1. Kanus-a nga mas lisod tingali ang pag-alagad kang Jehova?

SA IMONG hunahuna, kanus-a nga mas lisod tingali ang pag-alagad kang Jehova​—dihang daghan kag problema o dihang wala kaayo kay problema? Kon daghan tag problema, mosalig dayon ta kang Jehova. Pero komosta kon wala kaayo tay problema? Malimot ba ta usahay nga importante kaayo ang pag-alagad sa Diyos? Gipasidan-an ni Jehova ang mga Israelinhon nga posible ning mahitabo.​—Deut. 6:10-12.

2. Unsang ehemplo ang gipakita ni Haring Asa?

² Si Haring Asa maoy maayo kaayong ehemplo sa usa nga nagmaalamon pinaagi sa bug-os nga pagsalig kang Jehova. Siya nag-alagad kang Jehova dili lang sa panahon sa kalisdanan kondili sa panahon sab sa kalinaw. “Ang kasingkasing ni Asa bug-os ug debosyon kang Jehova sa tibuok niyang kinabuhi.” (1 Hari 15:14, footnote) Ang usa ka paagi nga si Asa nagpakita sa iyang debosyon mao ang pagwagtang sa bakak nga pagsimba sa Juda. Ang Bibliya nag-ingon nga “iyang gipanguha ang mga halaran sa langyawng mga diyos ug ang tag-as nga dapit, gidugmok ang sagradong mga haligi, ug giputol ang sagradong mga poste.” (2 Cron. 14:3, 5) Gitangtang pa gani niya ang iyang lola nga si Maaca gikan sa taas nga posisyon niini sa gingharian. Ngano? Tungod kay giawhag niini ang mga tawo sa pagsimbag idolo.​—1 Hari 15:11-13.

3. Unsay hisgotan niining artikuloha?

³ Si Asa mihimog labaw pa kay sa pagwagtang sa bakak nga pagsimba. Iyang gipalambo ang putli nga pagsimba pinaagi sa pagtabang sa gingharian sa Juda nga mobalik kang Jehova. Si Asa ug ang mga Israelinhon gipanalanginan ni Jehova ug panahon  sa kalinaw. * Sulod sa 10 ka tuig panahon sa pagmando ni Asa, “ang yuta may kalinaw.” (2 Cron. 14:1, 4, 6) Niining artikuloha, atong hisgotan kon giunsa paggamit ni Asa kanang panahon sa kalinaw. Dayon atong hisgotan ang ehemplo sa mga Kristohanon sa unang siglo kinsa, sama kang Asa, milihok nga maalamon panahon sa kalinaw. Sa kataposan, tubagon nato kining pangutanaha: Kon nagpuyo ka sa nasod diin may kagawasan sa pagsimba, sa unsang paagi mapahimuslan nimo kanang panahon sa kalinaw?

4. Sumala sa 2 Cronicas 14:2, 6, 7, giunsa paggamit ni Asa ang panahon sa kalinaw?

⁴ Basaha ang 2 Cronicas 14:2, 6, 7. Giingnan ni Asa ang mga tawo nga si Jehova ang ‘naghatag kanilag pahulay gikan sa tanan nilang kaaway sa palibot.’ Si Asa wala maghunahuna nga kining panahon sa kalinaw maoy panahon sa pagpahayahay. Hinunoa, siya nagsugod pagtukod ug mga siyudad, paril, torre, ug ganghaan. Iyang giingnan ang katawhan sa Juda: “Kita pa ang nanag-iya sa yuta.” Unsay iyang gipasabot? Buot niyang ipasabot nga makaadto pa sila bisan asa sa ilang nasod ug makahimo sa pagpanukod kay wala pay mga kaaway. Iyang giawhag ang mga tawo nga pahimuslan kining panahon sa kalinaw.

5. Nganong gipalig-on ni Asa ang iyang kasundalohan?

⁵ Gigamit sab ni Asa kining panahon sa kalinaw sa pagpalig-on sa iyang kasundalohan. (2 Cron. 14:8) Nagpasabot ba ni nga wala siyay pagsalig kang Jehova? Wala. Nahibalo si Asa nga iyang responsibilidad ingong hari ang pag-andam sa katawhan sa mga kalisdanan nga posible nilang maatubang. Nahibalo siya nga ang malinawong kahimtang sa Juda posibleng matapos, ug natinuod kini.

6. Giunsa paggamit sa mga Kristohanon sa unang siglo ang panahon sa kalinaw?

⁶ Bisag gilutos ang mga Kristohanon sa unang siglo, may mga panahon nga malinawon ang ilang kahimtang. Unsay ilang gibuhat nianang mga panahona? Ang maong matinumanong mga tinun-an nagsangyaw sa maayong balita nga walay hunong. Ang basahon sa Buhat nag-ingon nga sila “nagkinabuhi nga may kahadlok kang Jehova.” Nagkugi sila sa pagsangyaw sa maayong balita, ug tungod niana, sila “padayong midaghan.” Klaro nga gipanalanginan ni Jehova ang ilang madasigong pagsangyaw nianang panahon sa kalinaw.​—Buh. 9:26-31.

7-8. Dihang may kahigayonan, unsay gibuhat ni Pablo ug sa uban? Ipatin-aw.

⁷ Gipahimuslan gyod sa mga tinun-an sa unang siglo ang tanang kahigayonan sa pagsangyaw sa maayong balita. Pananglitan, dihang nakita ni apostol Pablo nga daghan siyag masangyawan sa Efeso, nagpabilin siya nianang siyudara ug nagsangyaw didto.​—1 Cor. 16:8, 9.

⁸ Si Pablo ug ang ubang Kristohanon may laing kahigayonan nga makasangyaw sa daghan dihang ang isyu bahin sa pagpatuli nadesisyonan niadtong 49 C.E. (Buh. 15:23-29) Human mapahibalo ang desisyon ngadto sa mga kongregasyon, ang mga tinun-an naningkamot pag-ayo sa pagsangyaw sa “maayong balita sa pulong ni Jehova.” (Buh. 15:30-35) Unsay resulta? Ang Bibliya nag-ingon nga “ang mga kongregasyon padayon gayong nalig-on diha sa pagtuo ug nagkadako kini adlaw-adlaw.”​—Buh. 16:4, 5.

9. Unsay kahimtang sa daghang nasod karon, ug unsay atong ipangutana sa kaugalingon?

⁹ Sa daghang nasod karon, may kagawasan ta sa pagsangyaw. Ingon ba niana ang kahimtang sa inyong nasod? Kon mao, pangutan-a ang imong kaugalingon, ‘Giunsa nako paggamit kini nga kagawasan?’ Niining makapahinam nga kataposang mga adlaw, ang organisasyon ni Jehova naghimo sa kinadak-ang pagsangyaw ug pagpanudlo nga buluhaton sukad masukad. (Mar. 13:10) Daghan kaayog puwedeng buhaton ang katawhan ni Jehova.

10. Unsay gidasig sa 2 Timoteo 4:2 nga atong buhaton?

¹⁰ Sa unsang paagi mapahimuslan nimo ang panahon sa kalinaw? (Basaha ang 2 Timoteo 4:2.) Puwede nimong konsiderahon kon ikaw o ang laing membro sa pamilya makapauswag ba sa inyong ministeryo, tingali makapayunir pa gani. Dili karon panahon sa pagtigom ug bahandi ug kabtangan​—mga butang nga dili nato madala latas sa dakong kasakitan.​—Prov. 11:4; Mat. 6:31-33; 1 Juan 2:15-17.

11. Unsay gihimo sa pipila aron mas daghan silag masangyawan?

¹¹ Daghang magmamantala ang nagtuon ug bag-ong pinulongan aron magamit nila sa pagsangyaw ug pagpanudlo. Ang organisasyon sa Diyos nagtaganag daghang publikasyon nga makatabang nato sa pagsangyaw diha sa mas daghang pinulongan. Pananglitan, niadtong 2010, ang atong mga literatura mabatonan diha sa mga 500 ka pinulongan. Karon, kini mabatonan na sa kapig 1,000 ka pinulongan!

12. Unsay kaayohan kon madungog sa mga tawo ang mensahe sa Gingharian diha sa ilang pinulongan? Paghatag ug pananglitan.

¹² Unsay gibati sa mga tawo dihang nakadungog sila sa kamatuoran sa Pulong sa Diyos diha sa ilang pinulongan? Tagda ang eksperyensiya sa usa ka sister nga mitambong ug rehiyonal nga kombensiyon sa Memphis, Tennessee, U.S.A. Ang programa sa kombensiyon gipresentar sa pinulongang Kinyarwanda, nga  sagad gigamit sa Rwanda, Congo (Kinshasa), ug Uganda. Human sa kombensiyon, ang sister miingon: “Kini ang unang higayon nga nakasabot ko pag-ayo ug espirituwal nga programa sukad nga mibalhin ko sa United States 17 ka tuig ang milabay.” Klaro nga ang sister natandog pag-ayo dihang nadunggan niya ang programa diha sa iyang pinulongan. Kon itugot sa imong kahimtang, puwede ka bang magtuon ug laing pinulongan aron duna pa kay laing matabangan sa inyong teritoryo? Dili kaha mas epektibo ni kay dunay mga tawo sa inyong teritoryo nga mas ganahang mogamit sa ilang pinulongan? Malipay gyod ka sa resulta sa imong mga paningkamot.

13. Sa unsang paagi gipahimuslan sa atong mga igsoon sa Russia ang panahon sa kalinaw?

¹³ Dili tanan sa atong mga igsoon ang may kagawasan sa pagsangyaw. Usahay malimitahan pag-ayo ang atong ministeryo tungod sa mga balaod sa gobyerno. Pananglitan, tagda ang atong mga igsoon sa Russia. Sila gilutos sa daghang katuigan, pero niadtong Marso 1991, gihatagan sila sa gobyerno ug kagawasan sa pagsimba. Nianang panahona, diha ray mga 16,000 ka Saksi sa Russia. Paglabayg 20 ka tuig, miabot na kinig kapin sa 160,000! Klaro nga ang atong mga igsoon milihok nga maalamon dihang may kagawasan pa sila sa pagsangyaw. Kana nga panahon sa kalinaw wala magdugay. Pero, bisag nausab ang ilang kahimtang, madasigon gihapon sila sa putling pagsimba. Gihimo gihapon nila ang tanan nilang maarangan sa pag-alagad kang Jehova.

14-15. Giunsa pagpakita ni Jehova ang iyang gahom sa pagtabang kang Asa?

¹⁴ Sa mga adlaw ni Asa, ang panahon sa kalinaw natapos ra. Misulong gikan sa Etiopia ang dakong kasundalohan, nga ang gidaghanon kapig usa ka milyon. Ang ilang komander  nga si Zera nagtuo nga mapildi ang Juda. Pero si Haring Asa misalig, dili sa gidaghanon sa iyang kasundalohan, kondili sa iyang Diyos, si Jehova. Siya miampo: “Tabangi mi, Oh Jehova nga among Diyos, kay kami nagasalig kanimo, ug sa imong ngalan kami mianhi batok niini nga katawhan.”​—2 Cron. 14:11.

¹⁵ Ang Etiopianhong kasundalohan halos doble sa gidaghanon sa mga sundalo ni Asa, pero nahibalo si Asa nga si Jehova gamhanan ug makahimo sa pagtabang sa Iyang katawhan. Ug wala siya pakyasa ni Jehova. Ang Etiopianhong kasundalohan napildi.​—2 Cron. 14:8-13.

16. Giunsa nato pagkahibalo nga ang panahon sa kalinaw dili magdugay?

¹⁶ Wala ta mahibalo kon unsa gyoy mahitabo sa matag usa kanato sa umaabot, pero nahibalo ta nga ang kalinaw nga natagamtam sa katawhan sa Diyos dili magdugay. Gani, si Jesus nagtagna nga sa kataposang mga adlaw, ang iyang mga tinun-an ‘dumtan sa tanang kanasoran.’ (Mat. 24:9) Sa susama, si apostol Pablo miingon nga “ang tanan nga nagkinabuhi nga nahiusa kang Kristo Jesus ug may debosyon ngadto sa Diyos lutoson sab.” (2 Tim. 3:12) Si Satanas may “dakong kasuko,” ug gilimbongan nato ang atong kaugalingon kon maghunahuna ta nga makalikay ta sa iyang kasuko.​—Pin. 12:12.

17. Sa unsang mga paagi posibleng masulayan ang atong pagtuo?

¹⁷ Sa dili madugay, kitang tanan makasinatig mga pagsulay sa atong pagtuo. Ang kalibotan hapit nang makasinati sa “dakong kasakitan nga wala pa mahitabo sukad sa sinugdan sa kalibotan hangtod karon.” (Mat. 24:21) Nianang panahona, ang mga membro sa atong pamilya mahimong mokontra nato ug ang atong buluhaton posibleng idili. (Mat. 10:35, 36) Sundogon ba nato si Asa ug mosalig sa tabang ug proteksiyon ni Jehova?

18. Sumala sa Hebreohanon 10:38, 39, unsay makatabang nato aron mahimo tang andam dihang matapos ang panahon sa kalinaw?

¹⁸ Ginaandam ta ni Jehova karon aron molig-on ang atong pagtuo. Iyang gigamit “ang matinumanon ug maalamong ulipon” sa paghatag kanato ug “pagkaon sa hustong panahon” aron makapabilin tang lig-on sa espirituwal. (Mat. 24:45) Pero kinahanglan tang  maningkamot aron molig-on ang atong pagtuo kang Jehova.​—Basaha ang Hebreohanon 10:38, 39.

19-20. Human mabasa ang 1 Cronicas 28:9, unsay angay natong ipangutana sa kaugalingon, ug ngano?

¹⁹ Sama kang Haring Asa, kinahanglan natong “pangitaon si Jehova.” (2 Cron. 14:4; 15:1, 2) Nagsugod ta pagpangita kang Jehova dihang kita nagtuon bahin kaniya ug nagpabawtismo. Naningkamot ta sa pagpalig-on sa atong gugma kang Jehova. Aron masusi ang atong kaugalingon niining bahina, puwede nato ning ipangutana: ‘Regular ba kong nagatambong sa mga tigom?’ Diha sa mga tigom, mapalig-on ta sa espirituwal ug madasig sa atong mga igsoon. (Mat. 11:28) Mahimo sab natong pangutan-on ang kaugalingon, ‘Duna ba koy maayong rutina sa personal nga pagtuon?’ Kon nagpuyo ka uban sa imong pamilya, duna ba moy pamilyahanong pagsimba kada semana? O kon nag-inusara kag puyo, naggahin ba gihapon kag panahon para niana, nga sama rag bahin ka sa usa ka pamilya? Dugang pa, gihimo ba nimo ang imong maarangan sa pagsangyaw ug paghimog mga tinun-an?

²⁰ Nganong ipangutana nato kana sa kaugalingon? Ang Bibliya nag-ingon nga ginasusi ni Jehova ang atong hunahuna ug kasingkasing, busa angay pod nato nang himoon. (Basaha ang 1 Cronicas 28:9.) Kon makita nato nga kinahanglan tang mohimog kausaban sa atong mga tumong o panghunahuna, angay tang mangayog tabang kang Jehova nga mahimo kana. Karon na ang panahon nga andamon ang atong kaugalingon para sa umaabot nga mga pagsulay. Hinaot nga dili nato tugotan ang bisan unsa nga makapugong nato sa maalamong paggamit sa panahon sa kalinaw!