TUN-ANANG ARTIKULO 7
AWIT 15 Dayegon Ta ang Panganay ni Jehova!
Pagpasaylo ni Jehova—Unsay Kahulogan Niini Para Nimo?
“Ikaw tinuod gayod nga nagapasaylo.”—SAL. 130:4.
POKUS
Pinaagi sa paghisgot sa pipila ka ilustrasyon nga gigamit sa Bibliya, mas molalom ang atong apresasyon sa tinuod nga pagpasaylo ni Jehova sa kada usa nato.
1. Nganong makalibog usahay ang pagpasaylo nga ginahimo sa mga tawo?
“GIPASAYLO NA TI KA.” Mahupayan gyod ka kon imo ning madungog sa usa nga imong nasultihan o nabuhatan ug dili maayo! Pero unsa man gyoy iyang gipasabot sa pag-ingon nga “gipasaylo na ti ka”? Nagpasabot ba na nga nagkauliay na gyod mo? O dili lang niya gustong hisgotan ang nahitabo? Makalibog ni usahay kay bisag moingon ang uban nga nagpasaylo na sila, lahi diay ang naa sa ilang hunahuna.
2. Unsay giingon sa Bibliya bahin sa pagpasaylo ni Jehova? (Tan-awa sab ang footnote.)
2 Ang pagpasaylo ni Jehova kanato lahi kaayo kon itandi sa atong pagpasaylo sa uban. Ang salmista miingon bahin kang Jehova: “Ikaw tinuod gayod nga nagapasaylo, aron ang mga tawo magpakitag halawom nga pagtahod kanimo.” a (Sal. 130:4) Oo, si Jehova “tinuod gayod nga nagapasaylo.” Iyang gipakita kon unsa gyoy tinuod nga kahulogan sa pagpasaylo. Sa ubang mga teksto, ang mga magsusulat sa Bibliya migamit ug Hebreohanong pulong nga nagtumong lang sa pagpasaylo nga ginahimo sa Diyos. Kini nga Hebreohanong pulong wala gyod gamita para sa pagpasaylo nga ginahimo sa mga tawo.
3. Nganong ang pagpasaylo ni Jehova lahi kaayo kon itandi sa atoa? (Isaias 55:6, 7)
3 Sa dihang pasayloon ta ni Jehova, iyang papason ang atong sala. Bug-os niyang ibalik ang atong maayong relasyon kaniya. Si Jehova bug-os nga nagapasaylo nato ug dili gyod mapul-an sa paghimo niini.—Basaha ang Isaias 55:6, 7.
4. Giunsa ta pagtabang ni Jehova nga masabtan kon unsa ang tinuod nga pagpasaylo?
4 Kay lahi kaayo ang pagpasaylo ni Jehova kon itandi sa atoa, giunsa ta niya pagtabang nga masabtan kon unsa ang tinuod nga pagpasaylo? Pinaagi sa paggamit ug mga ilustrasyon. Niining artikuloha, hisgotan nato ang pipila niana. Kini nga mga ilustrasyon motabang nato nga masabtan kon unsay ginahimo ni Jehova sa pagtangtang sa atong mga sala ug pagbalik sa atong maayong relasyon kaniya. Samtang hisgotan nato kini nga mga ilustrasyon, mas molalom ang atong apresasyon sa atong mahigugmaong Amahan, nga nagapasaylo nato sa daghan kaayong paagi.
SI JEHOVA NAGTANGTANG SA SALA
5. Unsay mahitabo sa dihang pasayloon ni Jehova ang atong mga sala?
5 Sa Bibliya, ang mga sala sagad gipakasama sa bug-at nga mga palas-anon. Matikdi kon unsay giingon ni Haring David bahin sa iyang mga sala: “Ang akong kasaypanan milapaw sa akong ulo; samag bug-at nga palas-anon, dili nako kini mapas-an.” (Sal. 38:4) Pero si Jehova nagapasaylo niadtong mga mahinulsolon. (Sal. 25:18; 32:5) Ang Hebreohanong pulong nga gihubad ug “nagpasaylo” nagkahulogang “nag-alsa” o “nagdala.” Sama bag gitangtang ni Jehova gikan nato ang atong bug-at nga sala, gialsa kini, ug gidala sa layo.
“Gipasaylo” (Sal. 32:5)
6. Unsa ka layo dad-on ni Jehova ang atong mga sala?
6 Naay laing ilustrasyon nga nagpakita kon unsa ka layo dad-on ni Jehova ang atong mga sala. Ang Salmo 103:12 nag-ingon: “Sama ka layo sa sidlakan gikan sa kasadpan, ingon usab niana ka layo nga gibutang niya ang atong kalapasan gikan kanato.” Ang sidlakan ug kasadpan naa sa isigkatumoy ug dili gyod ni mag-abot. Sa ato pa, ginadala ni Jehova sa layo kaayo ang atong mga sala. Nindot gyod ni nga ilustrasyon bahin sa pagpasaylo ni Jehova!
“Sama ka layo sa sidlakan gikan sa kasadpan” (Sal. 103:12)
7. Sumala sa Bibliya, unsay buhaton ni Jehova sa atong mga sala? (Miqueas 7:18, 19)
7 Kay ginadala ni Jehova ang atong mga sala palayo kanato, nagpasabot ba na nga padayon siyang naggunit niana? Wala. Si Haring Ezequias misulat bahin kang Jehova: “Gisalibay nimo sa imong luyo ang tanan nakong sala,” o sa footnote, “giwagtang nimo gikan sa imong panan-aw ang tanan nakong sala.” (Isa. 38:9, 17; footnote) Kini nga ilustrasyon nagpakita nga gikuha ni Jehova ang sala sa mga mahinulsolon ug gilabay kini sa layo kaayo nga dili na kini makita. Puwede pod ning hubaron niining paagiha: “Imong gihimo [ang akong mga sala] nga samag wala kini mahitabo.” Kini nga punto dugang gipasiugda sa Bibliya pinaagi sa lain pang ilustrasyon nga narekord sa Miqueas 7:18, 19. (Basaha.) Kini nga teksto nag-ingon nga ang atong mga sala gitambog ni Jehova sa kahiladman sa dagat. Sa karaang panahon, imposible na gyong makuhag balik ang usa ka butang nga naa na sa pinakailalom sa dagat.
“Gisalibay nimo sa imong luyo ang tanan nakong sala” (Isa. 38:17)
“Imong itambog sa kahiladman sa dagat ang tanan namong kasal-anan” (Miq. 7:19)
8. Unsa nay atong nakat-onan?
8 Pinaagi niini nga mga ilustrasyon, atong nakat-onan nga sa dihang mopasaylo si Jehova, wad-on niya sa bug-os ang atong mga sala maong dili na ta angayng mobatig kabug-at tungod niana. Sama sa giingon ni David, “malipayon ang mga tawo kansang kalapasan gipasaylo na ug kansang mga sala gipapas na; malipayon ang tawo kansang sala dili na hinumdoman ni Jehova.” (Roma 4:7, 8) Kana ang tinuod nga pagpasaylo!
SI JEHOVA NAGPAPAS SA SALA
9. Unsang mga ilustrasyon ang gigamit ni Jehova aron ipakita nga bug-os gyod ang iyang pagpasaylo?
9 Si Jehova naggamit ug uban pang mga ilustrasyon aron tabangan ta nga makita nga pinaagi sa halad lukat, iyang gipapas ang sala sa mga mahinulsolon. Ang Bibliya nag-ingon nga si Jehova naghugas ug nagwaswas sa atong mga sala. Tungod niana, nahinloan ta. (Sal. 51:7; Isa. 4:4; Jer. 33:8) Si Jehova mismo ang naghisgot kon unsay resulta niini: “Bisan tuod ang inyong mga sala hayag-pula, kini papution sama sa niyebe; bisag sama kini ka pula sa dagtom-pula nga panapton, kini mahisama sa balhibo sa karnero.” (Isa. 1:18) Lisod gyod tangtangon ang pula kaayo nga mansa. Pero pinaagi niini nga ilustrasyon, gipasaligan ta ni Jehova nga ang atong mga sala bug-os gyong matangtang ug dili na makita.
“Bisan tuod ang inyong mga sala hayag-pula, kini papution sama sa niyebe” (Isa. 1:18)
10. Unsang laing ilustrasyon ang gigamit ni Jehova aron ipakita kon unsa ka dako ang iyang pagpasaylo?
10 Sa nahisgotan na sa miaging artikulo, ang sala gipakasama sa “utang.” (Mat. 6:12, footnote; Luc. 11:4) Maong matag higayon nga makasala ta kang Jehova, samag magkaanam ka dako ang atong utang. Oo, dako kaayo tag utang kang Jehova! Pero sa dihang mopasaylo siya, samag iyang kanselahon ang utang nga angay unta natong bayran. Dili na ta niya paninglan sa mga sala nga iya nang gipasaylo. Makapahupay gyod na! Sama nga malipay pag-ayo ang usa ka tawo dihang kanselahon ang iyang utang, malipay pod kaayo ta dihang pasayloon ta ni Jehova.
“Pasayloa mi sa among mga utang” (Mat. 6:12; footnote)
11. Unsay gipasabot sa giingon sa Bibliya nga “mapapas” ang atong mga sala? (Buhat 3:19)
11 Gawas nga gikanselar ni Jehova ang atong mga utang, o mga sala, iya pod ning gipapas. (Basaha ang Buhat 3:19.) Hunahunaa ni: Kon gikanselar ang utang, ma-imagine tingali nato nga samag gisulatan ug dako nga X ang listahan sa mga utang. Bisan pa ana, makita gihapon ang utang kay igo ra ning gisulatan ug X. Pero lahi kaayo ang pagpapas. Hinumdomi nga sa karaang panahon, ang tinta nga gigamit maoy gisagol nga karbon, tagok, ug tubig. Dali ra ning ma-erase pinaagig basa nga panapton. Maong kon ang utang papason, mawala ni sa bug-os. Dili na makita kon unsa may nasulat niana kaniadto; sama bag wala gyoy rekord sa utang. Busa makapahupay gyod nga dili lang kay basta kanselahon ni Jehova ang atong mga sala, iya pod ning papason sa bug-os!—Sal. 51:9.
“Aron mapapas ang inyong mga sala” (Buh. 3:19)
12. Unsay atong makat-onan sa ilustrasyon bahin sa bagang panganod?
12 Si Jehova naggamit ug laing ilustrasyon nga nagpakita kon giunsa niya pagpapas ang atong mga sala. Siya miingon: “Akong papason ang imong mga kalapasan nga samag gitabonan kinig panganod ug ang imong mga sala nga samag gitabonan kinig bagang panganod.” (Isa. 44:22) Dihang mopasaylo si Jehova, samag tabonan niya pinaagig bagang panganod ang atong mga kalapasan aron dili na ni makita.
“Akong papason ang imong mga kalapasan nga samag gitabonan kinig panganod” (Isa. 44:22)
13. Dihang pasayloon ta ni Jehova, unsay atong bation?
13 Unsay atong nakat-onan niini nga mga ilustrasyon? Kon gipasaylo na ta ni Jehova, dili ta angayng mobati nga naa gihapon ang mansa sa atong nahimong sala ug makonsensiya sa tibuok natong kinabuhi. Pinaagi sa dugo ni Jesu-Kristo, bug-os nang gipapas ang atong mga sala, nga mora bag wala gyod nato ni nahimo. Kana ang tinuod nga pagpasaylo gikan kang Jehova basta maghinulsol ta.
IBALIK NI JEHOVA ANG MAAYONG RELASYON
Kay ang atong langitnong Amahan tinuod nga nagapasaylo, nabatonan nato ang maayong relasyon kaniya (Tan-awa ang parapo 14)
14. Nganong makasalig ta sa pagpasaylo ni Jehova? (Tan-awa sab ang mga hulagway.)
14 Kay si Jehova tinuod nga nagapasaylo, makasalig ta nga mabalik ang atong maayong relasyon kaniya. Busa dili ta angay nga padayong makonsensiya sa mga sala nga iya nang gipasaylo. Dili pod ta angayng mahadlok nga basig nasuko pa si Jehova ug nga nangita siyag paagi nga masilotan ta. Dili gyod na mahitabo. Nganong makasalig ta kang Jehova dihang moingon siya nga iya na tang gipasaylo? Giingnan ni Jehova si propetang Jeremias: “Pasayloon nako ang ilang kasaypanan, ug dili na nako hinumdoman ang ilang sala.” (Jer. 31:34) Gikutlo pod ni apostol Pablo ang giingon ni Jehova: “Dili na nako hinumdoman ang ilang mga sala.” (Heb. 8:12) Pero unsa may gipasabot niini?
“Dili na nako hinumdoman ang ilang sala” (Jer. 31:34)
15. Unsay gipasabot sa giingon ni Jehova nga dili na niya hinumdoman ang atong mga sala?
15 Sa Bibliya, ang pulong “hinumdoman” wala lang magpasabot nga hunahunaon ang usa ka butang. Usahay, nagpasabot pod ni nga naay himoong aksiyon. Ang kriminal nga gilansang tapad ni Jesus mihangyo: “Jesus, hinumdomi ko inig-abot nimo sa imong Gingharian.” (Luc. 23:42, 43) Ang iyang giingon wala magpasabot nga igo lang siyang hinumdoman ni Jesus, kondili mihangyo siya nga naay himoon si Jesus para niya. Ang tubag ni Jesus nagpakita nga iyang banhawon ang maong kriminal. Busa sa laing bahin, sa dihang miingon si Jehova nga dili na niya hinumdoman ang atong mga sala, nagpasabot ni nga dili na siya mohimog aksiyon aron silotan ta. Sa ato pa, dili ta niya silotan sa umaabot tungod sa mga sala nga iya nang gipasaylo.
16. Unsa nga klase sa kagawasan ang atong naeksperyensiyahan tungod sa tinuod nga pagpasaylo?
16 Ang Bibliya naggamit ug laing ilustrasyon aron ipakita nga ang pagpasaylo ni Jehova naghatag natog kagawasan. Kay dili ta hingpit ug naa tay tendensiya nga mohimog dili maayo, gipakasama tag “mga ulipon . . . sa sala.” Pero tungod kay gipasaylo ta ni Jehova, mora tag mga ulipon nga “gipagawas na . . . gikan sa sala.” (Roma 6:17, 18; Pin. 1:5) Oo, makapalipay gyod kaayo nga napahigawas ta gikan sa pagkaulipon sa sala.
“Gipagawas na . . . mo gikan sa sala” (Roma 6:18)
17. Unsa pay laing resulta tungod sa pagpasaylo ni Jehova? (Isaias 53:5)
17 Basaha ang Isaias 53:5. Sa kataposang ilustrasyon nga atong hisgotan, gipakasama tag mga tawo nga naay makamatay nga sakit. Pero tungod sa halad lukat nga gitagana ni Jehova pinaagi sa iyang Anak, samag naayo ta. (1 Ped. 2:24) Ang lukat nagpaposible nga bug-os mabalik ang atong relasyon kang Jehova, nga kaniadto nadaot tungod sa espirituwal nga sakit. Sama nga malipay pag-ayo ang usa ka tawo nga naulian sa iyang grabeng sakit, malipay pod kaayo ta dihang maulian ta sa espirituwal ug masuod pag-usab kang Jehova.
“Tungod sa iyang mga samad kami naayo” (Isa. 53:5)
KON UNSAY KAHULOGAN NIINI PARA NATO
18. Unsay atong nakat-onan sa mga ilustrasyon nga gigamit sa Bibliya bahin sa pagpasaylo ni Jehova? (Tan-awa sab ang kahong “Kon sa Unsang Paagi si Jehova Nagpasaylo Nato.”)
18 Unsa may atong nakat-onan bahin sa mga ilustrasyon nga atong nahisgotan? Atong nakat-onan nga si Jehova bug-os nga magpasaylo sa atong mga sala ug dili na gyod ni niya hinumdoman. Tungod ana, naa tay maayong relasyon sa atong langitnong Amahan. Importante pod nga hinumdoman nato nga ang tinuod nga pagpasaylo regalo gikan kang Jehova. Iya ning gihatag dili tungod kay ato ning katungod, kondili tungod sa gugma ug dili hitupngan nga pagkamaayo ni Jehova.—Roma 3:24.
19. (a) Sa unsa ta mapasalamaton? (Roma 4:8) (b) Unsay atong hisgotan sa sunod nga artikulo?
19 Basaha ang Roma 4:8. Mapasalamaton gyod ta nga si Jehova nga Diyos “tinuod gayod nga nagapasaylo”! (Sal. 130:4) Pero aron mapasaylo ta, naa tay kinahanglang himoon. Si Jesus miingon: “Kon dili ninyo pasayloon ang mga tawo sa ilang kasaypanan, dili usab pasayloon sa inyong Amahan ang inyong kasaypanan.” (Mat. 6:14, 15) Busa klaro nga kinahanglan natong sundogon ang pagpasaylo ni Jehova. Pero unsaon nato na paghimo? Hisgotan nato na sa sunod nga artikulo.
AWIT 46 Salamat Jehova
a Sa orihinal nga Hebreohanong pinulongan, ang pulong nga gigamit bahin sa “pagpasaylo” ni Jehova naghatag ug ideya nga kini lang ang tinuod nga pagpasaylo, bisan pag ang mga tawo nagapasaylo pod. Wala ipasiugda sa daghang hubad sa Bibliya kining importante nga punto. Pero lahi ang Bag-ong Kalibotang Hubad sa Balaang Kasulatan kay diha sa Salmo 130:4, klarong gipasiugda niini ang pagkalabaw sa pagpasaylo ni Jehova.
