1-2. Ngano ug sa unsang paagi gibuksan ni Jehova ang kahigayonan aron mahimo tang bahin sa iyang pamilya?

SI Jehova nagdapit kanato nga mahimong bahin sa iyang pamilya sa mga magsisimba. Pagkadakong pribilehiyo niana! Ang atong pamilya gilangkoban niadtong nagpahinungod sa ilang kaugalingon sa Diyos ug nagpakitag pagtuo sa halad lukat sa iyang Anak. Kita malipayon nga pamilya. Ang atong kinabuhi karon mapuslanon, ug nalipay ta sa paglaom nga mabuhi sa walay kataposan​—sa langit man o sa Paraiso sa yuta.

² Tungod sa gugma, si Jehova mihimog dakong sakripisyo aron mabuksan ang kahigayonan nga mahimo tang bahin sa iyang pamilya. (Juan 3:16) Kita ‘gipalit sa usa ka bili.’ (1 Cor. 6:20) Pinaagi sa lukat, gipaposible ni Jehova nga masuod ta kaniya. Kadungganan nato nga matawag ug Amahan ang kinalabwang Persona sa uniberso. Ug sa ato nang nahisgotan sa miaging artikulo, si Jehova ang kinamaayohang Amahan.

3. Unsa tingaliy ipangutana nato sa kaugalingon? (Tan-awa sab ang kahon nga “ Nakita ba Ko ni Jehova?”)

³ Sama sa usa ka magsusulat sa Bibliya, tingali makapangutana ta: “Unsay akong ibalos kang Jehova sa tanang maayo nga iyang gibuhat alang kanako?” (Sal. 116:12) Ang tinuod, dili gyod ta bug-os makabalos sa kaayo sa atong langitnong Amahan. Pero makahimo ta sa paghigugma kaniya. Si apostol Juan misulat: “Kita nahigugma, kay siya ang unang nahigugma nato.” (1 Juan 4:19) Sa unsang mga paagi ikapakita nato sa atong langitnong Amahan nga gihigugma nato siya?

4. Sumala sa Santiago 4:8, nganong maningkamot ta nga masuod kang Jehova?

⁴ Gusto ni Jehova nga makigsuod ug makig-estorya ta kaniya. (Basaha ang Santiago 4:8.) Giawhag ta niya nga ‘dili mohunong  sa pag-ampo,’ ug kanunay siyang maminaw kanato. (Roma 12:12) Dili siya puliki kaayo o kapoy kaayo nga dili na siya mamati kanato. Sa baylo, maminaw ta niya pinaagi sa pagbasa sa iyang Pulong, ang Bibliya, ug sa mga publikasyon nga motabang nato sa pagsabot niini. Maminaw sab ta kaniya pinaagi sa pagpamati pag-ayo sa atong mga tigom. Sama nga ang maayong komunikasyon makatabang sa mga anak sa pagpabiling suod sa ilang mga ginikanan, ang regular nga komunikasyon kang Jehova makatabang nato sa pagpabiling suod kaniya.

5. Sa unsang paagi mapauswag nato ang kalidad sa atong mga pag-ampo?

⁵ Hunahunaa ang kalidad sa imong pagpakig-estorya sa Diyos. Gusto ni Jehova nga isulti nato kaniya ang naa sa atong kasingkasing. (Sal. 62:8) Maayong pangutan-on ang kaugalingon: ‘Ang ako bang mga pag-ampo samag taphaw, kinopya lang nga mensahe, o kini ba samag kinasingkasing, personal nga sulat?’ Walay duhaduha nga gihigugma nimo pag-ayo si Jehova, ug gusto nimong magpabiling lig-on ang imong relasyon kaniya. Busa kinahanglang regular kang makigsulti kaniya. Isulti kaniya kon unsa gyoy imong gibati​—ang imong mga kalipay ug kasakit. Makasalig ka nga makapangayo kag tabang kaniya.

6. Unsay kinahanglan natong himoon aron magpabiling suod sa atong langitnong Amahan?

⁶ Aron magpabiling suod sa atong langitnong Amahan, kinahanglan tang magmapasalamaton. Uyon ta sa salmista kinsa misulat: “Pagkadaghan sa imong katingalahang mga buhat alang kanamo, Oh Jehova nga akong Diyos, ug daghan ang imong gihunahuna alang kanamo. Wala gyoy ikatandi kanimo; kon isulti nako kini ug isaysay, dili nako kini masugid sa kadaghan!” (Sal. 40:5) Dili lang ta basta mobatig apresasyon; ipahayag sab nato ang atong apresasyon kang Jehova sa pulong ug buhat. Nagpakita ni nga lahi ta sa daghang tawo karon. Nagpuyo ta sa kalibotan diin ang mga tawo walay apresasyon sa tanang gihimo sa Diyos kanila. Gani, ang usa sa mga ilhanan nga nagkinabuhi na ta sa “kataposang mga adlaw” mao nga ang mga tawo dili mapasalamaton. (2 Tim. 3:1, 2) Hinaot nga dili nato sila sundogon!

7. Unsay gusto ni Jehova nga atong buhaton, ug ngano?

⁷ Gusto sa mga ginikanan nga ang ilang mga anak suod sa usag usa, dili mag-away. Sa susama, gusto ni Jehova nga ang tanan niyang anak suod sa usag usa. Gani, ang atong gugma sa usag usa nagpaila nga kita tinuod nga mga Kristohanon. (Juan 13:35) Uyon ta sa salmista kinsa misulat: “Pagkamaayo ug pagkamakapalipay nga ang mga igsoon nag-uban nga may panaghiusa!” (Sal. 133:1) Kon gihigugma nato ang mga igsoon, gipakita nato kang Jehova nga gihigugma nato siya. (1 Juan 4:20) Makapalipay gyod nga mahimong bahin sa usa ka pamilya sa mga igsoon nga ‘nagpakitag kaayo sa usag usa ug nagmabination’!​—Efe. 4:32.

8. Sumala sa 1 Juan 5:3, unsa ang pangunang rason nga magmasinugtanon ta kang Jehova?

⁸ Gidahom ni Jehova nga ang mga anak magmasinugtanon sa ilang ginikanan, ug gidahom sab niya nga magmasinugtanon ta kaniya. (Efe. 6:1) Takos siya sa atong pagkamasinugtanon kay siya ang atong Maglalalang, ang Tigsustento sa atong kinabuhi, ug ang labing maalamon sa tanang ginikanan. Pero ang pangunang rason nga magmasinugtanon ta kang Jehova mao ang atong gugma kaniya. (Basaha ang 1 Juan 5:3.) Bisag daghan ug rason nga angay tang magmasinugtanon kang Jehova, wala ta niya pugsa  sa paghimo niana. Si Jehova naghatag kanatog kagawasan sa pagpili, busa malipay siya dihang mopili ta nga magmasinugtanon kaniya tungod sa atong gugma kaniya.

9-10. Nganong importanteng mahibaloan nato ang mga lagda sa Diyos ug sundon kini?

⁹ Gusto sa mga ginikanan nga luwas ang ilang mga anak. Kanay hinungdan nga maghimo silag mga lagda para sa kaayohan sa ilang mga anak. Dihang ang mga anak mosunod niana, ilang gipakita nga sila may pagsalig ug pagtahod sa ilang ginikanan. Labaw na gyod nga angay tang mahibalo sa mga lagda sa atong langitnong Amahan ug mosunod niana. Dihang buhaton nato kana, atong gipakita nga gihigugma ug gitahod nato si Jehova ug makahatag pod nag kaayohan kanato. (Isa. 48:17, 18) Pero kon atong isalikway si Jehova ug ang iyang mga lagda, moresulta kana sa atong kadaot.​—Gal. 6:7, 8.

¹⁰ Dihang magkinabuhi ta sa paagi nga makapalipay kang Jehova, mapanalipdan ta batok sa pisikal, emosyonal, ug espirituwal nga kadaot. Nahibalo si Jehova kon unsay pinakamaayo kanato. Si Aurora, nga taga-United States, miingon, “Nahibalo ko nga kon magmasinugtanon ta kang Jehova, moresulta gyod ni sa malipayon kaayong kinabuhi.” Tinuod gyod kana. Sa unsang paagi nakabenepisyo ka sa pagsunod sa mahigugmaong mga sugo ni Jehova?

11. Sa unsang paagi ang pag-ampo makatabang kanato?

¹¹ Ang pag-ampo makatabang kanato nga magmasinugtanon, bisan dihang lisod ning buhaton.  Usahay, maglisod ta sa pagsunod kang Jehova, pero kinahanglang padayon tang makigbisog sa tendensiya nga magpakasala. Ang salmista mihangyo sa Diyos: “Pukawa ang akong tinguha nga motuman kanimo.” (Sal. 51:12) Si Denise, nga usa ka regular payunir, miingon, “Kon malisdan ko pagsunod sa usa ka sugo ni Jehova, moampo ko nga hatagan ko niyag kusog sa paghimo kon unsay maayo.” Makaseguro ta nga tubagon gyod ni Jehova ang ingon niana nga hangyo.​—Luc. 11:9-13.

12. Sumala sa Efeso 5:1, unsay kinahanglan natong himoon?

¹² Basaha ang Efeso 5:1. Ingong “minahal nga mga anak” ni Jehova, himoon nato ang atong maarangan sa pagsundog kaniya. Atong masundog ang iyang mga hiyas pinaagi sa pagkahimong mahigugmaon, buotan, ug mapinasayloon sa uban. Dihang ang atong maayong panggawi makita niadtong wala makaila sa Diyos, basin mapalihok sila sa pagkat-og dugang bahin kaniya. (1 Ped. 2:12) Ang Kristohanong mga ginikanan dunay maayong rason sa pagsundog kang Jehova sa ilang pagtratar sa ilang mga anak. Kon ilang sundogon si Jehova, posible nga tinguhaon sab sa ilang mga anak nga makigsuod sa atong mahigugmaong Amahan.

13. Sa unsang paagi mahimo tang maisogon?

¹³ Sagad, ang usa ka bata mapasigarbohon sa iyang amahan ug malipay sa pag-estorya bahin kaniya. Kita sab mapasigarbohon sa atong  langitnong Amahan, si Jehova, ug gusto nato nga ang uban makaila kaniya. Sa atong kasingkasing, kitang tanan parehas ug gibati ni Haring David, kinsa misulat: “Ipanghambog nako si Jehova.” (Sal. 34:2) Pero komosta man kon maulawon ta? Sa unsang paagi mahimo tang maisogon? Mahimo nato kana kon maghunahuna ta sa kalipay nga bation ni Jehova ug sa kaayohan nga makuha sa uban dihang mosulti ta bahin kaniya. Hatagan ta ni Jehova sa kaisog nga atong gikinahanglan. Iyang gitabangan ang mga Kristohanon sa unang siglo nga magmaisogon, ug iya sab tang tabangan.​—1 Tes. 2:2.

14. Unsa ang pipila ka rason kon nganong importante ang paghimog tinun-an?

¹⁴ Si Jehova dili mapihigon, busa malipay siya dihang makita niya nga nagpakita tag gugma sa uban, bisag unsa pay ilang kahimtang. (Buh. 10:34, 35) Ang usa sa pinakamaayong paagi nga makapakita tag gugma mao ang pagsangyaw kanila sa maayong balita. (Mat. 28:19, 20) Unsay mapalampos niining buluhatona? Kadtong maminaw kanato makapauswag sa ilang kinabuhi karon ug may paglaom nga mabuhi sa walay kataposan.​—1 Tim. 4:16.

15-16. Unsay mga rason nga magmalipayon ta?

¹⁵ Si Jehova mahigugmaon nga Amahan, mao nga gusto niyang magmalipayon ang iyang pamilya. (Isa. 65:14) Dunay daghang rason nga puwede tang magmalipayon karon, bisag duna tay mga kalisdanan. Pananglitan, segurado ta nga gimahal ta pag-ayo sa atong langitnong Amahan. Duna tay tukmang kahibalo sa Pulong sa Diyos, ang Bibliya. (Jer. 15:16) Ug bahin ta sa espesyal nga pamilya diin ang tanan nahigugma kang Jehova, sa iyang mga balaod, ug sa usag usa.​—Sal. 106:4, 5.

¹⁶ Makapabilin tang malipayon kay segurado ta nga nindot kaayo ang kinabuhi sa umaabot. Nahibalo ta nga sa dili madugay wad-on ni Jehova ang tanang pagkadaotan ug ubos sa iyang Gingharian, ang yuta mahimong Paraiso. Duna sab tay nindot nga paglaom nga ang mga patay banhawon ug makauban pag-usab sa ilang mga minahal. (Juan 5:28, 29) Pagkamakapalipay unya niana! Ug pinakaimportante sa tanan, segurado ta nga sa dili madugay ang tanan sa langit ug yuta maghatag sa atong mahigugmaong Amahan sa pasidungog, pagdayeg, ug pagsimba nga angay kaniya.