Ang mga igsoon sa Bethel kapig usa ka tuig nga nagtrabaho aron tukoron ang estasyon sa radyo nga WBBR sa Staten Island, New York City. Human mahawani ang yuta, nagtukod silag dakong balay para sa mga igsoon nga miboluntaryo ug laing bilding para sa mga gamit. Dihang nahuman nila kinig trabaho, gisugdan sa mga igsoon ang pag-asembol sa mga gamit nga gikinahanglan aron maka-broadcast sa radyo. Pero naay pipila ka problema nga kinahanglan nilang sulbaron.

Nakita sa mga igsoon nga lisod ang pagtaod sa main nga antena para sa estasyon. Ang antena nga may gitas-ong 91 metros (300 feet) kinahanglang itaod sa tunga sa duha ka poste nga kahoy nga tag-61 metros (200 feet) ang gihabogon. Sa primero, wala sila molampos. Pero kay misalig sila sa tabang ni Jehova, milampos ra gyod sila. Si Calvin Prosser, nga apil sa mitrabaho niini nga proyekto, miingon, “Kon milampos pa mi sa pagtaod sa antena sa unang higayon, makaingon gyod tingali mi nga nahimo to namo tungod sa among kaugalingong paningkamot.” Nahibalo gyod ang mga igsoon nga milampos lang sila tungod sa tabang ni Jehova. Pero naa pa silay laing problema.

Ang pag-broadcast pinaagig radyo dili pa kaayo komon ug wala pa kaayoy mapalit nga mga gamit para niini. Pero ang mga brader nakakita ra gyod ug hinimohimo lang nga 500 watts nga transmitter nga ginamit na. Ug imbes mopalit ug mikropono, migamit silag telepono. Usa ka gabii sa Pebrero, ang mga brader midesisyon nga sulayan ang ilang gihimohimo nga mga gamit pang-broadcast. Aron naa silay ma-broadcast nga programa, ang mga brader nangantag mga Kingdom song.  Si Ernest Lowe makatawa dihang mahinumdom siya nga samtang nanganta ang mga brader, nakadawat silag tawag gikan kang Judge Rutherford b nga nakadungog sa ilang kanta diha sa iyang radyo didto sa Brooklyn, mga 25 kilometros (15 milya) ang gilay-on.

“Undangi ra god na ninyo,” si Brader Rutherford nagpasiaw nga miingon. “Mora mog mga iring nga nagyagaw!” Kay medyo naulaw, gipalong dayon sa mga brader ang transmitter. Pero nalipay sila kay andam na gyod diay sila para sa ilang unang pag-broadcast.

Niadtong Pebrero 24, 1924, panahon sa pinakaunang pag-broadcast, si Brader Rutherford miingon nga ang maong estasyon sa radyo gamiton para sa “intereses sa gingharian sa Mesiyas.” Miingon pod siya nga ang katuyoan niini mao ang “pagtabang sa tanang tawo nga masabtan ang kamatuoran sa Bibliya, bisan unsa pa ang ilang tinuohan o denominasyon, ug mahibaloan kon asa na ta nga yugto sa panahon.”

Milampos gyod ang unang pag-broadcast. Sulod sa 33 ka tuig, ang WBBR gigamit sa pag-broadcast sa mga programa sa katawhan ni Jehova.

Niadtong Hulyo 1924, ang mga Estudyante sa Bibliya nagpahigayon ug kombensiyon sa Columbus, Ohio. Daghang mga igsoon ang nangabot gikan sa lainlaing nasod. Nakadungog silag mga pakigpulong sa Arabic, English, French, German, Greek, Hungarian, Italian, Lithuanian, Polish, Russian, Scandinavian nga mga pinulongan, ug Ukrainian. Naay mga bahin sa programa nga gi-broadcast sa radyo ug gihangyo sa mga igsoon ang Ohio State Journal sa pagsulat ug mga artikulo bahin sa programa sa kombensiyon matag adlaw.

Pagka-Huwebes, Hulyo 24, kapig 5,000 sa mga nanambong ang nanangyaw sa siyudad diin gipahigayon ang kombensiyon. Nakapanagtag silag halos 30,000 ka libro ug nakasugod ug libolibo ka Bible study. Ang adlaw nga gigahin para sa pagsangyaw gitawag sa The Watch Tower nga “ang pinakamalipayong bahin sa kombensiyon.”

Pagka-Biyernes, Hulyo 25, sa usa sa mga pakigpulong ni Brader Rutherford, maisogon niyang gibasa ang dokumento nga nagsaway sa mga lider sa relihiyon. Niini nga dokumento, iyang gisaway  ang mga lider sa politika, relihiyon, ug negosyo kay ilang “gipugngan ang mga tawo nga makakat-on bahin sa [Gingharian] nga maoy gamiton sa Diyos sa pagpanalangin sa mga tawo.” Dugang pa, maisogong giyagyag ni Brader Rutherford nga kini nga mga lider nagduso sa League of Nations ingong paagi kuno sa pagmando sa Diyos sa katawhan. Ang mga Estudyante sa Bibliya nagkinahanglan gyod ug kaisog nga isangyaw kini nga mensahe ngadto sa mga tawo.

Bahin sa epekto niini nga kombensiyon, ang The Watch Tower miingon: “Kini nga gamayng grupo sa mga sundalo sa Ginoo nga nagtigom sa Columbus nga Kombensiyon namauli nga lig-on sa pagtuo . . . , andam kaayo sa bisan unsang paglutos o nagkalayo nga mga pagsupak sa mga kaaway.” Si Leo Claus, nga mitambong sa kombensiyon, nahinumdom: “Namauli mi nga eksayted kaayong managtag niini nga dokumento sa among teritoryo.”

Pagka-Oktubre, ang mga Estudyante sa Bibliya nagsugod sa pagpanagtag sa minilyong kopya sa tract nga Ecclesiastics Indicted, ang inimprentang bersiyon sa dokumento nga gibasa ni Brader Rutherford. Sa gamayng lungsod sa Cleveland, Oklahoma, si Frank Johnson sayong nahuman sa pagpanagtag maong kinahanglan siyang maghulat ug 20 minutos sa mga igsoon. Dili siya puwedeng maghulat sa gawas kay makit-an siya sa mga tawo nga nasuko niya tungod sa iyang pagsangyaw. Maong mitago siya sa duol nga simbahan. Kay wala may tawo didto, nagbilin siyag mga kopya sa Ecclesiastics Indicted sa Bibliya sa pastor ug sa mga lingkoranan. Dayon, nagdalidali siyag biya. Kay naa pa man siyay panahon, misulod pod siya sa duha pa ka simbahan, ug mao gihapon ang iyang gihimo.

Si Frank nagdalidalig balik sa lugar diin sila magkita sa mga igsoon. Mitago siya sa likod sa gasolinahan aron dili siya makit-an sa nangasuko nga mga tawo. Pag-agi sa sakyanan niining mga tawhana, wala sila makakita kang Frank. Dihang nakabiya na sila, ang mga igsoon nga nanangyaw pod sa silingang mga lugar miabot ug gipasakay dayon siya.

Ang usa sa mga igsoon nahinumdom: “Samtang pabiyaay na mi sa lungsod, nalabyan namo ang tulo ka simbahan. Naay mga 50 ka tawo nga nagtindog sa gawas sa matag simbahan. Ang uban nila nagbasa sa tract samtang ang uban naggunit niini aron ipakita sa ilang pastor. Tayming gyod kaayo ang among pagbiya! Mapasalamaton kaayo mi kang Jehova nga Diyos sa iyang proteksiyon ug sa paggiya namo aron makaikyas mi sa mga kaaway.”

Sa ubang mga nasod, ang mga Estudyante sa Bibliya maisogon pong nagsangyaw. Sa norte nga bahin sa France, si Józef Krett nagsangyaw sa mga trabahante sa minahan nga gikan sa Poland. Naa siyay eskedyul sa pakigpulong nga nag-ulohang “Ang Pagkabanhaw sa mga Patay Haduol Na.” Dihang ang mga igsoon nanagtag ug mga imbitasyon ngadto sa mga residente sa lungsod, gipasidan-an sa usa ka pari ang iyang mga membro nga dili motambong. Pero lahi hinuon ang resulta. Kapig 5,000 ang nanambong sa pakigpulong, apil ang pari! Gidapit ni Brader Krett ang pari nga depensahan ang iyang tinuohan, pero mibalibad kini. Human sa pakigpulong, gipanagtag ni Brader Krett ang tanang literatura nga iyang dala kay nakita niya nga ang mga tawo uhaw gyod sa kamatuoran.—Amos 8:11.

Sa Africa, si Claude Brown nagsangyaw sa maayong balita didto sa Gold Coast, nga karon gitawag ug Ghana. Nagwali siya ug nanagtag ug mga literatura nga nakatabang sa paspas nga  pagkaylap sa kamatuoran sa maong nasod. Si John Blankson, nga mikuhag kurso sa pagka-pharmacist, mitambong sa usa sa mga wali ni Brader Brown. Nasabtan dayon niya nga mao to ang kamatuoran. “Ang kamatuoran nakapalipay gyod pag-ayo nako,” nahinumdom si John, “ug ako ning gisangyaw sa among eskuwelahan.”

Usa ka adlaw, si John mibisita sa Anglican nga simbahan aron pangutan-on ang pari bahin sa Trinidad, nga klaro na niyang nasabtan nga wala gyod gitudlo sa Bibliya. Nasuko ang pari ug gisinggitan siya: “Dili ka Kristohanon; iya ka sa Yawa. Pahawa diri!”

Pag-abot niya sa balay, gisulatan ni John ang pari ug gihagad siya nga depensahan ang Trinidad atubangan sa publiko. Mibalos ug sulat ang pari ug giingnan si John nga moadto sa opisina sa prinsipal, ug ang prinsipal nangutana niya kon iya ba gyong gisulatan ang pari.

“O, Sir,” mitubag si John.

Gisugo sa prinsipal si John nga mosulat sa pari aron mangayog pasaylo. Maong misulat si John:

“Sir, gisugo ko sa akong maestro nga mangayog pasaylo nimo. Andam kong mangayog pasaylo, basta imong angkonon nga sayop ang imong gitudlo nga mga doktrina.”

Dili makatuo ang prinsipal ug nangutana: “Blankson, mao ba gyod ni ang gusto nimong isulat?”

“O, Sir. Mao ra gyod nay akong masulat.”

“Gusto ba kang mapahawa aning eskuwelahana? Nganong makaako ka sa pagsulti ana sa pari sa simbahan? Kabalo baya ka nga suportado ni sa gobyerno!”

“Pero Sir, . . . dili ba kon magtudlo ka unya naa mi dili masabtan, mangutana man mi nimo?”

“O, siyempre.”

“Mao nay nahitabo, Sir. Nagtudlo siya nato bahin sa Bibliya ug igo ra kong nangutana. Kon dili siya makatubag sa akong pangutana, nganong mangayo man kog pasaylo niya?”

Si Blankson wala ra mapahawa sa eskuwelahan. Ug wala na siya pasulata aron mangayog pasaylo.

Sa paghisgot sa kalihokan sa tibuok tuig, ang The Watch Tower miingon: “Sama kang David, makaingon pod ta: ‘Gibaksan nimo ako sa kusog alang sa gubat.’ (Salmo 18:39) Makapadasig gyod kaayo ning tuiga kay nakita nato ang kamot sa Ginoo . . . Ang iyang matinumanong mga alagad . . . nagmalipayon gyod sa pagsangyaw.”

Sa hapit nang mahuman ang tuig, ang mga brader nagplano nga magtukod ug lain pang estasyon sa radyo. Kini nga bag-ong estasyon gitukod duol sa Chicago ug gitawag nga WORD. Ang WORD naggamit ug 5,000 watts nga transmitter, ug tungod ana ang mensahe sa Gingharian nakaabot sa gatosan ka milya, bisan hangtod sa tumoy nga bahin sa Canada.

Eksayting pod ang sunod nga tuig nga 1925 kay naay espirituwal nga kahayag nga nagpatin-aw sa pagsabot sa mga Estudyante sa Bibliya bahin sa Pinadayag kapitulo 12. Tungod niini nga kausaban sa pagsabot, ang uban wala mopadayon sa pag-alagad. Pero daghan ang nalipay niini nga katin-awan kay mas nasabtan nila kon unsay nahitabo didto sa langit ug ang epekto niini sa katawhan sa Diyos dinhi sa yuta.