“KON naa gani usa ninyo nga dili makig-away sa France o England, kamong tanan patyon!” gisinggitan sa usa ka sundalo nga Nazi ang grupo sa mga Saksi ni Jehova panahon sa Gubat sa Kalibotan II. Bisan pag naa sa duol ang armadong mga sundalo nga Nazi, walay usa sa atong mga igsoon ang mikompromiso. Wa gyod sila mahadlok! Kini nga pananglitan nagpakita sa atong baroganan ingong mga Saksi ni Jehova: Dili ta moapil sa mga gubat sa kalibotan. Bisan pag hulgaon ta nga patyon, wala tay dapigan sa panag-away sa mga nasod.

1. ANG KATAWHAN SA DIYOS KANIADTO USA LANG KA NASOD

Kaniadto, si Jehova nagpilig usa ka nasod nga mahimong iyang katawhan​—ang nasod sa Israel. Iyang gitawag ang mga Israelinhon ingong iyang “espesyal nga katigayonan gikan sa tanang katawhan.” (Ex. 19:5) Gihatagan sab sila sa Diyos ug espesipikong teritoryo. Busa dihang gisugo sa Diyos ang mga Israelinhon nga makiggubat sa ubang nasod, dili mga isigkamagsisimba nila ang ilang kaaway o ang ilang patyon. a

Karon, ang mga magsisimba ni Jehova naggikan sa “tanang kanasoran ug tribo ug katawhan ug pinulongan.” (Pin. 7:9) Kon ang katawhan sa Diyos makiggubat, mahimo nilang kaaway ang ilang isigkamagsisimba ug mapatay pa gani nila sila.

 2. SI JEHOVA ANG NAGSUGO SA MGA ISRAELINHON SA PAGPAKIGGUBAT

Kaniadto, si Jehova ang modesisyon kon kanus-a ug kon nganong makiggubat ang mga Israelinhon. Pananglitan, gisugo sa Diyos ang Israel sa pagpakiggubat aron ipahamtang ang iyang paghukom sa mga Canaanhon, nga nabantog sa ilang pagsimba sa mga demonyo, makaluod nga seksuwal nga imoralidad, ug paghalad sa ilang mga anak. Gisugo ni Jehova ang mga Israelinhon nga wagtangon ang maong daotang impluwensiya sa yuta nga iyang gisaad kanila. (Lev. 18:24, 25) Dihang ang mga Israelinhon nakapuyo na sa Yutang Saad, may mga panahon nga gitugotan sila sa Diyos nga makiggubat aron depensahan ang Israel gikan sa pintas nga mga kaaway. (2 Sam. 5:17-25) Pero wala gyod hatagi ni Jehova ang mga Israelinhon ug katungod sa pagdesisyon kon makiggubat ba sila. Dihang magbuotbuot silag desisyon, sagad daotan kaayo ang resulta.—Num. 14:41-45; 2 Cron. 35:20-24.

Karon, si Jehova wala magsugo sa mga tawo sa pagpakiggubat. Ang mga nasod nakig-away aron himoon kon unsay ilang gusto, imbes ang gusto sa Diyos. Makiggubat sila aron modako ang ilang teritoryo o kaha para sa ilang ekonomiya o politikal nga ideya. Ang uban pod makig-away aron panalipdan ang ilang pagsimba o patyon ang mga kaaway sa Diyos. Pero angayng hinumdoman nga si Jehova ang manalipod sa iyang tinuod nga mga magsisimba ug maglaglag sa iyang mga kaaway sa umaabot nga gubat​—sa gubat sa Armagedon. (Pin. 16:14, 16) Niana nga gubat, gamiton sa Diyos ang iyang langitnong kasundalohan, dili ang iyang mga alagad dinhi sa yuta.​—Pin. 19:11-15.

3. WALA PATYA SA MGA ISRAELINHON KADTONG NAGPAKITAG PAGTUO

Kaniadto, sagad kaluy-an sa mga sundalo sa Israel kadtong nagpakitag pagtuo sa Diyos ug patyon nila kadto lang gihukman ni Jehova ug kamatayon. Hisgotan nato ang duha ka pananglitan. Bisag gisugo ni Jehova nga laglagon ang Jerico, giluwas sa mga Israelinhon si Rahab ug ang  iyang pamilya tungod sa iyang pagtuo. (Jos. 2:9-16; 6:16, 17) Sa ulahi, ang tibuok siyudad sa Gabaon wala laglaga kay ang mga Gabaonhon nagpakitag kahadlok sa Diyos.—Jos. 9:3-9, 17-19.

Karon, apilon ug patay sa mga sundalo kadtong nagpakitag pagtuo. Ug usahay, patyon pod nila ang inosenteng mga sibilyan.

4. KINAHANGLANG SUNDON SA MGA ISRAELINHON ANG MGA INSTRUKSIYON SA DIYOS DIHANG MAKIGGUBAT

Kaniadto, gisugo ni Jehova ang mga sundalo sa Israel nga sundon ang iyang mga instruksiyon sa pagpakiggubat. Pananglitan, ang Diyos magsugo usahay nga ipahibalo ngadto sa kaaway nga siyudad ang “mga kondisyon sa pakigdait.” (Deut. 20:10) Si Jehova nagsugo pod nga ang mga sundalo sa Israel ug ang ilang kampo kinahanglang hinlo kanunay. Gidahom pod niya nga sundon nila ang iyang mga sukdanan sa moralidad. (Deut. 23:9-14) Sagad lugoson sa mga sundalo sa ubang nasod ang binihag nga mga babaye, pero gidili nâ ni Jehova sa mga Israelinhon. Gani, dili nila puwedeng minyoan ang binihag nga babaye hangtod molabay ang usa ka bulan human nila mailog ang siyudad.​—Deut. 21:10-13.

Karon, ang kadaghanang nasod naay gipirmahang internasyonal nga mga kasabotan nga angay nilang sundon sa pagpakiggubat. Ang katuyoan niini mao ang pagpanalipod sa mga sibilyan, pero makapaguol kay kini nga mga balaod sagad dili masunod.

5. ANG DIYOS NAKIG-AWAY PARA SA IYANG NASOD

Kaniadto, si Jehova nakig-away para sa mga Israelinhon, ug sagad mihimo siyag mga milagro aron silay modaog. Pananglitan, giunsa pagtabang ni Jehova ang mga Israelinhon sa pagpildi sa siyudad sa Jerico? Iya silang gisugo sa ‘pagsinggit ug singgit sa pakiggubat.’ Dihang ila ning gihimo, “ang paril nalumpag” maong mas sayon nilang nailog ang siyudad. (Jos. 6:20) Ug nganong midaog sila batok sa mga Amorihanon? ‘Gipaulanan ni Jehova ug dagkong yelo’ ang mga Amorihanon. “Mas daghan pa gani ang namatay sa ulan nga yelo kay sa napatay sa mga Israelinhon pinaagig espada.”​—Jos. 10:6-11.

ANG TINUOD NGA MGA KRISTOHANON MAKIGDAITON

Sa ato nang nahisgotan, ang atong situwasyon karon lahi kaayo sa situwasyon sa Israel kaniadto. Pero dili lang kini ang mga rason kon nganong dili ta makiggubat. Naa pay lain. Pananglitan, gitagna sa Diyos nga sa kataposang mga adlaw, kadtong iyang mga gitudloan “dili na magkat-on sa pagpakiggubat.” Busa dili pod sila mag-apil-apil niini. (Isa. 2:2-4) Ang Kristo nag-ingon pod nga ang iyang mga tinun-an ‘dili bahin sa kalibotan’; wala silay dapigan sa panag-away sa mga nasod.​—Juan 15:19.

Gidasig pod sa Kristo ang iyang mga sumusunod nga mohimog labaw pa. Iya silang gisugo nga likayan ang mga kinaiya nga moresulta sa pagdumot, kasuko, ug gubat. (Mat. 5:21, 22) Gisugo pod niya ang iyang mga sumusunod nga mahimong “makigdaiton” ug higugmaon ang ilang mga kaaway.​—Mat. 5:9, 44.

Komosta ang kada usa nato? Seguradong dili ta gustong makiggubat, pero basig naay gamayng kasuko diha sa atong kasingkasing nga mahimong hinungdan sa dili pagsinabtanay o pagkabahinbahin sa kongregasyon. Angay tang maningkamot kanunay nga wad-on ang maong mga pagbati.​—Sant. 4:1, 11.

Imbes mag-apil-apil sa gubat sa mga nasod, maningkamot ta nga makigdait ug magpakitag gugma sa usag usa. (Juan 13:34, 35) Hinaot determinado ta nga magpabiling neyutral samtang nagpaabot sa panahon nga wad-on na ni Jehova ang tanang gubat hangtod sa hangtod.​—Sal. 46:9.