1-2. (a) Nganong ang Armagedon maayong balita para sa katawhan? (b) Unsang mga pangutana ang atong tubagon niining artikuloha?

ANG pipila ka tawo nagtuo nga ang “Armagedon” usa ka nukleyar nga gubat o natural nga katalagman. Pero lahi ang giingon sa Bibliya, kay sumala niini ang Armagedon maoy maayong balita nga makahatag ug kalipay! (Pin. 1:3) Ang gubat sa Armagedon dili magpuo sa katawhan kondili maghatag ug kaluwasan! Sa unsang paagi?

² Gipakita sa Bibliya nga ang gubat sa Armagedon maghatag ug kaluwasan pinaagi sa pagtapos sa pagmando sa tawo. Wagtangon niini ang mga daotan ug luwason ang mga matarong. Panalipdan sab niini ang atong planeta aron dili kini madaot. (Pin. 11:18) Aron mas masabtan nato kini, atong tubagon ang upat ka pangutana: Unsa ang Armagedon? Unsa ang mga panghitabo sa dili pa kini moabot? Sa unsang paagi maapil ta niadtong maluwas sa Armagedon? Sa unsang paagi makapabilin tang matinumanon samtang magkaduol ang Armagedon?

3. (a) Unsay gipasabot sa pulong nga “Armagedon”? (b) Base sa Pinadayag 16:14, 16, nganong makaingon ta nga ang Armagedon dili literal nga dapit?

³ Basaha ang Pinadayag 16:14, 16. Ang pulong nga “Armagedon” kausa lang makita sa Kasulatan, ug kini naggikan sa Hebreohanong pulong nga nagkahulogang “Bukid sa Megido.” (Pin. 16:16; footnote) Ang Megido maoy siyudad sa karaang Israel. (Jos. 17:11) Pero ang Armagedon wala magtumong sa bisan unsang literal nga dapit sa yuta. Sa pagkatinuod, kini nagtumong sa kahimtang diin ang “mga hari sa tibuok gipuy-ang yuta” tigomon batok kang Jehova. (Pin. 16:14) Pero niining artikuloha, gamiton sab nato ang terminong “Armagedon” sa pagtumong sa gubat nga mosunod dayon human matigom ang  mga hari sa yuta. Giunsa nato pagkahibalo nga ang Armagedon nagtumong sa usa ka simbolikong dapit? Una, walay literal nga bukid sa Megido. Ikaduha, ang luna palibot sa Megido dili igo para sa “mga hari sa tibuok gipuy-ang yuta” ug sa ilang kasundalohan ug mga hinagiban sa gubat. Ikatulo, sa ato unyang masayran niining artikuloha, ang gubat sa Armagedon magsugod dihang atakehon sa “mga hari” sa kalibotan ang katawhan sa Diyos, nga nagpuyo sa lainlaing bahin sa yuta.

4. Nganong ang pangataposan nga dakong gubat gikonektar ni Jehova sa Megido?

⁴ Nganong ang pangataposang dakong gubat gikonektar ni Jehova sa Megido? Tungod kay daghang gubat ang nahitabo sa Megido ug sa duol niini nga Walog sa Jezreel. Usahay, direktang mangilabot si Jehova sa maong mga gubat. Pananglitan, sa “daplin sa katubigan sa Megido,” gitabangan sa Diyos ang Israelinhong maghuhukom nga si Barak sa pagpildi sa Canaanhong kasundalohan nga gipangunahan sa usa ka pangulo, si Sisera. Si Barak ug ang propetang si Debora nagpasalamat kang Jehova sa ilang milagrosong kadaogan. Sila miawit: “Gikan sa langit ang mga bituon nakiggubat . . . kang Sisera. Ang bul-og sa Kison mibanlas kanila.”​—Maghu. 5:19-21.

5. Sa unsang importanteng paagi lahi ang gubat sa Armagedon sa gubat nga gisangka ni Barak?

⁵ Gitapos ni Barak ug Debora ang ilang awit niining mga pulonga: “Busa malaglag unta ang tanan nimong kaaway, Oh Jehova, apan kadtong mga nahigugma nimo mahisama unta sa adlaw nga misubang ug misidlak.” (Maghu. 5:31) Sa Armagedon, ang mga kaaway sa Diyos malaglag sab, pero kadtong nahigugma sa Diyos maluwas. Pero dunay usa ka importanteng kalainan kining duha ka gubat. Sa Armagedon, ang katawhan sa Diyos dili makig-away. Dili gani sila maghupot ug armas! Mahimo silang kusgan pinaagi sa pagpabiling kalmado ug pagsalig kang Jehova ug sa iyang langitnong kasundalohan.​—Isa. 30:15; Pin. 19:11-15.

6. Unsay puwedeng gamiton ni Jehova sa pagpildi sa iyang mga kaaway sa Armagedon?

⁶ Sa Armagedon, unsaon pagpildi sa Diyos ang iyang mga kaaway? Lagmit lainlaing paagi ang iyang gamiton. Pananglitan, mahimo niyang gamiton ang linog, ulan nga yelo, ug kilat. (Job 38:22, 23; Ezeq. 38:19-22) Puwede niyang maniobrahon nga magpinatyanay ang iyang mga kaaway. (2 Cron. 20:17, 22, 23) Ug mahimo sab niyang gamiton ang iyang mga anghel sa pagpatay sa mga daotan. (Isa. 37:36) Bisan unsa pay gamiton sa Diyos, seguradong modaog siya. Ang tanan niyang kaaway malaglag. Ug ang tanang matarong maluwas.​—Prov. 3:25, 26.

7-8. (a) Sumala sa 1 Tesalonica 5:1-6, unsang talagsaong proklamasyon ang himoon sa mga lider sa kalibotan? (b) Nganong peligroso kini nga bakak?

⁷ Ang pagproklamar ug “kalinaw ug kasegurohan” mahitabo sa dili pa ang “adlaw ni Jehova.” (Basaha ang 1 Tesalonica 5:1-6.) Sa 1 Tesalonica 5:2, ang “adlaw ni Jehova” nagtumong sa “dakong kasakitan.” (Pin. 7:14) Unsaon nato pagkahibalo nga magsugod na ang maong kasakitan? Ang Bibliya nag-ingon nga dunay talagsaon kaayong proklamasyon. Kini magsilbing ilhanan nga magsugod na ang dakong kasakitan.

⁸ Mao kana ang gitagna nga pagproklamar ug “kalinaw ug kasegurohan.” Nganong mosulti niana ang mga lider sa kalibotan? Moapil ba ang mga lider sa relihiyon? Posible. Bisan unsa pa man, nahibalo ta nga kini nga proklamasyon bakak, nga naggikan gayod sa mga demonyo. Apan peligroso kaayo kini nga bakak kay magtuo ang mga tawo nga luwas sila, pero sa pagkatinuod magsugod na ang kinagrabehang  kasakitan sa kasaysayan sa tawo. Oo, “ang kalit nga kalaglagan modangat kanila sama sa kasakit nga bation sa babayeng manganakay.” Komosta ang maunongong mga alagad ni Jehova? Lagmit makuratan sila sa kalit nga pagsugod sa adlaw ni Jehova, pero andam sila niana.

9. Kas-ahon ba ni Jehova paglaglag ang sistema ni Satanas? Ipatin-aw.

⁹ Lahi sa gihimo ni Jehova sa panahon ni Noe, dili niya kas-ahon paglaglag ang kalibotan ni Satanas. Hinunoa, iya ning laglagon sa duha ka hugna. Una, iyang laglagon ang Bantogang Babilonya, ang tibuok kalibotang imperyo sa bakak nga relihiyon. Dayon, sa Armagedon, iyang laglagon ang nahibiling bahin sa kalibotan ni Satanas, apil ang sistema niini sa politika, militar, ug negosyo. Atong hisgotag dugang kining duha ka dagkong panghitabo.

10. Sumala sa Pinadayag 17:1, 6 ug 18:24, nganong laglagon ni Jehova ang Bantogang Babilonya?

¹⁰ “Ang paghukom batok sa bantogang pampam.” (Basaha ang Pinadayag 17:1, 6; 18:24.) Gipahinabo sa Bantogang Babilonya nga daghan ang dili motahod sa ngalan sa Diyos. Nagtudlo siyag mga bakak bahin sa Diyos. Namampam siya sa espirituwal nga paagi kay nakig-alyansa siya sa mga magmamando sa yuta. Gigamit niya ang iyang gahom ug impluwensiya aron daogdaogon ug panguwartahan ang iyang mga membro. Ug daghan siyag gipabanaw nga dugo, apil ang dugo sa mga alagad sa Diyos. (Pin. 19:2) Unsaon paglaglag ni Jehova ang Bantogang Babilonya?

11. Unsa ang “hayag-pula nga pintas nga mananap,” ug unsay papel niini sa pagtuman sa Diyos sa iyang kabubut-on maylabot sa Bantogang Babilonya?

¹¹ Laglagon ni Jehova ang “bantogang pampam” pinaagi sa “10 ka sungay” sa “hayag-pula nga pintas nga mananap.” Kanang simbolikong mananap nagrepresentar sa United Nations. Ang 10 ka sungay nagrepresentar sa mga gobyerno karon nga nagsuportar niana nga organisasyon. Sa gitakdang panahon sa Diyos, ang maong mga gobyerno moatake sa Bantogang Babilonya. Ilang ‘laglagon ug huboan siya’ pinaagi sa pag-ilog sa iyang katigayonan ug pagyagyag sa iyang pagkadaotan. (Pin. 17:3, 16)  Kanang kalit nga kalaglagan​—nga daw sa usa ra ka adlaw—​makapakurat niadtong nagsuportar niya, ilabina kay pirme siyang manghambog: “Naglingkod ko ingong rayna, ug dili ko balo, ug dili gyod ko makatilawg pagbangotan.”​—Pin. 18:7, 8.

12. Unsay dili itugot ni Jehova nga buhaton sa mga nasod, ug ngano?

¹² Dili tugotan sa Diyos ang mga nasod sa paglaglag sa iyang katawhan. Sila mapasigarbohong nagdala sa iyang ngalan, ug ilang gituman ang iyang sugo sa paggula gikan sa Bantogang Babilonya. (Buh. 15:16, 17; Pin. 18:4) Nagkugi sab sila sa pagtabang sa uban sa paggula gikan sa Bantogang Babilonya. Busa ang mga alagad ni Jehova dili “makaagom sa iyang mga hampak.” Bisan pa niana, ang ilang pagtuo masulayan.

13. (a) Kinsa si Gog? (b) Sumala sa Ezequiel 38:2, 8, 9, unsay makaaghat kang Gog sa pag-atake sa katawhan sa Diyos?

¹³ Ang pag-atake ni Gog. (Basaha ang Ezequiel 38:2, 8, 9.) Human malaglag ang tanang bakak nga organisasyon sa relihiyon, ang katawhan sa Diyos magbarog nga samag nag-inusarang kahoy nga nakalahutay sa kusog nga bagyo. Siyempre, masuko pag-ayo si Satanas. Iyang ipahungaw ang iyang kasuko pinaagi sa paggamit ug demonyohanong propaganda​—“hugawng mga pahayag sa espiritu”—​nga makaaghat sa alyansa sa kanasoran sa pag-atake sa mga alagad ni Jehova. (Pin. 16:13, 14) Kana nga alyansa gitawag nga “Gog sa yuta sa Magog.” Dihang moatake ang mga nasod, magsugod na ang Armagedon.​—Pin. 16:16.

14. Unsay maamgohan ni Gog?

¹⁴ Si Gog mosalig sa iyang “bukton nga unod”​—ang iyang militaryong gahom. (2 Cron. 32:8, footnote) Kita mosalig kang Jehova nga atong Diyos​—usa ka baroganan nga isipon sa mga nasod ingong kabuangan. Kay kon buot hunahunaon, ang mga diyos sa Bantogang Babilonya, nga gamhanan kaniadto, wala gani makaluwas niya gikan sa “pintas nga mananap” ug sa “10 ka sungay” niini! (Pin. 17:16) Busa si Gog magdahom nga dali ra ta niyang pildihon. “Samag kapanganoran nga nagtabon sa yuta,” siya moatake sa katawhan ni Jehova. (Ezeq. 38:16) Pero  maamgohan unya ni Gog nga nalit-agan siya ug dili na makaikyas. Sama sa Paraon didto sa Pulang Dagat, maamgohan ni Gog nga nakig-away siya batok kang Jehova.​—Ex. 14:1-4; Ezeq. 38:3, 4, 18, 21-23.

15. Unsay himoon ni Jesus sa gubat sa Armagedon?

¹⁵ Ang Kristo ug ang iyang langitnong kasundalohan manalipod sa katawhan sa Diyos ug bug-os nga maglaglag kang Gog ug sa iyang kasundalohan. (Pin. 19:11, 14, 15) Pero komosta man ang pangunang kaaway ni Jehova, si Satanas, kansang bakak nga propaganda nag-aghat sa mga nasod sa pag-atake sa katawhan sa Diyos diha sa gubat sa Armagedon? Siya ug ang iyang mga demonyo itambog ni Jesus sa kahiladman, diin bilanggoon sila sulod sa usa ka libo ka tuig.​—Pin. 20:1-3.

16. (a) Unsaon nato pagpakita nga kita ‘nakaila sa Diyos’? (b) Nganong ang atong pagkaila kang Jehova panalangin unya panahon sa Armagedon?

¹⁶ Bag-ohan man ta o dugay na sa kamatuoran, aron maluwas sa Armagedon, kinahanglang ipakita nato nga kita ‘nakaila sa Diyos’ ug ‘nagsunod sa maayong balita bahin sa atong Ginoong Jesus.’ (2 Tes. 1:7-9) Kita ‘nakaila sa Diyos’ kon nahibalo ta sa iyang mga gusto, dili gusto, ug mga sukdanan. Ikapakita sab nato nga kita nakaila niya kon kita nahigugma ug nagsunod kaniya ug naghatag kaniya sa atong eksklusibong debosyon. (1 Juan 2:3-5; 5:3) Dihang ipakita nato nga nakaila ta sa Diyos, mabatonan nato ang pribilehiyo nga ‘mailhan niya,’ nga importante aron maluwas ta sa Armagedon! (1 Cor. 8:3) Ngano? Kay kon “nailhan” ta sa Diyos, nagpasabot kana nga iya tang giuyonan.

17. Unsay kahulogan sa ‘pagsunod sa maayong balita bahin sa atong Ginoong Jesus’?

¹⁷ Ang “maayong balita bahin sa atong Ginoong Jesus” naglakip sa tanang kamatuoran nga gitudlo ni Jesus, nga atong mabasa sa Pulong sa Diyos. Atong masunod ang maayong balita kon ato ning ipadapat. Apil sa maong pagsunod ang pag-una sa intereses sa Gingharian, pagkinabuhi subay sa matarong nga mga sukdanan sa Diyos, ug pagpahayag sa Gingharian  sa Diyos. (Mat. 6:33; 24:14) Apil sab niini ang pagsuportar sa dinihogang mga igsoon sa Kristo samtang ilang ginatuman ang ilang bug-at nga mga responsibilidad.​—Mat. 25:31-40.

18. Sa unsang paagi balosan sa dinihogang mga igsoon sa Kristo ang kaayo nga gipakita kanila?

¹⁸ Ang dinihogang mga alagad sa Diyos sa dili madugay magbalos sa kaayo nga gipakita kanila sa “ubang mga karnero.” (Juan 10:16) Sa unsang paagi? Sa dili pa magsugod ang gubat sa Armagedon, ang tanang membro sa 144,000 naa na sa langit ingong imortal nga espiritung mga persona. Unya mahimo silang bahin sa langitnong kasundalohan nga bug-os nga maglaglag kang Gog ug manalipod sa “dakong panon” sa katawhan ni Jehova. (Pin. 2:26, 27; 7:9, 10) Oo, pagkadakong pribilehiyo sa dakong panon nga nakatabang sila sa dinihogang mga alagad ni Jehova sa dinhi pa sa yuta ang mga dinihogan!

19-20. Bisan pa sa mga pagsulay, sa unsang paagi makapabilin tang matinumanon samtang nagkaduol ang Armagedon?

¹⁹ Niining malisod nga kataposang mga adlaw, daghan sa katawhan ni Jehova ang nakaagom ug mga pagsulay. Bisan pa niana, makalahutay ta nga malipayon. (Sant. 1:2-4) Ang usa ka sekreto niana mao ang pagpadayon sa kinasingkasing nga pag-ampo. (Luc. 21:36) Kinahanglang molihok sab ta uyon sa atong mga pag-ampo pinaagi sa pagtuon sa Pulong sa Diyos kada adlaw ug pagpamalandong niana, apil sa nindot nga mga tagna niana nga matuman sa dili madugay. (Sal. 77:12) Kini nga mga buluhaton, apil ang bug-os nga pagpakigbahin sa ministeryo, makatabang nga magpabiling lig-on ang atong pagtuo ug ang atong paglaom.

²⁰ Imadyina kon unsa unya ka dako ang imong kalipay dihang malaglag na ang Bantogang Babilonya ug matapos na ang Armagedon! Labaw pa niana, imadyina ang imong kalipay dihang ang ngalan sa Diyos ug ang iyang pagkasoberano bug-os nang mabindikar! (Ezeq. 38:23) Oo, ang Armagedon maayo gayong balita para niadtong nakaila sa Diyos, nagsunod sa iyang Anak, ug molahutay hangtod sa kataposan.​—Mat. 24:13.