1-2. Sa unsang paagi ang Ecclesiastes 11:6 konektado sa pagsangyaw sa maayong balita sa Gingharian?

SA PIPILA ka nasod, ang mga tawo malipay dihang makadungog sila sa maayong balita. Dugay na nila kanang gipaabot! Sa ubang nasod, kadaghanan sa mga tawo wala kaayoy interes sa Diyos o sa Bibliya. Unsay komon nga reaksiyon sa inyong dapit? Bisan unsa pa man, gusto ni Jehova nga magpadayon ta sa pagsangyaw hangtod moingon siya nga ang buluhaton natapos na.

² Gitakda na ni Jehova kon kanus-a matapos ang buluhatong pagsangyaw. Dayon, “moabot ang kataposan.” (Mat. 24:14, 36) Sa dili pa kana mahitabo, sa unsang paagi matuman nato ang sugo nga “ayaw papahulaya ang imong kamot”? *​—Basaha ang Ecclesiastes 11:6.

3. Unsay atong hisgotan niining artikuloha?

³ Sa miaging artikulo, gihisgotan ang upat ka butang nga kinahanglan natong buhaton aron mahimo tang epektibong “mangingisdag tawo.” (Mat. 4:19) Niining artikuloha, hisgotan ang tulo ka paagi nga mapalig-on nato ang atong determinasyon nga mosangyaw, bisag unsa pay mahitabo. Atong makat-onan kon nganong importante nga (1) padayong unahon ang buluhatong pagsangyaw, (2) magmapailobon, ug (3) magbaton ug lig-ong pagtuo.

4. Nganong kinahanglan nga padayon natong unahon ang buluhaton nga gipabuhat ni Jehova kanato?

⁴ Si Jesus nagtagna sa mga hitabo ug kahimtang nga mahimong ilhanan sa kataposang mga adlaw ug posibleng makabalda sa iyang mga sumusunod sa pag-una sa buluhatong pagsangyaw. Giingnan niya ang iyang mga tinun-an nga ‘magpadayon sa pagbantay.’ (Mat. 24:42) Karon, duna poy mga kabaldahan nga susama niadtong nakapugong sa mga tawo sa adlaw ni Noe sa pagpaminaw sa pasidaan nga iyang gihatag. (Mat. 24:37-39; 2 Ped. 2:5) Busa, kinahanglan nga padayon natong unahon ang buluhaton nga gipabuhat ni Jehova kanato.

5. Sumala sa Buhat 1:6-8, asa makaabot ang buluhatong pagsangyaw?

⁵ Karon, kinahanglan gyod natong unahon ang pagsangyaw sa Gingharian. Si Jesus nagtagna nga kining buluhatona mouswag ug magpadayon human sa iyang kamatayon. (Juan 14:12) Human sa kamatayon ni Jesus, ang pipila niya ka tinun-an mibalik sa pagpangisda. Human sa iyang pagkabanhaw, milagroso niyang gitabangan ang pipila ka tinun-an nga makakuhag daghang isda. Gigamit niya ang maong higayon sa pagpasiugda nga ang pagsangyaw ug paghimog mga tinun-an mas importante kay sa bisan unsang buluhaton. (Juan 21:15-17) Sa dayon nag saka ni Jesus sa langit, giingnan niya ang iyang mga tinun-an nga ang buluhatong pagsangyaw nga iyang gisugdan makaabot sa ubang kanasoran. (Basaha ang Buhat 1:6-8.) Katuigan sa ulahi, gihatagan ni Jesus ug panan-awon si apostol Juan aron ipakita kaniya kon unsay mahitabo “sa adlaw sa Ginoo.” * Apil sa nakita ni Juan mao kining katingalahan kaayong hitabo: Ubos sa pagpanguna sa mga anghel, ang “walay kataposang maayong balita” gisangyaw ngadto sa “matag nasod ug tribo ug pinulongan ug katawhan.” (Pin. 1:10; 14:6)  Klaro nga kabubut-on ni Jehova karon nga makigbahin ta niining tibuok kalibotang pagsangyaw hangtod nga kini matapos.

6. Sa unsang paagi makapadayon ta sa pag-una sa buluhatong pagsangyaw?

⁶ Makapadayon ta sa pag-una sa buluhatong pagsangyaw kon atong pamalandongon ang tanang gihimo ni Jehova sa pagtabang kanato. Pananglitan, nagtagana siya ug daghang inimprenta ug digital nga mga publikasyon, audio ug video nga mga rekording, ug mga Internet broadcast. Hunahunaa kini: Sa atong opisyal nga website, ang impormasyon mabatonan diha sa kapig 1,000 ka pinulongan! (Mat. 24:45-47) Sa kalibotan nga nabahin tungod sa politika, relihiyon, ug pinansiyal nga kahimtang, kapig walo ka milyong alagad sa Diyos ang tinuod nga nagkahiusa diha sa tibuok kalibotang panag-igsoonay. Pananglitan, niadtong Biyernes, Abril 19, 2019, ang mga Saksi ni Jehova sa tibuok kalibotan nagkahiusa sa paghisgot sa inadlaw nga teksto. Sa gabii nianang adlawa, 20,919,041 ang nagtigom aron saulogon ang Memoryal sa kamatayon ni Jesus. Mapalihok ta nga padayong unahon ang buluhaton sa Gingharian kon pamalandongon nato ang atong pribilehiyo nga makakita ug mahimong bahin niining modernong adlaw nga milagro.

7. Sa unsang paagi ang ehemplo ni Jesus makatabang nga makapadayon ta sa pag-una sa pagsangyaw?

⁷ Ang laing paagi nga makapadayon ta sa pag-una sa pagsangyaw mao ang pagsundog kang Jesus. Wala niya tugoti ang bisan unsa nga makabalda niya sa pagsangyaw sa kamatuoran. (Juan 18:37) Wala siya matental dihang gitanyag ni Satanas kaniya “ang tanang gingharian sa kalibotan ug ang himaya niini” o dihang gusto sa mga tawo nga himoon siyang hari. (Mat. 4:8, 9; Juan 6:15) Wala siya maimpluwensiyahi sa tinguha nga madato, ug wala siya mahadlok sa grabeng paglutos. (Luc. 9:58; Juan 8:59) Dihang sulayan ang atong pagtuo, makapadayon ta sa pag-una sa pagsangyaw kon atong hinumdoman ang tambag ni apostol Pablo. Gidasig niya ang mga Kristohanon nga sundogon si Jesus aron ‘dili sila kapoyon ug moundang’!​—Heb. 12:3.

8. Unsa ang pagpailob, ug nganong kinahanglan kaayo ni karon?

⁸ Ang pagpailob maoy kalmadong pagpaabot hangtod mausab ang kahimtang. Kita man nagpaabot nga matapos ang dili maayong kahimtang o nga matuman ang dugay na natong gipangandoy, kita kinahanglang magmapailobon. Si propetang Habacuc nangandoy nga matapos ang kapintasan diha sa Juda. (Hab. 1:2) Ang mga tinun-an ni Jesus nagdahom nga ang Gingharian “madayag dayon” ug magluwas kanila gikan sa pagmando sa Roma. (Luc. 19:11) Kita nangandoy sa panahon dihang ang Gingharian sa Diyos magwagtang sa pagkadaotan ug magpatungha sa bag-ong kalibotan nga puno sa matarong nga mga tawo. (2 Ped. 3:13) Pero kinahanglan tang magmapailobon ug magpaabot sa gitakdang panahon ni Jehova. Tagda ang pipila ka paagi nga si Jehova nagtudlo kanato nga magmapailobon.

9. Unsang mga pananglitan ang nagpakita nga si Jehova mapailobon?

⁹ Si Jehova ang hingpit nga ehemplo sa pagkamapailobon. Gihatagan niya si Noe ug igong panahon sa pagtukod sa arka ug sa pag-alagad ingong “magwawali sa pagkamatarong.” (2 Ped. 2:5; 1 Ped. 3:20) Si Jehova namati dihang si Abraham balikbalik nga nangutana kaniya bahin sa Iyang desisyon nga laglagon ang daotang mga tawo sa mga siyudad sa Sodoma ug Gomora. (Gen. 18:20-33) Sa daghang katuigan, si Jehova mapailobon kaayo sa dili matinumanong nasod sa Israel. (Neh. 9:30, 31) Karon, makita nato nga si Jehova mapailobon kay naghatag siyag panahon nga “maghinulsol”  ang tanan nga gusto niyang makabig. (2 Ped. 3:9; Juan 6:44; 1 Tim. 2:3, 4) Ang ehemplo ni Jehova naghatag natog maayong rason nga magmapailobon samtang nagpadayon ta sa pagsangyaw ug pagpanudlo. Siya nagtudlo sab ug pagkamapailobon pinaagi sa usa ka ilustrasyon nga makita diha sa iyang Pulong.

10. Sumala sa Santiago 5:7, 8, unsay gitudlo kanato sa pananglitan sa mag-uuma?

¹⁰ Basaha ang Santiago 5:7, 8. Ang pananglitan sa mag-uuma nga nananom nagtudlo kanato kon sa unsang paagi magmapailobon. Tinuod, ang pipila ka tanom paspas motubo. Pero ang kadaghanan, ilabina kadtong magpatunghag pagkaon, dangtag taastaas nga panahon una moguwang. Sa Israel, ang pagpanubo sa mga tanom dangtag mga unom ka bulan. Ang mag-uuma mananom human sa ulan sa tinglarag ug mangani human sa ulan sa tingpamulak. (Mar. 4:28) Maalamon ta kon atong sundogon ang pagkamapailobon sa mag-uuma. Pero, dili tingali ni sayon.

11. Sa unsang paagi ang pagkamapailobon makatabang sa atong pagministeryo?

¹¹ Sagad, ang dili hingpit nga mga tawo gusto dayong makakitag resulta sa ilang gihimo. Pero kon gusto nato nga ang atong uma magpatunghag ani, kinahanglan nga kanunay nato kining atimanon. Kita magkalot, magpugas, mangibot ug sagbot, ug mamisbis. Ang paghimog mga tinun-an nagkinahanglan sab ug padayong paghago. Nagkinahanglag panahon ang pagtabang nato sa atong mga Bible study nga mahimong mahigugmaon ug dili mapihigon. Ang pagkamapailobon makatabang nga dili ta maluya dihang ang mga tawo dili maminaw. Bisan dihang may mga tawo nga andam maminaw ug mokat-on, kinahanglan gihapon tang magmapailobon. Dili nato mapugos ang usa ka Bible study nga makabatog pagtuo. Gani, may mga higayon nga ang mga tinun-an ni Jesus wala dayon makasabot sa iyang gitudlo. (Juan 14:9) Atong hinumdoman nga bisag kita ang nagtanom  ug nagbisbis, ang Diyos maoy magpatubo.​—1 Cor. 3:6.

12. Sa unsang paagi makapakita tag pailob dihang magsangyaw sa dili Saksing mga membro sa atong pamilya?

¹² Ang usa ka kahimtang diin maglisod tingali ta sa pagpakitag pailob maoy sa dihang magsangyaw ta sa dili Saksing mga membro sa atong pamilya. Ang prinsipyo sa Ecclesiastes 3:1, 7 makatabang kanato. Kini nag-ingon: “Dunay . . . panahon sa paghilom ug panahon sa pagsulti.” Pinaagi sa atong maayong panggawi hilom tang makapamatuod, pero kinahanglan nga kanunay tang mangitag kahigayonan sa pagsulti sa kamatuoran. (1 Ped. 3:1, 2) Kinahanglang magmadasigon ta sa pagsangyaw ug pagpanudlo, pero angay tang magmapailobon sa tanan, apil sa atong pamilya.

13-14. Unsang pipila ka pananglitan sa pagkamapailobon ang atong masundog?

¹³ Makakat-on ta sa pagpakitag pailob gikan sa matinumanong mga alagad sa kapanahonan sa Bibliya ug sa modernong panahon. Si Habacuc nangandoy nga matapos ang pagkadaotan, pero masaligon siyang miingon: “Magpadayon ko sa pagtindog sa akong puwesto.” (Hab. 2:1) Si apostol Pablo miingon nga gusto niyang “mahuman” ang iyang ministeryo. Pero mapailobon siyang nagpadayon sa ‘bug-os nga pagpamatuod sa maayong balita.’​—Buh. 20:24.

¹⁴ Tagda ang eksperyensiya sa usa ka magtiayon nga migraduwar sa Gilead ug giasayn sa nasod diin pipila ra ang Saksi ug kadaghanan sa mga tawo dili Kristiyano. Diyutay ra ang gustong magpa-Bible study. Sa laing bahin, ang ilang mga klasmet sa Gilead nga nag-alagad sa laing mga nasod daghan ug mauswagong Bible study. Pero ang magtiayon mapailobong nagpadayon sa pagsangyaw bisag kadaghanan sa mga tawo sa ilang teritoryo dili maminaw. Human sa walo ka tuig nga pagsangyaw diha sa dili mabungahong teritoryo, nalipay kaayo sila dihang nabawtismohan ang usa sa ilang mga Bible study. Unsay atong makat-onan niining mga pananglitan sa karaang panahon ug sa modernong panahon? Kining matinumanon nga mga alagad wala magtinapolan, o wala nila papahulaya ang ilang kamot, ug gipanalanginan sila ni Jehova tungod sa ilang pagkamapailobon. Hinaot nga ‘mahimo tang tigsundog niadtong nakadawat sa mga saad tungod sa ilang pagtuo ug mapailobong paghulat.’​—Heb. 6:10-12.

15. Unsa ang usa ka paagi nga ang pagtuo magpalig-on sa atong determinasyon nga mosangyaw?

¹⁵ May pagtuo ta sa mensahe nga atong gisangyaw, busa gusto nato ning isulti sa daghang tawo kutob sa atong maarangan. Kita may pagsalig sa mga saad diha sa Pulong sa Diyos. (Sal. 119:42; Isa. 40:8) Nakita nato ang mga tagna sa Bibliya nga natuman sa atong panahon. Nakita nato nga nabag-o ang kinabuhi sa mga tawo dihang gipadapat nila ang mga tambag sa Bibliya. Tungod niini nga mga ebidensiya, segurado ta nga ang maayong balita sa Gingharian kinahanglang madungog sa tanan.

16. Base sa Salmo 46:1-3, sa unsang paagi ang atong pagtuo kang Jehova ug Jesus magpalig-on sa atong determinasyon nga mosangyaw?

¹⁶ May pagtuo sab ta kang Jehova, ang Tuboran sa mensahe nga atong gisangyaw, ug sa iyang gientrono nga Hari sa Gingharian, si Jesus. (Juan 14:1) Bisag unsay mahitabo kanato, si Jehova mao gyod ang atong kusog ug dangpanan. (Basaha ang Salmo 46:1-3.) Dugang pa, masaligon ta nga, gikan sa langit, si Jesus naggiya sa buluhatong pagsangyaw gamit ang gahom ug awtoridad nga gihatag ni Jehova kaniya.​—Mat. 28:18-20.

17. Paghatag ug pananglitan kon nganong angay tang mopadayon sa pagsangyaw.

¹⁷ Ang pagtuo magpalig-on sa atong pagsalig  nga si Jehova magpanalangin sa atong mga paningkamot, usahay sa mga paagi nga wala nato damha. (Eccl. 11:6) Pananglitan, kada adlaw, libolibo ang makakita sa atong mga literature display ug cart. Epektibo ba ni nga paagi sa pagsangyaw? Oo! Ang Nobyembre 2014 nga Ministeryo sa Gingharian naghisgot bahin sa usa ka batan-ong estudyante sa unibersidad nga gustong magsulat ug essay bahin sa mga Saksi ni Jehova. Wala siya makakitag Kingdom Hall, pero nakita niya ang atong literature display sa ilang eskuwelahan ug ang impormasyon para sa iyang essay. Ngadtongadto, siya nabawtismohan ug karon regular payunir na. Ang ingon niini nga mga eksperyensiya magpalihok nato sa pagpadayon sa pagsangyaw kay gipakita niini nga duna pay mga tawo nga kinahanglang makadungog sa mensahe sa Gingharian.

18. Nganong makaseguro ta nga ang buluhatong pagsangyaw sa Gingharian matapos sumala sa kabubut-on ni Jehova?

¹⁸ Makaseguro ta nga ang buluhatong pagsangyaw matapos sa gitakdang panahon. Konsideraha ang nahitabo sa adlaw ni Noe. Gipamatud-an ni Jehova nga siya ang hingpit nga Tigtakda ug Panahon. Mga 120 ka tuig una ang Lunop, gitakda na ni Jehova kon kanus-a kini mahitabo. Katuigan sa ulahi, gisugo ni Jehova si Noe sa pagtukod ug arka. Sulod sa mga 40 o 50 ka tuig una ang Lunop, si Noe nagpadayon sa paghago. Bisan pag ang mga tawo wala maminaw, siya nagpadayon sa pagpahayag ug pasidaan hangtod nga miingon si Jehova nga panahon na nga pasudlon sa arka ang mga mananap. Dayon, sa gitakdang panahon, “gisirhan ni Jehova ang pultahan.”​—Gen. 6:3; 7:1, 2, 16.

19. Unsay atong malaoman kon dili nato papahulayon ang atong kamot?

¹⁹ Sa dili madugay, taposon na ni Jehova ang buluhatong pagsangyaw. Iyang laglagon ang daotang sistema ni Satanas ug pulihan kinig matarong nga bag-ong kalibotan. Sa dili pa kana moabot, hinaot nga dili nato papahulayon ang atong kamot, sama sa gibuhat ni Noe, Habacuc, ug sa uban. Hinaot nga kita magpadayon sa pag-una sa buluhatong pagsangyaw, magmapailobon, ug magbaton ug lig-ong pagtuo kang Jehova ug sa iyang mga saad.