1-2. Nganong ang kahimtang sa katawhan parehas nianang sa batan-ong lalaki nga gihisgotan sa parapo 1?

 IMADYINA ang usa ka batan-ong lalaki nga nagdako sa dato nga pamilya. Pero usa ka adlaw, ang iyang mga ginikanan namatay sa aksidente. Nahugno gyod kaayo siya sa nahitabo. Pero dili kay kana ra. Hunahunaa kon unsay iyang gibati sa dihang iyang nahibaloan nga giwaldas sa iyang mga ginikanan ang ilang katigayonan ug nga naa silay dagkong utang. Imbes nga mapanunod niya ang ilang kadato, napanunod na hinuon niya ang ilang mga utang, ug ang mga giutangan nagsige nag paningil. Dako kaayo ang utang ug dili gyod niya ni kayang bayran.

² Ang atong kahimtang parehas pod nianang sa batan-ong lalaki. Ang atong unang ginikanan, si Adan ug Eva, hingpit ug nagpuyo sa nindot kaayo nga paraiso. (Gen. 1:27; 2:​7-9) Naa silay kahigayonan nga mabuhi hangtod sa hangtod nga malipayon ug wala gyoy problema. Pero kalit lang nga nausab ang tanan. Si Adan ug Eva nakasala. Tungod ana, gipahawa sila sa ilang puy-anan nga paraiso ug nawad-an ug kahigayonan nga mabuhi hangtod sa hangtod. Unsa may ilang napasa sa ilang mga anak? Ang Bibliya nag-ingon: “Sama nga ang sala misulod sa kalibotan pinaagi sa usa ka tawo [si Adan] ug ang kamatayon pinaagi sa sala, ang kamatayon mikaylap sa tanang tawo tungod kay silang tanan nakasala man.” (Roma 5:12) Busa ang gipasa ni Adan kanato mao ang sala, nga miresultag kamatayon. Ang atong napanunod nga sala samag dako kaayo nga utang nga walay usa nato ang makabayad.—Sal. 49:8.

3. Nganong ang atong mga sala gipakasamag “mga utang”?

³ Ang sala gipakasama ni Jesus ug “mga utang.” (Mat. 6:​12,  footnote; Luc. 11:4) Sa dihang makasala ta, sama tag nakautang kang Jehova. Pero dili nato kayang bayran ang atong utang nga sala, maong makanselar lang ni dihang mamatay ta.—Roma 6:​7, 23.

4. (a) Kon wala ang tabang ni Jehova, unsay mahitabo sa tanang makasasala? (Salmo 49:​7-9) (b) Unsay gipasabot sa pulong “sala” nga gihisgotan sa Bibliya? (Tan-awa ang kahong “ Sala.”)

⁴ Posible kaha nga makuha natog balik ang tanan nga giwala ni Adan ug Eva? Kon sa ato lang kaugalingong paningkamot, imposible na. (Basaha ang Salmo 49:​7-9.) Kon wala ang tabang ni Jehova, wala tay paglaom nga mabuhi sa umaabot o mabanhaw. Gani, ang atong kamatayon maparehas ra sa kamatayon sa mga hayop.—Eccl. 3:19; 2 Ped. 2:12.

5. Unsay gihimo sa atong mahigugmaong Amahan aron tabangan ta sa atong napanunod nga utang nga mao ang sala? (Tan-awa ang hulagway.)

⁵ Kon bahin sa batan-ong lalaki nga gihisgotan sa sinugdanan, unsa kahay iyang bation kon naay tawong dato nga moingon nga siyay mobayad sa tanan niyang utang? Seguradong magpasalamat gyod siyag maayo sa maong mahinatagon nga tawo ug dawaton ang iyang tabang. Sa samang paagi, ang atong mahigugmaong Amahan, si Jehova, naay gihimo aron mabayran ang atong utang nga sala nga napanunod nato gikan kang Adan. Gipatin-aw kini ni Jesus niining paagiha: “Gihigugma pag-ayo sa Diyos ang kalibotan mao nga gihatag niya ang iyang bugtong nga Anak aron ang tanan nga magpakitag pagtuo kaniya dili malaglag kondili makabaton ug kinabuhing walay kataposan.” (Juan 3:16) Dugang pa, tungod sa gihimo ni Jehova, posible tang makabaton ug maayong relasyon kaniya.

6. Unsa nga mga termino sa Bibliya ang atong hisgotan niini nga artikulo, ug ngano?

⁶ Sa unsang paagi ta makabenepisyo sa gihimo sa atong mahigugmaong Amahan aron mapasaylo ang atong mga sala, o “mga utang”? Matubag na nga pangutana pinaagi sa paghisgot sa mga termino nga gigamit sa Bibliya sama sa pagpasig-uli, pagtabon sa sala, lukat, natubos, ug giisip nga matarong. Niini nga artikulo, hisgotan nato ang kahulogan sa maong mga termino. Samtang mamalandong ta sa mga kahulogan niini, molalom ang atong apresasyon sa basehanan ni Jehova sa pagpasaylo kanato.

ANG TUMONG: PAGPASIG-ULI

7. (a) Unsa pay giwala ni Adan ug Eva? (b) Kay mga kaliwat ta ni Adan ug Eva, unsay atong gikinahanglan? (Roma 5:​10, 11)

⁷ Gawas nga giwala ni Adan ug Eva ang kahigayonan nga mabuhi hangtod sa hangtod, giwala pod nila ang ilang maayong relasyon sa ilang Amahan, si Jehova. Sa primero, apil sila  sa pamilya sa Diyos. (Luc. 3:38) Pero sa dihang misupak sila kang Jehova, wala na sila tugoti nga mahimong bahin sa iyang pamilya. Nahitabo ni sa dihang wala pa sila makabaton ug mga anak. (Gen. 3:​23, 24; 4:1) Tungod ana, kita pod nga ilang mga kaliwat dili bahin sa pamilya ni Jehova, maong nagkinahanglan tag tabang aron mapasig-uli kaniya. (Basaha ang Roma 5:​10, 11.) Nagpasabot ni nga kinahanglang makabaton tag maayong relasyon kaniya. Base sa usa ka reperensiya, ang Gregong pulong nga gigamit dinhi para sa “pagpasig-uli” puwedeng magpasabot nga “makighigala sa usa ka kaaway.” Makapainteres kay si Jehova ang mihimog paagi aron maposible ni. Unsay iyang gihimo?

ANG KAHIKAYAN: PAGTABON SA SALA

8. Unsa ang pagtabon sa sala?

⁸ Ang pagtabon sa sala maoy kahikayan ni Jehova aron ang makasasalang katawhan makabaton pag-usab ug maayong relasyon kaniya. Apil niini ang paghatag ug butang ingong baylo sa laing butang nga parehas ug bili. Busa ang usa ka butang nga nawala o nadaot puwedeng mabalik o mailisan. Kini nga kahikayan gihisgotan pod sa Gregong Kasulatan. Gihisgotan niini ang gihimo ni Jehova aron ang katawhan makabaton ug maayong relasyon kaniya ug mahimong iyang higala.—Roma 3:25; footnote.

9. Unsang temporaryong kahikayan ang gihimo ni Jehova aron mapasaylo ang sala sa mga Israelinhon?

⁹ Aron makabaton ang mga Israelinhon ug maayong relasyon kang Jehova, naghimo siyag temporaryong kahikayan aron mapasaylo ang ilang mga sala. Ang mga Israelinhon kinahanglang magsaulog sa Adlaw sa Pagtabon sa Sala kausa sa usa ka tuig. Nianang adlawa, ang hataas nga saserdote magtanyag ug halad nga mga hayop alang sa katawhan. Siyempre ang halad nga hayop dili bug-os makatabon sa sala, kay ang mga hayop mas ubos kay sa mga tawo. Pero kon itanyag sa mahinulsolong mga Israelinhon ang mga halad nga gisugo ni Jehova, andam siyang mopasaylo sa ilang mga sala. (Heb. 10:​1-4) Dugang pa, ang mga halad nga ilang ginatanyag sa Adlaw sa Pagtabon sa Sala ug sa ubang panahon magpahinumdom sa mga Israelinhon nga naa sila sa makasasalang kahimtang. Magpahinumdom pod ni nila nga nagkinahanglan silag permanenteng solusyon nga bug-os makatabon sa ilang mga sala.

10. Unsang permanenteng kahikayan ang gihimo ni Jehova aron mapasaylo ang mga sala?

¹⁰ Si Jehova mihimog permanenteng kahikayan aron mapasaylo ang mga sala sa katawhan. Gihikay niya nga ang iyang pinalanggang Anak mahimong ‘halad kausa alang sa tanang panahon aron mopas-an sa mga sala sa daghan.’ (Heb. 9:28) Gihatag ni Jesus ang “iyang kinabuhi ingong lukat baylo sa daghan.” (Mat. 20:28) Unsa ang lukat?

ANG GIBAYAD: LUKAT

11. (a) Base sa Bibliya, unsa ang lukat? (b) Unsay gikinahanglan aron mahatag ang lukat?

¹¹ Base sa Bibliya, ang lukat mao ang bayad para sa pagtabon sa sala ug sa pagpasig-uli. a Sa panglantaw ni Jehova, naghatag nig basehanan aron mabalik kon unsay nawala. Sa unsang paagi? Hinumdomi nga giwala ni Adan ug Eva ang ilang hingpit nga kinabuhi, apil ang kahigayonan nga mabuhi hangtod sa hangtod. Busa ang lukat kinahanglan nga parehas ug bili sa kon unsay nawala. (1 Tim. 2:6) Mabayran lang ni sa usa ka tawo nga (1) hingpit; (2) naay kahigayonan nga mabuhi sa yuta hangtod sa hangtod; ug (3) andam mohatag  o mosakripisyo sa iyang kinabuhi para sa katawhan. Ang kinabuhi niana nga tawo mao ray makapuli, o makabayad, sa kinabuhi nga nawala.

12. Nganong nakahimo si Jesus sa pagbayad sa lukat?

¹² Konsideraha ang tulo ka rason kon nganong nakahimo si Jesus sa pagbayad sa lukat. (1) Hingpit siya—“siya walay nahimong sala.” (1 Ped. 2:22) (2) Kay hingpit siya, naa siyay kahigayonan nga mabuhi sa yuta hangtod sa hangtod. (3) Andam siyang mamatay ug ihatag ang iyang kinabuhi para nato. (Heb. 10:​9, 10) Ingong hingpit nga tawo, si Jesus mao ang katumbas sa unang tawo nga si Adan sa wala pa kini makasala. (1 Cor. 15:45) Busa pinaagi sa kamatayon ni Jesus, iyang natabonan ang sala ni Adan, sa ato pa, iyang nabalik ang giwala ni Adan. (Roma 5:19) Busa si Jesus nahimong “ang kataposang Adan.” Dili na kinahanglan ug lain pang hingpit nga tawo aron mobayad sa kon unsay giwala ni Adan. Si Jesus namatay “kausa alang sa tanang panahon.”—Heb. 7:27; 10:12.

13. Unsay kalainan sa kahikayan nga pagtabon sa sala ug sa lukat?

¹³ Busa, unsay kalainan sa kahikayan nga pagtabon sa sala ug sa lukat? Ang kahikayan nga pagtabon sa sala mao ang gihimo sa Diyos aron ang makasasalang katawhan makabaton pag-usab ug maayong relasyon kaniya. Ang lukat mao ang gibayad aron matabonan ang sala sa katawhan. Gihatag kini ni Jesus pinaagi sa iyang bililhong dugo nga iyang gibubo alang kanato.—Efe. 1:7; Heb. 9:14.

MGA RESULTA: NATUBOS UG GIISIP NGA MATARONG

14. Unsay atong hisgotan karon, ug ngano?

¹⁴ Unsa ang mga resulta sa kahikayan sa pagtabon sa sala? Aron matubag na nga pangutana, hisgotan nato ang duha ka termino nga gigamit sa Bibliya nga nagpasiugda sa mga resulta niini. Samtang konsiderahon nato ang kahulogan niini nga mga termino, makatabang ni nato nga masabtan kon sa unsang paagi ta nakabenepisyo sa pagpasaylo ni Jehova.

15-16. (a) Sa Bibliya, unsay gipasabot sa pulong “natubos”? (b) Unsay epekto niini kanato?

¹⁵ Ang Bibliya nag-ingon nga tungod sa gibayad nga lukat kita natubos, o napahigawas. Si apostol Pedro naghisgot bahin niini: “Nahibalo mo nga dili pinaagi sa madunot nga mga butang, sa plata o bulawan, nga kamo nahigawas [sa literal, “gilukat; gitubos”] sa inyong way pulos nga pagkinabuhi nga napanunod ninyo sa inyong mga katigulangan. Apan pinaagi kini sa bililhong dugo sa Kristo, nga sama sa dugo sa walay depekto ug hinlo nga nating karnero.”—1 Ped. 1:​18, 19; footnote.

¹⁶ Tungod sa halad lukat, napahigawas ta gikan sa pagkaulipon sa sala ug kamatayon. (Roma 5:21) Busa dako gyod tag utang kabubut-on kang Jehova ug Jesus kay natubos ta tungod sa bililhong dugo, o kinabuhi, ni Jesus.—1 Cor. 15:22.

17-18. (a) Unsay gipasabot sa terminong ‘giisip nga matarong’? (b) Unsay kaayohan niana para nato?

¹⁷ Kay makasasala ta, samag naa tay criminal record. Pero kay giisip na ta nga matarong, samag gibasura ang atong mga kaso ug gipapas ang atong rekord sa mga sala. Bisag gihimo kini ni Jehova, wala niya gilapas ang iyang sukdanan sa hustisya. Giisip ta niya nga matarong, dili tungod kay takos ta niana o kay gikonsentir niya ang atong mga sala, kondili tungod sa atong pagtuo sa kahikayan nga pagtabon sa sala ug sa lukat nga gihatag. Tungod ana, naay basehanan si Jehova sa pagkanselar sa atong mga utang, o mga sala.—Roma 3:24; Gal. 2:16.

 ¹⁸ Unsay kaayohan niini para sa matag usa kanato? Kadtong gipili nga magmando kauban ni Jesus sa langit giisip na nga matarong ingong mga anak sa Diyos. (Tito 3:7; 1 Juan 3:1) Ang ilang mga sala gipasaylo na, nga sama bag wala na silay criminal record, maong kuwalipikado sila nga mahimong bahin sa Gingharian. (Roma 8:​1, 2, 30) Kadtong naay yutan-ong paglaom giisip na pod nga matarong. Ang ilang mga sala gipasaylo na ug nahimo na silang mga higala sa Diyos. (Sant. 2:​21-23) Ang dakong panon nga maluwas sa Armagedon naay kahigayonan nga dili makatilaw ug kamatayon. (Juan 11:26) Ang “mga matarong” ug “mga dili matarong” nga nangatulog sa kamatayon banhawon. (Buh. 24:15; Juan 5:​28, 29) Sa ngadtongadto, ang tanang matinumanong alagad ni Jehova sa yuta “makabaton sa mahimayaong kagawasan sa mga anak sa Diyos.” (Roma 8:21) Oo, tungod sa kahikayan sa pagtabon sa sala, bug-os tang mapasig-uli ngadto sa atong Amahan, si Jehova. Sa ato pa, mahimo pod tang hingpit nga mga anak sa Diyos. Eksayted gyod ta nianang nindot kaayo nga panalangin!

19. Sa unsang paagi nakabenepisyo ta karon sa gihimo ni Jehova ug Jesus para nato? (Tan-awa sab ang kahong “ Kon Unsay Kahulogan Niini Para Nato.”)

¹⁹ Kaniadto, ang atong situwasyon parehas nianang sa batan-ong lalaki nga gihisgotan sa sinugdan nga nawad-an sa tanan ug nakapanunod ug dako kaayong utang nga dili niya kayang bayran. Pero tungod kang Jehova, naa tay paglaom. Nausab ang atong situwasyon tungod sa kahikayan nga pagtabon sa sala ug pagbayad sa lukat. Tungod sa atong pagtuo kang Jesu-Kristo, kita natubos, o napahigawas, gikan sa sala ug kamatayon. Mapasaylo pod, o mapapas, ang atong mga sala. Labaw sa tanan, puwede natong mabatonan ang maayong relasyon uban sa atong mahigugmaong langitnong Amahan, si Jehova.

20. Unsay atong hisgotan sa sunod nga artikulo?

²⁰ Kon pamalandongon nato ang gihimo ni Jehova ug Jesus para nato, mobati gyod ta nga mapasalamaton. (2 Cor. 5:15) Kon buot hunahunaon, wala gyod unta tay paglaom kon wala ang ilang tabang, maong mapasalamaton kaayo ta sa pagpasaylo ni Jehova. Pero unsa man gyoy gipasabot niana para sa matag usa kanato? Mao nay atong hisgotan sa sunod nga artikulo.