1-2. (a) Sumala sa Proverbio 16:31, unsay angay natong panglantaw sa atong matinumanong tigulang nga mga igsoon? (b) Unsang mga pangutana ang atong tubagon niining artikuloha?

ANG mga bisita sa usa ka parke sa Arkansas, U.S.A. makakita tingalig mga diamante nga naa ra sa yuta. Pero kini nga mga diamante wala pa mahashasi. Busa, daghan niadtong makakita niini dili tingali maghunahuna nga diamante ni, ug labyan lang nila kini.

² Sa pipila ka paagi, ang atong matinumanong tigulang nga mga igsoon sama niana nga mga diamante; sila bililhon kaayo. Sa Pulong sa Diyos, ang ilang uban gipakasama sa usa ka korona. (Basaha ang Proverbio 16:31; 20:29) Pero tingali, dili dayon nato mamatikdan nga bililhon sila. Ang mga batan-on nga nahibalo kon unsa ka bililhon ang mga tigulang makakuhag mas labaw pa kay sa literal nga bahandi. Niining artikuloha, tubagon nato ang tulo ka pangutana: Nganong giisip ni Jehova nga bililhon ang matinumanong tigulang nga mga igsoon? Nganong importante sila sa organisasyon ni Jehova? Unsay atong mahimo aron makabenepisyo ta pag-ayo sa ilang ehemplo?

3. Base sa Salmo 92:12-15, nganong ang matinumanong mga tigulang bililhon kang Jehova?

³ Ang matinumanong mga tigulang bililhon kang Jehova nga Diyos. Nahibalo siya kon unsa silang matanga sa mga tawo, ug gipabilhan niya ang ilang nindot nga mga hiyas. Malipay siya dihang ipasa sa mga tigulang ngadto sa mga batan-on ang kaalam nga ilang nabatonan sa daghang tuig nga matinumanong  pag-alagad. (Job 12:12; Prov. 1:1-4) Gipabilhan sab ni Jehova ang ilang paglahutay. (Mal. 3:16) Nakasinati silag mga problema, pero ang ilang pagtuo kang Jehova wala gyod mohuyang. Ang ilang paglaom sa umaabot mas milig-on pa kon itandi niadtong una nilang nahibaloan ang kamatuoran. Ug gimahal sila ni Jehova kay padayon nilang gimantala ang iyang ngalan “bisan sa ilang pagkatigulang.”—Basaha ang Salmo 92:12-15.

4. Unsay makadasig sa atong tigulang nga mga igsoon?

⁴ Kon nagkatigulang ka na, magmasaligon nga si Jehova nahinumdom sa tanan nimong nahimo kaniadto. (Heb. 6:10) Madasigon nimong gisuportahan ang buluhatong pagsangyaw, ug kana nakapalipay sa atong langitnong Amahan. Milahutay ka sa mga kalisdanan, bisan niadtong makapaguol kaayo. Gisunod ug gidepensahan sab nimo ang matarong nga mga sukdanan sa Bibliya, matinumanong giatiman ang bug-at nga mga responsibilidad, ug gibansay ang uban. Gihimo nimo ang imong kinamaayohan aron maka-adjust sa daghang kausaban sa organisasyon ni Jehova. Imong gisuportahan ug gidasig ang uban nga naa sa bug-os panahong pag-alagad. Gimahal kaayo ka ni Jehova nga Diyos tungod sa imong pagkamaunongon. Siya nagsaad nga “dili niya biyaan ang mga maunongon kaniya”! (Sal. 37:28) Gipasaligan ka niya: “Hangtod sa imong pagkaubanon, ako padayong magpas-an kanimo.” (Isa. 46:4) Busa ayaw paghunahuna nga kay tigulang na ka, dili na ka importante sa organisasyon ni Jehova. Bililhon gihapon kaayo ka!

5. Unsay angayng hinumdoman sa mga tigulang?

⁵ Ang mga tigulang mapuslanon kaayo. Bisag luya na tingali sila, daghan kaayo silag eksperyensiya sa pag-alagad sulod sa daghang katuigan. Gamiton gihapon sila ni Jehova sa lainlaing paagi, ingon sa gipakita sa mosunod nga mga pananglitan kaniadto ug karon.

6-7. Paghatag ug mga pananglitan sa Bibliya sa mga tigulang nga gipanalanginan tungod sa ilang maunongong pag-alagad.

⁶ Sa Bibliya, dunay daghang maayong ehemplo niadtong matinumanong nag-alagad kang Jehova bisag tigulang na. Pananglitan,  si Moises mga 80 anyos na dihang nagsugod siya sa pag-alagad ingong propeta ug representante ni Jehova sa nasod sa Israel. Ang propetang si Daniel gigamit gihapon ni Jehova ingong Iyang tigpamaba bisan dihang tingali kapin na siyag 90 anyos. Ug si apostol Juan posibleng kapin na sab sa 90 anyos dihang gigiyahan siya ni Jehova sa pagsulat sa basahon sa Pinadayag.

⁷ Daghan pang matinumanong mga tigulang ang wala kaayo mailhi, ug tingali wala kaayo sila mamatikdi sa mga tawo. Pero namatikdan sila ni Jehova ug gipanalanginan niya sila tungod sa ilang pagkamaunongon. Pananglitan, ang ‘matarong ug diyosnong’ tawo nga si Simeon kadiyot ra hisgoti sa Bibliya, pero si Jehova nakaila niya ug gihatagan siyag pribilehiyo nga makita ang batang si Jesus ug managna bahin sa bata ug sa inahan niini. (Luc. 2:22, 25-35) Hunahunaa sab ang balong propeta nga si Ana. Siya 84 anyos na pero “wala gayod siya mopalta sa templo.” Tungod sa iyang kanunayng “pagtambong sa tigom,” siya gipanalanginan pag-ayo kay nakita sab niya ang batang si Jesus. Si Simeon ug Ana parehong bililhon kang Jehova.—Luc. 2:36-38.

8-9. Unsa gihapoy mahimo sa mga biyuda?

⁸ Karon, daghang matinumanong tigulang ang maayo kaayong ehemplo sa mga batan-on. Konsideraha ang eksperyensiya ni Sister Lois Didur. Siya 21 anyos lang dihang nahimo siyang espesyal payunir sa Canada. Human niana, siya ug ang iyang bana nga si John naasayn sa nagapanawng buluhaton sulod sa daghang tuig. Dayon, nag-alagad sila sa Canada Bethel sulod sa kapig 20 ka tuig. Pagka-58 anyos ni Lois, sila ni John gidapit nga mag-alagad sa Ukraine. Unsa kahay ilang himoon? Maghunahuna ba sila nga dili na nila kayang mag-alagad sa laing nasod tungod sa ilang edad? Gidawat nila ang asaynment, ug si John natudlo ingong membro sa Komite sa Sangang Buhatan didto. Paglabayg pito ka tuig, namatay si John, pero si Lois nagpabilin sa iyang asaynment. Karon, 81 anyos na si Lois. Matinumanon gihapon siyang nag-alagad uban sa pamilyang Bethel sa Ukraine, ug gimahal kaayo nila siya.

⁹ Ang mga biyuda nga sama ni Lois tingali dili na kaayo mamatikdan kon itandi niadtong buhi pa ang ilang bana. Bisan pa niana, bililhon gihapon kaayo sila. Gipabilhan pag-ayo ni Jehova ang mga sister nga misuportar sa ilang bana sulod sa daghang katuigan ug karon padayong nag-alagad Kaniya nga maunongon. (1 Tim. 5:3) Dugang pa, sila makadasig sa mga batan-on.

10. Unsang maayo kaayong ehemplo ang gipakita ni Tony?

¹⁰ Ang matinumanong mga tigulang nga naa na sa mga nursing home o dili na makagawasgawas sa balay bililhon gihapon kaayo. Pananglitan, ang brader nga si Tony nagpuyo na sa usa ka nursing home. Nabawtismohan siya sa Pennsylvania, U.S.A., niadtong Agosto 1942 sa edad nga 20. Wala madugay, nakaatubang  siyag isyu maylabot sa neyutralidad, ug ingong resulta, napriso siyag duha ka tuig ug tunga. Siya ug ang iyang asawa nga si Hilda nagpadako sa ilang duha ka anak diha sa kamatuoran. Latas sa katuigan, si Tony nakaalagad sa tulo ka kongregasyon ingong nagadumalang magtatan-aw (karon koordinetor sa mga ansiyano) ug ingong tigdumala sa sirkitong asembliya. Nakadumala siyag mga tigom ug mga pagtuon sa Bibliya diha sa usa ka prisohan. Karon, 98 anyos na si Tony, pero aktibo gihapon siya sa pag-alagad. Padayon siyang naghimo sa iyang kinamaayohan sa pag-alagad kang Jehova uban sa mga igsoon sa iyang kongregasyon!

11. Unsaon nato pagpakita nga atong gipabilhan ang mga tigulang nga nagpuyo sa mga nursing home o kadtong dili na makagawasgawas sa balay?

¹¹ Unsaon nato pagpakita nga atong gipabilhan ang mga tigulang nga nagpuyo sa mga nursing home o kadtong dili na makagawasgawas sa balay? Puwede silang iapil sa mga ansiyano sa mga kalihokan sa kongregasyon kutob sa mahimo. Ikapakita nato nga interesado ta kanila pinaagi sa pagbisita o pag-video call nila. Ilabinang hatagan natog pagtagad ang mga tigulang nga tingali nagpuyo sa mga nursing home nga layo sa ilang kongregasyon. Kinahanglang maningkamot ta nga dili makalimtan ang maong mga tigulang. Ang pipila kanila malisdan tingali sa pag-estorya bahin sa ilang kaugalingon o maghunahuna nga dili kini angayng himoon. Pero makabenepisyo kaayo ta kon mogahin tag panahon sa pagpangutana kanila ug sa pagpaminaw dihang mosulti sila bahin sa kalipay nga ilang naeksperyensiyahan sa organisasyon ni Jehova.

12. Unsay atong makita sa atong kongregasyon?

¹² Masorpresa tingali ta nga naa diay maayo kaayong mga ehemplo sa matinumanong mga tigulang diha sa atong kongregasyon. Ang sister nga si Harriette matinumanong nag-alagad kang Jehova sulod sa daghang katuigan sa iyang kongregasyon sa New Jersey, U.S.A. Dayon, miipon siya sa iyang anak nga babaye nga nagpuyo sa laing lugar. Ang mga igsoon sa iyang bag-ong kongregasyon naggahin ug panahon nga mailhan siya, ug ilang nahibaloan nga daghan diay siyag nindot kaayong mga eksperyensiya. Nadasig sila sa iyang mga estorya bahin sa pagsangyaw dihang bag-o pa niyang nakat-onan ang kamatuoran niadtong mga 1925. Niadtong panahona, pirme siyang magdaladalag toothbrush dihang magsangyaw—enkasog madakpan siya. Gani, duha ka higayon niadtong 1933 nga napriso siyag usa ka semana. Niadtong mga panahona, ang iyang dili Saksi pero matinabangong bana maoy nag-atiman sa ilang tulo ka gagmayng anak. Ang matinumanong mga tigulang nga sama kang Harriette angay gyong pabilhan!

13. Unsay atong nakat-onan bahin sa pagkabililhon sa mga tigulang diha sa organisasyon ni Jehova?

¹³ Ang atong tigulang nga mga igsoon importante kang Jehova ug sa iyang organisasyon. Nakita nila ang lainlaing paagi nga gipanalanginan ni Jehova ang iyang organisasyon ug sila mismo. Nakakat-on silag importanteng mga leksiyon sa mga kasaypanan nga ilang nahimo. Isipa sila ingong “tuboran sa kaalam,” ug pagkat-on gikan kanila. (Prov. 18:4) Kon maggahin kag panahon nga mailhan sila, mapalig-on ang imong pagtuo ug daghan kag makat-onan!

14. Unsay gidasig sa Deuteronomio 32:7 nga buhaton sa mga batan-on?

¹⁴ Pakig-estorya sa mga tigulang. (Basaha ang Deuteronomio 32:7.) Tinuod, hanap na tingali ang ilang panan-aw ug hinay na tingali ang ilang linakwan ug sinultihan, pero daghan  pa gihapon silag gustong buhaton ug nakahimo silag “maayong ngalan” kang Jehova. (Eccl. 7:1) Hinumdomi kon nganong gipabilhan sila ni Jehova. Padayon silang tahora. Sundoga si Eliseo. Miinsistir siya nga dili mobiya kang Elias sa kataposang adlaw nga magkauban sila. Tulo ka beses nga miingon si Eliseo: “Dili ka nako biyaan.”—2 Hari 2:2, 4, 6.

15. Unsay puwede natong ipangutana sa mga tigulang?

¹⁵ Ipakita ang sinserong interes sa mga tigulang pinaagi sa matinahorong pagpangutana kanila. (Prov. 1:5; 20:5; 1 Tim. 5:1, 2) Pananglitan, puwede nimo silang pangutan-on: “Sa batabata pa ka, unsay nakapakombinsir nimo nga nakaplagan nimo ang kamatuoran?” “Sa unsang paagi ang imong mga kasinatian mas nakapasuod nimo kang Jehova?” “Unsay nakatabang nimo sa pagpabiling malipayon sa pag-alagad kang Jehova?” (1 Tim. 6:6-8) Dayon, paminaw samtang isulti nila ang ilang kasinatian.

16. Sa unsang paagi madasig ang tigulang ug ang batan-on sa dihang mag-estoryahanay sila?

¹⁶ Sa dihang ang tigulang ug ang batan-on mag-estoryahanay, pareho silang madasig. (Roma 1:12) Sa bahin ninyong mga batan-on, mas molalom ang inyong apresasyon sa pag-atiman ni Jehova sa iyang matinumanong mga alagad, ug ang tigulang mobati nga gimahal siya. Ganahan siyang moestorya ninyo kon giunsa siya pagpanalangin ni Jehova.

17. Nganong makaingon ta nga ang matinumanong mga tigulang mahimong mas matahom sa paglabay sa mga katuigan?

¹⁷ Ang pisikal nga katahom sagad mawala kon matigulang na, pero kadtong maunongon kang Jehova mahimong mas matahom kaniya sa matag tuig nga molabay. (1 Tes. 1:2, 3) Ngano? Tungod kay latas sa katuigan, ilang gitugotan ang espiritu sa Diyos sa pagbansay kanila ug pagtabang nila nga maugmad ang nindot nga mga hiyas. Kon mas mailhan nato ang atong minahal nga tigulang nga mga igsoon, tahoron sila, ug mokat-on gikan kanila, mas labaw pa nato silang pabilhan!

18. Unsay atong hisgotan sa sunod nga artikulo?

¹⁸ Ang kongregasyon mas molig-on dili lang dihang pabilhan sa mga batan-on ang mga tigulang, kondili sa dihang pabilhan pod sa mga tigulang ang mga batan-on. Sa sunod nga artikulo, atong hisgotan kon sa unsang paagi ikapakita sa mga tigulang nga ilang gipabilhan ang mga batan-on sa kongregasyon.