1. Nganong malisdan ta usahay sa pagsunod?

 MALISDAN ba ka usahay sa pagsunod? Naeksperyensiyahan na ni Haring David, maong miampo siya sa Diyos: “Pukawa ang akong tinguha nga motuman kanimo.” (Sal. 51:12) Gimahal ni David si Jehova. Pero naay mga panahon nga nalisdan siya sa pagsunod, ug ingon ana pod ta. Ngano? Una, napanunod nato ang tendensiya nga mosupak. Ikaduha, si Satanas kanunayng nag-aghat nato nga morebelde, sama sa iyang gihimo. (2 Cor. 11:3) Ikatulo, napalibotan tag mga tawo nga rebelyosog kinaiya, “ang espiritu nga nagalihok karon sa mga anak sa pagkadili-masinugtanon.” (Efe. 2:2) Busa dili lang ang atong tendensiya nga magpakasala ang kinahanglan natong suklan. Kinahanglan pod natong suklan ang mga paningkamot sa Yawa ug niining kalibotana sa pag-impluwensiya nato nga mosupak. Angay gyod tang maningkamot nga sundon si Jehova ug kadtong mga gihatagan niyag awtoridad.

2. Unsay gipasabot sa pagkahimong “andam mosunod”? (Santiago 3:17)

² Basaha ang Santiago 3:17. Si Santiago gigiyahan sa Diyos sa pagsulat nga ang maalamong mga tawo “andam mosunod.” Hunahunaa kon unsay gipasabot niana. Kinahanglang andam kaayo tang mosunod niadtong gihatagan ni Jehova ug awtoridad. Siyempre, dili dahomon ni Jehova nga sundon nato kadtong mohatag natog sugo nga supak sa Iyang mga balaod.​—Buh. 4:18-20.

3. Nganong importante kang Jehova nga mosunod ta niadtong may awtoridad kanato?

³ Tingali mas sayon para nato nga sundon si Jehova kay sa tawo, ilabina kay kanunayng husto ang direksiyon nga ihatag ni Jehova. (Sal. 19:7) Pero dili ingon ana ang direksiyon gikan sa mga tawo kay dili sila hingpit. Bisan pa niana, gihatagan sa atong langitnong Amahan ug awtoridad ang mga ginikanan, mga opisyal  sa gobyerno, ug mga ansiyano. (Prov. 6:20; 1 Tes. 5:12; 1 Ped. 2:13, 14) Kon ato silang sundon, gisunod pod nato si Jehova. Atong konsiderahon kon sa unsang paagi nato masunod ang mga tawo nga gihatagan ni Jehova ug awtoridad, bisan pag usahay lisod tingaling dawaton ug sundon ang ilang direksiyon.

4. Nganong daghang anak ang dili masinugtanon sa ilang ginikanan?

⁴ Ang mga batan-on gipalibotan sa ubang batan-on nga “dili masinugtanon sa ginikanan.” (2 Tim. 3:1, 2) Nganong daghan nila ang dili masinugtanon? Gibati sa uban nga salingkapaw ang ilang ginikanan, kay naa silay gustong ipahimo sa ilang mga anak nga sila mismo wala gahimo. Para sa uban, ang tambag sa ilang ginikanan kinaraan na, dili praktikal, o sobra ka estrikto. Kon batan-on ka, kana pod bay imong gibati? Daghan ang naglisod ug sunod sa sugo ni Jehova: “Magmasinugtanon mo sa inyong ginikanan sumala sa kabubut-on sa Diyos, kay kini matarong.” (Efe. 6:1) Unsay makatabang nimo sa paghimo niana?

5. Nganong maayo kaayong ehemplo si Jesus sa pagsunod sa iyang mga ginikanan? (Lucas 2:46-52)

⁵ Makakat-on ka gikan sa pinakamaayong ehemplo sa pagkamasinugtanon​—si Jesus. (1 Ped. 2:21-24) Hingpit siya nga tawo, pero ang iyang mga ginikanan dili. Bisan pa niana, gipasidunggan ni Jesus ang iyang mga ginikanan bisag nakahimo silag mga sayop ug usahay wala sila makasabot niya. (Ex. 20:12) Konsideraha ang nahitabo kang Jesus niadtong 12 anyos siya. (Basaha ang Lucas 2:46-52.) Nabiyaan siya sa iyang mga ginikanan sa Jerusalem. Kon buot hunahunaon, responsibilidad ni Jose ug Maria nga seguroon nga ang tanan nilang anak apil sa grupo nga gabiyahe pauli human sa pista. Dihang nakit-an na gyod ni Jose ug Maria si Jesus, gibasol siya ni Maria sa problema nga iyang gihatag nila! Puwede ra untang mangatarongan si Jesus nga wala siyay gihimong sayop, pero wala na niya buhata. Hinuon, mitubag siya sa simple ug matinahorong paagi. Pero si Jose ug Maria ‘wala makasabot sa iyang gisulti.’ Bisan pa niana, si Jesus “padayong nagpasakop kanila.”

6-7. Unsay makatabang sa mga batan-on aron masunod nila ang ilang ginikanan?

⁶ Mga batan-on, maglisod ba mog sunod sa inyong ginikanan dihang masayop sila o dihang wala mo nila masabti? Unsay makatabang ninyo? Una, hunahunaa kon unsay bation ni Jehova. Ang Bibliya nag-ingon nga kon sundon ninyo ang inyong ginikanan, “makapalipay kini sa Ginoo.” (Col. 3:20) Nahibalo si Jehova dihang ang inyong ginikanan wala kaayo makasabot ninyo o dihang mohimo silag mga balaod nga morag dili rasonable. Pero kon sundon gihapon ninyo sila, mapalipay ninyo si Jehova.

⁷ Ikaduha, hunahunaa kon unsay bation sa inyong ginikanan. Kon inyo silang sundon, mapalipay ninyo sila ug mosalig sila ninyo. (Prov. 23:22-25) Ug seguradong mas masuod mo kanila. Si Alexandre, nga taga-Belgium, miingon: “Dihang mas ginasunod na nako ang hangyo sa akong mga ginikanan, ang among relasyon nausab. Mas nagkasuod mi ug nahimong mas malipayon.” b Ikatulo, hunahunaa kon sa unsang paagi ang imong pagsunod karon makatabang nimo sa ulahi. Si Paulo, nga taga-Brazil, miingon: “Kay nakakat-on ko nga sundon ang akong mga ginikanan, nakatabang ni nako nga sundon si Jehova ug kadtong naay awtoridad.” Ang Pulong sa Diyos naghatag ug importanteng rason kon nganong angay nimong sundon ang imong ginikanan. Kini nag-ingon: “Aron  magmauswagon ka ug mabuhig dugay sa yuta.”​—Efe. 6:2, 3.

8. Nganong daghang batan-on ang masinugtanon sa ilang ginikanan?

⁸ Nakita sa daghang batan-on nga maayo ang resulta dihang mosunod sila. Sa primero, wala masabti ni Luiza, nga taga-Brazil, kon nganong wala pa siya tugoti nga makabaton ug cellphone. Mirason siya nga kadaghanan sa iyang mga kaedad naay cellphone. Pero naamgohan niya nga giprotektahan lang siya sa iyang mga ginikanan. Karon, wala na siya maghunahuna nga ang pagsunod niya sa iyang mga ginikanan nakapugong niya sa paghimo sa iyang gusto. Hinuon siya miingon, “Mora nig seatbelt nga makaluwas sa akong kinabuhi.” Si Elizabeth, batan-ong sister sa United States, nalisdan gihapon usahay nga mosunod sa iyang mga ginikanan. Siya miingon, “Dihang dili kaayo nako masabtan kon nganong gihatag sa akong ginikanan ang usa ka balaod, hinumdoman nako ang mga higayon nga napanalipdan ko sa ilang mga balaod.” Si Monica, nga taga-Armenia, miingon nga kanunayng maayo ang resulta dihang mosunod siya sa iyang mga ginikanan imbes nga supakon sila.

9. Unsay pagbati sa daghang tawo bahin sa pagsunod sa balaod?

⁹ Daghan ang moingon nga kinahanglan nato ang mga gobyerno ug nga angay natong sundon ang pipila sa mga balaod nga gipatuman niining “labaw nga mga awtoridad.” (Roma 13:1) Pero kon ang usa ka balaod morag dili makataronganon o sobra ra ang gipangayo, tingali magduhaduha na sila sa pagsunod niini. Tagda pananglitan ang pagbayad ug buhis. Sa survey nga gihimo sa usa ka nasod sa Europe, daghan ang naghunahuna nga “dili ka angayng mobayad ug buhis kon gibati nimo nga dili ni makataronganon.” Dili ikatingala nga ang mga tawo aning nasora mobayad lang ug mga 65% sa buhis nga gipangayo sa gobyerno.

10. Nganong sundon nato bisan ang mga balaod nga dili nato ganahan?

¹⁰ Gipakita sa Bibliya nga ang mga gobyerno sa tawo nagpahinabog pag-antos, kontrolado ni Satanas, ug hapit nang laglagon. (Sal. 110:5, 6; Eccl. 8:9; Luc. 4:5, 6) Kini sab nag-ingon nga “kadtong mosukol sa awtoridad misukol sa kahikayan sa Diyos.” Ang atong relatibong pagpasakop sa labaw nga mga awtoridad apil sa temporaryong kahikayan ni Jehova sa pagmentinar sa kahapsay. Busa angay natong “ihatag ngadto sa tanan ang nahiangay kanila,” apil na ang pagbayad ug buhis, pagpakitag pagtahod, ug pagkamasinugtanon. (Roma 13:1-7) Tingali para nato ang usa ka balaod dili praktikal, dili makataronganon, o dakog gasto kon sundon. Pero sundon nato si Jehova, ug gisugo niya nga mosunod ta niini nga mga awtoridad basta wala ra silay ipabuhat nga supak sa iyang mga sugo.​—Buh. 5:29.

11-12. Sumala sa Lucas 2:1-6, unsay gihimo ni Jose ug Maria aron masunod ang balaod nga dili kombenyente para nila, ug unsay resulta? (Tan-awa sab ang mga hulagway.)

 ¹¹ Makakat-on ta sa ehemplo ni Jose ug Maria, kinsa andam mosunod sa labaw nga mga awtoridad bisag dili ni kombenyente para nila. (Basaha ang Lucas 2:1-6.) Dihang mga siyam ka bulan nang mabdos si Maria, nasulayan ang ilang pagkamasinugtanon ni Jose. Si Agusto, nga nagmando sa Imperyo sa Roma, nagpagawas ug sugo nga ang tanan kinahanglang mouli sa ilang lungsod aron magparehistro. Si Jose ug Maria kinahanglang moadto sa Betlehem, nga mobiyaheg 150 kilometros (93 ka milya) agi sa daghang bungtod. Lisod gyod ni nga biyahe, ilabina kang Maria. Posible nga nabalaka sila sa iyang safety ug sa ilang anak nga wala pa matawo. Unsa na lag manganak siya samtang gabiyahe? Ang bata nga iyang gibuntis mao baya ang umaabot nga Mesiyas. Himoon kaha nila ning rason aron dili sundon ang gisugo sa gobyerno?

¹² Bisag naay mga rason si Jose ug Maria nga mabalaka, gisunod gihapon nila ang balaod. Gipanalanginan ni Jehova ang ilang pagkamasinugtanon. Si Maria luwas nga nakaabot sa Betlehem, nanganak ug himsog nga bata, ug nakatabang pa gani nga matuman ang tagna sa Bibliya.​—Miq. 5:2.

13. Sa unsang paagi ang atong pagkamasinugtanon makaapektar sa atong mga igsoon?

¹³ Kon sundon nato ang labaw nga mga awtoridad, makabenepisyo ta ug ang uban. Sa unsang paagi? Ang usa niana, malikayan nato ang silot nga resulta sa pagsupak sa balaod. (Roma 13:4) Kon mosunod ta sa balaod, makaapektar ni sa panglantaw sa mga awtoridad diha sa mga Saksi ni Jehova. Pananglitan, didto sa Nigeria daghang tuig na ang milabay, gisulod sa mga sundalo ang usa ka Kingdom Hall panahon sa tigom. Gipangita nila ang mga nagprotesta nga dili gustong mobayad ug buhis. Pero giingnan sa usa ka opisyal ang mga sundalo nga mobiya, kay matod niya: “Ang mga Saksi ni Jehova dili supak sa pagbayad ug buhis.” Sa matag higayon nga mosunod ka sa balaod, gitabangan nimo  nga makabaton ug maayong reputasyon ang katawhan ni Jehova​—reputasyon nga posibleng makapanalipod sa mga igsoon sa umaabot.​—Mat. 5:16.

14. Unsay nakatabang sa usa ka sister nga mahimong “andam mosunod” sa labaw nga mga awtoridad?

¹⁴ Pero naa gihapon tingali mga higayon nga dili ta gustong mosunod sa labaw nga mga awtoridad. Si Joanna, sister sa United States, miangkon: “Lisod kaayo para nako nga mosunod, kay pipila sa akong pamilya nakasinatig inhustisya sa kamot sa mga awtoridad.” Pero naningkamot si Joanna nga bag-ohon ang iyang panghunahuna. Una, gihunong niya ang pagbasag mga post sa social media nga makapukaw sa iyang negatibong pagbati sa mga awtoridad. (Prov. 20:3) Ikaduha, nag-ampo siya nga tabangan siya ni Jehova nga mosalig Niya imbes nga molaom ug kausaban sa gobyerno. (Sal. 9:9, 10) Ikatulo, nagbasa siyag mga artikulo sa atong mga publikasyon bahin sa neyutralidad. (Juan 17:16) Karon, si Joanna miingon nga tungod sa iyang pagtahod ug pagsunod sa mga awtoridad, malinawon na kaayo ang iyang kasingkasing ug hunahuna.

15. Ngano kahang usahay lisod sundon ang direksiyon gikan sa organisasyon ni Jehova?

¹⁵ Si Jehova nagsugo nga “magmasinugtanon [ta] sa mga nanguna” sa kongregasyon. (Heb. 13:17) Bisag hingpit ang atong Lider nga si Jesus, dili hingpit ang mga tawo nga iyang gigamit nga manguna dinhi sa yuta. Usahay, malisdan tingali ta sa pagsunod kanila, ilabina kon naa silay ipabuhat nga dili nato gustong himoon. Dihay higayon nga si apostol Pedro nagduhaduha sa pagsunod. Dihang giingnan siya sa anghel nga kaonon ang mga hayop nga gidili sa Moisesnong Balaod, si Pedro mibalibad​—dili lang kas-a, kondili tulo ka beses! (Buh. 10:9-16) Ngano? Naglibog siya sa bag-ong direksiyon. Lahi ra kaayo ni sa iyang ginahimo sukad pa kaniadto. Kon nalisdan si Pedro nga sundon ang direksiyon gikan sa hingpit nga anghel, labaw na gyod tingali nga malisdan tang mosunod sa direksiyon gikan sa dili hingpit nga mga tawo.

16. Bisag dili tingali rasonable para kang apostol Pablo ang direksiyon nga iyang nadawat, unsay iyang gihimo? (Buhat 21:23, 24, 26)

¹⁶ Si apostol Pablo “andam mosunod” bisan pag nakadawat siyag direksiyon nga tingali dili rasonable para niya. Ang Hudiyong mga Kristohanon nakadungog ug mga estorya bahin kang Pablo​—nga siya kuno nanudlog “apostasya batok sa Balaod ni Moises” ug wala magtahod niini nga Balaod. (Buh. 21:21) Ang Kristohanong mga ansiyano sa Jerusalem naghatag ug direksiyon kang Pablo nga magdala siyag upat ka lalaki ngadto sa templo ug hinloan niya ang iyang kaugalingon sa seremonyal nga paagi aron ipakita nga gasunod siya sa Balaod. Pero nahibalo si Pablo nga ang mga Kristohanon dili na ubos sa Balaod, ug nga wala siyay gihimong sayop. Bisan pa niana, gisunod dayon ni Pablo ang direksiyon. “Pagkasunod adlaw gidala ni Pablo ang [maong] mga tawo ug gihinloan ang iyang kaugalingon sa seremonyal nga paagi uban kanila.” (Basaha ang Buhat 21:23, 24, 26.) Ang pagkamasinugtanon ni Pablo nakaamot sa panaghiusa.​—Roma 14:19, 21.

17. Unsay imong nakat-onan sa eksperyensiya ni Stephanie?

¹⁷ Ang sister nga si Stephanie naglisod ug dawat sa desisyon gikan sa sangang buhatan sa ilang nasod. Siya ug ang iyang bana malipayong nag-alagad sa grupo nga langyawg pinulongan. Dayon, gi-dissolve sa sangang buhatan ang maong grupo, ug ang magtiayon giasayn ug balik sa kongregasyon nga nagsulti sa ilang pinulongan. “Wala gyod ko malipay,” miingon si Stephanie. “Dili ko kombinsido nga mas dakog panginahanglan ang mga kongregasyon  nga nagsulti sa among pinulongan.” Bisan pa niana, gisunod gihapon niya ang bag-ong direksiyon. “Sa ngadtongadto, nakita nako ang kaalam sa maong direksiyon,” siya miingon. “Nahimo ming espirituwal nga ginikanan sa pipila diha sa among kongregasyon nga dili Saksi ug pamilya. Naa koy giestadihan nga bag-ong na-reactivate nga sister. Ug karon mas daghan na kog panahon para sa personal nga pagtuon.” Siya midugang, “Hinlo ang akong konsensiya, kay nahibalo ko nga gihimo nako ang akong maarangan nga mahimong masinundanon.”

18. Unsay mga kaayohan kon mosunod ta sa mga direksiyon?

¹⁸ Kitang tanan makakat-on sa pagsunod. “Nakat-onan [ni Jesus] ang pagkamasinugtanon,” dili ubos sa maayong mga kahimtang kondili “sa mga butang nga iyang giantos.” (Heb. 5:8) Sama kang Jesus, sagad makakat-on tang mosunod kon naa ta sa lisod nga mga situwasyon. Pananglitan, sa pagsugod sa COVID-19 nga pandemic, nakadawat tag direksiyon nga hunongon ang pagtigom diha sa mga Kingdom Hall ug ang pagsangyaw sa balay ug balay. Nalisdan ba ka sa pagsunod? Bisan pa niana, ang imong pagsunod nakapanalipod nimo, nakatabang nga magkahiusa ang kongregasyon, ug nakapalipay kang Jehova. Kitang tanan karon mas andam na unyang mosunod sa bisan unsang instruksiyon nga atong madawat panahon sa dakong kasakitan. Ang pagsunod niana makaluwas gyod sa atong kinabuhi!​—Job 36:11.

19. Nganong gusto nimo nga mahimong masinugtanon?

¹⁹ Atong nakat-onan nga ang pagkamasinugtanon moresultag daghang panalangin. Pero ang pangunang rason nga sundon nato si Jehova maoy tungod sa atong gugma kaniya ug kay gusto nato siyang mapalipay. (1 Juan 5:3) Dili gyod nato mabayran si Jehova sa tanang butang nga iyang gihimo para nato. (Sal. 116:12) Pero makahimo ta sa pagsunod kaniya ug niadtong naay awtoridad kanato. Kon mosunod ta, atong gipakita nga maalamon ta. Ug ang mga maalamon makapalipay sa kasingkasing ni Jehova.​—Prov. 27:11.