NAMATIKDAN ba nimo nga daghang tawo karon ang mibati nga angay silang trataron nga espesyal o hatagan ug mas daghang katungod? Bisan pag pakitaan silag pabor, dili gihapon sila kontento niana. Sila mapahitas-on ug dili mapasalamaton, mga kinaiya nga apil sa ilhanan sa kataposang mga adlaw.—2 Tim. 3:2.

Sukad pa kaniadto, ang mga tawo nagpakita nag kahakog ug pagkamapahitas-on. Pananglitan, gusto ni Adan ug Eva nga silay magbuot kon unsay husto ug sayop, ug tungod niana nag-antos ang tanan nilang kaliwat. Gatosan ka katuigan sa ulahi, si Haring Uzzias sa Juda naghunahuna nga naa siyay katungod nga maghalad ug insenso sa templo, pero ang tinuod, wala gyod siyay katungod. (2 Cron. 26:​18, 19) Ug ang mga Pariseo ug Saduseo nagtuo nga angayan sila sa espesyal nga pabor sa Diyos kay mga kaliwat sila ni Abraham.—Mat. 3:9.

Karon, kadaghanan sa mga tawo mapahitas-on ug garboso, ug kon dili ta magbantay, puwede ta nilang maimpluwensiyahan. (Gal. 5:26) Basin maghunahuna na ta nga angayan tang makadawat ug mga pribilehiyo o espesyal nga pagtagad. Sa unsang paagi malikayan nato kini nga kinaiya? Kinahanglan natong masabtan ang panghunahuna ni Jehova bahin niini. Niay duha ka prinsipyo sa Bibliya nga makatabang nato.

Si Jehova maoy magdesisyon kon unsay angay natong madawat. Konsideraha ang pipila ka pananglitan.

• Sa pamilya, gusto ni Jehova nga ang bana mobati nga gitahod siya sa iyang asawa, ug ang asawa  kinahanglang mobati nga gimahal siya sa iyang bana. (Efe. 5:33) Ang matag usa nila naay katungod nga magdahom nga siya ray higugmaon sa iyang kapikas. (1 Cor. 7:3) Ang mga ginikanan naay katungod nga magdahom nga sundon sila sa ilang mga anak, ug dahomon pod sa mga anak nga mahalon ug atimanon sila sa ilang mga ginikanan.—2 Cor. 12:14; Efe. 6:2.

• Sa kongregasyon, ang kugihang mga ansiyano angayan gyod sa atong pagtahod. (1 Tes. 5:12) Pero wala silay katungod nga magharihari sa mga igsoon.—1 Ped. 5:​2, 3.

• Gihatagan sa Diyos ug katungod ang mga gobyerno nga mangayog buhis ug modawat ug pasidungog gikan sa ilang mga sakop.—Roma 13:​1, 6, 7. 

Si Jehova mahigugmaong naghatag nato ug labaw pa kay sa angay para nato. Tungod kay makasasala man ta, angay lang tang mamatay. (Roma 6:23) Pero gihatagan ta ni Jehova ug daghang panalangin tungod sa iyang maunongong gugma kanato. (Sal. 103:​10, 11) Ang matag panalangin o pribilehiyo nga atong nadawat maoy tungod lang sa iyang dili hitupngang pagkamaayo.—Roma 12:​6-8; Efe. 2:8.

Ayaw sundoga ang panghunahuna sa kalibotan. Kon dili ta mag-amping, basin magsugod na tag hunahuna nga mas espesyal ta maong angay tang makabaton ug mas daghan kay sa uban. Dali ra kaayong motubo kini nga tendensiya, ug gipakita kana ni Jesus sa iyang ilustrasyon bahin sa mga mamumuo nga gisuholan ug tag-usa ka denario. Ang ubang mamumuo sayo pa sa buntag nagsugod, ug nagtrabaho sila sa tibuok adlaw; samtang ang uban nagtrabahog usa ra ka oras. Kadtong nagsugod ug sayo naghunahuna nga angay silang makadawat ug mas dakong suhol kay mas daghan silag gitrabaho. (Mat. 20:​1-16) Pero gipakita ni Jesus pinaagi niini nga ilustrasyon nga ang iyang mga sumusunod angayng magmakontento sa ihatag sa Diyos kanila.

Magmapasalamaton, dili demanding. (1 Tes. 5:18) Sundoga si apostol Pablo kinsa wala mag-obliga sa mga igsoon sa Corinto nga tagan-an siya sa iyang materyal nga panginahanglan bisag naa unta siyay katungod nga mohimo niana. (1 Cor. 9:​11-14) Angay tang magmapasalamaton sa bisan unsa nga atong madawat, imbes mahimong demanding.

 Magmapainubsanon. Kon ang usa taas ug panglantaw sa iyang kaugalingon, sagad dili siya kontento sa kon unsay iyang nabatonan, ug magsige siyag hunahuna nga angayan gyod siyang makadawat ug dugang pa. Ang pagkamapainubsanon motabang nato nga malikayan ang maong sayop nga panghunahuna.

Si propetang Daniel nagpakitag maayong ehemplo sa pagkamapainubsanon. Gikan siya sa prominenteng pamilya, guwapo, brayt, ug daghag katakos. Kining tanan puwede gyod untang mopabati niya nga angayan siya sa espesyal nga pagtagad ug mga pribilehiyo nga iyang nadawat. (Dan. 1:​3, 4, 19, 20) Pero si Daniel nagpabiling mapainubsanon, ug tungod ana gimahal siya pag-ayo ni Jehova.—Dan. 2:30; 10:​11, 12.

Busa angay gyod natong likayan ang pagkamapahitas-on ug pagkagarboso nga komon kaayo sa kalibotan karon. Hinaot nga padayon tang magmapasalamaton sa bisan unsang panalangin nga gihatag ni Jehova kanato tungod sa iyang dili hitupngang pagkamaayo.