1. Unsa ang usa ka rason kon nganong ang pamilya ni Jehova nagkahiusa?

NALIPAY ta nga mahimong bahin sa pamilya ni Jehova. Nganong ang atong pamilya malinawon kaayo ug nagkahiusa? Ang usa ka rason mao nga kitang tanan naningkamot nga tahoron ang kahikayan sa pagkaulo nga giestablisar ni Jehova. Gani, kon mas maapresyar nato ang kahikayan sa pagkaulo, mas magkahiusa ta.

2. Unsang mga pangutana ang atong tubagon niining artikuloha?

² Niining artikuloha, atong hisgotan ang kahikayan sa pagkaulo diha sa kongregasyon. Tubagon sab nato ang mosunod nga mga pangutana: Unsay papel sa mga sister? Tinuod ba nga ang matag brader maoy ulo sa matag sister? Ang awtoridad ba sa mga ansiyano ibabaw sa mga igsoon parehas ra sa awtoridad sa ulo sa pamilya ibabaw sa iyang asawa ug mga anak? Pero ato unang hisgotan kon unsay angay natong panglantaw sa mga sister.

3. Unsay makatabang aron mas maapresyar nato ang ginahimo sa mga sister?

³ Naapresyar nato ang mga sister nga naghago sa pag-atiman sa ilang pamilya, pagsangyaw sa maayong balita, ug pagsuportar sa kongregasyon. Mas maapresyar nato sila kon hunahunaon nato kon unsay panglantaw ni Jehova ug Jesus kanila. Makabenepisyo sab ta sa pagkonsiderar kon giunsa pag-isip ni apostol Pablo ang mga babaye.

4. Giunsa pagpakita sa Bibliya nga parehong gipabilhan ni Jehova ang mga babaye ug mga lalaki?

 ⁴ Gipakita sa Bibliya nga parehong gipabilhan ni Jehova ang mga babaye ug mga lalaki. Pananglitan, gipakita niini nga sa unang siglo, parehong gihatagan ni Jehova ug balaang espiritu ang mga babaye ug mga lalaki aron makahimo silag mga milagro, sama sa pagsultig lainlaing pinulongan. (Buh. 2:1-4, 15-18) Ang mga babaye ug mga lalaki gidihogan sa balaang espiritu ug may paglaom nga magmando uban sa Kristo. (Gal. 3:26-29) Ang mga babaye ug mga lalaki parehong makadawat sa ganti nga kinabuhing walay kataposan dinhi sa yuta. (Pin. 7:9, 10, 13-15) Ug sila parehong gisugo sa pagsangyaw ug pagpanudlo bahin sa maayong balita. (Mat. 28:19, 20) Pananglitan, ang basahon sa Buhat naghisgot sa usa ka sister nga ginganlag Priscila. Siya ug ang iyang bana nga si Aquila nagpatin-aw sa kamatuoran sa mas tukma nga paagi ngadto sa edukado kaayong tawo nga si Apolos.​—Buh. 18:24-26.

5. Unsay gipakita sa Lucas 10:38, 39, 42 bahin sa panglantaw ni Jesus sa mga babaye?

⁵ Si Jesus nagpasidungog ug nagtahod sa mga babaye. Wala niya sundoga ang mga Pariseo, kinsa nagpakamenos sa mga babaye ug dili gani makig-estorya kanila sa publiko, ug labaw nang dili maghisgot sa Kasulatan uban kanila. Hinunoa, naghisgot siyag lawom nga espirituwal nga mga kamatuoran dili lang ngadto sa lalaking mga tinun-an kondili sa mga babaye usab. * (Basaha ang Lucas 10:38, 39, 42.) Gitugotan sab niya ang mga babaye nga mouban kaniya dihang magsangyaw siya sa lainlaing lugar. (Luc. 8:1-3) Ug gihatagan sila ni Jesus ug pribilehiyo nga ipahibalo sa mga apostoles nga gibanhaw na siya.​—Juan 20:16-18.

6. Giunsa pagpakita ni apostol Pablo nga gitahod niya ang mga babaye?

⁶ Si apostol Pablo nagpahinumdom kang Timoteo nga pasidunggan ang mga babaye. Giingnan ni Pablo si Timoteo nga isipon “ang tigulang nga mga babaye ingong inahan” ug “ang batan-ong mga babaye ingong igsoong babaye.” (1 Tim. 5:1, 2) Nakatabang gyod si Pablo kang Timoteo nga mahimong hamtong nga Kristohanon. Pero iyang giila nga ang mama ug lola ni Timoteo ang unang nagtudlo kang Timoteo “sa balaang mga sinulat.” (2 Tim. 1:5; 3:14, 15) Sa iyang sulat sa mga taga-Roma, espesipikong ginganlan ni Pablo ang mga sister nga iyang gipangomosta. Namatikdan niya ang paghago sa mga sister ug gipasalamatan ang ilang kakugi sa ministeryo.​—Roma 16:1-4, 6, 12; Filip. 4:3.

7. Unsang mga pangutana ang atong hisgotan?

⁷ Ingon sa gipakita sa nag-unang mga parapo, walay giingon ang Bibliya nga ang mga sister mas ubos kay sa mga brader. Ang atong mahigugmaon ug mahinatagon nga mga sister bililhon kaayo, ug giapresyar sa mga ansiyano ang ilang tabang sa pagpalambo sa kalinaw ug panaghiusa sa kongregasyon. Pero dunay pipila ka pangutana nga kinahanglang tubagon. Pananglitan: Nganong nagsugo si Jehova nga ang usa ka sister magpandong sa pipila ka kahimtang? Kay mga brader lang ang itudlo ingong mga ansiyano ug ministeryal nga alagad, nagpasabot ba ni nga ang matag brader ulo sa matag sister diha sa kongregasyon?

8. Sumala sa Efeso 5:23, ang matag brader ba ulo sa matag sister? Ipatin-aw.

⁸ Ang matag brader ba ulo sa matag sister diha sa kongregasyon? Dili. Si Jesu-Kristo ang ulo. (Basaha ang Efeso 5:23.) Sa pamilya, ang bana dunay awtoridad ibabaw sa iyang asawa.  Ang bawtismadong anak nga lalaki dili mao ang ulo sa iyang inahan. (Efe. 6:1, 2) Ug diha sa kongregasyon, limitado ang awtoridad sa mga ansiyano ibabaw sa mga sister ug brader. (1 Tes. 5:12; Heb. 13:17) Ang tagsaanong mga sister nga wala na sa poder sa ilang ginikanan magpadayon sa pagtahod kanila ug sa mga ansiyano. Pero sama sa mga lalaki diha sa kongregasyon, usa lang ang ilang ulo, si Jesus.

9. Nganong may mga higayon nga ang mga sister kinahanglang magpandong?

⁹ Tinuod, gitudlo ni Jehova ang mga lalaki nga manguna sa pagpanudlo ug pagsimba diha sa kongregasyon, ug wala niya hatagi ang mga babaye ug ingon niana nga awtoridad. (1 Tim. 2:12) Ngano? Tungod sa samang rason nga iyang gitudlo si Jesus ingong ulo sa lalaki​—aron magpabiling organisado ang kongregasyon. Kon tungod sa mga sirkumstansiya ang usa ka sister kinahanglang mohimo sa asaynment nga buluhaton gyod sa usa ka brader, si Jehova nagsugo nga magpandong siya. * (1 Cor. 11:4-7) Gisugo kini ni Jehova sa mga sister, dili aron sa pagpakamenos kanila, kondili aron sa paghatag kanilag kahigayonan nga ipakita ang ilang pagtahod sa kahikayan sa pagkaulo nga iyang giestablisar. Karon tubagon nato ang pangutana: Unsang awtoridad ang nabatonan sa mga ulo sa pamilya ug sa mga ansiyano?

10. Ngano tingaling gusto usahay sa usa ka ansiyano nga maghimog mga balaod diha sa kongregasyon?

¹⁰ Ang mga ansiyano nahigugma sa Kristo, ug ilang gihigugma ang “mga karnero” nga gipaatiman ni Jehova ug Jesus kanila. (Juan 21:15-17) Tungod kay gimahal sa usa ka ansiyano ang kongregasyon, maghunahuna tingali siya nga sama siyag amahan sa kongregasyon. Busa  mangatarongan tingali siya nga kon ang usa ka ulo sa pamilya dunay katungod sa paghimog mga balaod aron protektahan ang iyang pamilya, ang usa ka ansiyano makahimog mga balaod nga sa iyang hunahuna manalipod sa mga karnero sa Diyos. Ug ang pipila ka igsoon basin mohangyo sa mga ansiyano nga modesisyon para nila. Tungod niana, ang maong mga ansiyano maghunahuna tingali nga sila ang espirituwal nga ulo sa maong mga igsoon. Pero parehas ra bag awtoridad ang mga ansiyano sa kongregasyon ug ang mga ulo sa pamilya?

11. Sa unsang paagi managsama ang awtoridad sa mga ulo sa pamilya ug sa mga ansiyano?

¹¹ Gipakita ni apostol Pablo nga managsama sa pipila ka paagi ang awtoridad sa ulo sa pamilya ug sa ansiyano. (1 Tim. 3:4, 5) Pananglitan, gusto ni Jehova nga sundon sa mga membro sa pamilya ang ulo sa ilang pamilya. (Col. 3:20) Ug gusto niya nga ang mga igsoon sa kongregasyon mosunod sa mga ansiyano. Gidahom ni Jehova nga paneguroon sa mga ulo sa pamilya ug sa mga ansiyano nga kadtong ilalom sa ilang pag-atiman himsog sa espirituwal. Pareho pod nilang atimanon ang emosyonal nga panginahanglan niadtong ilalom sa ilang awtoridad. Ug sama sa maayong mga ulo sa pamilya, tabangan sa mga ansiyano ang mga igsoon nga nanginahanglan. (Sant. 2:15-17) Dugang pa, gidahom ni Jehova nga tabangan  sa mga ansiyano ug sa mga ulo sa pamilya ang uban sa pagtuman sa iyang mga balaod. Gipasidan-an sab niya sila nga dili ‘mosaylo sa mga butang nga nasulat’ sa Bibliya.​—1 Cor. 4:6.

12-13. Ingon sa gipakita sa Roma 7:2, sa unsang paagi managlahi ang awtoridad sa mga ulo sa pamilya ug sa mga ansiyano?

¹² Pero, managlahi sab kaayo ang awtoridad sa ansiyano ug sa ulo sa pamilya. Pananglitan, gitudlo ni Jehova ang mga ansiyano ingong mga maghuhukom, ug gihatagan niya silag responsibilidad sa pagpalagpot sa dili mahinulsolong makasasala.​—1 Cor. 5:11-13.

¹³ Sa laing bahin, gihatagan ni Jehova ang mga ulo sa pamilya ug awtoridad nga wala niya ihatag sa mga ansiyano. Pananglitan, iyang gihatagan ug awtoridad ang ulo sa pamilya sa paghimo ug pagpatuman ug mga balaod para sa iyang pamilya. (Basaha ang Roma 7:2.) Ang ulo sa pamilya dunay katungod nga modesisyon kon unsang orasa angayng mouli ang mga anak inigkagabii. May awtoridad sab siya sa pagdisiplina sa iyang mga anak kon dili sila mosunod sa maong balaod. (Efe. 6:1) Siyempre, ang mahigugmaong ulo sa pamilya mokonsulta sa iyang asawa sa dili pa mohimog mga balaod sa panimalay, kay silang duha “usa ka unod.” *​—Mat. 19:6.

14. (a) Base sa Marcos 10:45, nganong haom nga gitudlo ni Jehova si Jesus ingong ulo sa kongregasyon? (b) Unsay papel sa Nagamandong Lawas? (Tan-awa ang kahong “ Ang Papel sa Nagamandong Lawas.”)

¹⁴ Pinaagi sa lukat, gipalit ni Jehova ang kinabuhi sa matag indibiduwal diha sa kongregasyon ug ni bisan kinsa nga magpakitag pagtuo  kang Jesus. (Basaha ang Marcos 10:45; Buh. 20:28; 1 Cor. 15:21, 22) Busa haom nga iyang gitudlo si Jesus, kinsa naghalad sa iyang kinabuhi para kanato, ingong ulo sa kongregasyon. Ingong atong ulo, si Jesus may awtoridad sa paghimo ug pagpatuman ug mga balaod kon unsay angayng buhaton sa matag indibiduwal, pamilya, ug sa tibuok kongregasyon. (Gal. 6:2) Pero si Jesus wala lang maghimog mga balaod. Siya nagpakaon ug nagpangga sa matag usa kanato.​—Efe. 5:29.

15-16. Unsay imong nakat-onan sa giingon sa sister nga si Marley ug sa brader nga si Benjamin?

¹⁵ Gipakita sa mga sister nga ilang gitahod ang Kristo pinaagi sa pagsunod sa giya nga gihatag sa mga lalaki nga gitudlo niya sa pag-atiman kanila. Daghang sister ang mouyon kang Marley, sister nga taga-United States, kinsa miingon: “Gipabilhan gyod nako ang akong papel ingong asawa ug sister diha sa kongregasyon. Kinahanglan nga kanunay nakong ugmaron ang hustong panglantaw sa kahikayan ni Jehova sa pagkaulo. Pero dili ni lisod buhaton kay ang akong bana ug ang mga brader sa kongregasyon nagtahod nako ug nagpakitag apresasyon sa akong ginabuhat.”

¹⁶ Gipakita sa mga brader nga ilang giapresyar ang kahikayan sa pagkaulo pinaagi sa pagtahod ug pagpasidungog sa mga sister. Si Benjamin, brader nga taga-England, miingon: “Daghan kaayo kog nakat-onan sa komento sa mga sister diha sa mga tigom ug sa ilang mga sugyot kon unsaon pagtuon ug kon sa unsang paagi mahimong epektibo sa ministeryo. Mapuslanon kaayo sila sa kongregasyon.”

17. Nganong angay natong tahoron ang kahikayan sa pagkaulo?

¹⁷ Kon ang tanan​—mga lalaki, babaye, ulo sa pamilya, ug mga ansiyano—​makasabot ug magtahod sa kahikayan sa pagkaulo, ang kongregasyon magmalinawon. Ug labaw sa tanan, madayeg nato ang atong mahigugmaon nga langitnong Amahan, si Jehova.​—Sal. 150:6.