1. Unsa ang pipila ka gasa nga atong nadawat gikan kang Jesus?

 SA TANANG tawo nga nabuhi sukad, walay molabaw kang Jesus sa pagkamahinatagon. Sa dihang dinhi siya sa yuta, kinabubut-on niyang gigamit ang iyang gahom sa pagtabang sa uban. (Luc. 9:​12-17) Gihatag niya ang kinalabwang gasa pinaagi sa pagtanyag sa iyang kinabuhi para nato. (Juan 15:13) Ug sukad sa iyang pagkabanhaw, wala gyod mohunong si Jesus sa pagtabang kanato. Sama sa iyang gisaad, iyang gihangyo si Jehova nga ibubo ang balaang espiritu aron tudloan ug hupayon ta. (Juan 14:​16, 17, footnote; 16:13) Pinaagi pod sa atong mga tigom sa kongregasyon, padayon tang gibansay ni Jesus sa paghimog mga tinun-an sa tibuok kalibotan.—Mat. 28:​18-20.

2. Kinsay apil sa “gasa nga mga lalaki” nga gihisgotan sa Efeso 4:​7, 8?

² Naa pay laing gasa nga gihatag si Jesus. Si apostol Pablo misulat nga human mosaka si Jesus sa langit, “siya naghatag ug gasa nga mga lalaki.” (Basaha ang Efeso 4:​7, 8.) Gipatin-aw ni Pablo nga gihatag ni Jesus kini nga mga gasa aron suportahan ang kongregasyon sa lainlaing paagi. (Efe. 1:​22, 23; 4:​11-13) Karon, apil sa “gasa nga mga lalaki” ang mga ministeryal nga alagad, ansiyano, ug tigdumala sa sirkito. a Siyempre, dili sila hingpit maong makahimo silag mga sayop. (Sant. 3:2) Pero ang atong Ginoong Jesu-Kristo naggamit nila sa pagtabang kanato. Regalo gyod sila ni Jesus para nato.

3. Sa unsang paagi ta makasuportar sa buluhaton sa “gasa nga mga lalaki”? Iilustrar.

³ Gigamit ni Jesus kining “gasa nga mga lalaki” sa pagpalig-on sa kongregasyon. (Efe. 4:12) Pero kitang tanan makatabang nila  aron ilang mahimo kining importanteng responsibilidad. Puwede nato ning ikakompara sa pagtukod ug Kingdom Hall. Ang uban aktuwal nga nakigbahin sa pagpanukod. Ang uban pod nagsuportar sa pagpanukod pinaagi sa pagtaganag pagkaon, paghatod ug mga suplay, ug pagtabang sa laing paagi. Sa susama, pinaagi sa pulong ug buhat, kitang tanan makasuportar sa buluhaton sa mga ministeryal nga alagad, ansiyano, ug tigdumala sa sirkito. Busa hisgotan nato karon kon sa unsang paagi ta nakabenepisyo sa ilang mga paningkamot. Hisgotan pod nato kon unsaon nato pagpakita kanila ug kang Jesus, kinsa naghatag niining “gasa nga mga lalaki,” nga giapresyar nato sila.

ANG MGA MINISTERYAL NGA ALAGAD NAGTAGANAG TABANG

4. Unsa ang pipila ka paagi nga ang mga ministeryal nga alagad nagtaganag tabang sa unang siglo?

⁴ Sa unang siglo, ang pipila ka lalaki gitudlo ingong mga ministeryal nga alagad. (1 Tim. 3:8) Posibleng sila ang gitumong ni Pablo nga naghimog “mga buhat sa pagtabang.” (1 Cor. 12:28) Ang mga ministeryal nga alagad nag-atiman ug importanteng mga buluhaton aron ang mga ansiyano makapokus sa pagpanudlo ug pagpalig-on sa mga igsoon. Pananglitan, tingali mitabang sila sa paghimog mga kopya sa Kasulatan o sa pagpalit ug mga materyales nga gikinahanglan sa pagkopya.

5. Unsa ang pipila ka paagi nga ang mga ministeryal nga alagad nagtaganag tabang karon?

⁵ Matikdi ang pipila ka tabang nga ginahimo sa mga ministeryal nga alagad sa inyong kongregasyon. (1 Ped. 4:10) Tingali naasayn sila sa pag-atiman sa account o teritoryo sa kongregasyon, pag-order ug mga literatura, pag-operate sa audio ug video, pag-attendant, o pagtabang sa pagmentinar sa Kingdom Hall. Kini nga mga buluhaton importante aron mahimong organisado ang mga tigom ug pagsangyaw ug makabenepisyo ang mga igsoon. (1 Cor. 14:40) Dugang pa, ang ubang mga ministeryal nga alagad naay mga bahin sa Tigom nga Kinabuhi ug Ministeryo ug nagahatag ug mga pakigpulong publiko. Tingali ang uban nila gitudlo pod ingong asistant sa tigdumala sa grupo sa pagsangyaw. Ug usahay, ang kuwalipikadong mga ministeryal nga alagad mouban sa mga ansiyano sa pag-shepherding.

6. Unsa ang pipila ka rason kon nganong giapresyar nato ang kugihang mga ministeryal nga alagad?

⁶ Sa unsang paagi ang buluhaton sa mga ministeryal nga alagad nakahatag ug kaayohan sa kongregasyon? “Tungod sa mga ministeryal nga alagad sa among kongregasyon, nakapahimulos ko pag-ayo sa mga tigom,” miingon si Beberly, b sister nga taga-Bolivia. “Mapasalamaton ko sa ilang mga paningkamot kay tungod nila, makakanta ko, makakomento, makapaminaw sa mga pakigpulong, ug makakat-on sa mga video ug mga hulagway. Seguroon nila nga luwas ang mga nanambong ug makapahimulos ang mga nakakonek pinaagig videoconference. Human sa tigom, manguna pod sila sa pagpanghinlo, motabang sa pag-atiman sa mga donasyon, ug seguroon nila nga naa mi mga literatura nga among gikinahanglan. Mapasalamaton gyod ko nila!” Si Leslie nga taga-Colombia, nga ang bana nag-alagad ingong ansiyano, miingon: “Ang akong bana nagkinahanglan gyod sa tabang sa mga ministeryal nga alagad aron maatiman ang lainlaing responsibilidad. Kon wala pa sila, mas ma-busy gyod tingali siya. Maong mapasalamaton ko sa ilang kakugi ug kaandam motabang.” Seguradong mapasalamaton pod ta sa atong mga ministeryal nga alagad.—1 Tim. 3:13.

7. Unsaon nato pagpakita ang atong apresasyon sa mga ministeryal nga alagad? (Tan-awa sab ang hulagway.)

⁷ Pero bisag mapasalamaton ta sa mga ministeryal nga alagad, dili igo nga mobati lang ta niana. Ang Bibliya nagdasig nato: “Ipakita nga mapasalamaton mo.” (Col. 3:15) Si Krzysztof, ansiyano nga taga-Finland, nagpakita sa iyang  apresasyon niining paagiha, “Magpadala kog card o text sa ministeryal nga alagad ug apilan nako nig teksto. Maghisgot pod kog espesipikong butang nga iyang gisulti o gihimo nga nakadasig nako, o kaha kon nganong naapresyar nako ang iyang mga paningkamot.” Si Pascal ug Jael nga taga-New Caledonia espesipikong nagaampo para sa mga ministeryal nga alagad. Si Pascal miingon, “Niining bag-o lang, nagaampo mi pirme para niini nga mga brader. Nagpasalamat mi kang Jehova tungod nila ug amo siyang gihangyo nga giyahan ug tabangan sila.” Dunggon gyod ni Jehova ang maong mga pag-ampo, ug tungod niana, ang tibuok kongregasyon makabenepisyo.—2 Cor. 1:11.

ANG MGA ANSIYANO “NAGHAGO TALIWALA KANINYO”

8. Nganong nakaingon si Pablo nga ang mga ansiyano sa unang siglo “naghago” para sa kongregasyon? (1 Tesalonica 5:​12, 13)

⁸ Ang mga ansiyano sa unang siglo naghago para sa kongregasyon. (Basaha ang 1 Tesalonica 5:​12, 13; 1 Tim. 5:17) ‘Nagadumala’ sila sa kongregasyon pinaagi sa pagpahigayon ug mga miting ug paghimog mga desisyon ingong lawas sa mga ansiyano. ‘Nagatambag’ sila sa mga igsoon sa prangka pero mahigugmaong paagi aron maproteksiyonan ang kongregasyon. (1 Tes. 2:​11, 12; 2 Tim. 4:2) Siyempre, naningkamot pod sila nga matagan-an ang materyal ug espirituwal nga panginahanglan sa ilang pamilya.—1 Tim. 3:​2, 4; Tito 1:​6-9.

9. Unsa ang pipila ka responsibilidad nga giatiman sa mga ansiyano karon?

⁹ Ang mga ansiyano karon daghan kaayog responsibilidad. Sila madasigong mga magsasangyaw. (2 Tim. 4:5) Nanguna sila sa ministeryo, nag-organisar sa lokal nga teritoryo, ug nagbansay nato sa pagsangyaw ug pagpanudlo sa epektibong paagi. Nag-alagad pod sila ingong maluluy-on ug patas nga maghuhukom. Dihang ang usa ka Kristohanon makahimog seryosong sala, ang mga ansiyano maningkamot nga tabangan siya nga mabalik ang iyang maayong relasyon kang Jehova. Sa samang higayon, maningkamot pod sila nga magpabiling hinlo ang kongregasyon. (1 Cor. 5:​12, 13; Gal. 6:1) Ug labaw sa tanan, ang mga ansiyano nailhan ingong mga magbalantay. (1 Ped. 5:​1-3) Nagahatag silag maayong pagkaandam nga mga pakigpulong nga gibase sa Bibliya, naningkamot nga mailhan ang tanan diha sa kongregasyon, ug naga-shepherding sa mga igsoon. Ang ubang ansiyano nagtabang pod sa pagpanukod ug pagmentinar sa mga Kingdom Hall, nag-organisar ug mga kombensiyon, ug nag-alagad sa Hospital Liaison Committee ug Patient Visitation Group. Gawas pa niini, naa pa silay laing mga asaynment. Nagkugi gyod ang mga ansiyano para nato!

10. Unsa ang pipila ka rason kon nganong giapresyar nato ang kugihang mga ansiyano?

¹⁰ Si Jehova nagtagna nga kini nga mga magbalantay mag-atiman pag-ayo nato ug nga kita “dili na mahadlok o malisang.” (Jer. 23:4) Mao gyod nay naeksperyensiyahan ni Johanna, sister nga taga-Finland, dihang ang iyang mama grabeng nasakit. Siya miingon: “Wala ko maanad nga mosulti sa akong gibati. Pero naay ansiyano nga bisag dili pa kaayo nako suod, mapailobong naminaw nako, nag-ampo uban nako, ug gipasaligan ko sa gugma ni Jehova. Wala na ko kahinumdom kon unsay iyang gisulti, pero dili gyod nako malimtan nga tungod sa iyang gihimo, nawala ang akong kabalaka. Gibati nako nga gipadala siya ni Jehova sa panahon nga nagkinahanglan gyod kog tabang.” Komosta sa imong bahin? Giunsa ka pagtabang sa mga ansiyano?

11. Unsaon nato pagpakita nga giapresyar nato ang mga ansiyano? (Tan-awa sab ang hulagway.)

¹¹ Gusto ni Jehova nga magpakita tag kinasingkasing nga apresasyon sa mga ansiyano “tungod sa ilang ginabuhat.” (1 Tes. 5:​12, 13) Si Henrietta, nga taga-Finland, miingon: “Ang mga ansiyano andam kaayong motabang, pero wala  ni magpasabot nga mas daghan silag panahon ug kusog o nga wala silay mga problema. Maong usahay moingon ko, ‘Abi nimo, maayo kaayo ka nga ansiyano. Gusto lang ko nga mahibalo ka ana.’” Si Sera, sister nga taga-Türkiye c miingon: “Ang mga ansiyano nagkinahanglag pagdasig aron makapadayon sa ilang buluhaton. Maong puwede nato silang padad-an ug card, imbitahon sa pagpangaon, o mokuyog nila sa pagsangyaw.” Naa ba kay mahunahunaang ansiyano nga naapresyar nimo pag-ayo? Kon mao, pangitag mga paagi nga mapakita nimo ang imong apresasyon.—1 Cor. 16:18.

ANG MGA TIGDUMALA SA SIRKITO NAGPALIG-ON SA MGA KONGREGASYON

12. Kinsa pay laing gigamit ni Jesus sa pagpalig-on sa mga kongregasyon sa unang siglo? (1 Tesalonica 2:​7, 8)

¹² Si Jesu-Kristo nagtagana sa kongregasyon ug “gasa nga mga lalaki” nga nag-alagad sa laing paagi. Ubos sa iyang direksiyon, ang mga ansiyano sa Jerusalem nagpadala kang Pablo, Bernabe, ug sa uban ingong mga nagapanawng tigdumala. (Buh. 11:22) Ngano? Aron palig-onon ang mga kongregasyon, sama sa ginahimo sa mga ministeryal nga alagad ug mga ansiyano. (Buh. 15:​40, 41) Kini nga mga lalaki mihimog daghang sakripisyo, ug andam pa gani nilang ipameligro ang ilang kinabuhi aron tudloan ug dasigon ang mga igsoon.—Basaha ang 1 Tesalonica 2:​7, 8.

13. Unsa ang pipila ka responsibilidad sa mga tigdumala sa sirkito?

¹³ Ang mga tigdumala sa sirkito magsigeg balhin. Ang uban mobiyaheg layo aron duawon ang mga kongregasyon. Kada semana, ang tigdumala sa sirkito mohatag ug mga pakigpulong, mag-shepherding, magdumala ug miting sa payunir, miting sa mga ansiyano, ug mga tigom sa pagsangyaw. Mangandam pod siyag mga pakigpulong ug mag-organisar ug mga sirkitong  asembliya ug kombensiyon. Magtudlo siya sa Pioneer Service School ug magdumalag espesyal nga miting kauban ang mga payunir sa sirkito. Mag-asikaso pod siya sa uban pang importanteng butang nga giasayn sa sangang buhatan, nga usahay dinalian.

14. Unsa ang pipila ka rason kon nganong giapresyar nato ang kugihan nga mga tigdumala sa sirkito?

¹⁴ Sa unsang paagi ang mga kongregasyon nakabenepisyo sa paningkamot sa mga tigdumala sa sirkito? Bahin sa mga pagbisita sa mga tigdumala sa sirkito, ang usa ka brader nga taga-Türkiye miingon: “Sa matag higayon nga mobisita sila, madasig gyod ko nga mogahin ug dugang panahon sa pagtabang sa mga igsoon. Daghan kog nailaila nga mga tigdumala sa sirkito, pero wala gyoy usa nila nga nagpabati nako nga busy kaayo siya o dili daling duolon.” Si Johanna, nga gihisgotan ganina, gipartner sa usa ka tigdumala sa sirkito panahon sa pagsangyaw. Pero wala silay naestorya. Bisan pa niana, siya miingon, “Dili gyod nako malimtan kadtong adlawa. Ang akong duha ka igsoong babaye bag-o lang namalhin sa laing lugar, ug gimingaw kaayo ko nila. Gidasig ug gitabangan ko sa tigdumala sa sirkito nga masabtan nga sa pag-alagad kang Jehova, naa tingali mga higayon nga malayo ta sa atong pamilya. Pero temporaryo lang ni kay sa bag-ong kalibotan, daghan na tag kahigayonan nga makauban sila.” Sa susama, daghang tigdumala sa sirkito ang nasuod pag-ayo sa mga igsoon sa kongregasyon nga ilang ginaduaw.—Buh. 20:37–21:1.

15. (a) Base sa 3 Juan 5-8, unsaon nato pagpakita ang atong apresasyon sa mga tigdumala sa sirkito? (Tan-awa sab ang hulagway.) (b) Nganong angay natong pakitaag konsiderasyon ang mga asawa sa tinudlong mga brader, ug unsaon nato na paghimo? (Tan-awa ang kahong “ Hinumdomi ang Ilang mga Asawa.”)

¹⁵ Gidasig ni apostol Juan si Gayo nga abiabihon ang mibisita nga mga igsoon ug ‘tabangan sila sa paagi nga makapalipay sa Diyos.’ (Basaha ang 3 Juan 5-8.) Ang usa ka paagi nga ato  nang mahimo mao ang pag-imbitar sa tigdumala sa sirkito sa pagpangaon. Ang laing paagi mao ang pagsuportar sa mga kahikayan sa pagsangyaw panahon sa iyang duaw. Si Leslie, nga gihisgotan ganina, nagpakita sa iyang apresasyon sa lain pang paagi. Siya miingon: “Nag-ampo ko kang Jehova nga tagan-an sila sa ilang mga panginahanglan. Kami sa akong bana naghimog mga sulat para nila ug giingnan sila nga napalig-on gyod mi sa ilang pagbisita.” Hinumdomi nga ang mga tigdumala sa sirkito parehas ra pod nato nga naay mga kalisdanan. Usahay magsakit sila, mabalaka, ug maluya pa gani. Ang imong makapahupay nga mga pulong o simpleng regalo basin mao ang tubag sa pag-ampo sa inyong tigdumala sa sirkito.—Prov. 12:25.

NAGKINAHANGLAN TAG “GASA NGA MGA LALAKI”

16. Base sa Proverbio 3:​27, unsay puwedeng ipangutana sa mga brader sa ilang kaugalingon?

¹⁶ Sa tibuok kalibotan, nagkinahanglan tag dugang nga mga brader nga mag-alagad ingong “gasa nga mga lalaki.” Kon bawtismado ka nga brader, “makahimo [ba] ka sa pagtabang”? (Basaha ang Proverbio 3:27.) Andam ba kang mangab-ot sa pagkahimong ministeryal nga alagad? Kon ministeryal nga alagad na ka, andam ba kang moalagad sa mga igsoon ingong ansiyano? d Makahimo ba kag mga kausaban sa imong kahimtang aron makaaplay sa School for Kingdom Evangelizers? Kini nga tunghaan magbansay nimo aron mas magamit pa ka sa pag-alagad. Kon gibati nimo nga dili ka kuwalipikado, pag-ampo kang Jehova. Hangyoa ang tabang sa iyang balaang espiritu aron molampos ka sa bisan unsang asaynment nga imong madawat.—Luc. 11:13; Buh. 20:28.

17. Bahin sa “gasa nga mga lalaki,” unsay gipakita niini bahin sa atong Hari nga si Kristo Jesus?

¹⁷ Ang mga brader nga gitudlo ni Jesus ingong “gasa nga mga lalaki” maoy pamatuod nga siya nagagiya nato niining kataposang mga adlaw. (Mat. 28:20) Mapasalamaton kaayo ta nga naa tay Hari nga mahigugmaon, mahinatagon, nahibalo sa atong mga panginahanglan, ug nagtaganag kuwalipikadong mga brader nga moatiman nato! Maong pangitag mga kahigayonan nga ipakita ang imong apresasyon niining kugihan nga mga brader. Ug ayawg kalimot sa pagpasalamat kang Jehova, ang Tinubdan sa “matag maayong gasa ug matag hingpit nga regalo.”—Sant. 1:17.