trapal? Banner ni nga gihigot sa mga lansang. Paminaw pag-ayo kang Judge. a Dihang moingon na siya, ‘imantala, imantala,’ putla ning upat ka higot.”

Busa si Arthur, nga naggunit ug kutsilyo, naghulat uban sa iyang mga higala sa signal nga putlon na ang mga higot. Dayon miabot na si Brader Rutherford sa pinakaimportanteng bahin sa iyang pakigpulong. Kay nadala sa iyang emosyon ug kadasig, tingali si Brader Rutherford halos misinggit dihang siya miingon: “Magmatinumanon ug mahimong matuod nga mga saksi para sa Ginoo. Ayawg hunong sa pagpakig-away, hangtod nga bug-os malaglag ang Babilonya. Isangyaw ang mensahe sa tanang dapit. Ang kalibotan kinahanglang mahibalo nga si Jehova ang Diyos ug si Jesu-Kristo ang Hari sa mga hari ug Ginoo sa mga ginoo. Kining adlawa importante kaayo. Tan-awa, ang Hari nagmando na! Kamo ang iyang mga magwawali. Busa imantala, imantala, imantala, ang Hari ug ang iyang Gingharian!”

Si Arthur miingon nga giputol nila ang mga higot ug hapsay kaayong nabuklad ang banner. Niadtong tungora, nasabtan na ang kahulogan sa “ADV,” kay mabasa diha sa banner ang mga pulong nga “Advertise the King and Kingdom!” o “Imantala ang Hari ug ang Gingharian!”

Ang kombensiyon sa Cedar Point nakatabang sa mga igsoon nga magpokus sa importanteng buluhaton sa pagsangyaw sa Gingharian, ug kadtong andam nga moboluntaryo nalipay sa pagpakigbahin niini. Ang usa ka colporteur (nga gitawag karon ug payunir) sa Oklahoma, U.S.A., miingon, “Nagsangyaw mi sa lugar nga daghan ang nagtrabaho sa mga minahan sa karbon ug pobre kaayo.” Miingon siya nga dihang madungog sa mga tawo ang mensahe nga mabasa sa Golden Age nga magasin, sagad “manghilak sila.” Siya miingon, “Lipay kaayo mi kay nahupay namo sila.”

Ang maong mga Estudyante sa Bibliya nahibalo nga importante kaayo ang giingon ni Jesus sa Lucas 10:2: “Daghan ang anihonon, apan diyutay ra ang mangangani.” Sa hapit nang matapos ang tuig, nahimo silang mas determinado nga imantala ang mensahe sa Gingharian sa tanang dapit.