1. Sa dihang maghunahunag posibleng minyoan, unsay pipila ka pangutana nga angayng isukna sa usa ka sister sa iyang kaugalingon?

ANG tanang Kristohanon nailalom sa awtoridad ni Jesu-Kristo, kinsa hingpit nga ulo. Pero sa dihang ang usa ka Kristohanong babaye maminyo, mailalom siya sa awtoridad sa usa ka dili hingpit nga lalaki. Dili nâ pirmeng sayon. Busa, sa dihang maghunahunag posibleng minyoan, angay niyang pangutan-on ang kaugalingon: ‘Unsay nagpakita nga kini nga brader mahimong maayo nga ulo sa pamilya? Prayoridad ba niya ang espirituwal nga mga kalihokan? Kon dili, mahimo kaha siyang maayong ulo nga manguna nako sa espirituwal kon maminyo na mi?’ Siyempre, angay sab niyang pangutan-on ang kaugalingon: ‘Unsay akong mga hiyas nga makatabang sa pagpalampos sa kaminyoon? Ako ba mapailobon ug mahinatagon? Lig-on ba ang akong relasyon kang Jehova?’ (Eccl. 4:9, 12) Kon ang babaye mohimog maayong mga desisyon sa dili pa magminyo, makatabang ni niya nga molampos ug magmalipayon sa iyang kaminyoon.

2. Unsay atong hisgotan niining artikuloha?

² Minilyon sa mga sister ang nagpakitag maayong ehemplo sa pagpasakop sa ilang bana. Angay silang komendahan! Nalipay tang mag-alagad kang Jehova uban niining maunongong mga babaye! Niining artikuloha, atong hisgotan ang tubag sa tulo ka pangutana: (1) Unsay pipila sa mga problema nga kinahanglang atubangon sa mga asawa? (2) Nganong ang asawa kinabubut-ong magpasakop sa iyang bana? (3) Bahin sa pagpasakop, unsay makat-onan sa mga bana ug asawa sa ehemplo ni Jesus, Abigail, ug Maria, nga asawa ni Jose ug inahan ni Jesus?

3. Nganong walay hingpit nga kaminyoon?

³ Ang kaminyoon hingpit nga regalo gikan sa Diyos, pero ang mga tawo dili hingpit. (1 Juan 1:8) Busa, ang Pulong sa Diyos nagpasidaan sa mga magtiayon nga sila makasinatig mga problema nga gitawag ug “kasakitan sa . . . unod.” (1 Cor. 7:28) Matikdi ang pipila ka problema nga mahimong atubangon sa usa ka asawa.

4. Nganong ang usa ka asawa mobati tingali nga ang pagpasakop niya sa iyang bana magpakamenos kaniya?

⁴ Usahay, tungod sa paagi sa pagpadako kaniya, ang usa ka asawa mobati tingali nga ang pagpasakop niya sa iyang bana magpakamenos niya. “Sa lugar nga akong gidak-an,” miingon si Marisol nga taga-United States, “ang mga babaye pirmeng sultihan nga kinahanglang katumbas sila sa mga lalaki sa tanang butang. Nahibalo ko nga gihimo ni Jehova ang kahikayan sa pagkaulo, ug gusto niya nga ang mga babaye magpasakop, ug sa samang higayon, tahoron. Pero dili kanunayng sayon ang pagbaton ug balanseng panglantaw sa pagkaulo.”

5. Unsang dili Kasulatanhong mga panghunahuna ang nabatonan sa pipila bahin sa mga babaye?

⁵ Sa laing bahin, ang babaye naminyo tingali sa usa ka lalaki nga naghunahuna nga ang mga babaye dili kaayo importante. “Sa among lugar,” miingon si Ivon, sister nga taga-South America, “ang mga lalaki maoy mag-unag kaon, dayon mosunod ang mga babaye. Ang mga batang babaye gidahom nga maoy magluto ug manglimpiyo, pero ang mga batang lalaki silbihan sa ilang inahan ug mga igsoong babaye ug sultihan nga sila ang ‘hari sa panimalay.’” Si Yingling, sister nga taga-Asia, miingon: “Sa amo, naay panultihon nga ang mga babaye dili kinahanglang brayt o abilidaran. Ang ilang papel mao ang paghimo sa tanang buluhaton sa balay, pero wala silay katungod nga mosulti sa ilang opinyon ngadto sa ilang bana.” Ang bana nga naimpluwensiyahan sa maong dili mahigugmaon ug dili Kasulatanhon nga panghunahuna makapalisod sa kinabuhi sa iyang asawa, wala magsundog kang Jesus, ug makapasuko kang Jehova.​—Efe. 5:28, 29; 1 Ped. 3:7.

6. Unsay angayng buhaton sa mga asawa aron mapalig-on ang ilang relasyon kang Jehova?

⁶ Sumala sa gihisgotan sa miaging artikulo, gidahom ni Jehova nga ang Kristohanong mga bana magtagana sa espirituwal, emosyonal, ug materyal nga panginahanglan sa ilang pamilya. (1 Tim. 5:8) Pero bisag ang minyong mga sister busy kaayo, kinahanglang maningkamot sila nga mogahin ug panahon kada adlaw sa pagbasa sa Pulong sa Diyos ug pagpamalandong niini ug sa pag-ampo kang Jehova nga kinasingkasing. Dili tingali ni sayon. Ang mga asawa daghag buluhaton, maong maghunahuna tingali sila nga wala na silay panahon o kusog sa paghimo nianang mga butanga. Pero kinahanglan nga gahinan nila kinig panahon. Ngano? Tungod kay gusto ni Jehova nga ang matag usa kanato mahimo niyang higala ug magpabiling suod kaniya.​—Buh. 17:27.

7. Unsay makatabang aron mahimong mas sayon para sa asawa ang pagtuman sa iyang papel?

⁷ Siyempre, ang asawa kinahanglan tingaling maningkamot pag-ayo sa pagpasakop sa iyang dili hingpit nga bana. Pero, mahimong mas sayon para niya ang pagtuman sa papel nga gihatag ni Jehova kaniya kon iyang masabtan ug dawaton ang mga rason diha sa Bibliya kon nganong angay siyang magpasakop.

8. Sumala sa Efeso 5:22-24, nganong ang Kristohanong asawa kinabubut-ong magpasakop sa iyang bana?

⁸ Ang Kristohanong asawa kinabubut-ong magpasakop sa iyang bana kay mao nay gusto ni Jehova nga iyang buhaton. (Basaha ang Efeso 5:22-24.) Siya may pagsalig sa iyang  langitnong Amahan, kay nahibalo siya nga gimahal siya sa iyang Amahan ug ang tanan Niyang gipabuhat maoy para sa iyang kaayohan.​—Deut. 6:24; 1 Juan 5:3.

9. Unsay mahitabo kon ang asawa motahod sa awtoridad sa iyang bana?

⁹ Ang kalibotan nag-awhag sa mga babaye nga isalikway ang mga sukdanan ni Jehova ug isipon ang pagpasakop ingong pagpakamenos kanila. Siyempre, kadtong nagpasiugda niini nga mga ideya wala makaila sa atong mahigugmaong Diyos. Si Jehova dili gyod mohatag sa iyang pinanggang mga anak nga babaye ug sugo nga magpakamenos kanila. Ang sister nga naningkamot sa pagsunod kang Jehova pinaagi sa pagpasakop sa iyang bana makatabang nga magmalinawon ang ilang pamilya. (Sal. 119:165) Makahatag nig kaayohan sa iyang bana, kaniya, ug sa ilang mga anak.

10. Unsay atong makat-onan sa giingon ni Carol?

¹⁰ Ang asawa nga mapinasakopon sa iyang dili hingpit nga bana nagpakita nga siya nahigugma ug nagtahod kang Jehova, ang usa nga nag-establisar sa kahikayan sa pagkaulo. “Nahibalo ko nga ang akong bana masayop,” miingon si Carol nga taga-South America. “Kabalo sab ko nga ang akong reaksiyon sa maong mga sayop magpakita kon gipabilhan ba gyod nako ang akong relasyon kang Jehova. Busa naningkamot kong magpasakop kay gusto nakong mapalipay ang akong langitnong Amahan.”

11. Unsay nakatabang sa sister nga si Aneese nga magmapinasayloon, ug unsay atong makat-onan sa iyang giingon?

¹¹ Malisdan tingali ang asawa sa pagtahod ug pagpasakop sa iyang bana kon gibati niya nga wala konsideraha sa iyang bana ang iyang mga pagbati ug kabalaka. Pero matikdi kon unsay ginahimo sa minyong sister nga si Aneese sa dihang mahitabo kana. Siya miingon: “Maningkamot ko nga dili masuko. Hinumdoman nako nga kitang tanan masayop. Tumong nako nga kinasingkasing nga magpasaylo, sama kang Jehova. Sa dihang magpasaylo ko, mobati kog kalinaw sa hunahuna.” (Sal. 86:5) Kon ang asawa mapinasayloon, sagad mas sayon para niya ang pagpasakop.

12. Unsang mga ehemplo ang narekord sa Bibliya?

¹² Ang uban maghunahuna tingali nga huyang ang tawo nga mapinasakopon. Pero dili  gyod nâ tinuod. Ang Bibliya dunay daghang ehemplo sa mapinasakopong mga tawo nga maisogon kaayo. Konsideraha kon unsay atong makat-onan kang Jesus, Abigail, ug Maria.

13. Nganong si Jesus nagpasakop kang Jehova? Ipatin-aw.

¹³ Si Jesus nagpasakop kang Jehova, pero dili tungod kay kulang siyag kahibalo o kahanas. Ang iyang simple ug klaro nga paagi sa pagpanudlo nagpakita nga siya intelihente kaayo. (Juan 7:45, 46) Nahibalo si Jehova sa katakos ni Jesus, maong gitugotan Niya si Jesus sa pagbuhat uban Niya dihang gilalang ni Jehova ang uniberso. (Prov. 8:30; Heb. 1:2-4) Ug sukad sa pagkabanhaw ni Jesus, gihatag ni Jehova kaniya ang “tanang awtoridad sa langit ug sa yuta.” (Mat. 28:18) Bisag si Jesus daghag abilidad, nagpagiya gihapon siya kang Jehova. Ngano? Tungod kay gimahal niya ang iyang Amahan.​—Juan 14:31.

14. Unsay makat-onan sa mga bana (a) sa panglantaw ni Jehova sa mga babaye? (b) sa Proverbio 31?

¹⁴ Ang makat-onan sa mga bana. Si Jehova nagsugo sa mga asawa sa pagpasakop sa ilang bana dili tungod kay giisip Niya ang mga babaye nga ubos kay sa mga lalaki. Gipamatud-an nâ ni Jehova pinaagi sa pagpilig mga babaye ug mga lalaki nga magmando uban ni Jesus. (Gal. 3:26-29) Si Jehova nagpakitag pagsalig sa iyang Anak pinaagi sa paghatag kaniyag awtoridad. Sa susama, ang maalamong bana maghatag sa iyang asawa ug awtoridad. Bahin sa maayo kaayong asawa, ang Pulong sa Diyos nag-ingon nga siya makadumala sa mga buluhaton sa balay, makapalit ug makabaligyag propidad, ug makahimog mga transaksiyon sa negosyo. (Basaha ang Proverbio 31:15, 16, 18.) Dili siya ulipon kinsa walay katungod nga mosulti sa iyang opinyon. Hinunoa, ang iyang bana mosalig kaniya ug maminaw sa iyang mga opinyon. (Basaha ang Proverbio 31:11, 26, 27.) Kon pakitaan sa bana ug ingon niana nga pagtahod ang iyang asawa, ang asawa malipay sa pagpasakop kaniya.

15. Unsay makat-onan sa mga asawa sa ehemplo ni Jesus?

¹⁵ Ang makat-onan sa mga asawa. Bisan pa sa mga kalamposan ni Jesus, wala siya maghunahuna nga ang pagpasakop sa pagkaulo ni Jehova magpakamenos kaniya. (1 Cor. 15:28; Filip. 2:5, 6) Sa susama, ang maayo kaayong asawa nga nagsunod sa ehemplo ni Jesus dili maghunahuna nga ang pagpasakop niya sa iyang bana magpakamenos kaniya. Suportahan niya ang iyang bana dili lang tungod kay gimahal niya kini kondili tungod kay gimahal ug gitahod niya si Jehova.

16. Sumala sa 1 Samuel 25:3, 23-28, unsang mga kalisdanan ang giatubang ni Abigail? (Tan-awa ang hulagway sa atubangan sa magasin.)

¹⁶ Si Abigail may bana nga ginganlag Nabal, kinsa hakog, garboso, ug dili mapasalamaton. Bisan pa niana, wala mangitag paagi si Abigail nga makalingkawas sa ilang kaminyoon. Puwede unta siyang magpakahilom ug tugotan si David ug ang mga sundalo niini sa pagpatay sa iyang bana. Pero imbes magpakahilom, mihimo siyag praktikal nga pamaagi aron protektahan si Nabal ug ang ilang dakong panimalay. Imadyina ang kaisog ni Abigail dihang miatubang siya sa 400 ka armadong lalaki ug matinahorong nakig-estorya kang David. Nangayo pa gani siyag pasaylo sa gibuhat sa iyang bana. (Basaha ang 1 Samuel 25:3, 23-28.) Naamgohan dayon ni David nga gigamit ni Jehova kining maisogong babaye sa paghatag kaniyag tambag nga nakapugong niya sa paghimog dakong sala.

17. Unsay makat-onan sa mga bana sa asoy bahin kang David ug Abigail?

¹⁷ Ang makat-onan sa mga bana. Si Abigail maalamon nga babaye. Kay naminaw si David sa iyang tambag, wala siya mahimong sad-an  sa dugo. Sa susama, konsiderahon pag-ayo sa maalamong bana ang opinyon sa iyang asawa dihang maghimog importanteng mga desisyon. Tingali ang opinyon sa iyang asawa makatabang niya nga malikayan ang paghimog dili maalamong desisyon.

18. Unsay makat-onan sa mga asawa kang Abigail?

¹⁸ Ang makat-onan sa mga asawa. Ang asawa nga nahigugma ug nagtahod kang Jehova makahatag ug kaayohan sa iyang pamilya, bisan pag ang iyang bana wala mag-alagad kang Jehova o magsunod sa Iyang mga sukdanan. Dili siya mangitag dili Kasulatanhong mga paagi aron makalingkawas sa iyang kaminyoon. Hinunoa, pinaagi sa pagtahod ug pagpasakop, maningkamot siya nga mapalihok ang iyang bana sa pagkat-on bahin kang Jehova. (1 Ped. 3:1, 2) Pero bisan pag ang iyang bana dili mapalihok sa iyang maayong ehemplo, maapresyar ni Jehova ang pagkamaunongon Kaniya sa usa ka mapinasakopong asawa.

19. Sa unsang mga kahimtang nga dili sundon sa asawa ang iyang bana?

¹⁹ Pero ang mapinasakopon nga Kristohanong asawa dili mosuportar sa iyang bana kon duna ni ipabuhat kaniya nga supak sa mga balaod o prinsipyo sa Bibliya. Ibutang ta nga ang iyang dili Saksing bana magsugo niya nga mamakak, mangawat, o mohimog butang nga makapasuko kang Jehova. Ang tanang Kristohanon, apil ang minyong mga sister, kinahanglang magmasinugtanon una kang Jehova nga Diyos. Kon ang sister pabuhaton ug butang nga supak sa mga prinsipyo sa Bibliya, kinahanglan siyang mobalibad, ug ipatin-aw niya sa matinahoron pero lig-on nga paagi kon nganong dili niya kana himoon.​—Buh. 5:29.

20. Nganong nahibalo ta nga si Maria dunay suod nga relasyon kang Jehova?

²⁰ Si Maria dunay suod nga relasyon kang Jehova. Klaro nga sinati kaayo siya sa Kasulatan. Sa dihang nakig-estorya siya kang Elisabet, nga inahan ni Juan nga Tigbawtismo, si Maria mikutlo sa Hebreohanong Kasulatan ug kapig 20 ka beses. (Luc. 1:46-55) Ug hunahunaa ni: Bisag si Maria minyoonon kang Jose, dili si Jose ang unang giestorya sa anghel ni Jehova. Ang anghel unang nakig-estorya kang Maria ug giingnan siya nga siya manganak sa  Anak sa Diyos. (Luc. 1:26-33) Si Jehova nakaila pag-ayo kang Maria ug masaligon siya nga mahalon ug atimanon niini ang iyang Anak. Ug seguradong si Maria nagpabiling suod kang Jehova bisan human sa kamatayon ug pagkabanhaw ni Jesus ngadto sa langit.​—Buh. 1:14.

21. Unsay makat-onan sa mga bana sa giingon sa Bibliya bahin kang Maria?

²¹ Ang makat-onan sa mga bana. Ang maalamong bana malipay kon ang iyang asawa sinati kaayo sa Kasulatan. Dili siya mahadlok o maghunahuna nga pulihan siya sa iyang asawa sa pagkaulo. Nahibalo siya nga ang sister nga sinati kaayo sa Bibliya ug sa mga prinsipyo niini dakog ikatabang sa pamilya. Siyempre, bisag ang asawa mas edukado kay sa bana, responsibilidad sa bana ang pagpanguna sa pamilyahanong pagsimba ug sa ubang espirituwal nga kalihokan.​—Efe. 6:4.

22. Unsay makat-onan sa mga asawa kang Maria?

²² Ang makat-onan sa mga asawa. Ang asawa kinahanglang magpasakop sa iyang bana, pero responsibilidad gihapon niya ang pag-atiman sa iyang espirituwalidad. (Gal. 6:5) Busa, kinahanglan siyang maggahin ug panahon para sa personal nga pagtuon ug pagpamalandong. Makatabang nâ niya nga mamentinar ang iyang gugma ug pagtahod kang Jehova ug magmalipayon sa pagpasakop niya sa iyang bana.

23. Sa unsang paagi ang mapinasakopong mga asawa makahatag ug kaayohan sa ilang kaugalingon, sa ilang pamilya, ug sa kongregasyon?

²³ Ang mga asawa nga nagpasakop sa ilang bana tungod sa gugma kang Jehova mas malipayon ug kontento kon itandi niadtong nagsalikway sa kahikayan ni Jehova sa pagkaulo. Sila naghatag sab ug maayong ehemplo para sa mga batan-ong lalaki ug babaye. Ug makatabang sila sa pagpalambo sa gugma ug kalinaw, dili lang sa ilang pamilya, kondili sa kongregasyon usab. (Tito 2:3-5) Karon, mga babaye ang kadaghanan niadtong maunongong nag-alagad kang Jehova. (Sal. 68:11) Kitang tanan, lalaki man o babaye, dunay importanteng papel sa kongregasyon. Hisgotan sa sunod nga artikulo kon sa unsang paagi matuman sa matag usa kanato ang maong papel.