TUN-ANANG ARTIKULO 8
AWIT 130 Magmapinasayloon
Pagpasaylo ni Jehova—Unsaon Nimo Kini Pagsundog?
“Sama nga si Jehova kinasingkasing nga nagpasaylo kaninyo, kinahanglang buhaton sab ninyo kana.”—COL. 3:13.
POKUS
Niining artikuloha, atong hisgotan ang praktikal nga mga paagi nga atong mahimo aron makapasaylo ta niadtong nakapasakit nato.
1-2. (a) Kanus-a ta malisdan kaayo sa pagpasaylo? (b) Giunsa pagpakita ni Denise ang pagpasaylo?
MALISDAN ba ka sa pagpasaylo? Daghan nato ang malisdan sa pagpasaylo, ilabina kon nasakitan kaayo ta sa gihimo o gisulti sa uban. Pero kaya natong madaog ang kasakit nga atong gibati ug makapasaylo. Pananglitan, konsideraha ang eksperyensiya sa usa ka sister nga si Denise, a nga nagpakitag talagsaong pagpasaylo. Niadtong 2017, si Denise ug ang iyang pamilya mibisita sa bag-ong hedkuwarter sa mga Saksi ni Jehova. Samtang nagbiyahe sila pauli, naay laing drayber nga nawad-ag kontrol sa iyang sakyanan ug nabanggaan sila. Si Denise nawad-an ug panimuot. Pagmata niya, iyang nahibaloan nga ang iyang mga anak grabeng nasamdan ug nga ang iyang bana, si Brian, namatay. Si Denise miingon, “Pagkahibalo nako sa nahitabo, nahugno gyod ko. Wala ko kabalo kon unsay buhaton.” Sa ulahi, iyang nahibaloan nga ang drayber wala makainom o maka-drugs ug wala pod magsigeg cellphone o malinga sa ubang butang. Maong nag-ampo si Denise kang Jehova nga tabangan siya nga makabaton ug kalinaw.
2 Ang drayber nga nakabangga nila gikasohan ug pagpatay. Kon mapamatud-an siyang sad-an, mapriso siya. Pero ang korte miingon nga ang sentensiya sa lalaki magdepende sa testimonya ni Denise. Tungod ana siya miingon, “Gibati nako nga morag giablihan ang mga tahi sa akong samad ug gibuboan kinig daghang asin, kay kinahanglan nakong hinumdoman ug balik ang pinakasakit nga hitabo sa akong kinabuhi.” Pipila ka semana sa ulahi, si Denise miatubang sa korte ug mihatag ug testimonya atubangan sa tawo nga maoy hinungdan sa grabeng kasakit sa ilang pamilya. Unsay giingon ni Denise? Iyang gihangyo ang huwes nga pakitaan ug kaluoy ang maong tawo. b Human sa iyang testimonya, ang huwes nakahilak ug miingon: “Sa 25 ka tuig nako ingong huwes, karon pa gyod ko nakadungog ug ingon niini. Karon pa ko nakadungog nga ang pamilya sa biktima maoy nagpakiluoy para sa akusado. Wala pa ko sukad nakakita ug ingon ani nga gugma ug pagpasaylo dinhi sa korte.”
3. Unsay nakatabang kang Denise nga magpasaylo?
3 Unsay nakatabang kang Denise nga magpasaylo? Gipamalandong niya ang pagpasaylo ni Jehova. (Miq. 7:18) Kon mapasalamaton kaayo ta sa pagpasaylo ni Jehova kanato, mapalihok ta nga pasayloon pod ang uban.
4. Unsay gusto ni Jehova nga atong himoon? (Efeso 4:32)
4 Gusto ni Jehova nga pasayloon nato ang uban sama nga kinasingkasing siyang nagpasaylo nato. (Basaha ang Efeso 4:32.) Gidahom niya nga andam ta nga mopasaylo niadtong nakapasakit nato. (Sal. 86:5; Luc. 17:4) Niini nga artikulo, atong konsiderahon ang tulo ka butang nga makatabang nato nga mahimong mas mapinasayloon.
AYAWG BALEWALAA ANG IMONG GIBATI
5. Base sa Proverbio 12:18, unsa tingali ang atong bation kon naay makapasakit nato?
5 Masakitan gyod tingali ta kon naay mosulti o mohimog dili maayo nato, ilabina kon suod nato siya nga higala o membro sa pamilya. (Sal. 55:12-14) Usahay mora tag gidunggab tungod sa kasakit. (Basaha ang Proverbio 12:18.) Tingali pasagdan o balewalaon ra nato ang atong gibati. Pero kon ato nang himoon, mora tag gidunggab ug dayon gipasagdan ra nga magpabilin ang kutsilyo. Sa samang paagi, dili ta makadahom nga moarang-arang ang atong gibati nga kasakit kon ato ra ning balewalaon.
6. Unsa tingali ang atong reaksiyon kon naay makapasakit nato?
6 Kon naay makapasakit nato, masuko tingali ta. Sagad mao nay una natong reaksiyon, ug giila sa Bibliya nga natural ra ni. Pero gipasidan-an ta niini nga dili magpadayon sa pagkasuko. (Sal. 4:4; Efe. 4:26) Ngano? Kay kon magpadala ta sa atong kasuko, sagad moresulta nig dili maayo. (Sant. 1:20) Hinumdomi ni: Dili kalikayan nga masuko ta usahay, pero naa ra nato kon padayon ba tang masuko.
Dili kalikayan nga masuko ta usahay, pero naa ra nato kon padayon ba tang masuko
7. Unsa pa tingali ang atong bation kon mapasakitan ta sa uban?
7 Dili gyod lalim ang bation kon mapasakitan ta pag-ayo sa uban. Pananglitan, ang sister nga si Ann miingon: “Sa bata pa ko, gibiyaan ni Papa si Mama ug giminyoan ang akong yaya. Gibati nako nga giabandona ko. Dihang nagkaanak sila, mora kog gipulihan. Gibati nako nga walay nagmahal nako.” Ang sister nga si Georgette miingon kon unsay iyang gibati dihang giluiban siya sa iyang bana: “Nasakitan gyod ko kay amigo mi sukad sa pagkabata. Nag-uban pod mi sa pagpayunir. Morag gidunggab ang akong kasingkasing sa kasakit.” Ug ang sister nga si Naomi miingon: “Wala gyod ko magdahom nga pasakitan ko sa akong bana. Busa dihang mitug-an siya nga sekreto siyang nagtan-awan ug pornograpiya, mibati ko nga gilimbongan ug giluiban.”
8. (a) Unsa ang pipila ka rason kon nganong angay tang magpasaylo? (b) Unsay mga kaayohan kon magpasaylo ta? (Tan-awa ang kahong “ Komosta kon Na-trauma Ta sa Gihimo sa Uban?”)
8 Dili nato makontrol kon unsay isulti o himoon sa uban, pero puwede natong kontrolon ang atong reaksiyon. Ug sagad, ang pinakamaayong buhaton mao ang pagpasaylo. Ngano? Kay gimahal nato si Jehova ug gusto niya nga magpasaylo ta. Kon padayon tang masuko ug dili magpasaylo, basig makahimo tag dili maayo o kaha masakit na hinuon ta. (Prov. 14:17, 29, 30) Matikdi ang giingon sa usa ka sister nga si Christine: “Dihang paundayonan nako ang akong kasuko, sige na lang kog mug-ot. Wala koy gana nga magluto ug lami nga pagkaon, ug wala koy tarong tulog. Dali ra pod kong sapoton, maong maapektohan ang akong relasyon sa akong bana ug sa uban.”
9. Nganong angay natong wad-on sa atong kasingkasing ang pagdumot?
9 Bisan pag ang tawo nga nakapasakit nato dili mangayog pasaylo, puwede natong mamenosan ang kadaot nga iyang nahimo. Sa unsang paagi? Si Georgette nga gihisgotan ganina miingon: “Milabay pa ang pipila ka panahon ayha nawala ang akong gihambin nga kasuko sa kanhi nakong bana. Pero sa dihang ako ning gihimo, gibati gyod nako ang grabeng kalinaw.” Kon wad-on nato sa atong kasingkasing ang kasuko ug pagdumot, maayo nig epekto sa atong kaugalingon ug sa atong pagtratar sa uban. Samag gihatagan pod natog nindot nga regalo ang atong kaugalingon, kay makapadayon ta sa atong kinabuhi ug mabalik ang atong kalipay. (Prov. 11:17) Pero komosta kon dili pa gihapon ka andam nga mopasaylo?
AYAWG PADAOG SA IMONG GIBATI
10. Nganong angay natong hatagan ug panahon nga maulian ang atong gibati? (Tan-awa sab ang mga hulagway.)
10 Nagkinahanglag panahon aron maulian ang atong gibati nga kasakit. Sa pag-ilustrar: Ang tawo nga grabeng na-injure nagkinahanglan gihapon ug panahon nga maulian bisag nahatagan na siyag medikal nga pag-atiman. Sa samang paagi, nagkinahanglag panahon nga maulian ang atong gibati aron makahimo ta sa pagpasaylo nga kinasingkasing.—Eccl. 3:3; 1 Ped. 1:22.
Sama nga ang tawo nga na-injure nagkinahanglan ug pag-atiman ug igong panahon nga maulian, ingon ana pod ang tawo nga nasakitan sa emosyonal (Tan-awa ang parapo 10)
11. Sa unsang paagi ang pag-ampo makatabang nimo nga magpasaylo?
11 Pinaagi sa pag-ampo, hangyoa si Jehova nga tabangan ka nga makapasaylo. c Si Ann, nga gihisgotan ganina, miingon kon sa unsang paagi ang pag-ampo nakatabang niya: “Mihangyo ko kang Jehova nga pasayloon ang matag usa sa among pamilya tungod sa among mga nasulti o nahimo nga dili maayo. Dayon gisulatan nako si Papa ug ang iyang bag-ong asawa ug giingnan sila nga ako na silang gipasaylo.” Si Ann miangkon nga dili to sayon himoon. Pero siya miingon: “Nanghinaot ko nga pinaagi sa akong pagsundog sa pagpasaylo ni Jehova, mapalihok si Papa ug ang iyang asawa nga mokat-on ug dugang bahin kang Jehova.”
12. Nganong angay tang mosalig kang Jehova imbes sa atong gibati? (Proverbio 3:5, 6)
12 Salig kang Jehova, dili sa imong gibati. (Basaha ang Proverbio 3:5, 6.) Nahibalo si Jehova kon unsay pinakamaayo para nato. (Isa. 55:8, 9) Dili gyod ta niya hangyoon nga himoon ang usa ka butang nga makadaot nato. Busa dihang giingnan ta niya nga magpasaylo, makasalig ta nga ang paghimo niana makahatag natog kaayohan. (Sal. 40:4; Isa. 48:17, 18) Sa laing bahin, kon mosalig ta sa atong gibati ug pasagdan ra ni nga magpadayon, basin dili gyod ta makapasaylo. (Prov. 14:12; Jer. 17:9) Si Naomi, nga gihisgotan ganina, miingon: “Sa primero, gibati nako nga sakto ra man nga dili nako pasayloon ang akong bana sa iyang pagtan-awg pornograpiya. Nahadlok man god ko nga pasakitan ko niyag balik o kaha malimot siya kon unsa ka sakit para nako ang iyang gihimo. Ug nahibalo ko nga nakasabot si Jehova nako. Pero naamgohan nako nga bisag nakasabot si Jehova sa akong gibati, wala na magpasabot nga miuyon siya niana. Nahibalo siya nga nagkinahanglag panahon aron mawala ang akong kasuko ug kahiubos, pero gusto gihapon niya nga magpasaylo ko.” d
PULIHI KINIG POSITIBONG MGA PAGBATI
13. Base sa Roma 12:18-21, unsay kinahanglan natong himoon?
13 Ang pagpasaylo wala lang basta magpasabot nga dili na estoryahan ang nahitabo. Hinuon, maningkamot ta nga magkauliay, ilabina kon igsoon ang nakapasakit pag-ayo nato. (Mat. 5:23, 24) Imbes padayong masuko, pilion nato nga magpakitag kaluoy, ug imbes magdumot, pilion nato nga magpasaylo. (Basaha ang Roma 12:18-21; 1 Ped. 3:9) Unsay makatabang nato sa paghimo niana?
14. Unsay paningkamotan natong himoon, ug ngano?
14 Gipili ni Jehova nga pangitaon ang maayong mga hiyas sa mga tawo, ug angay pod nato nang sundogon. (2 Cron. 16:9; Sal. 130:3) Kon dili maayong mga kinaiya ang atong pangitaon, puro pod dili maayo ang atong makita. Pero kon maayong mga hiyas ang atong pangitaon, makita pod nato na, ug makatabang na nga dali tang makapasaylo. Pananglitan, ang brader nga si Jarrod miingon, “Mas dali kong makapasaylo sa igsoon kon akong hunahunaon ang daghang maayong mga butang nga akong ganahan bahin niya, imbes magsigeg hunahuna sa iyang nahimong sayop.”
15. Nganong makatabang kon sultihan nimo ang usa nga imo na siyang gipasaylo?
15 Naa poy kaayohan kon sultihan nimo ang tawo nga nakapasakit nimo nga imo na siyang gipasaylo. Ngano? Matikdi ang giingon ni Naomi, nga gihisgotan sa miaging mga parapo. Siya miingon: “Gipangutana ko sa akong bana, ‘Napasaylo na ba ko nimo?’ Gusto kong moingon nga ‘Gipasaylo na ti ka,’ pero wala gyod nako ni malitok. Maong nakita nako nga wala pa gyod diay ko makapasaylo niya. Pero sa ngadtongadto, nasulti ra gyod nako ang mga pulong nga ‘Gipasaylo na ti ka.’ Pagsulti nako adto, nanglugmaw ang mga luha sa akong bana. Wala gyod ko magdahom nga ingon adto nga kahupayan ang iyang bation. Wala pod ko magdahom sa epekto niadto sa akoa kay migaan ang akong gibati ug nawala ang tanan nakong gihambin sa akong dughan. Sukad adto, nakakat-on ko nga mosalig niya pag-usab ug nabalik pod ang among kasuod.”
16. Unsay imong nakat-onan bahin sa pagpasaylo?
16 Gusto ni Jehova nga magpasaylo ta. (Col. 3:13) Bisan pa niana, malisdan tingali ta sa pagpasaylo sa uban. Pero kaya nato ning himoon kon dili nato balewalaon ang atong gibati ug kon maningkamot ta nga dili magpadaog niini. Dayon pulihan nato nig positibong mga pagbati.—Tan-awa ang kahong “ Tulo ka Paagi Aron Makapasaylo.”
PAGPOKUS SA MGA KAAYOHAN SA PAGPASAYLO
17. Sa unsang paagi ang pagpasaylo makahatag natog kaayohan?
17 Daghan tag rason sa pagpasaylo. Konsideraha ang pipila niana. Una, gisundog nato ang atong maluluy-ong Amahan, si Jehova, ug tungod ana napalipay nato siya. (Luc. 6:36) Ikaduha, gipakita nato nga mapasalamaton ta sa pagpasaylo ni Jehova kanato. (Mat. 6:12) Ug ikatulo, naa tay maayong panglawas ug maayong relasyon sa uban.
18-19. Unsay posibleng resulta kon magpasaylo ta?
18 Kon pasayloon nato ang uban, posibleng makadawat tag wala damhang mga panalangin. Matikdi kon unsay nahitabo sa kahimtang ni Denise nga gihisgotan sa sinugdan. Wala siya mahibalo niadtong panahona nga ang tawo nga nakabangga nila nagplano diay nga magpakamatay human sa iyang husay. Pero kay natandog siya sa pagpasaylo ni Denise, nagpa-Bible study siya sa mga Saksi ni Jehova.
19 Tingali naay mga panahon nga malisdan kaayo ta sa pagpasaylo, pero dili gyod ta magmahay kon ato ning himoon. (Mat. 5:7) Busa hinaot nga himoon nato ang tanan natong maarangan nga sundogon ang pagpasaylo ni Jehova.
AWIT 125 “Malipayon ang mga Maluluy-on!”
a Ang ubang ngalan giilisan.
b Sa ingon ana nga mga kahimtang, ang matag Kristohanon maoy modesisyon kon unsay himoon.
c Tan-awa sa jw.org ang mga video sa orihinal nga mga kanta nga “Magpasaylo” ug “Panaghigala Huptan Ta.”
d Bisag ang pagtan-awg pornograpiya maoy sala ug makapasakit sa kapikas, dili ni maghatag ug Kasulatanhong basehanan nga makigdiborsiyo ang inosenteng kapikas.
