TUN-ANANG ARTIKULO 35
Gipabilhan ni Jehova ang Iyang Mapainubsanon nga mga Alagad
“Gihatagan [ni Jehova ug] pagtagad ang mapainubsanon.”—SAL. 138:6.
AWIT 48 Nagalakaw Uban ni Jehova
SUMARYO *
1. Unsay pagbati ni Jehova sa mga mapainubsanon? Ipatin-aw.
SI Jehova nahigugma sa mga mapainubsanon. Kadto lang tinuod nga mapainubsanon ang puwedeng makabaton ug suod, personal nga relasyon kaniya. Sa laing bahin, “halayo [si Jehova] sa mapahitas-on.” (Sal. 138:6) Gusto natong tanan nga mapalipay si Jehova ug matagamtam ang iyang mainitong gugma. Busa may maayo tang mga rason nga ugmaron ang pagkamapainubsanon.
2. Unsay atong hisgotan niining artikuloha?
2 Niining artikuloha, atong tubagon ang tulo ka pangutana: (1) Unsa ang pagkamapainubsanon? (2) Nganong angay natong ugmaron kanang hiyasa? (3) Unsang mga situwasyon ang makasulay sa atong pagkamapainubsanon? Sa ato unyang masayran, dihang ugmaron nato ang pagkamapainubsanon, mapalipay nato ang kasingkasing ni Jehova ug makabenepisyo ta.—Prov. 27:11; Isa. 48:17.
UNSA ANG PAGKAMAPAINUBSANON?
3. Unsa ang pagkamapainubsanon?
3 Ang tawong mapainubsanon dili maghunahuna nga mas importante siya sa uban, ug dili siya hambogiro. Gipakita sa Bibliya nga ang tawong mapainubsanon may hustong panglantaw sa iyang relasyon kang Jehova nga Diyos ug sa iyang isigkatawo. Giila niya nga ang matag usa mas labaw kaniya sa pipila ka paagi.—Filip. 2:3, 4.
4-5. Nganong makaingon ta nga ang tinuod nga pagkamapainubsanon dili lang kanang makita sa panggawas?
4 Ang pipila mapainubsanon lang tan-awon. Tingali maulawon Luc. 6:45.
sila o hilomon. O kaha matinahoron sila tungod sa ilang kultura ug sa pagpadako kanila. Pero tingali sa tinuoray, hambogiro kaayo sila. Sa madugay o sa madali, madayag kon unsa gyod sila.—5 Sa laing bahin, may mga tawo nga kon tan-awon may kompiyansa sa kaugalingon o prangka pero dili diay hambogiro. (Juan 1:46, 47) Pero kadtong ingon nianag personalidad angayng magbantay nga dili mosalig sa kaugalingong katakos. Bisan unsa may atong personalidad, kitang tanan angayng maningkamot nga maugmad ang pagkamapainubsanon.
Si apostol Pablo mapainubsanon ug wala maghunahuna nga importante siya (Tan-awa ang parapo 6) *
6. Sumala sa 1 Corinto 15:10, unsay atong makat-onan kang apostol Pablo?
6 Tagda ang ehemplo ni apostol Pablo. Gigamit siya pag-ayo ni Jehova sa pagtukod ug bag-ong mga kongregasyon sa lainlaing siyudad. Posible nga mas daghan siyag nahimo diha sa ministeryo kay sa ubang apostoles ni Jesu-Kristo. Bisan pa niana, wala siya maghunahuna nga labaw siya sa mga igsoon. Mapainubsanon siyang miingon: “Ako ang labing ubos sa mga apostoles, ug dili ko angayng tawgon nga apostol, kay gilutos nako ang kongregasyon sa Diyos.” (1 Cor. 15:9) Dayon, siya miingon nga nabatonan niya ang maayong baroganan atubangan kang Jehova, dili tungod sa iyang mga hiyas o buhat, kondili sa dili hitupngang pagkamaayo sa Diyos. (Basaha ang 1 Corinto 15:10.) Nagpakita gyod si Pablo ug maayong ehemplo sa pagkamapainubsanon diha sa iyang sulat sa mga taga-Corinto—ilabina kon atong hinumdoman nga dihay pipila ka lalaki sa kongregasyon nga nagtinguhang pamatud-an ang ilang kaugalingon nga labaw kang Pablo.—2 Cor. 10:10.
Si Karl F. Klein, usa ka mapainubsanong brader nga membro kaniadto sa Nagamandong Lawas (Tan-awa ang parapo 7)
7. Sa unsang paagi nagpakitag pagkamapainubsanon ang pipila ka iladong igsoon sa modernong panahon? Paghatag ug pananglitan.
7 Daghan sa mga alagad ni Jehova ang nadasig sa sugilanon sa kinabuhi ni Brader Karl *
F. Klein, kinsa membro kaniadto sa Nagamandong Lawas. Sa iyang sugilanon, mapainubsanong gisulti ni Brader Klein ang mga kahuyangan ug problema nga iyang gipakigbisogan sulod sa katuigan. Pananglitan, niadtong 1922, misangyaw siya sa unang higayon sa balay ug balay. Nalisdan siya pag-ayo mao nga wala na siya mosangyaw pag-usab sulod sa mga duha ka tuig. Sa ulahi, samtang nag-alagad sa Bethel, taudtaod siyang naghambin ug kasuko sa usa ka brader nga mitambag niya. Dugang pa, nakaagom siyag nervous breakdown, pero naulian ra siya sa ulahi. Bisan pa niana, daghan siyag talagsaong pribilehiyo. Mapainubsanon gyod siya kay bisag ilado siya, giangkon niya ang iyang mga kahuyangan! Daghang igsoon ang mahinumdom kang Brader Klein ug sa iyang matinud-anon ug makapatandog nga sugilanon sa kinabuhi.NGANONG ANGAY NATONG UGMARON ANG PAGKAMAPAINUBSANON?
8. Sa unsang paagi ang 1 Pedro 5:6 makatabang nato nga masabtan nga ang pagkamapainubsanon makapalipay kang Jehova?
8 Kini ang labing importanteng rason kon nganong ugmaron nato ang pagkamapainubsanon—makapalipay ni kang Jehova. Giklaro kini ni apostol Pedro. (Basaha ang 1 Pedro 5:6.) Ingong komento sa giingon ni Pedro, ang librong “Umari Ka, Mahimong Akong Sumusunod” nag-ingon: “Ang pagkamapahitas-on nahisamag hilo. Mahimong daotan kaayo ang epekto niini. Kini maoy hiyas nga makahimo sa abilidaran kaayong tawo nga walay-kapuslanan alang sa Diyos. Sa laing bahin, ang pagkamapainubsanon makahimo bisan sa labing ubos nga tawo nga mapuslanon kaayo kang Jehova. . . . [Siya] . . . malipay sa pagganti kanimo tungod sa imong pagkamapainubsanon.” * Oo, ang labing maayo nga atong mahimo mao ang paglipay sa kasingkasing ni Jehova.—Prov. 23:15.
9. Nganong gustong makigsuod nato ang uban kon mapainubsanon ta?
9 Gawas nga mapalipay nato si Jehova, makadawat tag daghang benepisyo kon ugmaron nato ang pagkamapainubsanon. Kon mapainubsanon ta, ganahang makigsuod nato ang uban. Aron masabtan kon ngano, ibutang ang imong kaugalingon sa kahimtang sa uban. (Mat. 7:12) Sagad dili ta ganahang makig-uban sa mga tawo nga pirmeng moinsistir sa ilang gusto ug dili modawat ug mga sugyot sa uban. Pero malipay tang makig-uban sa atong mga igsoon dihang sila magpakitag “simpatiya, inigsoong pagmahal, kaluoy, ug pagkamapainubsanon.” (1 Ped. 3:8) Kon ganahan ta sa maong mga tawo, lagmit ganahan pod sila nato—basta mapainubsanon ta.
10. Nganong ang pagkamapainubsanon mas makapasayon sa atong kinabuhi?
10 Ang pagkamapainubsanon mas makapasayon sab sa atong kinabuhi. Sa tinuoray lang, makakita o makasinati tingali tag mga butang nga morag dili husto o makataronganon. Ang maalamong hari nga si Solomon miingon: “Nakakita kog mga sulugoon nga nagsakayg kabayo apan ang mga prinsipe nagbaktas samag mga sulugoon.” (Eccl. 10:7) Usahay ang mga tawong abilidaran kaayo dili makadawat ug pasidungog. Ug kadtong dili ra kaayo abilidaran maoy makadawat usahay ug mas dakong pasidungog. Bisan pa niana, si Solomon nag-ingon nga mas maayong dawaton na lang ang kamatuoran imbes magsigeg kaguol sa negatibong mga kahimtang. (Eccl. 6:9) Kon mapainubsanon ta, mas sayon natong dawaton ang maong kahimtang bisag dili pa nato ni gusto.
UNSANG MGA SITUWASYON ANG MAKASULAY SA ATONG PAGKAMAPAINUBSANON?
Sa unsang paagi ang mga situwasyon nga sama niini makasulay sa atong pagkamapainubsanon? (Tan-awa ang parapo 11-12) *
11. Unsay angay natong reaksiyon kon tambagan ta?
11 Kada adlaw, daghan tag kahigayonan sa pagpakitag pagkamapainubsanon. Niay pipila ka pananglitan. Dihang tambagan ta. Maayong hinumdoman nato nga kon dunay motambag nato, lagmit mas bug-at ang atong kasaypanan kay sa atong gihunahuna. Nianang mga panahona, ang una tingali natong reaksiyon mao ang pagsalikway sa tambag. Tingali sawayon nato ang naghatag niana o ang paagi sa pagtambag. Pero kon mapainubsanon ta, maningkamot ta sa pagpakita sa hustong panghunahuna.
12. Sumala sa Proverbio 27:5, 6, nganong angay tang magmapasalamaton niadtong motambag nato? Iilustrar.
12 Ang tawong mapainubsanon mapasalamaton sa tambag. Sa pag-ilustrar: Imadyina nga naa ka sa tigom. Human makig-estorya sa pipila ka igsoon, ang usa kanila misulti nimo sa pribado nga naa kay kiki. Seguradong maulaw ka. Pero dili ba mapasalamaton ka nga gisultian ka niya? Sa pagkatinuod, maghunahuna ka nga maayo untag may nakasulti dayon nimo! Sa susama, angay tang magmapainubsanon ug magmapasalamaton sa igsoon nga may kaisog sa paghatag ug tambag dihang gikinahanglan nato kini. Isipon nato ang maong igsoon ingong atong higala, dili kaaway.—Basaha ang Proverbio 27:5, 6; Gal. 4:16.
Nganong gikinahanglan ang pagkamapainubsanon dihang ang uban makadawat ug pribilehiyo? (Tan-awa ang parapo 13-14) *
13. Sa unsang paagi makapakita tag pagkamapainubsanon dihang ang uban makadawat ug pribilehiyo?
13 Dihang makadawat ang uban ug pribilehiyo. “Dihang makita nako nga makadawat ug 1 Tim. 3:1) Pero angay natong bantayan ang atong hunahuna. Kon dili ta mag-amping, mahimong moturok ang garbo sa atong kasingkasing. Pananglitan, ang usa ka brader mahimong maghunahuna nga siya ang labing kuwalipikado sa usa ka asaynment. O ang usa ka asawa maghunahuna tingali, ‘Mas kuwalipikado man ang akong bana kay nianang bradera!’ Pero kon tinuod ta nga mapainubsanon, dili ta maghunahunag ingon niana.
pribilehiyo ang uban, usahay maghunahuna ko kon nganong dili ako ang gipili,” miadmitir ang usa ka ansiyano nga ginganlag Jason. Mobati ba sab ka usahay ug ingon niana? Dili sayop nga “mangab-ot” ug dugang nga pribilehiyo sa pag-alagad. (14. Unsay atong makat-onan sa reaksiyon ni Moises dihang ang uban nakadawat ug pribilehiyo?
14 Makakat-on ta sa reaksiyon ni Moises dihang ang uban nakadawat ug pribilehiyo. Giapresyar ni Moises ang iyang asaynment sa pagpanguna sa nasod sa Israel. Unsay reaksiyon ni Moises dihang gitugotan ni Jehova ang uban sa pag-alagad uban kaniya? Wala siya masina. (Num. 11:24-29) Kon bahin sa paghukom sa katawhan, mapainubsanon niyang gitugotan ang uban nga motabang niya. (Ex. 18:13-24) Tungod niini, mas daghan na ang makatabang kang Moises sa pag-atiman sa mga kaso sa mga Israelinhon. Nagpakita ni nga mas giuna ni Moises ang kaayohan sa uban kay sa iyang mga pribilehiyo. Maayo gyod ni nga ehemplo para kanato! Atong hinumdoman nga aron mahimo tang mapuslanon kang Jehova, mas importante ang pagkamapainubsanon kay sa atong abilidad. Bisag “si Jehova hataas, gihatagan niyag pagtagad ang mapainubsanon.”—Sal. 138:6.
15. Unsang kausaban sa sirkumstansiya ang nasinati sa daghan?
15 Dihang may kausaban sa atong sirkumstansiya. Sa di pa dugayng katuigan, daghang dugay na sa pag-alagad ang nakadawat ug kausaban sa asaynment. Pananglitan niadtong 2014, ang mga tigdumala sa distrito ug ilang asawa
gidapit nga moalagad sa laing matang sa bug-os panahong pag-alagad. Sugod gihapon nianang tuiga, ang mga tigdumala sa sirkito dili na makapadayon sa ilang asaynment inig-edad nilag 70. Ug ang mga brader nga 80 anyos pataas dili na makaalagad ingong koordinetor sa mga ansiyano. Dugang pa, sa milabayng pipila ka tuig, daghan sa pamilyang Bethel ang nareasayn sa field. Ang uban kinahanglang moundang sa espesyal nga bug-os panahong pag-alagad tungod sa dili maayong panglawas, obligasyon sa pamilya, o ubang rason.16. Sa unsang paagi ang atong mga igsoon nagpakitag pagkamapainubsanon sa pagdawat sa ilang bag-ong asaynment?
16 Ang maong mga kausaban dili sayon para niini nga mga igsoon. Dayag nga gimahal nila pag-ayo ang ilang kanhing asaynment, nga sagad nabatonan nila sa daghang katuigan. Ang pipila naguol pag-ayo samtang nag-adyas sa ilang bag-ong kahimtang. Pero sa ngadtongadto, nakaadyas ra sila. Ang pangunang nakatabang nila mao ang ilang gugma kang Jehova. Nahibalo sila nga sila nagpahinungod sa Diyos—dili sa trabaho, titulo, o asaynment. (Col. 3:23) Nalipay sila nga makapadayon sa pag-alagad kang Jehova nga mapainubsanon sa bisan unsang asaynment. Ilang ‘gitugyan kaniya ang tanan nilang kabalaka,’ kay nahibalo sila nga gimahal niya sila.—1 Ped. 5:6, 7.
17. Nganong mapasalamaton ta nga ang Pulong sa Diyos nagdasig kanato nga magmapainubsanon?
17 Dili ba mapasalamaton ta nga ang Pulong sa Diyos nagdasig kanato nga magmapainubsanon? Dihang ugmaron nato kining nindot nga hiyas, makabenepisyo ta ug ang uban. Mas malahutay nato ang mga problema. Labaw sa tanan, mas masuod ta sa atong langitnong Amahan. Malipay kaayo ta sa pagkahibalo nga bisag siya ang “Usa nga Hataas ug Halangdon,” iyang gimahal ug gipabilhan ang iyang mapainubsanong mga alagad!—Isa. 57:15.
AWIT 45 Ang Akong mga Gipamalandong
^ par. 5 Ang pagkamapainubsanon maoy usa sa labing importanteng mga hiyas nga kinahanglan natong ugmaron. Unsa ang pagkamapainubsanon? Nganong angay nato ning ugmaron? Ug sa unsang paagi ang mga kausaban sa sirkumstansiya makasulay sa atong pagkamapainubsanon? Hisgotan niining artikuloha ang maong importanteng mga pangutana.
^ par. 7 Tan-awa ang artikulong “Jehovah Has Dealt Rewardingly With Me” sa Oktubre 1, 1984 nga Watchtower.
^ par. 8 Tan-awa ang kap. 3, par. 23.
^ par. 53 HULAGWAY: Samtang diha sa balay sa usa ka igsoon, si apostol Pablo mapainubsanong nakig-uban sa mga igsoon, apil sa mga bata.
^ par. 57 HULAGWAY: Usa ka brader midawat ug binase sa Bibliya nga tambag gikan sa batabata nga brader.
^ par. 59 HULAGWAY: Ang tigulang nga brader wala masina sa batabatang brader nga may pribilehiyo sa kongregasyon.