TUN-ANANG ARTIKULO 38
“Ari Kamo Kanako, . . . ug Ako Magpalagsik Kaninyo”
“Ari kamo kanako, kamong tanang gikapoy ug nabug-atan, ug ako magpalagsik kaninyo.”—MAT. 11:28.
AWIT 17 “Buot Ko”
SUMARYO *
1. Sumala sa Mateo 11:28-30, unsay gisaad ni Jesus?
SI Jesus naghatag ug nindot nga saad sa mga tawo nga naminaw niya. “Ari kamo kanako,” miingon siya, “ug ako magpalagsik kaninyo.” (Basaha ang Mateo 11:28-30.) Kasaligan gyod ni nga saad. Pananglitan, hunahunaa kon unsay iyang gihimo para sa babaye nga nag-antos sa grabeng sakit.
2. Unsay gihimo ni Jesus para sa masakitong babaye?
2 Ang babaye nagkinahanglan gyod ug tabang. Daghan na siyag naadtoang doktor aron maayo unta siya. Human mag-antos ug 12 ka tuig, wala gihapon siya maayo. Sumala sa Balaod, siya hugaw. (Lev. 15:25) Unya nakabalita siya nga si Jesus makaayo sa mga nag-antos, busa gipangita niya kini. Dihang nakita niya si Jesus, gihikap niya ang bitaybitay sa sidsid sa besti niini, ug dihadiha siya naayo! Pero dili kay kana ray gihimo ni Jesus—gibalik sab niya ang dignidad sa babaye. Pananglitan, samtang nakig-estorya kaniya, gigamit ni Jesus ang makapatandog ug matinahorong pulong nga “anak.” Segurado nga kana nakapalagsik, o nakapalig-on, sa babaye!—Luc. 8:43-48.
3. Unsang mga pangutana ang atong tubagon?
3 Matikdi nga ang babaye miadto kang Jesus. Milihok siya. Tinuod sab nâ karon—kinahanglan tang maningkamot sa pagduol kang Jesus. Karon, dili ayohon ni Jesus sa milagrosong paagi ang mga sakit niadtong moduol kaniya. Pero siya nagdapit gihapon: “Ari kamo kanako, . . . ug ako magpalagsik kaninyo.” Niining artikuloha, atong tubagon ang lima ka pangutana: Sa unsang paagi makaduol ta kang Jesus? Unsay buot ipasabot ni Jesus dihang miingon siya: “Isangon ang akong yugo”? Unsay
atong makat-onan kang Jesus? Nganong makapalagsik ang buluhaton nga iyang gihatag kanato? Ug sa unsang paagi padayon tang mobatig kahayahay ilalom sa yugo ni Jesus?“ARI KAMO KANAKO”
4-5. Unsa ang pipila ka paagi nga kita makaduol kang Jesus?
4 Ang usa ka paagi sa pagduol kang Jesus mao ang pagpaningkamot pag-ayo nga makakat-on bahin sa mga butang nga iyang gisulti ug gibuhat. (Luc. 1:1-4) Walay laing makahimo niana para kanato—responsibilidad nato nga tun-an kini nga mga asoy. Makaduol sab ta kang Jesus pinaagi sa pagdesisyon nga magpabawtismo ug mahimong tinun-an sa Kristo.
5 Ang laing paagi sa pagduol kang Jesus mao ang pagduol sa mga ansiyano kon nanginahanglan tag tabang. Si Jesus naggamit niining “gasa nga mga lalaki” sa pag-atiman sa iyang mga karnero. (Efe. 4:7, 8, 11; Juan 21:16; 1 Ped. 5:1-3) Kinahanglang molihok ta aron mangayog tabang. Dili ta makadahom nga ang mga ansiyano makabasa sa atong hunahuna ug mahibalo sa atong mga panginahanglan. Tagda ang giingon sa brader nga si Julian: “Kinahanglan kong mohawa sa Bethel tungod sa kahimtang sa akong panglawas, ug gitambagan ko sa usa sa akong mga higala nga magpa-shepherding. Sa primero, naghunahuna ko nga wala ko magkinahanglan anâ. Pero sa ulahi nangayo kog tabang, ug ang maong pagduaw maoy usa sa kinamaayohang regalo nga akong nadawat.” Ang maunongong mga ansiyano, sama niadtong duha nga miduaw kang Julian, makatabang nato nga mahibalo sa “panghunahuna sa Kristo,” buot ingnon, masabtan ug masundog ang iyang panghunahuna ug pagbati. (1 Cor. 2:16; 1 Ped. 2:21) Usa gyod ni sa kinamaayohang mga regalo nga mahatag nila kanato.
“ISANGON ANG AKONG YUGO”
6. Unsay gipasabot ni Jesus dihang siya miingon: “Isangon ang akong yugo”?
6 Dihang si Jesus miingon: “Isangon ang akong yugo,” tingali mao ni ang iyang gipasabot: “Pasakop sa akong awtoridad.” O kaha kini ang iyang gipasabot: “Pas-ana ang yugo uban kanako, ug mag-uban ta sa pagbuhat para kang Jehova.” Bisan hain niana ang iyang gipasabot, ang yugo nagpakita nga duna tay buluhaton.
7. Sumala sa Mateo 28:18-20, unsang buluhaton ang gisugo kanato, ug unsay atong maseguro?
7 Atong gidawat ang imbitasyon ni Jesus dihang kita nagpahinungod sa atong kinabuhi kang Jehova ug nagpabawtismo. Kana nga imbitasyon para sa tanan—dili gayod isalikway ni Jesus si bisan kinsa nga dunay sinserong tinguha nga moalagad sa Diyos. (Juan 6:37, 38) Ang tanang sumusunod sa Kristo gihatagag pribilehiyo sa paghimo sa buluhaton nga gisugo ni Jehova kang Jesus. Makaseguro ta nga si Jesus kanunayng mag-uban kanato aron tabangan ta sa paghimo niana.—Basaha ang Mateo 28:18-20.
“PAGKAT-ON GIKAN KANAKO”
Palagsika ang uban sama sa gihimo ni Jesus (Tan-awa ang parapo 8-11) *
8-9. Nganong ang mga mapainubsanon ganahang moduol kang Jesus, ug unsay angay natong ipangutana sa kaugalingon?
8 Ang mapainubsanong mga tawo ganahang moduol kang Jesus. (Mat. 19:13, 14; Luc. 7:37, 38) Ngano? Tagda ang kalainan ni Jesus ug sa mga Pariseo. Ang maong mga lider sa relihiyon walay pagbati ug arogante. (Mat. 12:9-14) Si Jesus mahigugmaon ug mapainubsanon. Ang mga Pariseo ambisyoso ug mapasigarbohon sa ilang taas nga posisyon sa komunidad. Si Jesus nagsaway sa dili maayong ambisyon, ug gitudloan niya ang iyang mga tinun-an nga isipon ang kaugalingon ingong ubos nga mga alagad. (Mat. 23:2, 6-11) Ang mga Pariseo nagdominar sa uban pinaagig pagpanghulga. (Juan 9:13, 22) Si Jesus nagpalagsik sa uban pinaagig mahigugmaong mga buhat ug malumong mga pulong.
9 Nakakat-on na ba ka niini nga mga leksiyon gikan kang Jesus? Pangutan-a ang kaugalingon: ‘Nailhan ba ko nga lumo ug mapainubsanon? Mohimo ba kog ubos nga mga trabaho sa pag-alagad sa uban? Buotan ba ko?’
10. Unsay kahimtang kon kauban si Jesus sa buluhaton?
10 Gihimo ni Jesus nga malinawon ug makapalipay ang kahimtang sa pagbuhat uban kaniya, ug nalipay siya sa pagbansay sa iyang mga kauban. (Luc. 10:1, 19-21) Gidasig niya ang iyang mga tinun-an sa pagpangutana, ug gusto niyang madungog ang ilang mga opinyon. (Mat. 16:13-16) Samag mga tanom nga gipanalipdan batok sa dili maayong klima, ang mga tinun-an mitubo, o miuswag. Ilang nasabtan ang mga leksiyon nga gitudlo ni Jesus ug sila namungag maayong mga buhat.
Mahimong daling duolon ug mahigalaon
Mahimong aktibo ug dasig sa pag-alagad
Mahimong mapainubsanon ug kugihan *
11. Unsay angay natong ipangutana sa kaugalingon?
11 Duna ba kay awtoridad? Kon mao, pangutan-a ang kaugalingon: ‘Giunsa nako pagtratar ang uban diha sa trabahoan ug sa balay? Naningkamot ba ko nga mahimong malinawon ug makapalipay ang kahimtang? Gidasig ba nako ang uban sa pagpangutana? Ug andam ba kong maminaw sa ilang mga opinyon?’ Dili gyod nato gustong sundogon ang mga Pariseo, nga nasuko niadtong nangutana nila ug naglutos niadtong lahi nilag opinyon.—Mar. 3:1-6; Juan 9:29-34.
“KAMO MOBATIG KAHAYAHAY”
12-14. Nganong makapahayahay ang buluhaton nga gihatag ni Jesus kanato?
12 Nganong mobati tag kahayahay kon buhaton nato ang gisugo ni Jesus? Dunay daghang rason, pero pipila ra ang atong hisgotan.
13 Duna tay pinakamaayong mga tigdumala. Si Jehova, ang atong Kinalabwang Tigdumala, dili bangis nga agalon nga walay apresasyon sa iyang mga alagad. Gipabilhan niya ang atong ginahimo. (Heb. 6:10) Ug gihatagan ta niya sa kusog nga atong gikinahanglan sa pagtuman sa atong mga responsibilidad. (2 Cor. 4:7; Gal. 6:5, footnote) Si Jesus, ang atong Hari, naghatag natog hingpit nga ehemplo kon unsaon pagtratar ang uban. (Juan 13:15) Ug ang mga ansiyano nga nag-atiman kanato naningkamot sa pagsundog kang Jesus, ang “maayo kaayong magbalantay.” (Heb. 13:20; 1 Ped. 5:2) Naningkamot silang mahimong buotan, makapadasig, ug maisogon samtang sila nag-atiman ug nagprotektar kanato.
14 Duna tay pinakamaayong mga higala. Walay laing nakabaton ug mahigugmaong mga higala ug makapalipayng buluhaton nga sama sa atong nabatonan. Hunahunaa lang: Pribilehiyo nato nga makauban sa buluhaton ang mga tawo nga dunay kinatas-ang sukdanan sa moral pero wala magpakamatarong sa kaugalingon. Abilidaran sila pero dili hambogiro, ug giisip nila ang uban nga mas labaw kanila. Giisip sab ta nila ingong mga higala, dili lang ingong kauban sa buluhaton. Ug suod kaayo ta nila nga andam nilang ihatag ang ilang kinabuhi para kanato!
15. Unsay angay natong bation sa atong buluhaton?
15 Duna tay pinakamaayong buluhaton. Kita nagtudlo sa mga tawo sa kamatuoran bahin kang Jehova ug nagyagyag sa mga bakak sa Yawa. (Juan 8:44) Gipabug-atag maayo ni Satanas ang mga tawo pinaagig mga bakak. Pananglitan, gusto niyang motuo ta nga dili pasayloon ni Jehova ang atong mga sala ug dili ta angayng mahalon. Makapahugno gyod kana nga bakak! Dihang moduol ta sa Kristo, mapasaylo ang atong mga sala. Ug sa pagkatinuod, si Jehova nahigugma pag-ayo kanatong tanan. (Roma 8:32, 38, 39) Dako ang atong kalipay dihang tabangan nato ang mga tawo nga mosalig kang Jehova ug makita nato nga miuswag ang ilang kinabuhi!
SA UNSANG PAAGI PADAYON KANG MOBATIG KAHAYAHAY ILALOM SA YUGO NI JESUS?
16. Sa unsang paagi ang gipapas-an ni Jesus kanato lahi sa ubang butang nga angay natong pas-anon?
16 Ang gipapas-an ni Jesus kanato lahi sa ubang butang nga angay natong pas-anon. Pananglitan, inigkahapon dihang mahuman na ang sekular nga trabaho, daghan ang kapoyon ug dili malipayon. Pero kita, human sa pipila ka oras nga pag-alagad kang Jehova ug sa Kristo, mobatig dakong kalipay. Tingali gikapoy ta sa tibuok adlaw nga trabaho ug kinahanglang pugson nato ang kaugalingon sa pagtambong sa tigom nianang gabhiona. Pero sagad inig-uli nato gikan sa tigom, hayahay na ang atong paminaw ug lagsik na ta. Ingon sab niana ang atong bation dihang maningkamot ta sa pagsangyaw ug sa paghimog personal nga pagtuon sa Bibliya—mobati tag kahayahay ug kalagsik!
17. Nganong kinahanglang realistiko ta, ug unsay hunahunaon nato pag-ayo?
17 Kinahanglang realistiko ta. Ang atong kusog may limitasyon. Busa hunahunaon natog maayo kon unsay atong himoon. Pananglitan, basig masayang ang atong kusog sa pagtigom ug materyal nga mga butang. Matikdi ang giingon ni Jesus sa dato nga batan-on, kinsa nangutana: “Unsay kinahanglan nakong himoon aron makapanunod ug kinabuhing walay kataposan?” Ang batan-on nagsunod na sa Balaod. Lagmit maayo siyang tawo kay ang Ebanghelyo ni Marcos nag-ingon nga si Jesus “mibatig gugma kaniya.” Gidapit siya ni Jesus: “Lakaw, ibaligya ang tanan nimong kabtangan . . . unya kuyog nako ug mahimong akong sumusunod.” Gusto sa batan-on nga mosunod kang Jesus, pero dayag nga dili niya kayang biyaan ang iyang ‘daghang kabtangan.’ (Mar. 10:17-22) Busa iyang gibalibaran ang yugo nga gitanyag ni Jesus kaniya ug padayon siyang nagpaulipon “sa Bahandi.” (Mat. 6:24) Kon ikaw tong batan-on, unsay imong pilion?
18. Unsay angay natong himoon matag karon ug unya, ug ngano?
18 Matag karon ug unya, maayong susihon nato kon unsay atong mga prayoridad. Ngano? Aron maseguro nato nga atong gigamit ang atong kusog sa hustong paagi. Tagda ang giingon sa batan-ong si Mark: “Sa daghang tuig, abi nakog simple ang akong pagkinabuhi. Payunir ko, pero pirme kong maghunahuna kon sa unsang paagi makakuwarta ug mas mohayahay ang akong kinabuhi. Naghunahuna ko kon nganong nabug-atan na ko. Dayon akong naamgohan nga giuna diay nako ang kaugalingong interes ug sobra na lang sa akong panahon ug kusog ang akong gihatag kang Jehova.” Giusab ni Mark ang iyang panghunahuna ug pagkinabuhi aron mas dako siyag mahimo sa pag-alagad kang Jehova. Siya miingon: “Usahay mabalaka ko, pero sa tabang ni Jehova ug ni Jesus, nakapokus gihapon ko sa pag-alagad.”
19. Nganong importante kaayo nga husto ang atong panglantaw?
19 Padayon tang mobatig kahayahay ilalom sa yugo ni Jesus kon himoon nato ang tulo ka butang. Una, mentinaha ang hustong panglantaw. Buluhaton ni Jehova ang atong ginahimo, busa angay ning himoon sumala sa gusto ni Jehova. Kita ang tigbuhat sa buluhaton, ug si Jehova ang Agalon. (Luc. 17:10) Kon himoon nato ang iyang buluhaton sumala sa atong gusto, gilisodlisod nato ang atong kaugalingon. Bisan ang kusgang baka lagmit masakitan ug kapoyon kon kanunay kining mosunod sa gusto niining direksiyon ug dili mosunod sa yugo nga gikontrolar sa iyang agalon. Pero kon sundon nato ang giya ni Jehova, mahimo nato ang mga butang nga daw imposible ug maatubang nato ang mga kalisdanan nga daw dili nato kaya. Hinumdomi, walay makapugong niya sa pagtuman sa iyang kabubut-on!—Roma 8:31; 1 Juan 4:4.
20. Unsay angay natong motibo sa pagpas-an sa yugo ni Jesus?
20 Ikaduha, magbaton ug hustong motibo. Tumong nato nga mahimaya ang atong mahigugmaong Amahan, si Jehova. Ang mga tawo sa unang siglo nga hakog o kaugalingon ray gihunahuna, sa wala madugay, nahimong masulub-on ug gibiyaan nila ang yugo ni Jesus. (Juan 6:25-27, 51, 60, 66; Filip. 3:18, 19) Pero kadtong nahigugma sa Diyos ug sa ilang isigkatawo labaw sa ilang kaugalingon malipayong nagpas-an sa yugo sa tibuok nilang kinabuhi dinhi sa yuta, nga may paglaom nga mag-alagad uban sa Kristo didto sa langit. Sama kanila, magpabilin tang malipayon kon husto tag motibo sa pagpas-an sa yugo ni Jesus.
21. Sumala sa Mateo 6:31-33, unsay atong madahom nga buhaton ni Jehova?
21 Ikatulo, magbaton ug hustong mga pagdahom. Gipili nato ang kinabuhi diin kinahanglan tang magsakripisyo ug magkugi. Si Jesus nagpasidaan nga lutoson ta. Pero makadahom ta nga hatagan ta ni Jehova ug kusog sa paglahutay sa bisan unsang kalisdanan. Kon padayon tang molahutay, mas molig-on ta. (Sant. 1:2-4) Makadahom sab ta nga itagana ni Jehova ang atong panginahanglan, atimanon ta ni Jesus, ug dasigon ta sa atong mga igsoon. (Basaha ang Mateo 6:31-33; Juan 10:14; 1 Tes. 5:11) Kompleto gyod ta sa tanan natong gikinahanglan aron makalahutay!
22. Sa unsa ta mapasalamaton?
22 Ang babaye nga giayo ni Jesus mibatig kahayahay sa mismong adlaw nga naayo siya. Pero mobati lang siyag kahayahay hangtod sa hangtod kon nahimo siyang maunongong tinun-an sa Kristo. Unsa kahay iyang gihimo? Kon gisangon niya ang yugo ni Jesus, hunahunaa ang ganti—pag-alagad uban ni Jesus sa langit! Ang bisan unsang sakripisyo nga iyang gihimo sa pagsunod sa Kristo balewala ra kon itandi niana nga panalangin. Bisag unsa pay atong paglaom—kinabuhing walay kataposan sa langit man o sa yuta—mapasalamaton gyod ta nga gidawat nato ang pagdapit ni Jesus: “Ari kamo kanako”!
AWIT 13 Ang Kristo, Atong Panig-ingnan
^ par. 5 Si Jesus nagdapit nato nga moduol kaniya. Unsay kahulogan sa pagdawat sa iyang imbitasyon? Kining artikuloha magtubag nianang pangutanaha ug magpahinumdom nato kon sa unsang paagi mapalagsik ta pinaagi sa pagbuhat kauban sa Kristo.