1. Nganong makadawat ta ug tambag, ug nganong kitang tanan nagkinahanglan niana?

 KITANG tanan nagkinahanglag tambag. Naay mga panahon nga mangayo tag tambag sa usa nga atong gitahod. Ug naa poy mga panahon nga duolon ta sa igsoon nga nabalaka nato aron pasidan-an ta nga hapit na tang makahimog “sayop nga lakang”—butang nga ato unyang basolan. (Gal. 6:1) O kaha makadawat tag tambag dihang tul-iron ta tungod sa seryosong sayop nga atong nahimo. Bisag unsa pay rason nga gitambagan ta, kinahanglan nato nang dawaton, kay kana makaayo nato ug makaluwas sa atong kinabuhi!—Prov. 6:23.

2. Base sa Proverbio 12:15, nganong angay tang maminaw ug tambag?

² Ang temang teksto nagdasig nato nga ‘maminaw pag-ayo sa mga pulong sa maalamon.’ (Prov. 22:17) Walay tawo nga nahibalo sa tanan; naa gyoy mas labaw natog kahibalo o eksperyensiya. (Basaha ang Proverbio 12:15.) Busa ang pagpaminaw ug tambag nagpakita nga mapainubsanon ta. Nagpakita pod ni nga nahibalo ta sa atong mga limitasyon ug nga nagkinahanglan tag tabang aron makab-ot ang atong mga tumong. Gigiyahan ni Jehova ang maalamong hari nga si Solomon sa pagsulat: “Naay kalamposan kon daghan ang magtatambag.”—Prov. 15:22.

3. Sa unsang mga paagi nga makadawat tag tambag?

³ Tingali makadawat tag dili direkta o direkta nga tambag. Unsa ang dili direkta nga tambag? Naa tingali tay mabasa sa Bibliya o sa atong mga publikasyon nga makapahunahuna nato bahin sa atong ginahimo ug magpalihok nato sa paghimog kausaban. (Heb. 4:12) Matawag nâ nga dili direkta nga tambag. Unsa pod ang direktang tambag? Tingali naay ansiyano o hamtong nga brader nga mosulti nato kon unsay angay natong pauswagon.  Mao nay direkta nga tambag. Kon tungod sa gugma ang usa motambag nato base sa Bibliya, angay natong ipakita ang atong apresasyon pinaagi sa pagpaminaw ug pagpadapat sa iyang tambag.

4. Base sa Ecclesiastes 7:9, unsang reaksiyon ang angay natong likayan dihang tambagan ta?

⁴ Tingali malisdan kaayo ta sa pagdawat ug direktang tambag. Basin masuko pa gani ta. Ngano? Sayon ra tingali para nato nga moangkon nga dili ta perpekto, pero basig malisdan ta sa pagdawat ug tambag bahin sa sayop nga atong nahimo. (Basaha ang Ecclesiastes 7:9.) Tingali ipakamatarong nato ang atong kaugalingon. Basig kuwestiyonon nato ang motibo sa nagtambag o masuko ta sa iyang paagi sa pagtambag. Basig pangitaan pa gani natog sayop ang nagtambag ug maghunahuna, ‘Kinsa god siyang motambag nako? Naa man pod siyay mga sayop!’ Kon dili ta ganahan sa tambag, basig balewalaon nato ni o mangita tag tambag nga gusto natong madungog.

5. Unsay atong hisgotan niining artikuloha?

⁵ Niining artikuloha, atong hisgotan ang mga pananglitan sa Bibliya bahin niadtong wala modawat ug tambag ug niadtong midawat ug tambag. Hisgotan pod nato kon unsay makatabang nato nga modawat ug tambag ug makabenepisyo niini.

6. Unsay atong makat-onan sa reaksiyon ni Haring Rehoboam sa tambag nga iyang nadawat?

⁶ Konsideraha si Rehoboam. Dihang nahimo siyang hari sa Israel, ang iyang mga sakop mihangyo nga pagaanon niya ang gipangayo sa iyang amahan nga si Solomon. Ug maayo ang gihimo ni Rehoboam kay mikonsulta siya sa mga ansiyano sa Israel kon unsay iyang itubag sa mga tawo. Gitambagan sa mga ansiyano ang hari nga kon ihatag niya ang gipangayo sa mga tawo, padayon silang mosuporta niya. (1 Hari 12:3-7) Pero wala maangayi ni Rehoboam ang ilang tambag, mao nga mikonsulta siya sa mga lalaki nga kaedad niya. Tingali mga 40 anyos na sila, mao nga naa na pod silay eksperyensiya sa kinabuhi. (2 Cron. 12:13) Pero nianang higayona, sayop ang ilang gitambag kang Rehoboam. Ila siyang gitambagan nga mas pabug-atan pa ang mga tawo. (1 Hari 12:8-11) Kay lainlain ang tambag nga iyang nadawat, angay untang mag-ampo si Rehoboam kang Jehova kon asa niana ang iyang sundon. Imbes mag-ampo, iya hinuong gidawat ang tambag sa iyang mga kaedad kay mao to ang iyang gusto. Miresulta tog dili maayo para kang Rehoboam ug sa katawhan sa Israel. Sa ato pong bahin, makadawat tingali tag tambag nga dili maoy atong gusto. Pero kon gibase ni sa Pulong sa Diyos, angay nato ning dawaton.

7. Unsay atong makat-onan sa nahitabo kang Haring Uzzias?

⁷ Si Haring Uzzias wala maminaw ug tambag. Misulod siya sa dapit sa templo ni Jehova nga mga saserdote lang ang puwedeng mosulod, ug misulay siya sa pagsunog ug insenso. Giingnan siya sa mga saserdote ni Jehova: “Dili nimo buluhaton, Uzzias, ang pagsunog ug insenso kang Jehova! Mga saserdote lang ang angayng magsunog ug insenso.” Unsay reaksiyon ni Uzzias? Kon mapainubsanon pa unta niyang gidawat ang tambag ug mibiya dayon sa templo, basig gipasaylo siya ni Jehova. Pero “si Uzzias . . . nasuko.” Nganong wala niya dawata ang tambag? Tingali naghunahuna siya nga puwede niyang himoon ang bisan unsa kay hari siya. Pero wala maangayi ni Jehova ang iyang gihimo. Kay mapangahason si Uzzias, gisilotan siyag sanla ug “wala [siya] maayo hangtod nga siya namatay.” (2 Cron. 26:16-21) Ang nahitabo kang Uzzias nagtudlo nato  nga bisag kinsa pa ta, kon dili ta modawat ug tambag nga binase sa Bibliya, mawad-an ta sa pag-uyon ni Jehova.

8. Unsay reaksiyon ni Job dihang gitambagan siya?

⁸ Gawas sa mga pasidaan nga ato nang nahisgotan, ang Bibliya naghatag pod ug maayong mga pananglitan niadtong gipanalanginan kay midawat silag tambag. Konsideraha si Job. Bisag naa siyay kahadlok sa Diyos, dili siya perpekto. Ubos sa grabeng pagsulay, nakasulti siyag sayop nga mga butang. Ingong resulta, nakadawat siyag prangkang tambag gikan kang Elihu ug kang Jehova. Unsay reaksiyon ni Job? Mapainubsanon niyang gidawat ang tambag. Siya miingon: “Ako misulti nga walay pagsabot. . . . Akong bakwion ang akong gisulti, ug ako molingkod sa abog ug sa abo agig paghinulsol.” Si Job gipanalanginan ni Jehova tungod sa iyang pagkamapainubsanon.—Job 42:3-6, 12-17.

9. Unsang maayong ehemplo ang gipakita ni Moises kon bahin sa pagdawat ug tambag?

⁹ Si Moises maayo pod nga ehemplo kay dihang gitul-id siya tungod sa seryosong sayop, iya ning gidawat. Kas-a, nasuko siya pag-ayo ug wala niya pasidunggi si Jehova. Tungod ani, nawad-an siyag pribilehiyo nga makasulod sa Yutang Saad. (Num. 20:1-13) Dihang mihangyo si Moises nga usbon ni nga desisyon, giingnan siya ni Jehova: “Ayaw na kog estoryahi bahin aning butanga.” (Deut. 3:23-27) Imbes masuko, gidawat ni Moises ang desisyon ni Jehova ug padayon siyang gigamit ni Jehova sa pagpanguna sa Israel. (Deut. 4:1) Si Job ug Moises maayo gyong sundogon kon bahin sa pagdawat ug tambag. Giusab ni Job ang iyang hunahuna; wala siya mangrason. Gipamatud-an ni Moises nga gidawat niya ang tambag ni Jehova kay nagpabilin siyang matinumanon bisag wala niya madawat ang pribilehiyo nga iyang gipangandoy.

10. (a) Base sa Proverbio 4:10-13, unsay mga kaayohan kon modawat tag tambag? (b) Unsang maayong reaksiyon ang gipakita sa uban dihang gitambagan sila?

¹⁰ Naay kaayohan kon atong sundogon ang ehemplo sa matinumanong mga tawo sama ni Job ug Moises. (Basaha ang Proverbio 4:10-13.) Ug mao gyod nay gihimo sa daghang igsoon. Matikdi ang giingon sa usa ka brader sa Congo nga si Emmanuel bahin sa pasidaan nga iyang nadawat: “Nakita sa hamtong nga mga brader sa among kongregasyon nga naa koy ginahimo nga makadaot sa akong espirituwalidad, ug ila kong gitabangan. Gipadapat nako ang ilang tambag, ug nakatabang to nga makalikay ko sa daghang problema.” * Ang usa ka payunir sa Canada nga si Megan miingon: “Usahay di ko ganahan sa tambag nga akong madawat, pero mao to nga tambag ang akong gikinahanglan.” Ug ang brader sa Croatia nga si Marko miingon: “Nawad-an kog pribilehiyo. Pero kon maghunahuna ko sa tambag nga akong nadawat, makaingon ko nga nakatabang to nako nga mapalig-on pag-usab ang akong relasyon kang Jehova.”

11. Unsay giingon ni Brader Karl Klein bahin sa pagdawat ug tambag?

¹¹ Ang laing pananglitan niadtong nakabenepisyo tungod sa pagdawat ug tambag mao si Brader Karl Klein, nga membro kaniadto sa Nagamandong Lawas. Sa iyang sugilanon sa kinabuhi, gisulti niya nga kas-a nakadawat siyag bug-at nga tambag gikan kang Joseph F. Rutherford, nga suod niyang higala. Miangkon si Brader Klein nga sa primero nasakitan siya sa tambag. Dihang nagkita sila pag-usab, si Brader Rutherford miingon, “Hello, Karl!” Pero kay nahiubos pa si Karl, hilaw siyag tinagdan. Si Brader Rutherford miingon, “Karl,  pagbantay! Ang Yawa nagatinguha kanimo!” Kay naulaw, siya mitubag, “Ah, wala ra man, Igsoon Rutherford.” Pero kay nasayod gyod si Brader Rutherford, gibalik niya ang iyang pasidaan, “Maayo kon maohon. Pagbantay lamang. Ang Yawa nagatinguha kanimo.” Si Brader Klein miingon nga husto gyod si Brader Rutherford. Siya midugang: “Sa diha nga atong hambinon ang kayugot batok sa usa ka igsoon, ilabina tungod sa pagsulti sa butang nga siya adunay katungod sa pagsulti . . . , ginabuksan nato ang atong kaugalingon alang sa mga lit-ag sa Yawa.” * (Efe. 4:25-27) Gidawat ni Brader Klein ang tambag ni Brader Rutherford, ug nagpabilin ang ilang kasuod.

12. Nganong ang pagkamapainubsanon makatabang nato sa pagdawat ug tambag? (Salmo 141:5)

¹² Unsay makatabang aron dawaton nato ang tambag? Kinahanglan nga magmapainubsanon ta ug atong hinumdoman nga dili gyod ta perpekto ug masipyat gyod ta usahay. Sa nahisgotan na, si Job sayop ug panghunahuna sa primero. Pero sa ulahi, giusab niya ang iyang panghunahuna, ug gipanalanginan siya ni Jehova tungod niana. Ngano? Kay mapainubsanon si Job. Gipakita nâ niya dihang gidawat niya ang tambag ni Elihu bisag mas bata si Elihu. (Job 32:6, 7) Ang pagkamapainubsanon motabang pod nato sa pagdawat sa tambag bisag mobati ta nga ang tambag dili mapadapat kanato o mas bata ang nagtambag nato. Usa ka ansiyano sa Canada miingon, “Mas makita sa uban kon unsay angay natong pauswagon, maong lisod gyod kaayong mouswag kon walay motambag nato.” Naa bay usa nato nga makaingon nga wala na siyay kinahanglang pauswagon kon bahin sa pagpakita sa bunga sa espiritu ug sa pagtuman sa Kristohanong ministeryo?—Basaha ang Salmo 141:5.

13. Unsay angay natong pag-isip sa tambag nga atong madawat?

¹³ Isipa ang tambag ingong pagpakita sa Diyos sa iyang gugma. Gusto ni Jehova ang pinakamaayo para nato. (Prov. 4:20-22) Dihang iya tang tambagan pinaagi sa iyang Pulong, sa binase sa Bibliya nga publikasyon, o sa hamtong nga igsoon, iyang gipakita ang iyang gugma kanato. Iya nang gihimo “para sa atong kaayohan,” nag-ingon ang Hebreohanon 12:9, 10.

14. Dihang tambagan ta, sa unsa ta angayng magpokus?

¹⁴ Pagpokus sa tambag, dili sa paagi sa pagtambag. Usahay maghunahuna tingali ta nga dili maayo ang paagi sa pagtambag kanato. Siyempre, ang magtambag angayng mangitag  paagi nga sayon dawaton ang iyang tambag. * (Gal. 6:1) Pero kon kita ang tambagan, angay tang magpokus sa kon unsay gitambag—bisan pag mobati ta nga dili kaayo maayo ang paagi sa pagtambag. Puwede natong pangutan-on ang atong kaugalingon: ‘Bisag di ko ganahan sa iyang paagi sa pagtambag, naa ba koy mapadapat sa iyang giingon? Unsa kaha kon akong palabyon ang iyang mga sayop ug ipadapat ang iyang tambag?’ Maayo gyod kon mangita tag paagi nga makabenepisyo sa bisan unsang tambag nga atong madawat.—Prov. 15:31.

15. Nganong angay tang mangayog tambag?

¹⁵ Gidasig ta sa Bibliya nga mangayog tambag. Ang Proverbio 13:10 nag-ingon: “Maalamon ang mangayog tambag.” Tinuod gyod ni! Kadtong mangayog tambag imbes maghulat nga tambagan sagad mas mouswag sa espirituwal kay niadtong dili mangayog tambag. Busa maayo gyod nga mangayog tambag.

16. Sa unsang mga situwasyon nga mangayo tingali tag tambag?

¹⁶ Kanus-a tingali ta mangayog tambag sa mga igsoon? Konsideraha ang mosunod nga mga pananglitan. (1) Ang sister mihangyo sa usa ka eksperyensiyadong igsoon nga mokuyog niya sa pag-Bible study ug human niana nangayo siyag tambag kon unsay angay niyang pauswagon sa iyang paagi sa pagtudlo. (2) Ang dalaga nga sister nangayog opinyon sa hamtong nga sister bahin sa slacks nga gusto niyang paliton. (3) Ang brader giasayn sa paghatag sa iyang unang pakigpulong publiko. Gihangyo niya ang usa ka eksperyensiyadong mamumulong nga maminaw pag-ayo sa iyang pakigpulong ug sultihan siya kon unsay angay niyang pauswagon. Bisan ang brader nga daghang tuig nang nagpakigpulong angay gihapong mangayog tambag sa eksperyensiyadong mga mamumulong ug ipadapat kini.

17. Unsay atong himoon aron makabenepisyo ta sa tambag?

¹⁷ Sa mosunod nga mga semana o bulan, kitang tanan makadawat ug tambag, direkta man o dili direkta. Dihang mahitabo nâ, hinumdomi ang mga punto nga atong gihisgotan. Pabiling mapainubsanon. Pagpokus sa tambag, dili sa paagi sa pagtambag. Ug ipadapat ang tambag nga imong madawat. Wala ta matawo nga maalamon. Pero kon ‘maminaw ta sa tambag ug modawat ug disiplina,’ ang Pulong sa Diyos nagsaad nga ‘mahimo tang maalamon.’—Prov. 19:20.