Nianang tuiga, ang organisasyon mihimog mga kausaban nga mas nakapahiusa sa pagsimba sa mga Estudyante sa Bibliya. Ang The Watch Tower nagsugod pag-publish ug mga komento bahin sa mga teksto nga gihisgotan sa ilang senemanang Tigom sa Pag-ampo, Pagdayeg, ug Testimonya. Naghimo pod ang mga Estudyante sa Bibliya ug kalendaryo nga naay teksto sa kada semana ug numero sa mga awit. Kini nga mga awit puwedeng kantahon panahon sa personal nga pagtuon ug pamilyahanong pagsimba.

Sa ilang mga tigom, ang mga Estudyante sa Bibliya mohatag ug mga “testimonya.” Aning panahona, mosulti sila sa ilang eksperyensiya sa pagsangyaw, magpasalamat kang Jehova, moawit, o moampo pa gani. Si Eva Barney, nga nabawtismohan niadtong 1923 sa edad nga 15, nahinumdom: “Kon gusto kang mohatag ug testimonya, motindog ka ug sugdan nimo ni sa pagsulti ug sama niini, ‘Gusto nakong pasalamatan ang Ginoo sa tanang kaayo nga iyang gipakita kanako.’” Ang ubang igsoon ganahan kaayong mohatag ug testimonya. Si Sister Barney miingon: “Ang tigulang nga igsoon nga si Brader Godwin daghan kaayog gustong pasalamatan sa Ginoo. Pero dihang makita sa iyang asawa nga dili na mahimutang ang brader nga nagdumala, iyang hinayon ug bira ang tumoy sa amerkana sa iyang bana, ug molingkod na ang iyang bana.”

Kausa kada bulan, ang matag klase (kongregasyon) dunay espesyal nga Tigom sa Pag-ampo, Pagdayeg, ug Testimonya. Bahin niini nga tigom, ang The Watch Tower sa Abril 1, 1923, nag-ingon: “Ang katunga sa tigom igahin para sa paghatag ug mga testimonya bahin sa buluhatong pagsangyaw ug pagdasig sa mga magmamantala. . . . Segurado mi nga kining makapadasig nga mga tigom mas makapasuod sa mga igsoon.”

Nakabenepisyo pag-ayo niini nga mga tigom si Charles Martin, 19 anyos nga magmamantala gikan sa Vancouver, Canada. Siya nahinumdom: “Dinhi ko unang nakakat-on kon unsay akong isulti dihang magsangyaw sa balay ug balay. Kasagaran, naay mohatag ug eksperyensiya bahin sa ilang pagsangyaw. Naghatag ni nakog ideya kon unsay akong isulti ug kon unsaon pagtubag ang lainlaing pagsupak.”

Ang mga “adlaw sa pag-alagad” nakaamot pod sa panaghiusa sa mga igsoon. Ang Abril 1, 1923 nga The Watch Tower nagpahibalo: “Aron ang tanan magkahiusa sa buluhaton . . . , ang Martes, Mayo 1,  1923, gipili ingong adlaw sa pag-alagad sa tibuok [kongregasyon]. Ug mao man sab ang unang Martes sa matag bulan human niana . . . Ang matag membro sa [kongregasyon] angayng makigbahin niini nga buluhaton.”

Bisan ang batan-ong mga Estudyante sa Bibliya miapil pod sa pagsangyaw. Si Hazel Burford, nga 16 anyos pa lang niadtong panahona, nahinumdom: “Ang Bulletin dunay mga sampol nga pagpakig-estorya nga among i-memorize. a Dasig kaayo ko nga miapil sa pagsangyaw uban sa akong lolo.” Pero wala magdahom si Sister Burford nga naay igsoon nga mosupak niana. Siya miingon: “Ang usa ka tigulang nga brader dili gyod mosugot nga makig-estorya ko sa mga tawo. Niadtong panahona, ang uban wala makasabot nga ang tanang Estudyante sa Bibliya, apil ang ‘mga batan-ong lalaki ug babaye,’ angayng makigbahin sa pagdayeg sa atong Dakong Maglalalang.” (Sal. 148:​12, 13) Pero wala to makapugong kang Sister Burford sa pagsangyaw. Sa ulahi, siya nakaeskuwela sa ikaduhang klase sa Gilead ug nag-alagad ingong misyonaryo sa Panama. Sa ngadtongadto, giusab sa maong mga igsoon ang ilang panglantaw bahin sa mga batan-on nga makigbahin sa ministeryo.

Ang lokal ug rehiyonal nga mga kombensiyon nakatabang pod sa mga igsoon nga mas magkahiusa. Daghan niini nga mga kombensiyon ang naggahin ug mga adlaw sa pagsangyaw. Pananglitan, sa kombensiyon sa Winnipeg, Canada, ang tanan nga nanambong gidapit nga mosangyaw sa siyudad pagka-Marso 31. Tungod aning espesyal nga mga adlaw sa pagsangyaw, mas daghang tawo ang nasangyawan ug miresulta nig mga pag-uswag. Pagka-Agosto 5, sa laing kombensiyon sa Winnipeg, gibanabana nga 7,000 ang mitambong. Niadtong panahona, kini ang kinatas-ang attendance sa kombensiyon sa Canada.

Ang pinakaimportanteng kombensiyon sa katawhan ni Jehova sa 1923 gipahigayon sa Los Angeles, California, niadtong Agosto 18-26. Sa mga semana una pa ang kombensiyon, gi-advertise sa mga newspaper ang maong okasyon ug ang mga Estudyante sa Bibliya nakapanagtag ug kapig 500,000 ka handbill. Nagbutang pod silag mga banner diha sa  publiko ug pribadong mga sakyanan aron i-advertise ang kombensiyon.

Pagka-Sabado, Agosto 25, si Brader Rutherford naghatag ug pakigpulong nga nag-ulohang “Mga Karnero ug mga Kanding.” Iyang giklaro nga ang mga “karnero” nagtumong sa matinud-anog kasingkasing nga mga tawo nga magpuyo sa paraisong yuta. Gibasa pod niya ang resolusyon nga “Usa ka Pasidaan.” Kini nga resolusyon nagsaway sa Kakristiyanohan ug nagdasig sa matinud-anog kasingkasing nga mga tawo nga mobulag sa “Bantogang Babilonya.” (Pin. 18:​2, 4) Sa ulahi, ang madasigong mga Estudyante sa Bibliya sa tibuok kalibotan nanagtag ug minilyong kopya niini nga resolusyon.

Sa kataposang adlaw sa kombensiyon, kapig 30,000 nga nanambong ang nakadungog sa pakigpulong ni Brader Rutherford nga nag-ulohang “Ang Tanang Nasod Nagmartsa Paingon sa Armagedon, Pero Minilyon nga Buhi Karon Dili na Gayod Mamatay.” Gidahom sa mga Estudyante sa Bibliya nga daghan gyod ang manambong, maong giabangan nila ang bag-ong gitukod nga Los Angeles Coliseum. Aron maseguro nga madunggan sa tanan ang programa, gigamit sa mga igsoon ang loudspeaker system sa estadyum, nga bag-ong teknolohiya adtong panahona. Daghan pod ang nakadungog sa programa diha sa radyo.

Niadtong 1923, naay dakong pag-uswag sa buluhatong pagsangyaw sa Africa, Europe, India, ug South America. Sa India, samtang nag-atiman sa iyang asawa ug unom ka anak, si A. J. Joseph mitabang sa paghimog mga literatura sa pinulongang Hindi, Tamil, Telugu, ug Urdu.

Sa Sierra Leone, ang mga Estudyante sa Bibliya nga si Alfred Joseph ug Leonard Blackman misulat sa hedkuwarter sa Brooklyn, New York, aron mohangyog dugang magsasangyaw. Pagka-Abril 14, 1923, gitubag ang ilang hangyo. “Gabii na kaayo to sa Sabado dihang kalit nga naay nanawag sa telepono,” miingon si Alfred. Dihay kusog nga tingog nga nangutana, “Ikaw ba tong misulat sa Watch Tower Society aron mohangyog dugang magsasangyaw?” “Oo,” mitubag si Alfred. “Aw, ako ang ilang gipadala.” Ang nanawag mao si William R. Brown. Miabot siya anang adlawa gikan sa Caribbean uban sa iyang asawa nga si Antonia ug sa ilang bata pang mga anak nga si Louise ug Lucy. Ang mga igsoon wala na maghulat ug dugay aron makita ang bag-ong abot nga pamilya.

Si Alfred mipadayon: “Pagkasunod buntag, samtang nagpahigayon mi ni Leonard sa among senemanang pagtuon sa Bibliya, dihay taas nga tawo  nga nagtindog sa pultahan—si Brader Brown. Tungod sa iyang kadasig, gusto dayon niyang mohatag ug pakigpulong publiko pagkasunod adlaw.” Wala pay usa ka bulan, nahurot nag panagtag ni Brader Brown ang tanang literatura nga iyang gidala. Dayon nakadawat siyag 5,000 pa ka libro, pero wala madugay nahurot na pod to ug nagkinahanglan na pod ug dugang libro. Pero si Brader Brown wala mailhi ingong tigbaligyag libro. Sulod sa daghang tuig nga madasigon siyang nag-alagad kang Jehova, kanunay siyang nagkutlo sa Bibliya dihang magpakigpulong, maong gianggaan siyag Bible Brown.

Sa laing bahin, ang sangang buhatan sa Barmen, Germany, dili na paigo para sa mga nagboluntaryo didto, ug ang siyudad hapit nang sakopon sa France nga silingang nasod niini. Ang mga Estudyante sa Bibliya nakakitag bilding sa Magdeburg nga haom kaayo sa pag-imprentag mga literatura. Pagka-Hunyo 19, naempake na sa mga igsoon ang equipment sa pag-imprenta ug ang ubang gamit, ug mibalhin sila sa bag-ong Bethel sa Magdeburg. Sa mismong adlaw nga gipahibalo nila ang hedkuwarter nga nakabalhin na sila, gibalita sa mga newspaper nga nasakop na sa France ang siyudad sa Barmen. Nakita sa mga igsoon nga ang ilang pagbalhin maoy pamatuod sa panalangin ug proteksiyon ni Jehova.

Sa Brazil, si George Young, nga mibiyahe sa daghang lugar aron isangyaw ang maayong balita, nag-organisar ug sangang buhatan ug nagsugod pag-publish sa The Watch Tower diha sa pinulongang Portuguese. Sulod lang sa pipila ka bulan, nakapanagtag siyag kapin sa 7,000 ka literatura. Ang iyang pag-abot sa Brazil nakapalipay pod pag-ayo kang Sarah Ferguson ug sa iyang pamilya. Sukad sa 1899, nagabasa na si Sister Ferguson sa The Watch Tower pero wala pa niya masimbolohi ang iyang dedikasyon pinaagig bawtismo. Pipila ka bulan sa ulahi, si Sister Ferguson ug ang iyang upat ka anak nabawtismohan na gyod.

Sa hapit nang matapos ang tuig, ang epekto sa nagkahiusang paagi sa pagsimba sa mga Estudyante sa Bibliya gihisgotan sa The Watch Tower niadtong Disyembre 15, 1923: “Klaro natong makita nga ang mga [kongregasyon] . . . maayog kahimtang sa espirituwal . . . Busa mangandam ta alang sa dugang buluhaton ug huptan ang atong kadasig ug determinasyon para sa sunod tuig, nga magpabiling malipayon sa pag-alagad.”

Eksayting pod kaayo ang mosunod nga tuig para sa mga Estudyante sa Bibliya. Ang mga igsoon sa Bethel pila ka bulan nang nagtrabaho sa usa ka lote sa Staten Island, nga dili ra layo sa hedkuwarter sa Brooklyn. Ang mga pasilidad nga gitukod nianang bag-ong lokasyon nahuman sa sayong bahin sa 1924, ug nakatabang ni nga mas magkahiusa ang mga igsoon ug masangyaw ang maayong balita sa mga paagi nga wala pa mahimo sukad.