1. Unsay kahimtang ni apostol Juan sa hinapos sa unang siglo C.E.?

SA HINAPOS sa unang siglo C.E., si apostol Juan nakasinatig lisod kaayong kahimtang. Siya tigulang na ug nabilanggo sa isla sa Patmos, ug lagmit siya na lang ang buhi nga apostol. (Pin. 1:9) Nahibalo siya nga ang mga magsusupak nagpahisalaag sa mga kongregasyon ug nagpahinabog pagkabahinbahin. Mora bag ang gamayng kalayo sa Kristiyanidad hapit nang mapalong.​—Jud. 4; Pin. 2:15, 20; 3:1, 17.

2. Sumala sa Pinadayag 7:9-14, unsang makapalipayng panan-awon ang nadawat ni Juan? (Tan-awa ang hulagway sa atubangan sa magasin.)

² Bisan pa nianang dili maayong kahimtang, si Juan nakadawat ug makapalipayng panan-awon. Niini, ang mga anghel giingnan nga pugngan ang malaglagong mga hangin sa dakong kasakitan hangtod nga mahuman ang kataposang pagselyo sa usa ka grupo sa mga ulipon. (Pin. 7:1-3) Ang maong grupo gilangkoban sa 144,000 nga magmando uban ni Jesus sa langit. (Luc. 12:32; Pin. 7:4) Dayon, naghisgot si Juan ug laing grupo. Kini dako kaayo nga siya nakaingon: “Tan-awa!”​—ekspresyon nga tingali nagpaila nga nakurat siya sa iyang nakita. Unsay nakita ni Juan? “Usa ka dakong panon, nga walay tawong makaihap, gikan sa tanang kanasoran ug tribo ug katawhan ug pinulongan, nga nagbarog atubangan sa trono ug atubangan sa Kordero.” (Basaha ang Pinadayag 7:9-14.) Hunahunaa kon unsa ka malipayon si Juan dihang nahibaloan niya nga sa umaabot daghan kaayong tawo ang mosimba sa Diyos sa hustong paagi!

3. (a) Nganong angayng makapalig-on sa atong pagtuo ang panan-awon ni Juan? (b) Unsay atong makat-onan niining artikuloha?

³ Segurado nga ang maong panan-awon nakapalig-on sa pagtuo ni Juan. Angay nga mas makapalig-on kini sa atong pagtuo  kay nagkinabuhi ta sa panahon nga nagakatuman kini nga panan-awon! Atong nakita ang pagtigom sa milyonmilyon nga naglaom nga makalabang buhi sa dakong kasakitan ug mabuhi sa yuta sa walay kataposan. Niini nga artikulo, atong makat-onan kon giunsa pagpadayag ni Jehova sa iyang katawhan kapig 80 ka tuig na ang milabay kon kinsa kining dakong panon. Atong hisgotan ang duha ka butang bahin niana nga panon: (1) kini dako kaayo ug (2) ang mga membro niini naggikan sa tibuok kalibotan. Kining mga puntoha makapalig-on sa pagtuo niadtong naglaom nga mahimong bahin nianang bulahan nga grupo.

4. Unsang kamatuoran sa Bibliya ang wala masabti sa Kakristiyanohan, ug sa unsang paagi lahi ang mga Estudyante sa Bibliya maylabot niini?

⁴ Sagad, ang Kakristiyanohan wala magtudlo sa kamatuoran sa Bibliya nga sa umaabot ang matinumanong mga tawo magpuyo sa yuta hangtod sa hangtod. (2 Cor. 4:3, 4) Karon, ang kadaghanang relihiyon sa Kakristiyanohan nagtudlo nga ang tanang maayong tawo moadto sa langit inigkamatay nila. Pero lahi ang gitudlo sa gamayng grupo sa mga Estudyante sa Bibliya nga nagpatik sa Watch Tower sukad sa 1879. Ilang nasabtan nga ipasig-uli sa Diyos ang Paraiso sa yuta ug milyonmilyon nga matinumanong mga tawo ang magpuyo dinhi sa yuta​—dili sa langit. Pero milabay pa ang panahon una nila masabti kon kinsa gyod ning matinumanong mga tawo.​—Mat. 6:10.

5. Unsay gituohan sa mga Estudyante sa Bibliya bahin sa 144,000?

⁵ Siyempre, nasabtan sab sa mga Estudyante sa Bibliya gikan sa Kasulatan nga dunay ‘paliton gikan sa yuta’ aron magmando uban ni Jesus sa langit. (Pin. 14:3) Kanang grupoha langkoban sa 144,000 ka madasigon ug maunongong mga Kristohanon nga matinumanong nag-alagad sa Diyos samtang dinhi pa sa yuta. Unsa man poy gituohan sa mga Estudyante sa Bibliya bahin sa dakong panon?

6. Unsay gituohan sa mga Estudyante sa Bibliya bahin sa dakong panon?

⁶ Sa panan-awon, nakita ni Juan ang maong grupo nga “nagbarog atubangan sa trono ug atubangan sa Kordero.” (Pin. 7:9) Base niana, ang mga Estudyante sa Bibliya naghunahuna nga, sama sa 144,000, ang dakong panon magpuyo sa langit. Kon ang 144,000 ug ang dakong panon magpuyo sa langit, unsay kalainan sa duha ka grupo? Nagtuo ang mga Estudyante sa Bibliya nga ang dakong panon langkoban sa mga Kristohanon nga dili kaayo matinumanon sa dinhi pa sila sa yuta. Bisag nagsunod sila sa moral nga mga sukdanan sa Bibliya, ang pipila kanila lagmit nagpabiling membro sa mga relihiyon sa Kakristiyanohan. Nagtuo ang mga Estudyante sa Bibliya nga ang maong grupo dunay gugma sa Diyos, pero dili igo aron magmando sila uban ni Jesus. Kay dili kaayo lig-on ang ilang gugma sa Diyos, ang dakong panon kuwalipikado nga moadto sa langit sa atubangan sa trono pero dili molingkod sa mga trono.

7. Sumala sa mga Estudyante sa Bibliya, kinsa ang magpuyo sa yuta panahon sa Milenyo, ug unsay ilang gituohan bahin sa matinumanong mga lalaki nga namatay sa wala pa ang Kristo?

⁷ Kon mao, kinsay magpuyo sa yuta? Ang mga Estudyante sa Bibliya nagtuo nga human matigom sa langit ang 144,000 ug ang dakong panon, milyonmilyong tawo ang magpuyo sa yuta aron makabenepisyo sa mga panalangin sa Milenyong Pagmando sa Kristo. Ang mga Estudyante sa Bibliya wala magtuo nga ang maong mga tawo mag-alagad kang Jehova una magsugod ang Pagmando sa Kristo. Hinunoa, gituohan nga kining grupoha tudloan sa mga paagi ni Jehova panahon sa Milenyo. Human niana, kadtong mosunod sa mga  sukdanan ni Jehova panalanginan ug kinabuhing walay kataposan sa yuta, pero kadtong mosupak pagalaglagon. Ang mga Estudyante sa Bibliya nagtuo sab nga lagmit ang pipila nga mag-alagad ingong mga “prinsipe” sa yuta nianang panahona​—apil ang gibanhaw nga matinumanong mga lalaki nga namatay sa wala pa ang Kristo—​gantihan ug kinabuhi sa langit sa kataposan sa Milenyo.​—Sal. 45:16.

8. Unsang tulo ka grupo ang gituohan kaniadto nga dunay dapit sa katuyoan sa Diyos?

⁸ Busa ang mga Estudyante sa Bibliya nagtuo nga dunay tulo ka grupo: (1) ang 144,000, kinsa magmando uban ni Jesus sa langit; (2) ang dakong panon sa dili kaayo madasigong mga Kristohanon, kinsa magbarog atubangan sa trono ni Jesus sa langit; ug (3) ang milyonmilyong tawo nga tudloan sa mga paagi ni Jehova dinhi sa yuta panahon sa Usa ka Libo ka Tuig nga Pagmando sa Kristo. * Pero sa gitakdang panahon ni Jehova, ang kahayag sa kamatuoran anam-anam nga midan-ag bahin niini nga topiko.​—Prov. 4:18.

9. (a) Sa unsang paagi ang dakong panon sa yuta makabarog “atubangan sa trono ug atubangan sa Kordero”? (b) Nganong makataronganon kini nga pagsabot sa Pinadayag 7:9?

⁹ Niadtong 1935, nahimong tin-aw kon kinsa ang dakong panon sa panan-awon ni Juan. Nasabtan na gyod sa mga Saksi ni Jehova nga ang pagbarog sa dakong panon “atubangan sa trono ug atubangan sa Kordero” dili literal nga sa langit. Himoon nila kini sa simbolikong paagi. Bisag magpuyo sa yuta, ang dakong panon makabarog “atubangan sa trono” pinaagi sa pag-ila sa awtoridad ni Jehova ug pagpasakop sa iyang pagkasoberano. (Isa. 66:1) Makabarog sila “atubangan sa Kordero” pinaagi sa pagpakitag pagtuo sa halad lukat ni Jesus. Sa susama, sa Mateo 25:31, 32, “ang tanang kanasoran”​—apil ang mga daotan—​gihisgotan nga “tigomon sa . . . atubangan” ni Jesus diha sa iyang mahimayaong trono. Klaro nga kining mga nasora nia sa yuta, wala sa langit. Makataronganon kana nga kausaban sa pagsabot. Kanay hinungdan kon nganong ang Bibliya wala mag-ingon nga ang dakong panon dad-on sa langit. Usa lang ka grupo ang gisaarag walay kataposang kinabuhi sa langit​—ang 144,000 nga “magmando ingong hari ibabaw sa yuta” uban ni Jesus.​—Pin. 5:10.

10. Nganong kinahanglang tudloan ang dakong panon sa mga paagi ni Jehova una pa ang Milenyo?

¹⁰ Busa sukad sa 1935, nasabtan sa mga Saksi ni Jehova nga ang dakong panon sa panan-awon ni Juan gilangkoban sa matinumanong mga Kristohanon nga naglaom nga mabuhi sa yuta sa walay kataposan. Aron maluwas sa dakong kasakitan, ang dakong panon kinahanglang tudloan bahin sa mga paagi ni Jehova una pa magsugod ang Milenyo. Sila kinahanglang magpakitag lig-ong pagtuo aron “makaikyas niining tanang butang nga kinahanglang mahitabo” sa dili pa ang Usa ka Libo ka Tuig nga Pagmando sa Kristo.​—Luc. 21:34-36.

11. Ngano tingaling may mga Estudyante sa Bibliya nga nagtuo nga ang pipila ka tawo moadto sa langit human sa Milenyo?

¹¹ Komosta man ang pagtuo nga ang pipila ka sulondang mga tawo sa yuta moadto sa langit human sa Milenyo? Kana nga posibilidad gisugyot katuigan kanhi sa Pebrero 15, 1913 nga isyu sa Watch Tower. Tingali dunay nangatarongan, ‘Nganong ang matinumanong mga tawo sa karaang panahon makadawat lang ug yutan-ong panulondon samtang ang mga Kristohanon nga dili kaayo matinumanon gantihan ug kinabuhi sa langit?’ Siyempre, kana nga panghunahuna  naimpluwensiyahan sa duha ka sayop nga pagtuo: (1) nga ang dakong panon magpuyo sa langit ug (2) nga ang dakong panon langkoban ug dili kaayo dasig nga mga Kristohanon.

12-13. Unsay nahibal-an sa mga dinihogan ug sa dakong panon bahin sa ilang ganti?

¹² Pero sa nahisgotan na, sukad niadtong 1935, tin-awng nasabtan sa mga Saksi ni Jehova nga ang maluwas sa Armagedon mao ang dakong panon sa panan-awon ni Juan. Sila ‘makalabang sa dakong kasakitan’ dinhi sa yuta, ug sila ‘padayong magsinggit ug kusog, nga mag-ingon: “Ang kaluwasan utang namo sa atong Diyos, nga naglingkod sa trono, ug sa Kordero.”’ (Pin. 7:10, 14) Dugang pa, ang Kasulatan nagtudlo nga kadtong banhawon ngadto sa langitnong kinabuhi “mas maayo” ug paglaom kay niadtong matinumanong mga tawo sa karaang panahon. (Heb. 11:40) Tungod niana, ang atong mga igsoon madasigong nagsugod sa pagdapit sa mga tawo sa pag-alagad kang Jehova uban ang paglaom nga mabuhi sa yuta sa walay kataposan.

¹³ Kadtong sakop sa dakong panon nalipay kaayo sa ilang paglaom. Nasabtan nila nga si Jehova ang magpili kon asa mag-alagad niya ang iyang matinumanong mga magsisimba, sa langit ba o sa yuta. Ang mga dinihogan ug ang dakong panon nahibalo nga ang ilang ganti naposible lang tungod sa dili hitupngang pagkamaayo ni Jehova pinaagi sa halad lukat ni Jesu-Kristo.​—Roma 3:24.

14. Human sa 1935, nganong daghan ang naghunahuna kon sa unsang paagi matuman ang tagna bahin sa dakong panon?

¹⁴ Human maklaro ang pagsabot sa katawhan ni Jehova niadtong 1935, daghan gihapon ang naghunahuna kon sa unsang paagi kadtong dunay yutan-ong paglaom mahimong dako nga panon. Pananglitan, si Ronald Parkin 12 anyos dihang naklaro kon kinsa ang dakong panon. Siya miingon: “Nianang panahona, dihay mga 56,000 ka magmamantala sa tibuok kalibotan ug daghan o lagmit kadaghanan kanila, mga dinihogan. Busa ang dakong panon morag dili kaayo dako.”

15. Sa unsang paagi nagpadayon ang pagtigom sa dakong panon?

¹⁵ Pero sa misunod nga mga dekada, dihay gipadala nga mga misyonaryo sa daghang nasod, ug ang mga Saksi ni Jehova padayong midaghan. Unya, pagka-1968, gisugdan ang programa sa pagtuon sa Bibliya gamit ang librong Ang Kamatuoran nga Motultol sa Kinabuhing Dayon. Ang simpleng eksplinasyon niini sa kamatuoran sa Bibliya nakadani sa mas daghan pang maaghop nga mga tawo. Sulod lang sa upat ka tuig, kapig tunga sa milyon ang nabawtismohan. Dihang  ang impluwensiya sa relihiyong Katoliko nagkahuyang sa Latin America ug sa ubang nasod ug gitugot na ang atong buluhaton sa Eastern Europe ug sa pipila ka dapit sa Africa, milyonmilyon pa ang nabawtismohan. (Isa. 60:22) Sa di pa dugayng katuigan, ang organisasyon ni Jehova naghimog daghang epektibong galamiton sa pagtabang sa mga tawo nga makakat-on bahin sa Bibliya. Walay duhaduha nga usa ka dakong panon​—nga karon kapin nag walo ka milyon—​ang ginatigom.

16. Asa maggikan ang tigomon nga dakong panon?

¹⁶ Dihang gisulat ni Juan ang iyang panan-awon, miingon siya nga ang dakong panon maggikan sa “tanang kanasoran ug tribo ug katawhan ug pinulongan.” Si propetang Zacarias daan nang nagtagna ug susama niana. Siya misulat: “Nianang panahona 10 ka tawo gikan sa tanang pinulongan sa mga nasod ang mogunit pag-ayo sa sinina sa usa ka Hudiyo, ug moingon: ‘Gusto ming mouban ninyo, kay nakadungog mi nga ang Diyos nagauban kaninyo.’”​—Zac. 8:23.

17. Unsay ginahimo aron tabangan ang mga tawo sa tanang nasod ug pinulongan?

¹⁷ Naamgohan sa mga Saksi ni Jehova nga aron matigom ang mga tawo gikan sa tanang pinulongan, ang maayong balita kinahanglang  isangyaw sa daghang pinulongan. Kita naghubad nag mga publikasyon para sa pagtuon sa Bibliya sa kapig 130 ka tuig, pero karon atong ginahimo ang kinadak-ang buluhaton sa paghubad sukad, nga miabot nag gatosan ka pinulongan. Klaro nga si Jehova naghimog milagro sa atong panahon​—ang pagtigom sa dakong panon gikan sa tanang kanasoran. Tungod kay mabatonan na ang espirituwal nga pagkaon sa nagkadaghang pinulongan, kini nga grupo nagkahiusa sa pagsimba kang Jehova, bisag naggikan sila sa lainlaing dapit sa kalibotan. Ug ang mga Saksi nailhan sa ilang kadasig sa pagsangyaw ug sa ilang inigsoong gugma. Makapadasig kaayo kana!​—Mat. 24:14; Juan 13:35.

18. (a) Nahiuyon sa Isaias 46:10, 11, nganong wala ta matingala nga gituman ni Jehova ang tagna bahin sa dakong panon? (b) Nganong kadtong naglaom nga mabuhi sa yuta wala mobating hinikawan?

¹⁸ Eksayted kaayo ta sa tagna bahin sa dakong panon! Wala ta matingala nga gituman ni Jehova kanang tagnaa sa kahibulongang paagi. (Basaha ang Isaias 46:10, 11.) Kadtong sakop sa dakong panon mapasalamaton sa paglaom nga gihatag ni Jehova kanila. Wala sila mobating hinikawan bisag wala sila dihogi sa espiritu sa Diyos sa pag-alagad uban kang Jesus sa langit. Sa tibuok Kasulatan, atong mabasa ang matinumanong mga lalaki ug babaye nga gigiyahan sa balaang espiritu; pero dili sila apil sa 144,000. Usa kanila mao si Juan nga Tigbawtismo. (Mat. 11:11) Ang lain pa mao si David. (Buh. 2:34) Sila ug ang daghang uban pa banhawon aron mabuhi sa paraisong yuta. Silang tanan​—apil ang dakong panon—​duna unyay kahigayonan sa pagpakita sa ilang pagkamaunongon kang Jehova ug sa iyang pagkasoberano.

19. Kon nasabtan nato ang kahulogan sa panan-awon ni Juan bahin sa dakong panon, unsay atong himoon?

¹⁹ Karon pa lang nahitabo sa kasaysayan nga gihiusa sa Diyos ang milyonmilyong tawo gikan sa tanang kanasoran. Sa langit man o sa yuta ang atong paglaom, kinahanglang tabangan nato ang pinakadaghan nga atong maarangan nga mahimong bahin sa dakong panon sa “ubang mga karnero.” (Juan 10:16) Sa dili madugay, ipahinabo na ni Jehova ang gitagna nga dakong kasakitan nga maglaglag sa mga gobyerno ug relihiyon nga grabeng nagpaantos sa mga tawo. Pagkatalagsaon unya sa pribilehiyo niadtong sakop sa dakong panon​—ang pag-alagad kang Jehova sa yuta hangtod sa hangtod!​—Pin. 7:14.