NIADTONG Miyerkoles, Enero 18, 2023, naay espesyal nga announcement sa jw.org nga nag-ingon nga sila Brader Gage Fleegle ug Jeffrey Winder gitudlo nga mag-alagad ingong mga membro sa Nagamandong Lawas sa mga Saksi ni Jehova. Sila matinumanong nag-alagad kang Jehova sulod na sa daghang katuigan.

Si Brader Fleegle gipadako sa iyang mahinadlokon sa Diyos nga mga ginikanan didto sa Pennsylvania, U.S.A. Sa tin-edyer siya, mibalhin ang ilang pamilya sa gamayng baryo diin mas dako ang panginahanglan. Wala madugay human adto, nabawtismohan siya niadtong Nobyembre 20, 1988.

Ang mga ginikanan ni Brader Fleegle kanunayng nagdasig niya nga mosulod sa bug-os panahong pag-alagad. Pirme silang magpasaka ug mga tigdumala sa sirkito ug Bethelite sa ilang balay, ug nakita ni Brader Fleegle kon unsa sila ka malipayon. Niadtong Septiyembre 1, 1989, wala madugay human sa iyang bawtismo, nagregular payunir siya. Paglabayg duha ka tuig, gidapit siya nga mag-alagad sa Bethel, nga maoy iyang tumong sukad niadtong 12 anyos siya. Nagsugod siyag alagad didto sa Brooklyn Bethel niadtong Oktubre 1991.

Sa Bethel, si Brader Fleegle nag-alagad sa Bindery sulod sa walo ka tuig, ug human niana, giasayn siya sa Service Department. Nianang panahona, nagpasakop siya sa Russian nga kongregasyon sulod sa pipila ka tuig. Pagka-2006, nagminyo sila ni Nadia, ug sukad adto, nag-uban na sila sa pag-alagad sa Bethel. Nakaalagad sila sa Portuguese ug pinulongan nga teritoryo ug nakaalagad pod sila ug kapig 10 ka tuig sa Spanish ug pinulongan nga teritoryo. Human sa daghang tuig nga pag-alagad sa Service Department, si Brader Fleegle giasayn nga magtrabaho sa Opisina sa Komite sa Pagpanudlo ug dayon sa Opisina sa Komite sa Pag-alagad.  Niadtong Marso 2022, gitudlo siya ingong katabang sa Komite sa Pag-alagad sa Nagamandong Lawas.

Si Brader Winder nagdako sa Murrieta, California, U.S.A. Sukad pagkabata, gitudloan siya sa iyang mga ginikanan sa kamatuoran, ug nabawtismohan siya niadtong Marso 29, 1986. Pagkasunod bulan dayon, nag-oksilyare payunir siya. Giganahan kaayo siya adto, mao nga mipadayon siya. Human sa pipila ka bulan nga pag-oksilyare payunir, nagregular payunir siya niadtong Oktubre 1, 1986.

Sa tin-edyer pa siya, gibisita ni Brader Winder ang iyang duha ka kuya nga nag-alagad sa Bethel niadtong panahona. Tungod adto, nadasig siya nga himoong tumong nga moaplay sa Bethel kon puwede na sa iyang edad. Ug pagka-Mayo 1990, gidapit siya sa Bethel ug nagsugod pag-alagad didto sa Wallkill.

Sa Bethel, si Brader Winder naasayn sa lainlaing department, apil na sa Cleaning Department, Farm Department, ug sa Bethel Office. Nagminyo sila ni Angela niadtong 1997, ug sukad adto, magkauban na silang nag-alagad sa Bethel. Niadtong 2014, mibalhin sila sa Warwick, diin si Brader Winder mitabang sa pagtukod sa pasilidad sa hedkuwarter. Pagka-2016, mibalhin sila sa Watchtower Educational Center sa Patterson, diin si Brader Winder naasayn sa Audio/Video Services. Paglabayg upat ka tuig, mibalik sila sa Warwick, ug si Brader Winder naasayn nga magtrabaho sa Opisina sa Komite sa Personnel. Niadtong Marso 2022, gitudlo siya ingong katabang sa Komite sa Personnel sa Nagamandong Lawas.

Hinaot nga dagayang panalanginan ni Jehova kining “gasa nga mga lalaki” samtang padayon silang nagkugi alang sa buluhaton sa Gingharian.—Efe. 4:8.