1-2. Unsang simbolikong pag-uyog ang gitagna nga mahitabo sa atong panahon?

“KALIT lang nangahugno ang mga tindahan ug daang mga bilding.” “Nangalisang ang mga tawo . . . Daghan ang nag-ingon nga gidangtan tog mga dos minutos. Pero para nako, morag dugay kaayo to.” Kanay giingon sa pipila nga naluwas sa linog sa Nepal niadtong 2015. Kon makaeksperyensiya kag ingon ana ka makahahadlok nga hitabo, dili gyod nâ nimo dayon malimtan.

² Pero, niining higayona mismo, nakaeksperyensiya tag lahi nga klase sa pag-uyog, ang pag-uyog nga nagakahitabo dili lang sa usa ka siyudad o nasod. Kini nagakahitabo sa tanang kanasoran ug dugay nang nagsugod. Kini nga pag-uyog gitagna ni propetang Haggeo. Siya misulat: “Kini ang giingon ni Jehova sa mga panon, ‘Sa makausa pa—sa dili na madugay—akong uyogon ang kalangitan ug ang yuta ug ang dagat ug ang mamala nga yuta.’”—Hag. 2:6.

3. Sa unsang paagi ang simbolikong pag-uyog lahi sa literal nga linog?

³ Ang pag-uyog nga gihisgotan ni Haggeo dili parehas sa literal nga linog nga magpahinabo lag kadaot. Hinunoa, kini nga pag-uyog dunay maayong mga resulta. Si Jehova mismo nag-ingon: “Akong uyogon ang tanang kanasoran, ug ang bililhong mga butang sa tanang kanasoran manulod; ug akong pun-on kining balaya sa himaya.” (Hag. 2:7) Unsay gipasabot niining tagnaa para niadtong nabuhi sa panahon ni Haggeo? Ug unsay gipasabot niini para kanato karon? Hisgotan nato ang tubag sa maong mga pangutana. Makat-onan sab nato kon sa unsang paagi makapakigbahin ta sa pag-uyog sa kanasoran karon.

4. Nganong gipadala ni Jehova si Haggeo ngadto sa Iyang katawhan?

⁴ Si Haggeo nakadawat ug importanteng sugo gikan kang Jehova. Hunahunaa ang nahitabo una pa niana. Si Haggeo posibleng apil sa mga binihag sa Babilonya nga namalik sa Jerusalem niadtong 537 B.C.E. Wala madugay human sa pag-abot nianang matinumanong mga magsisimba sa Jerusalem, gipahimutang nila ang pundasyon sa balay, o templo, ni Jehova. (Esd. 3:8, 10) Pero wala madugay, dihay nahitabo nga dili maayo. Nadismayar sila ug mihunong sa pagtukod tungod sa pagsupak. (Esd. 4:4; Hag. 1:1, 2) Busa pagka-520 B.C.E., gisugo ni Jehova si Haggeo sa pagdasig kanila nga humanon ang pagtukod pag-usab sa templo. *—Esd. 6:14, 15.

5. Nganong seguradong nakadasig sa katawhan sa Diyos ang mensahe ni Haggeo?

⁵ Ang katuyoan sa mensahe ni Haggeo mao ang pagpalig-on sa pagtuo sa mga Hudiyo kang Jehova. Maisogong gisulti sa propeta kining mga pulonga ngadto sa nadismayar nga mga Hudiyo: “‘Magmalig-on kamong tanang katawhan sa yuta,’ nag-ingon si Jehova, ‘ug pagtrabaho mo. Kay ako nagauban kaninyo,’ nag-ingon si Jehova sa mga panon.” (Hag. 2:4) Ang ekspresyong “Jehova sa mga panon” seguradong nakadasig nila. Si Jehova dunay awtoridad ibabaw sa dako kaayong panon sa mga anghel, busa ang mga Hudiyo kinahanglang mosalig niya aron molampos.

6. Unsay mahimong resulta sa pag-uyog nga gitagna ni Haggeo?

⁶ Gipadala ni Jehova si Haggeo aron sultihan ang mga Hudiyo nga Iyang uyogon ang tanang kanasoran. Kini nagpasalig niadtong naluyang mga Hudiyo nga mihunong sa pagtukod sa templo nga uyogon ni Jehova ang Persia, ang gahom sa kalibotan niadtong panahona. Ug unsay mahimong resulta sa maong pag-uyog? Una, mahuman sa katawhan sa Diyos ang pagtukod sa templo. Dayon, bisan ang mga dili Hudiyo moapil kanila sa pagsimba kang Jehova diha sa natukod pag-usab nga templo. Makapadasig gyod nâ nga mensahe para sa katawhan sa Diyos!—Zac. 8:9.

7. Nakigbahin ta sa unsang buluhaton nga pag-uyog? Ipatin-aw.

⁷ Unsay gipasabot sa tagna ni Haggeo para kanato karon? Sa makausa pa, ginauyog ni Jehova ang tanang kanasoran, ug niining higayona apil ta sa maong buluhaton. Hunahunaa ni: Niadtong 1914, gientrono ni Jehova si Jesu-Kristo ingong Hari sa Iyang langitnong Gingharian. (Sal. 2:6) Ang pagkatukod niana nga Gingharian maoy dili maayong balita para sa mga lider sa kalibotan. Nagpasabot ni nga “ang gitakdang mga panahon sa kanasoran”—ang panahon diin walay magmamando nga direktang nagrepresentar kang Jehova—natuman na, o natapos na. (Luc. 21:24) Tungod niana, ilabina sukad niadtong 1919, ang mga alagad ni Jehova nagsangyaw nga ang Gingharian sa Diyos lang ang paglaom sa katawhan. Kining pagsangyaw sa “maayong balita sa Gingharian” nag-uyog sa tibuok kalibotan.—Mat. 24:14.

8. Sumala sa Salmo 2:1-3, unsay reaksiyon sa kadaghanan sa mga nasod niini nga mensahe?

⁸ Unsay reaksiyon sa mga tawo niini nga mensahe? Kadaghanan nila nagsalikway niana. (Basaha ang Salmo 2:1-3.) Ang kanasoran wala mahimutang. Dili nila gustong dawaton ang Magmamando nga gitudlo ni Jehova. Wala nila isipa ang mensahe sa Gingharian nga atong gisangyaw ingong “maayong balita.” Gidili pa gani sa pipila ka gobyerno  ang buluhatong pagsangyaw! Bisag kadaghanan sa mga magmamando niining mga nasora nangangkon nga nag-alagad sa Diyos, dili nila gustong buhian ang ilang kaugalingong gahom ug awtoridad. Busa sama sa gihimo sa mga magmamando sa panahon ni Jesus, ang mga magmamando karon nagsupak sa Dinihogan ni Jehova pinaagi sa paglutos sa iyang maunongong mga sumusunod.—Buh. 4:25-28.

9. Kay dili maayo ang reaksiyon sa kanasoran, unsang kahigayonan ang gihatag ni Jehova kanila?

⁹ Kay dili maayo ang reaksiyon sa kanasoran, unsang kahigayonan ang gihatag ni Jehova kanila? Ang Salmo 2:10-12 nagtubag: “Busa karon, kamong mga hari, pagpakitag lawom nga pagsabot; pagpatul-id mo, kamong mga maghuhukom sa yuta. Alagara si Jehova uban ang kahadlok, ug pagsadya mo uban ang kataha. Pasidunggi ninyo ang anak, aron dili masuko ang Diyos ug mangahanaw mo sa dalan, kay ang Iyang kasuko dali rang mosilaob. Malipayon ang tanan nga modangop Kaniya.” Si Jehova maayo kaayo kay gihatagan niyag kahigayonan ang mga magsusupak sa paghimog hustong desisyon. Puwede pa silang magbag-o ug modesisyon nga dawaton ang Gingharian ni Jehova. Pero, mubo na lang ang nahibiling panahon. Nagkinabuhi na ta sa “kataposang mga adlaw” niining sistemaha sa mga butang. (2 Tim. 3:1; Isa. 61:2) Importante gyod kaayo nga molihok na ang mga tawo aron mahibalo sa kamatuoran ug mohimo sa hustong desisyon.

10. Sumala sa Haggeo 2:7-9, unsay maayong reaksiyon sa pipila tungod sa buluhatong pag-uyog?

¹⁰ Ang simbolikong pag-uyog nga gitagna ni Haggeo dunay positibong epekto sa pipila. Siya miingon nga tungod sa pag-uyog, “ang bililhong mga butang [sinserong mga tawo] sa tanang kanasoran manulod” aron mosimba kang Jehova. * (Basaha ang Haggeo 2:7-9.) Si Isaias ug Miqueas nagtagna ug susama niana nga kahimtang nga mahitabo “sa kataposang mga adlaw.”—Isa. 2:2-4, footnote; Miq. 4:1, 2, footnote.

11. Unsay gibuhat sa usa ka brader dihang nadunggan niya ang mensahe sa Gingharian?

 ¹¹ Konsideraha ang epekto niining kulbahinam nga mensahe ngadto sa brader nga si Ken, nga nag-alagad sa hedkuwarter. Nahinumdom pa kaayo siya sa unang higayon nga nadungog niya ang mensahe sa Gingharian mga 40 ka tuig kanhi. Si Ken miingon: “Dihang una nakong nadunggan ang kamatuoran sa Pulong sa Diyos, nalipay ko sa pagkahibalo nga nagkinabuhi na ta sa kataposang mga adlaw niining sistemaha sa mga butang. Nasabtan nako nga aron mabatonan ang pag-uyon sa Diyos ug ang kinabuhing walay kataposan, kinahanglan kong maningkamot nga dili mahimong bahin niining way kasegurohan nga kalibotan ug lig-ong mobarog dapig kang Jehova. Miampo ko kang Jehova ug gibuhat dayon kana. Gitalikdan nako ang kalibotan ug midangop dayon ko sa Gingharian sa Diyos, nga dili gyod matarog.”

12. Sa unsang paagi ang espirituwal nga templo ni Jehova napunog himaya niining kataposang mga adlaw?

¹² Klaro nga gipanalanginan ni Jehova ang iyang katawhan. Niining kataposang mga adlaw, nakita nato ang dakong pag-uswag sa gidaghanon sa iyang mga magsisimba. Niadtong 1914, pipila lang ta ka libo. Karon kapin nag walo ka milyon ang madasigong nagsimba sa Diyos, ug minilyon pa ang nakig-uban nato kada tuig sa pagsaulog sa Memoryal. Niining paagiha, ang yutan-ong bahin sa espirituwal nga templo ni Jehova—ang iyang kahikayan alang sa putling pagsimba—napuno sa “bililhong mga butang sa tanang kanasoran.” Ang ngalan ni Jehova nahimaya sab tungod sa mga kausaban nga ilang gihimo samtang naningkamot sila nga isul-ob ang bag-ong personalidad.—Efe. 4:22-24.

13. Unsang ubang tagna ang natuman tungod sa pag-uswag sa gidaghanon sa mga alagad ni Jehova? (Tan-awa ang hulagway sa atubangan sa magasin.)

¹³ Kining talagsaong mga pag-uswag nagtuman sa ubang tagna, sama nianang sa Isaias kapitulo 60. Ang bersikulo 22 nianang kapituloha nag-ingon: “Ang diyutay mahimong usa ka libo ug ang gamay mahimong gamhanang nasod. Ako, si Jehova, magpadali niini sa kaugalingong panahon niini.” Tungod sa pagdaghan sa matuod nga mga magsisimba, dunay maayo kaayong nahitabo. Kining “bililhong mga butang” nanulod dala ang lainlaing kahanas ug  katakos, ug andam silang makigbahin sa pagsangyaw sa “maayong balita sa Gingharian.” Busa, ingon sa gitagna ni Isaias, ang “gatas sa kanasoran” napahimuslan sa katawhan ni Jehova. (Isa. 60:5, 16) Sa tabang niining bililhong mga lalaki ug babaye, ang buluhatong pagsangyaw ginahimo diha sa 240 ka nasod ug ang mga literatura giimprenta diha sa kapig 1,000 ka pinulongan.

14. Unsang desisyon ang kinahanglang himoon sa mga tawo karon?

¹⁴ Kay giuyog ang kanasoran niining panahon sa kataposan, ang mga tawo kinahanglan nang modesisyon. Suportahan ba nila ang Gingharian sa Diyos, o mosalig ba sila sa mga gobyerno niining kalibotana? Kini maoy desisyon nga kinahanglang himoon sa tanan. Bisag ang katawhan ni Jehova nagsunod sa mga balaod sa gobyerno sa nasod nga ilang gipuy-an, bug-os silang nagpabiling neyutral sa politika niining kalibotana. (Roma 13:1-7) Nahibalo sila nga ang Gingharian lang ang tinuod nga solusyon sa mga problema sa katawhan. Kana nga Gingharian dili bahin niining kalibotana.—Juan 18:36, 37.

15. Unsang dakong pagsulay sa pagkamaunongon ang gihisgotan sa basahon sa Pinadayag?

¹⁵ Ang basahon sa Pinadayag naghisgot ug pagsulay sa pagkamaunongon nga atubangon sa katawhan sa Diyos sa kataposang mga adlaw. Kana nga pagsulay padayong magpahinabog grabeng pagsupak ug paglutos kanato. Pugson ta sa mga gobyerno niining kalibotana nga simbahon sila, ug lutoson nila kadtong dili mosuportar kanila. (Pin. 13:12, 15) Ilang ‘pugson ang tanang tawo—ang timawa ug halangdon, ang dato ug kabos, ang gawasnon ug ulipon—aron kini mamarkahan diha sa tuong kamot o sa agtang.’ (Pin. 13:16) Ang mga ulipon sa karaang panahon gimarkahan aron mailhan kon kinsay nanag-iya nila. Sa susama, ang tanan karon gidahom nga dunay simbolikong marka sa ilang kamot o agtang. Ang ilang mga hunahuna ug lihok magpakita nga ang gobyerno niining sistemaha maoy nanag-iya nila ug maoy ilang gisuportahan.

16. Nganong kinahanglan nga palig-onon nato karon ang atong pagkamaunongon kang Jehova?

¹⁶ Dawaton ba nato kining simbolikong marka ug suportahan ang mga gobyerno niining kalibotana? Kadtong dili modawat sa marka makasinatig mga kalisdanan ug kapeligrohan. Ang basahon sa Pinadayag nagpadayon: “Walay si bisan kinsa nga makapalit o makabaligya gawas sa tawong nakabaton sa marka.” (Pin. 13:17) Pero ang katawhan sa Diyos nahibalo kon unsay Iyang himoon niadtong nakabaton sa marka nga gihisgotan sa Pinadayag 14:9, 10. Busa imbes dawaton ang maong marka, samag gisulatan nila ang ilang kamot ug, “Iya ni Jehova.” (Isa. 44:5) Karon na ang panahon nga palig-onon nato ang atong pagkamaunongon kang Jehova. Kon ato nang buhaton, malipay gyong moingon si Jehova nga siyay nanag-iya nato!

17. Unsay angay natong hinumdoman bahin sa pailob ni Jehova?

¹⁷ Si Jehova nagpakitag taas nga pailob niining kataposang mga adlaw. Dili niya gusto nga dunay malaglag. (2 Ped. 3:9) Gihatagan niyag kahigayonan ang tanan sa paghinulsol ug paghimog hustong desisyon. Pero ang iyang pailob dunay kinutoban. Kadtong dili mosuportar sa Gingharian sa Diyos parehas ug maagoman sa Paraon sa panahon ni Moises. Si Jehova miingon sa Paraon: “Kon gisilotan pa ti ka ug ang imong katawhan pinaagig makamatayng sakit, nahanaw na unta ka sa yuta. Apan kini ang hinungdan nga gitugotan ti ka nga mabuhi: aron ipakita kanimo ang akong gahom ug aron mailhan  ang akong ngalan sa tibuok yuta.” (Ex. 9:15, 16) Sa ngadtongadto, ang tanang kanasoran mahibalo gayod nga si Jehova lang ang bugtong matuod nga Diyos. (Ezeq. 38:23) Sa unsang paagi mahitabo kana?

18. (a) Unsang laing klase sa pag-uyog ang gihisgotan sa Haggeo 2:6, 20-22? (b) Giunsa nato pagkahibalo nga ang mga pulong ni Haggeo dunay umaabot nga katumanan?

¹⁸ Daghang katuigan human mamatay si Haggeo, si apostol Pablo gigiyahan sa pagsulat nga ang mga pulong diha sa Haggeo 2:6, 20-22 dunay umaabot nga katumanan. (Basaha.) Si Pablo misulat: “Karon siya misaad: ‘Sa makausa pa akong uyogon dili lang ang yuta kondili ang langit usab.’ Ang ekspresyon nga ‘sa makausa pa’ nagpasabot nga wad-on ang mga butang nga nauyog, mga butang nga dili hinimo sa Diyos, aron magpabilin ang mga butang nga wala mauyog.” (Heb. 12:26, 27) Dili sama sa pag-uyog nga gihisgotan sa Haggeo 2:7, kini nga pag-uyog magpasabot ug walay kataposang kalaglagan niadtong dili modawat sa katungod ni Jehova sa pagmando, sama kang Paraon.

19. Unsay dili mauyog, ug giunsa nato pagkahibalo?

¹⁹ Unsay dili mauyog, o mawala? Si Pablo mipadayon: “Kay kita makadawat man ug Gingharian nga dili mauyog, padayon natong dawaton ang dili hitupngang pagkamaayo, nga pinaagi niini kita makahatag sa Diyos ug sagradong pag-alagad nga may kahadlok ug pagtahod.” (Heb. 12:28) Oo, dihang matapos na ang kataposang pag-uyog, ang Gingharian sa Diyos lang ang magpabilin. Kini dili gyod matarog!—Sal. 110:5, 6; Dan. 2:44.

20. Unsang desisyon ang kinahanglang himoon sa mga tawo, ug sa unsang paagi matabangan nato sila?

²⁰ Mubo na lang gyod ang panahon! Ang mga tawo kinahanglang modesisyon: Padayon ba nilang suportahan ang paagi sa pagkinabuhi nga gipasiugda niining kalibotana, nga moresultag kalaglagan, o maningkamot ba sila nga ipahiuyon ang ilang kinabuhi sa kabubut-on sa Diyos, nga moresultag kinabuhing walay kataposan? (Heb. 12:25) Pinaagi sa atong buluhatong pagsangyaw, matabangan nato ang mga tawo sa pagdesisyon kon unsay ilang dapigan niining importante nga isyu. Hinaot tabangan nato ang mas daghan pang bililhong mga tawo nga modapig sa Gingharian sa Diyos. Ug hinaot nga hinumdoman nato pirme ang giingon ni Ginoong Jesus: “Kining maayong balita sa Gingharian isangyaw sa tibuok yuta sa pagpamatuod ngadto sa tanang kanasoran, ug unya moabot ang kataposan.”—Mat. 24:14.