1-2. Unsay nahitabo samtang ang duha ka tinun-an ni Jesus nagbaktas paingon sa Emmaus?

 KADTO maoy Nisan 16, 33 C.E. Ang mga tinun-an ni Jesus naguol ug nahadlok. Ang duha kanila mibiya sa Jerusalem ug mibaktas paingon sa Emmaus, usa ka baryo nga mga 11 kilometros (7 milya) gikan sa Jerusalem. Naguol sila pag-ayo kay ang ilang Magtutudlo nga si Jesus bag-o pa lang gipatay. Wala na ang Mesiyas nga maoy ilang gilaoman nga motabang sa mga Hudiyo. Pero naay nahitabo nga wala nila dahoma.

² Usa ka lalaki ang miduol ug milakaw kuyog nila. Gisulti sa duha ka tinun-an ang ilang kaguol tungod sa nahitabo kang Jesus. Dayon naay gihisgotan ang lalaki nga wala gyod nila malimti. “Sugod kang Moises ug sa mga sinulat sa tanang Propeta,” iyang gipatin-aw kon nganong ang Mesiyas kinahanglang mag-antos ug mamatay. Sa dihang ang tulo miabot sa Emmaus, gipaila sa lalaki ang iyang kaugalingon—nga siya ang binanhaw nga si Jesus. Seguradong nalipay gyod sila dihang ilang nakita nga buhi ang Mesiyas!—Luc. 24:​13-35.

3-4. Unsay nahitabo sa mga tinun-an ni Jesus, ug unsay atong makat-onan niini nga artikulo? (Buhat 1:3)

³ Sa iyang kataposang 40 ka adlaw dinhi sa yuta, si Jesus kadaghang nagpakita sa iyang mga tinun-an. a (Basaha ang Buhat 1:3.) Nianang panahona, ang kaguol ug kahadlok sa mga tinun-an napulihag  kalipay ug paglaom. Nakabaton pod silag kaisog nga mosangyaw ug motudlo bahin sa Gingharian.

⁴ Makabenepisyo gyod ta kon atong tun-an kining makapalig-on nga yugto sa kinabuhi ni Jesus. Niini nga artikulo, atong tan-awon kon giunsa paggamit ni Jesus ang iyang nahibiling panahon aron (1) dasigon ang iyang mga tinun-an, (2) palalomon ang ilang pagsabot sa Kasulatan, ug (3) bansayon sila alang sa dugang responsibilidad. Sa matag kahimtang, atong hisgotan kon unsaon nato pagsundog ang ehemplo ni Jesus.

DASIGA ANG UBAN

5. Nganong ang mga tinun-an ni Jesus nagkinahanglan ug pagdasig?

⁵ Ang mga tinun-an ni Jesus nagkinahanglan ug pagdasig. Ngano? Ang uban nila mibiya sa ilang balay, pamilya, ug negosyo aron mosunod kang Jesus. (Mat. 19:27) Ang uban pod nila nakasinatig dili maayong pagtratar dihang nahimo silang mga tinun-an. (Juan 9:22) Gihimo nila kini nga mga sakripisyo kay naa silay pagtuo nga si Jesus mao ang gisaad nga Mesiyas. (Mat. 16:16) Pero sa dihang gipatay si Jesus, nahugno ang ilang paglaom ug sila naguol pag-ayo.

6. Unsay gihimo ni Jesus human siya mabanhaw?

⁶ Wala isipa ni Jesus nga kulang ug pagtuo ang iyang mga tinun-an kay naguol sila sa iyang kamatayon. Nakasabot siya nga normal lang ang ilang gibati. Maong sa mismong adlaw nga nabanhaw siya, gidasig dayon niya ang iyang mga higala. Pananglitan, nagpakita siya kang Maria Magdalena, kinsa naghilak didto sa iyang lubnganan. (Juan 20:​11, 16) Nagpakita sab siya sa duha ka tinun-an nga gihisgotan sa sinugdanan niining artikuloha. Ug nagpakita siya kang apostol Pedro. (Luc. 24:34) Unsay atong makat-onan sa ehemplo ni Jesus? Matikdi kon unsay nahitabo dihang nagpakita siya sa unang higayon.

7. Base sa Juan 20:​11-16, unsay nakita ni Jesus nga gibuhat ni Maria sayo sa buntag sa Nisan 16, ug unsay gihimo ni Jesus? (Tan-awa sab ang hulagway.)

⁷ Basaha ang Juan 20:​11-16. Sayo sa buntag sa Nisan 16, naay pipila ka maunongong babaye nga miadto sa lubnganan ni Jesus. (Luc. 24:​1, 10) Ang usa nila mao si Maria Magdalena. Sa dihang miabot si Maria sa lubnganan, iyang nakita nga kini walay sulod. Nagdalidali siyag adto kang Pedro ug Juan ug gisultihan sila. Pagkahibalo sa duha, midagan sila paingon sa lubnganan, ug si Maria nagsunod nila. Dihang nakita ni Pedro ug Juan nga walay sulod ang lubnganan, namauli sila. Pero si Maria nagpabilin nga naghilak. Wala siya mahibalo nga si Jesus nagtan-aw diay niya. Nakita ni Jesus ang mga luha niining  matinumanong babaye ug natandog siya pag-ayo. Maong nagpakita siya kang Maria ug naa siyay gihimo nga nakapadasig kaayo niya. Iyang giestorya si Maria ug gihatagan ug importanteng asaynment—nga sultihan ang iyang mga tinun-an nga nabanhaw na siya.—Juan 20:​17, 18.

8. Unsaon nato pagsundog si Jesus?

⁸ Unsaon nato pagsundog si Jesus? Masundog nato si Jesus kon atong dasigon ang mga igsoon nga padayong moalagad kang Jehova. Sama kang Jesus, kinahanglang magmatikod ta sa ilang mga kalisdanan, maningkamot nga sabton ang ilang gibati, ug hupayon sila. Konsideraha ang kasinatian sa sister nga si Jocelyn. Ang iyang igsoong babaye namatay sa aksidente. Siya miingon: “Sulod sa daghang bulan, grabe gyod ang akong gibating kaguol.” Pero naay magtiayon nga nag-imbitar kaniya sa ilang balay, naminaw niya pag-ayo, ug gipasaligan siya nga importante kaayo siya sa Diyos. Si Jocelyn miingon: “Gibati nako nga morag naa ko sa ngitngit ug balorong dagat ug hapit nang malunod. Pero gigamit sila ni Jehova aron birahon ug luwason ko. Gitabangan ko nila nga mabalik ang akong kadasig sa pag-alagad kang Jehova.” Kita pod makadasig sa uban kon maminaw ta pag-ayo samtang ipahungaw nila ang tanan nilang gibati, ug kon mosulti tag makapahupay nga mga pulong aron dasigon sila nga padayong moalagad sa Diyos.—Roma 12:15.

TABANGI ANG UBAN NGA MAS MASABTAN ANG PULONG SA DIYOS

9. Unsay gikalibgan sa mga tinun-an ni Jesus, ug giunsa niya sila pagtabang?

⁹ Gidawat sa mga tinun-an ni Jesus ang Pulong sa Diyos ug naningkamot sila pag-ayo nga ipadapat kini sa ilang kinabuhi. (Juan 17:6) Pero wala sila makasabot kon nganong kinahanglang mamatay si Jesus diha sa estaka sa pagsakit ingong kriminal. Nahibalo si Jesus nga ang hinungdan sa ilang kalibog ug pagduhaduha mao ang ilang kakulang ug pagsabot sa Kasulatan, dili kay daotan silag kasingkasing. (Luc. 9:​44, 45; Juan 20:9) Busa gitabangan niya sila nga mas masabtan ang Kasulatan. Konsideraha kon giunsa niya kana paghimo dihang nagpakita siya sa duha ka tinun-an nga nagbaktas paingon sa Emmaus.

10. Giunsa pagkombinsir ni Jesus ang iyang mga tinun-an nga siya gyod ang Mesiyas? (Lucas 24:​18-27)

¹⁰ Basaha ang Lucas 24:​18-27. Matikdi nga wala dayon sultihi ni Jesus ang mga tinun-an kon kinsa siya. Hinuon, nagpatungha una siyag mga pangutana. Ngano? Tingali gusto ni Jesus nga isulti nila kon unsay naa sa ilang hunahuna ug kasingkasing. Ug mao nay ilang gihimo. Miingon sila nga abi nilag si Jesus ang magluwas sa Israel gikan sa pagmando sa mga Romano, kinsa nagdaogdaog sa katawhan. Human nila masulti ang ilang gibati, gigamit ni Jesus ang Kasulatan aron tabangan sila nga masabtan nga ang mga nahitabo maoy katumanan sa mga tagna. b Wala madugay nianang gabhiona, nagpakita pod siya sa ubang mga tinun-an aron ipatin-aw ang kahulogan niini nga mga tagna. (Luc. 24:​33-48) Unsay atong makat-onan niini nga asoy?

11-12. (a) Unsay atong makat-onan sa paagi ni Jesus sa pagtudlo sa kamatuoran? (Tan-awa sab ang mga hulagway.) (b) Sa unsang paagi si Nortey natabangan sa nag-Bible study niya?

¹¹ Unsaon nato pagsundog si Jesus? Una, dihang magtudlo sa mga Bible study, mogamit tag haom nga mga pangutana aron mahibaloan nato kon unsay naa sa ilang hunahuna ug kasingkasing. (Prov. 20:5) Dihang masabtan na nato ang ilang gibati, tabangan nato sila nga makakitag espesipikong mga teksto nga mapadapat sa ilang kahimtang. Pero likayan nato nga sultihan sila kon unsay angay nilang buhaton. Hinuon, mogamit tag haom nga mga pangutana aron tabangan sila nga mapamalandong ang maong mga  teksto ug masabtan kon unsaon nila pagpadapat ang mga prinsipyo sa Bibliya sa ilang kinabuhi. Konsideraha ang eksperyensiya ni Nortey, brader nga taga-Ghana.

¹² Si Nortey 16 anyos dihang nagsugod siyag Bible study. Pero wala madugay, gisupak siya sa iyang pamilya. Unsay nakatabang niya nga magpadayon sa pagtuon? Gigamit sa brader nga nag-Bible study niya ang Mateo kapitulo 10 aron ipatin-aw nga ang tinuod nga mga Kristohanon makasinatig paglutos. Tungod ana, si Nortey miingon: “Dihang gilutos ko, nakombinsir ko nga mao gyod ni ang kamatuoran.” Gigamit pod sa brader ang Mateo 10:16 aron tabangan si Nortey nga mag-amping ug magmatinahoron dihang maghisgot sa iyang tinuohan ngadto sa iyang pamilya. Human sa iyang bawtismo, gusto ni Nortey nga magpayunir. Pero gidahom sa iyang papa nga moeskuwela siyag college. Imbes sultihan si Nortey kon unsay himoon, ang brader migamit ug mga pangutana aron tabangan siya nga mamalandong sa mga prinsipyo sa Bibliya ug makahimog maayong desisyon. Unsay resulta? Si Nortey midesisyon nga magpayunir. Tungod ana, gipahawa siya sa iyang papa sa ilang balay. Unsay gibati ni Nortey sa nahitabo? Siya miingon: “Kombinsido ko nga sakto gyod ang akong gihimong desisyon.” Kon dasigon pod nato ang uban nga mamalandong sa Kasulatan, matabangan nato sila nga molig-on ang ilang pagtuo ug padayong moalagad kang Jehova.—Efe. 3:​16-19.

BANSAYA ANG MGA BRADER NGA MAHIMONG “GASA NGA MGA LALAKI”

13. Unsay gihimo ni Jesus aron padayong maatiman ang buluhatong pagsangyaw? (Efeso 4:8)

¹³ Samtang dinhi sa yuta, gihimo gyod ni Jesus ang buluhaton nga gihatag kaniya sa iyang Amahan. (Juan 17:4) Pero wala siya maghunahuna nga kinahanglang siya gyod ang mangunay sa paghimo sa buluhaton aron maseguro nga maayo ang resulta niini. Panahon sa iyang tulo ug tunga ka tuig nga ministeryo, gibansay niya ang uban para sa maong buluhaton. Sa wala pa siya mobalik sa langit, gisalig ni Jesus sa iyang mga tinun-an ang responsibilidad nga atimanon ang bililhong katawhan ni Jehova ug manguna sa buluhatong pagsangyaw ug pagpanudlo. Gani, ang pipila niini nga mga tinun-an mga 20 kapin pa ang edad. (Basaha ang Efeso 4:8.) Giunsa paggamit ni Jesus ang iyang kataposang 40 ka adlaw aron tabangan kining kugihan ug maunongong mga tinun-an nga mahimong “gasa nga mga lalaki”?—Tan-awa ang study note sa Efeso 4:8.

14. Sa iyang kataposang 40 ka adlaw dinhi sa yuta, giunsa pagtabang ni Jesus ang iyang mga tinun-an nga mouswag sa espirituwal? (Tan-awa sab ang hulagway.)

 ¹⁴ Gihatagan ni Jesus ang iyang mga tinun-an ug prangka pero mahigugmaon nga tambag. Pananglitan, namatikdan niya nga ang uban nila naay mga pagduhaduha, maong gitambagan niya sila. (Luc. 24:​25-27; Juan 20:27) Gitabangan pod niya sila nga masabtan nga angay nilang hatagag mas dakong importansiya ang pag-atiman sa katawhan ni Jehova imbes ang ilang sekular nga trabaho. (Juan 21:15) Gipahinumdoman niya sila nga dili sobrang magpokus sa mga pribilehiyo nga nabatonan sa uban, nga tungod ana, itandi na hinuon nila ang ilang kaugalingon. (Juan 21:​20-22) Ug gitul-id niya ang ilang sayop nga panghunahuna bahin sa Gingharian ug gitabangan sila nga magpokus sa pagsangyaw sa maayong balita. (Buh. 1:​6-8) Unsay makat-onan sa mga ansiyano kang Jesus?

15-16. (a) Sa unsang mga paagi masundog sa mga ansiyano si Jesus? (b) Sa unsang paagi nakabenepisyo si Patrick sa tambag nga iyang nadawat?

¹⁵ Unsaon pagsundog sa mga ansiyano si Jesus? Kinahanglang bansayon ug tabangan sa mga ansiyano ang mga brader, bisan kadtong mga batabata pa, sa pag-atiman ug dugang responsibilidad sa kongregasyon. c Nahibalo ang mga ansiyano nga kini nga mga brader daghan pag kinahanglang makat-onan. Maong angay silang mohatag ug mahigugmaong tambag aron ang mga batan-ong brader makabaton ug eksperyensiya ug makakat-on nga mahimong mapainubsanon, matinumanon, ug andam moalagad sa uban.—1 Tim. 3:1; 2 Tim. 2:2; 1 Ped. 5:5.

¹⁶ Konsideraha kon sa unsang paagi ang brader nga si Patrick nakabenepisyo sa tambag nga iyang nadawat. Niadtong batan-on pa siya, medyo sakit siyang manulti ug usahay molihok siya nga walay konsiderasyon, bisan sa mga sister. Namatikdan sa usa ka ansiyano ang kahuyangan ni Patrick, ug gihatagan siyag prangka nga tambag pero sa buotan nga paagi. Si Patrick miingon, “Nalipay ko nga iya tong gihimo. Sagad, masina ko dihang makita nako nga ang ubang brader makadawat ug mga pribilehiyo nga gusto pod nako. Pero ang tambag nga gihatag sa ansiyano  nakatabang nako nga magmapainubsanon ug magpokus sa pag-alagad sa mga igsoon imbes sobrang magpokus sa pagbaton ug pribilehiyo sa kongregasyon.” Ingong resulta, si Patrick natudlo ingong ansiyano pagka-23 anyos niya.—Prov. 27:9.

17. Giunsa pagpakita ni Jesus nga naa siyay pagsalig sa iyang mga tinun-an?

¹⁷ Gihatagan ni Jesus ang iyang mga tinun-an ug responsibilidad dili lang sa pagsangyaw kondili apil na pod sa pagpanudlo. (Tan-awa ang study note nga “teaching them” sa Mateo 28:20.) Gibati tingali sa mga tinun-an nga dili sila kuwalipikado niini nga asaynment. Pero wala gyod magduhaduha si Jesus nga makaya nila ang buluhaton. Gani, gisultihan niya sila nga bug-os ang iyang pagsalig nila. Siya miingon: “Ingon nga ang Amahan nagpadala kanako, ako magpadala usab kaninyo.”—Juan 20:21.

18. Unsaon pagsundog sa mga ansiyano si Jesus?

¹⁸ Unsaon pagsundog sa mga ansiyano si Jesus? Ang eksperyensiyadong mga ansiyano mobansay sa uban pinaagi sa paghatag nilag mga responsibilidad. (Filip. 2:​19-22) Pananglitan, puwedeng hatagan sa mga ansiyano ug asaynment ang mga batan-ong brader sa paghinlo ug pagmentinar sa Kingdom Hall. Human nila mahatagig asaynment ang mga brader, tudloan nila sila kon unsaon ni paghimo ug dayon mosalig nga himoon sa mga brader ang buluhaton sa hustong paagi. Ang bag-ong ansiyano nga si Matthew miingon nga naapresyar gyod niya ang mga ansiyano nga nagbansay niya pag-ayo ug nagpakitag pagsalig niya. Siya miingon: “Dihang masayop ko, giisip ni nila nga apil sa proseso sa akong pagkat-on, ug dayon gitabangan ko nila nga himoon ni sa saktong paagi sa sunod nga higayon. Tungod adto, nakabenepisyo gyod ko sa ilang pagbansay.” d

19. Unsay determinado natong himoon?

¹⁹ Gigamit ni Jesus ang iyang kataposang 40 ka adlaw dinhi sa yuta aron dasigon, bansayon, ug tudloan ang uban. Hinaot nga magmadeterminado ta nga sundon pag-ayo ang ehemplo ni Jesus. (1 Ped. 2:21) Tabangan ta niya sa paghimo niana kay siya nagsaad: “Ako magauban kaninyo sa tanang adlaw hangtod sa hinapos sa sistema sa mga butang.”—Mat. 28:20.