TUN-ANANG ARTIKULO 37
Kinabubut-ong Magpasakop Kang Jehova—Ngano ug Sa Unsang Paagi?
“Dili ba mas magpasakop ta sa atong espirituwal nga Amahan?”—HEB. 12:9.
AWIT 9 Si Jehova ang Atong Hari!
SUMARYO *
1. Nganong angay tang magpasakop kang Jehova?
ANGAY tang magpasakop * kang Jehova kay siya ang atong Maglalalang. Ingong Maglalalang, duna siyay katungod sa pagtakdag mga sukdanan para sa iyang mga linalang. (Pin. 4:11) Pero duna pay maayong rason nga mosunod ta niya—ang iyang paagi sa pagmando mao ang kinamaayohan. Sa tibuok kasaysayan, daghang tawhanong magmamando ang nakabatog gahom ug awtoridad. Kon itandi kanila, si Jehova ang labing maalamon, mahigugmaon, maluluy-on, ug mabinationg Magmamando sa tanan.—Ex. 34:6; Roma 16:27; 1 Juan 4:8.
2. Unsang mga rason ang gihatag kanato sa Hebreohanon 12:9-11 aron magpasakop kang Jehova?
2 Gusto ni Jehova nga mosunod ta niya kay ato siyang gihigugma ug giisip ingong mahigugmaong Amahan, dili lang kay nahadlok tang masuko siya nato. Sa sulat ni Pablo sa mga Hebreohanon, iyang gipatin-aw nga angay tang ‘magpasakop sa atong Amahan’ kay ginabansay ta niya “para sa atong kaayohan.”—Basaha ang Hebreohanon 12:9-11.
3. (a) Unsaon nato pagpakita nga nagpasakop ta kang Jehova? (b) Unsang mga pangutana ang atong tubagon?
3 Nagpasakop ta kang Jehova pinaagi sa paghimo sa atong kinamaayohan sa pagsunod kaniya sa tanang butang ug pinaagi sa pagsukol sa tendensiya nga mosalig sa atong kaugalingong Prov. 3:5) Mas sayon para nato ang pagsunod kang Jehova kon mahibalo tag dugang sa iyang nindot nga mga hiyas. Ngano? Tungod kay kini nga mga hiyas makita sa tanan niyang ginahimo. (Sal. 145:9) Samtang magkalawom ang atong kahibalo kang Jehova, magkadako sab ang atong gugma kaniya. Ug kon gihigugma nato si Jehova, dili ta magkinahanglan ug daghang balaod nga mosulti nato kon unsay himoon ug dili himoon. Maningkamot ta nga ipahiuyon ang atong hunahuna ug emosyon sa kon unsay maayo ug likayan ang daotan. (Sal. 97:10) Pero usahay, dili sayon ang pagsunod kang Jehova. Ngano? Ug unsay makat-onan sa mga ansiyano, amahan, ug inahan gikan sa ehemplo ni Gobernador Nehemias; Haring David; ug Maria, nga inahan ni Jesus? Tubagon niining artikuloha kanang mga pangutanaha.
pagsabot. (NGANONG LISOD USAHAY ANG PAGPASAKOP KANG JEHOVA?
4-5. Sumala sa Roma 7:21-23, nganong lisod usahay ang pagpasakop kang Jehova?
4 Ang usa ka rason nga malisdan tingali ta sa pagpasakop kang Jehova mao ang atong napanunod nga sala ug pagkadili-hingpit. Busa naa tay tendensiya nga dili mosunod sa Diyos. Human morebelde si Adan ug Eva sa Diyos ug mokaon sa gidiling bunga, sila nagtakdag kaugalingong mga sukdanan. (Gen. 3:22) Karon, kadaghanan sa mga tawo wala sab moila kang Jehova ug silay nagbuot kon unsay husto ug sayop.
5 Bisan kadtong nakaila ug nahigugma kang Jehova maglisod usahay sa pagpasakop kaniya. Si apostol Pablo nakaeksperyensiya niana. (Basaha ang Roma 7:21-23.) Sama kang Pablo, gusto natong buhaton kon unsay husto sa panglantaw ni Jehova. Pero angay natong suklan kanunay ang tendensiya sa paghimo ug daotan.
6-7. Unsa ang laing rason nga maglisod ta usahay sa pagpasakop kang Jehova? Paghatag ug pananglitan.
6 Ang laing rason kon nganong lisod usahay ang pagpasakop kang Jehova mao ang impluwensiya sa kultura nga atong gidak-an. Daghang ideya sa mga tawo ang supak sa kabubut-on ni Jehova, busa kinahanglan nga padayon tang maningkamot sa pagsalikway sa maong mga panghunahuna. Tagda ang usa ka pananglitan.
7 Komon sa daghang lugar nga presyuron ang mga batan-on sa pagpangitag daghang kuwarta. Naeksperyensiyahan nâ sa sister nga si Mary. * Sa wala pa siya makakat-on bahin kang Jehova, nag-eskuwela siya sa usa sa kinamaayohang mga eskuwelahan sa ilang nasod. Gipresyur siya sa iyang pamilya nga mangitag trabaho nga dakog suweldo aron tahoron sa uban. Kana pod ang iyang gusto. Pero dihang nakakat-on siya bahin kang Jehova ug sa paghigugma Kaniya, giusab niya ang iyang mga tumong. Bisan pa niana, siya miingon: “Usahay makakita kog maayong mga oportunidad sa negosyo diin mokita kog dako pero mababagan ang akong espirituwal nga rutina. Tungod sa paagi sa pagpadako kanako, maglisod gihapon ko sa pagbalibad niana. Kinahanglan kong mohangyo kang Jehova nga tabangan ko sa pagsukol sa tentasyon sa pagdawat ug trabaho nga makababag sa akong pag-alagad kaniya.”—Mat. 6:24.
8. Unsay atong hisgotan karon?
8 Ang pagpasakop kang Jehova makahatag natog kaayohan. Pero kadtong dunay awtoridad, sama sa mga ansiyano, amahan, ug inahan, may dugang rason sa pagsunod sa giya sa Diyos; duna silay kahigayonan sa pagtabang sa uban. Atong hisgotan ang pipila ka pananglitan sa Bibliya nga nagtudlo nato kon unsaon paggamit ang awtoridad sa paagi nga makapalipay kang Jehova.
KON UNSAY MAKAT-ONAN SA MGA ANSIYANO KANG NEHEMIAS
Ang mga ansiyano motabang sa mga trabahoon diha sa Kingdom Hall, sama nga si Nehemias mitabang sa pagtukod pag-usab sa Jerusalem (Tan-awa ang parapo 9-11) *
9. Unsang mga kalisdanan ang giatubang ni Nehemias?
9 Si Jehova naghatag sa mga ansiyano ug importanteng responsibilidad sa pag-atiman sa iyang katawhan. (1 Ped. 5:2) Ang mga ansiyano daghag makat-onan sa paagi ni Nehemias sa pagtratar sa katawhan ni Jehova. Ingong gobernador sa Juda, si Nehemias dakog awtoridad. (Neh. 1:11; 2:7, 8; 5:14) Hunahunaa ang pipila sa mga kalisdanan nga giatubang ni Nehemias. Iyang nahibaloan nga gihugawan sa mga tawo ang templo ug wala na sila maghatag ug pinansiyal nga tabang sa mga Levihanon sumala sa gitakda sa Balaod. Gilapas sa mga Hudiyo ang balaod sa Igpapahulay, ug dihay mga lalaki nga nangasawag mga langyaw. Kinahanglan nga may himoon si Gobernador Nehemias maylabot nianang lisod nga situwasyon.—Neh. 13:4-30.
10. Giunsa pag-atubang ni Nehemias ang iyang mga kalisdanan?
10 Wala gamita ni Nehemias ang iyang awtoridad aron pugson ang katawhan sa Diyos sa pagsunod sa iyang kaugalingong mga sukdanan. Hinunoa, kinasingkasing siyang nag-ampo kang Jehova nga giyahan siya, ug gitudloan niya ang katawhan sa Balaod ni Jehova. (Neh. 1:4-10; 13:1-3) Si Nehemias mapainubsanong nagtrabaho uban sa katawhan, nga mitabang pa gani kanila sa pagtukod pag-usab sa paril sa Jerusalem.—Neh. 4:15.
11. Sumala sa 1 Tesalonica 2:7, 8, unsay angayng pagtratar sa mga ansiyano niadtong naa sa kongregasyon?
11 Tingali ang mga ansiyano dili makaatubang sa mga problema nga naeksperyensiyahan ni Nehemias, pero puwede nila siyang sundogon sa daghang paagi. Pananglitan, magkugi sila para sa kaayohan sa mga igsoon. Ug dili nila tugotan nga mahimo silang garboso tungod sa ilang awtoridad. Ila hinuong panggaon ang kongregasyon. (Basaha ang 1 Tesalonica 2:7, 8.) Tungod sa ilang lawom nga gugma ug pagkamapainubsanon, lumo silang makig-estorya sa uban. Si Andrew, nga dugay nang ansiyano, miingon: “Nakita nako nga matandog ang mga igsoon kon ang ansiyano buotan ug mahigalaon. Kini nga mga hiyas magpalihok sa mga igsoon nga mokooperar sa mga ansiyano.” Si Tony, nga dugay na pong ansiyano, miingon: “Naningkamot ko sa pagpadapat sa tambag sa Filipos 2:3, nga isipon ang uban nga labaw kanako. Kini nakatabang nga dili ko mahimong morag diktador.”
12. Nganong importante nga magmapainubsanon ang mga ansiyano?
12 Ang mga ansiyano kinahanglang magmapainubsanon, sama nga si Jehova mapainubsanon. Bisag si Jehova ang Soberano sa uniberso, siya “moyuko” aron bangonon “ang timawa gikan sa abog.” (Sal. 18:35; 113:6, 7) Gani, gidumtan ni Jehova ang mga garboso ug hambogiro.—Prov. 16:5.
13. Nganong ang ansiyano kinahanglang “magkontrolar sa iyang dila”?
13 Ang ansiyano nga nagpasakop kang Jehova kinahanglang “magkontrolar sa iyang dila.” Kay kon dili, basin mosulti siyag sakit kon dunay dili motahod niya. (Sant. 1:26; Gal. 5:14, 15) Si Andrew, nga gihisgotan ganina, miingon: “Usahay, gusto nakong sultihag sakit ang igsoon nga morag way tahod nako. Pero gipamalandong nako ang ehemplo sa matinumanong mga lalaki sa Bibliya, ug kana nakatabang nako nga makita ang kaimportante sa pagkamapainubsanon ug kalumo.” Ikapakita sa mga ansiyano nga nagpasakop sila kang Jehova pinaagi sa mahigugmaon ug malumong pagpakigsulti sa mga igsoon sa kongregasyon, apil sa ilang kaubang mga ansiyano.—Col. 4:6.
KON UNSAY MAKAT-ONAN SA MGA AMAHAN KANG HARING DAVID
14. Unsang papel ang gihatag ni Jehova sa mga amahan, ug unsay iyang gidahom kanila?
14 Gitudlo ni Jehova ang amahan ingong ulo sa pamilya, ug gidahom sa Diyos nga bansayon ug disiplinahon niya ang iyang pamilya. (1 Cor. 11:3; Efe. 6:4) Pero may limitasyon ang awtoridad sa amahan—kinahanglan siyang manubag kang Jehova, ang usa nga naglalang sa pamilya. (Efe. 3:14, 15) Ikapakita sa mga amahan nga sila nagpasakop kang Jehova pinaagi sa paggamit sa ilang awtoridad sa paagi nga makapalipay sa Diyos. Daghan silag makat-onan sa kinabuhi ni Haring David.
Ang paagi sa pag-ampo sa amahan angayng magpakita nga siya mapainubsanon (Tan-awa ang parapo 15-16) *
15. Nganong maayong ehemplo si Haring David para sa mga amahan?
15 Gitudlo ni Jehova si David ingong ulo, dili lang sa iyang pamilya, kondili sa tibuok nasod sa Israel. Ingong hari, dakog gahom si David. Usahay, dili husto ang paggamit niya sa iyang gahom ug nakahimo siyag grabeng mga sayop. (2 Sam. 11:14, 15) Pero gipakita niya nga nagpasakop siya kang Jehova pinaagi sa pagdawat ug disiplina. Gibubo niya ang iyang kasingkasing kang Jehova sa pag-ampo. Ug naningkamot siya sa pagsunod sa tambag ni Jehova. (Sal. 51:1-4) Dugang pa, mapainubsanon siyang midawat ug maayong tambag dili lang gikan sa mga lalaki kondili sa mga babaye usab. (1 Sam. 19:11, 12; 25:32, 33) Si David nakakat-on sa iyang mga sayop ug gipokus niya ang iyang kinabuhi sa pag-alagad kang Jehova.
16. Unsang mga leksiyon ang makat-onan sa mga amahan kang David?
16 Tagda ang pipila ka leksiyon nga makat-onan sa mga amahan kang Haring David: Ayawg abusoha ang awtoridad nga gihatag ni Jehova. Angkona ang imong sayop, ug dawata ang binase sa Bibliyang mga tambag sa uban. Kon imo nang himoon, tahoron ka sa imong pamilya tungod sa imong pagkamapainubsanon. Dihang mag-ampo ka uban sa imong pamilya, ibubo ang imong kasingkasing kang Jehova—padungga sila nga nagsalig gyod ka kaniya. Labaw sa tanan, isentro ang imong kinabuhi sa pag-alagad kang Jehova. (Deut. 6:6-9) Ang imong maayong ehemplo maoy usa sa labing bililhong mga regalo nga ikahatag nimo sa imong pamilya.
KON UNSAY MAKAT-ONAN SA MGA INAHAN KANG MARIA
17. Unsang papel ang gihatag ni Jehova sa mga inahan?
17 Gihatagan ni Jehova ang inahan ug dungganong papel diha sa pamilya ug awtoridad sa iyang mga anak. (Prov. 6:20) Sa pagkatinuod, ang ginahimo ug ginasulti sa inahan makaapektar sa iyang mga anak sa tibuok nilang kinabuhi. (Prov. 22:6) Matikdi kon unsay makat-onan sa mga inahan kang Maria, ang inahan ni Jesus.
18-19. Unsay makat-onan sa mga inahan kang Maria?
18 Si Maria pamilyar kaayo sa Kasulatan. Siya lawom ug pagtahod kang Jehova ug suod kaayo kaniya. Andam siyang magpasakop sa paggiya ni Jehova, bisan pag kini makausab sa tibuok niyang kinabuhi.—Luc. 1:35-38, 46-55.
Kon ang inahan gikapoy o naglagot, kinahanglan tingali siyang mas maningkamot aron ikapakita ang iyang gugma sa iyang pamilya (Tan-awa ang parapo 19) *
19 Mga inahan, masundog ninyo si Maria sa daghang paagi. Unsay puwede ninyong himoon? Una, kinahanglang magpabilin mong suod kang Jehova pinaagi sa personal nga pagtuon sa Bibliya ug pag-ampo. Ikaduha, kinahanglang andam mong mohimog kausaban sa inyong kinabuhi aron mapalipay si Jehova. Pananglitan, tingali ang inyong ginikanan dali kaayong masuko ug mosingka sa ilang mga anak. Busa tingali nagtuo mo nga normal ra ni nga pagtratar sa mga anak. Bisag nakakat-on na mo bahin sa mga sukdanan ni Jehova, tingali malisdan gihapon mo sa pagpabiling kalmado ug pagpailob sa inyong mga anak, ilabina kon dili sila mopatuo ninyo dihang gikapoy mo. (Efe. 4:31) Nianang mga panahona, importante kaayo nga mangayo mog tabang kang Jehova. Si Lydia nga usa ka inahan miingon: “Usahay, kinahanglan kong mag-ampo pag-ayo aron dili nako masingkahan ang akong anak kon dili ko niya sundon. Gani may mga higayon nga dili nako ilahos ang akong isulti ug hilom kong mag-ampo sa tabang ni Jehova. Ang pag-ampo nakatabang nako sa pagpabiling kalmado.”—Sal. 37:5.
20. Unsang kalisdanan ang giatubang sa pipila ka inahan, ug sa unsang paagi masulbad kana?
20 Ang pipila ka inahan tingali nag-atubang ug laing kalisdanan—maglisod sila sa pagpahayag sa ilang gugma sa ilang mga anak. (Tito 2:3, 4) Ang ubang babaye nagdako sa panimalay diin ang ginikanan dili suod sa ilang mga anak. Kon mao nay imong kahimtang, ayawg sundoga ang sayop sa imong ginikanan. Ang inahan nga nagpasakop sa kabubut-on ni Jehova tingali kinahanglang mokat-on kon unsaon niya pagpahayag ang iyang gugma sa iyang mga anak. Malisdan tingali siya sa pag-usab sa iyang panghunahuna, pagbati, ug linihokan. Pero mahimo niya kini, ug ang maong mga kausaban makahatag ug kaayohan kaniya ug sa iyang mga anak.
PADAYON SA PAGPASAKOP KANG JEHOVA
21-22. Sumala sa Isaias 65:13, 14, unsay mga benepisyo sa pagpasakop kang Jehova?
21 Si Haring David nahibalo sa mga benepisyo sa pagpasakop kang Jehova. Siya misulat: “Ang mga sugo ni Jehova matarong, nga makapalipay sa kasingkasing; ang kasugoan ni Jehova hinlo, nga nagapadan-ag sa mga mata. Pinaagi niini ang imong alagad gipasidan-an; sa pagtuman niini, adunay dakong ganti.” (Sal. 19:8, 11) Karon, atong makita ang kalainan niadtong nagpasakop kang Jehova ug niadtong nagsalikway sa iyang mahigugmaong tambag. Kadtong nagpasakop kang Jehova ‘naninggit sa kalipay tungod sa maayong kahimtang sa kasingkasing.’—Basaha ang Isaias 65:13, 14.
22 Dihang ang mga ansiyano, amahan, ug inahan magpasakop kang Jehova, mouswag ang ilang kinabuhi, mas magmalipayon ang ilang pamilya, ug mas magkahiusa ang kongregasyon. Labaw sa tanan, mapalipay nila ang kasingkasing ni Jehova. (Prov. 27:11) Duna bay ganti nga labaw pa niana?
AWIT 123 Magpasakop sa Kahikayan sa Diyos
^ par. 5 Hisgotan niining artikuloha kon nganong angay tang magpasakop kang Jehova. Hisgotan sab niini kon unsay makat-onan sa mga ansiyano, amahan, ug inahan—kinsa dunay awtoridad—gikan sa ehemplo ni Gobernador Nehemias; Haring David; ug Maria, nga inahan ni Jesus.
^ par. 1 TERMINO GIPATIN-AW: Ang mga pulong nga magpasakop ug pagpasakop dili maayog kahulogan para niadtong napugos sa pagsunod sa uban. Pero ang katawhan sa Diyos mipili sa pagsunod kaniya, busa wala sila maghunahuna nga dili maayo ang pagpasakop.
^ par. 7 Ang ubang ngalan niining artikuloha giilisan.
^ par. 62 HULAGWAY: Ang ansiyano, uban sa iyang anak, mitabang sa pag-ayo sa Kingdom Hall, sama nga si Nehemias mitabang sa pagtukod pag-usab sa paril sa Jerusalem.
^ par. 64 HULAGWAY: Ang amahan nagrepresentar sa iyang pamilya diha sa kinasingkasing nga pag-ampo kang Jehova.
^ par. 66 HULAGWAY: Ang bata nagdulag video game sulod sa daghang oras ug wala pa niya mahuman ang iyang mga himoonon sa balay o homwork. Ang iyang inahan, nga gikapoy sa trabaho, nagdisiplina kaniya pero wala masuko o mosultig sakit.