1. Unsay gibati sa pipila sa dihang na-disfellow ang ilang minahal?

DUNA ka bay minahal nga na-disfellow? Makapaguol kaayo nâ! “Sa dihang ang akong maunongong bana namatay human sa 41 ka tuig namong kaminyoon,” miingon ang sister nga si Hilda, “abi nakog mao to ang pinakasakit nga kasinatian. * Pero sa dihang ang akong anak mibiya sa kongregasyon, sa iyang asawa, ug sa iyang mga anak, labaw pa gyod niana ang kaguol nga akong gibati.”

2-3. Sumala sa Salmo 78:40, 41, unsay bation ni Jehova dihang ang iyang mga alagad mobiya kaniya?

² Hunahunaa ang kaguol ni Jehova sa dihang ang pipila niya ka anak nga mga anghel mibiya kaniya! (Jud. 6) Ug imadyina ang kasakit nga iyang gibati dihang nakita niya ang iyang minahal nga katawhan, ang mga Israelinhon, nga sublisubling mirebelde kaniya. (Basaha ang Salmo 78:40, 41.) Makaseguro ka nga ang atong mahigugmaong langitnong Amahan masakitan sab sa dihang ang imong minahal mobiya kaniya. Masabtan niya ang kaguol nga imong bation. Mabination niyang itagana ang pagdasig ug tabang nga imong gikinahanglan.

³ Niining artikuloha, atong hisgotan kon unsay atong mahimo aron madawat ang tabang ni Jehova dihang ang atong minahal mohunong sa pag-alagad kaniya. Susihon sab nato kon sa unsang paagi makatabang ta sa uban diha sa kongregasyon nga nag-atubang niana nga kahimtang. Pero hisgotan una nato ang negatibong panghunahuna nga angay natong likayan.

4. Unsay gibati sa daghang ginikanan dihang ang ilang anak mibiya kang Jehova?

⁴ Sa dihang ang usa ka minahal nga anak mobiya kang Jehova, sagad maghunahuna ang ginikanan nga unta duna pa silay gihimo  aron matabangan ang ilang anak nga magpabilin sa kamatuoran. Human ma-disfellow ang iyang anak nga lalaki, ang brader nga si Luke miingon: “Gibasol nako ang akong kaugalingon. Damandamanon pa gani ko tungod sa pagsigeg hunahuna niana. Usahay mohilak ko ug maguol pag-ayo.” Si Elizabeth, sister nga nag-atubang ug susamang kahimtang, sagad maghunahuna: “Unsa may akong sayop? Gibati nako nga napakyas ko sa pagsilsil sa kamatuoran diha sa akong anak.”

5. Kon ang usa ka tawo mobiya kang Jehova, kang kinsa nang sayop?

⁵ Angay natong hinumdoman nga gihatagan ni Jehova ang matag usa kanato ug kagawasan sa pagpili. Nagpasabot ni nga makapili ta kon sundon ba nato siya o dili. Ang pipila ka batan-on nga wala magdako sa ginikanan nga maayong ehemplo mipili sa pag-alagad kang Jehova ug nagpabiling matinumanon kaniya. Ang uban, kansang ginikanan naningkamot pag-ayo sa pagpadako kanila sumala sa mga prinsipyo sa Bibliya, mibiya sa kamatuoran dihang dagko na sila. Busa, ang matag usa kanato mao gyoy modesisyon kon moalagad ba ta kang Jehova. (Jos. 24:15) Kon naguol ka kay ang imong anak mibiya kang Jehova, ayawg hunahunaa nga imo nang sayop!

6. Unsa kahay bation sa anak kon ang iyang ginikanan mobiya sa Diyos?

⁶ Usahay, ang usa ka ginikanan mobiya sa kamatuoran ug bisan sa iyang pamilya. (Sal. 27:10) Sakit kaayo ni para sa mga anak kinsa nag-isip sa ilang ginikanan ingong ehemplo. Si Esther, kansang amahan na-disfellow, miingon: “Pirme kong maghilak kay naamgohan nako nga dili anam-anam ang iyang pagbiya sa kamatuoran. Tinuyo siyang midesisyon nga mobiya kang Jehova. Gimahal nako si Papa, busa sa dihang na-disfellow siya, pirme kong mabalaka sa iyang kahimtang. Nakaeksperyensiya pa gani kog mga panic attack.”

7. Unsay pagbati ni Jehova sa mga batan-on kansang ginikanan na-disfellow?

⁷ Mga batan-on, kon ma-disfellow ang usa sa inyong ginikanan, masakitan pod mi! Makaseguro mo nga nahibalo sab si Jehova sa kasakit nga inyong gibati. Gimahal mo niya ug nalipay siya nga nagmaunongon mo kaniya. Ug kami, nga mga igsoon ninyo sa pagtuo, nalipay sab. Hinumdomi pod nga dili kamo ang responsable sa desisyon sa inyong ginikanan. Sa gihisgotan ganina, gihatagan ni Jehova ang matag usa ug kagawasan sa pagpili. Ug ang matag dedikado ug bawtismadong indibiduwal kinahanglang “magpas-an sa iyang kaugalingong responsibilidad.”—Gal. 6:5, footnote.

8. Unsay mahimo sa matinumanong mga membro sa pamilya samtang magpaabot nga ang ilang minahal mobalik kang Jehova? (Tan-awa sab ang kahong “ Balik Kang Jehova.”)

⁸ Kon ang imong minahal mobiya kang Jehova, natural lang nga maglaom ka nga moabot ang adlaw nga mobalik siya Kaniya. Samtang magpaabot niana, unsay imong mahimo? Puwede nimong palig-onon ang imong espirituwalidad. Kon buhaton nimo kana, makapakita kag maayong ehemplo sa ubang membro sa pamilya ug tingali bisan niadtong na-disfellow. Mabatonan sab nimo ang kusog nga gikinahanglan sa paglahutay sa kasakit nga imong gibati. Hisgotan nato ang pipila ka praktikal nga butang nga imong mahimo.

9. Sa unsang mga paagi mapalig-on ka ni Jehova? (Tan-awa sab ang kahong “ Makapahupayng mga Teksto kon ang Imong Minahal Mibiya Kang Jehova.”)

⁹ Padayona ang maayong espirituwal nga rutina. Importante kaayo nga padayon nimong lig-onon ang imong kaugalingon ug ang ubang membro sa pamilya. Sa unsang paagi mahimo nimo kana? Pangayog kusog kang Jehova pinaagi sa pagpadayon sa imong rutina sa pagbasa sa Pulong sa Diyos ug pagpamalandong niana, maingon man sa pagtambong sa mga tigom. Si Joanna, kansang amahan ug igsoong babaye mibiya sa kamatuoran, miingon: “Mobati kog kalinaw sa hunahuna dihang magbasa ko bahin sa mga karakter sa Bibliya sama kang Abigail, Ester, Job, Jose, ug Jesus. Ang ilang ehemplo nakadasig ug nakatabang nako nga magmapositibo. Nakadasig sab kaayo nako ang atong orihinal nga mga kanta.”

10. Sa unsang paagi ang Salmo 32:6-8 makatabang nato sa paglahutay sa atong kaguol?

¹⁰ Isulti kang Jehova ang tanan nimong kabalaka. Dihang maguol ka, ayawg hunong sa pag-ampo kaniya. Hangyoa ang atong mahigugmaong Diyos nga tabangan ka nga masundog ang iyang panglantaw sa imong kahimtang ug ‘hatagan kag lawom nga pagsabot ug tudloan sa dalan nga angay nimong laktan.’ (Basaha ang Salmo 32:6-8.) Siyempre, sakit tingali kaayo para nimo nga isulti kang Jehova kon unsa gyoy imong gibati. Pero si Jehova makasabot gyod sa imong gibating kasakit. Gimahal ka niya pag-ayo, ug giawhag ka niya nga ibubo ang imong kasingkasing kaniya.—Ex. 34:6; Sal. 62:7, 8.

11. Sumala sa Hebreohanon 12:11, nganong angay tang mosalig sa mahigugmaong disiplina ni Jehova? (Tan-awa sab ang kahong “ Ang Pag-disfellow—Mahigugmaong Disiplina ni Jehova.”)

¹¹ Suportahi ang desisyon sa mga ansiyano. Ang pag-disfellow maoy bahin sa kahikayan  ni Jehova. Ang iyang mahigugmaong disiplina maoy para sa kaayohan sa tanan, apil na sa nakasala. (Basaha ang Hebreohanon 12:11.) Ang pipila diha sa kongregasyon moingon tingali nga sayop ang desisyon sa mga ansiyano nga i-disfellow ang usa ka indibiduwal. Pero hinumdomi nga kadtong nagkuwestiyon sa desisyon sa mga ansiyano sagad dili mosultig negatibong mga butang bahin sa tawong nakasala. Wala ta mahibalo sa tanang detalye. Busa, salig nga ang mga ansiyano sa hudisyal nga komite naningkamot gyod sa pagsunod sa mga prinsipyo sa Bibliya ug sa paghukom “alang kang Jehova.”—2 Cron. 19:6.

12. Unsang mga kaayohan ang naeksperyensiyahan sa pipila dihang gisuportahan nila ang kahikayan ni Jehova sa pagdisiplina?

¹² Pinaagi sa pagsuportar sa desisyon sa mga ansiyano nga i-disfellow ang imong minahal, mahimong matabangan nimo siya nga mobalik kang Jehova. “Lisod gyod para namo nga dili makig-uban sa among hingkod na nga anak,” miingon si Elizabeth, nga gihisgotan ganina. “Pero dihang mibalik na siya kang Jehova, siya miingon nga angay lang siyang ma-disfellow. Ngadtongadto, siya miingon nga daghan siyag nakat-onan nga maayong mga leksiyon. Akong nakita nga husto gyod ang disiplina ni Jehova,” matod ni Elizabeth. Ang iyang bana nga si Mark midugang: “Sa ulahi, giingnan mi sa among anak nga usa sa mga rason nga mibalik siya mao ang paghunong namo sa pagpakig-uban kaniya. Nalipay kaayo ko nga gitabangan mi ni Jehova nga magmasinugtanon.”

13. Unsay makatabang nimo sa pag-atubang sa kasakit nga imong gibati?

¹³ Pakig-estorya sa masinabtanong mga higala. Pakig-uban sa hamtong nga mga igsoon nga makatabang nimo sa pagpabiling positibo. (Prov. 12:25; 17:17) Si Joanna, nga gihisgotan ganina, miingon: “Mibati kong nag-inusara. Pero ang pagpakigsulti sa kasaligang mga higala nakatabang gyod nako.” Apan unsay imong mahimo kon ang pipila diha sa kongregasyon mosultig mga butang nga makapasamot sa imong kaguol?

14. Nganong angay tang ‘magpadayon sa pagpailob sa usag usa ug kinasingkasing nga magpinasayloay’?

¹⁴ Magmapailobon sa mga igsoon. Dili ta makadahom nga kanunayng husto ang ilang isulti. (Sant. 3:2) Kitang tanan dili hingpit, busa ayawg katingala kon ang pipila dili kabalo kon unsay isulti o makasulti pa ganig sakit nga mga pulong. Hinumdomi ang tambag ni apostol Pablo: “Padayon sa pagpailob sa usag usa ug kinasingkasing nga magpinasayloay kon ang usa dunay reklamo batok sa lain.” (Col. 3:13) Ang usa ka sister kansang anak na-disfellow miingon: “Gitabangan ko ni Jehova sa pagpasaylo sa mga igsoon kinsa naningkamot sa pagdasig nako pero nakapasakit hinuon nako.” Unsay mahimo sa kongregasyon sa pagtabang sa matinumanong mga membro sa pamilya?

15. Unsay atong mahimo sa pagtabang sa mga membro sa pamilya kansang minahal bag-o lang na-disfellow?

¹⁵ Mahigugmaong abiabiha ang matinumanong mga membro sa pamilya. Ang sister nga si  Miriam miingon nga dili siya komportableng motambong sa mga tigom human ma-disfellow ang iyang igsoong lalaki. “Nahadlok ko kon unsay isulti sa mga igsoon. Pero dihay daghang igsoon nga naguol sab, ug wala sila masuko sa akong igsoon nga na-disfellow. Tungod nila, wala ko mag-inusara sa akong kaguol.” Ang laing sister miingon: “Human ma-disfellow ang among anak nga lalaki, giduaw mi sa mga igsoon aron hupayon mi. Ang pipila miingon nga wala sila kabalo kon unsay isulti. Sila mihilak uban nako o nagpadalag makapadasig nga sulat. Nakatabang gyod to nako!”

16. Sa unsang paagi ang kongregasyon padayong makasuportar sa pamilya niadtong na-disfellow?

¹⁶ Padayong suportahi ang matinumanong mga membro sa pamilya. Mas gikinahanglan nila karon ang inyong gugma ug pagdasig. (Heb. 10:24, 25) Usahay, ang mga membro sa pamilya niadtong na-disfellow mibati nga ang pipila diha sa kongregasyon dili na pod makig-estorya nila, nga mora bag na-disfellow sab sila. Dili nato gustong mobati silag ingon niana! Ang mga batan-on kansang ginikanan mibiya sa kamatuoran ilabinang nagkinahanglag komendasyon ug pagdasig. Si Maria, kansang bana na-disfellow ug mibiya sa pamilya, miingon: “Ang pipila ka igsoon mianhi sa among balay ug naglutog pagkaon, ug gitabangan mi nila sa among pamilyahanong pagsimba. Gibati nila ang akong kasakit ug mihilak sila uban nako. Gidepensahan ko nila dihang dunay mosultig dili tinuod nga tabi bahin kanako. Nadasig gyod ko nila!”—Roma 12:13, 15.

17. Sa unsang paagi ang mga ansiyano makahupay niadtong magul-anon?

¹⁷ Mga ansiyano, gamita ang tanang kahigayonan nga inyong makita sa pagpalig-on sa matinumanong mga membro sa pamilya. Duna moy talagsaong responsibilidad sa paghupay sa mga igsoon kansang mga minahal mibiya kang Jehova. (1 Tes. 5:14) Pakig-estorya nila una ug human sa tigom aron dasigon sila. Duawa sila ug pag-ampo uban kanila. Pakig-uban nila sa ministeryo, o kaha imbitaha sila nga moapil usahay sa inyong pamilyahanong pagsimba. Ang espirituwal nga mga magbalantay kinahanglang magpakitag kaluoy, gugma, ug pagtagad sa naguol nga mga karnero ni Jehova.—1 Tes. 2:7, 8.

18. Sumala sa 2 Pedro 3:9, unsay gusto ni Jehova para niadtong nakahimog seryosong sala?

¹⁸ ‘Dili gusto ni Jehova nga naay malaglag kondili gusto niya nga ang tanan maghinulsol.’ (Basaha ang 2 Pedro 3:9.) Bisag ang usa ka tawo makahimo tingalig seryosong sala, ang iyang kinabuhi bililhon gihapon sa Diyos. Hunahunaa ang dako kaayong bili nga gibayad ni Jehova alang sa matag usa kanato—ang halad lukat sa iyang minahal nga Anak. Si Jehova mahigugmaong naningkamot sa pagtabang niadtong nakahimog seryosong sala nga mobalik kaniya. Siya naglaom nga ila nang himoon, sama sa atong makita sa ilustrasyon ni Jesus bahin sa nawalang anak. (Luc. 15:11-32) Daghan niadtong mibiya sa kamatuoran ang mibalik sa ulahi sa ilang mahigugmaong langitnong Amahan. Ug ang kongregasyon nalipay kaayo sa pagdawat kanila. Si Elizabeth, nga gihisgotan ganina, nalipay kaayo dihang ang iyang anak napasig-uli. Siya miingon, “Naapresyar gyod nako ang mga igsoon nga nagdasig namo nga dili wad-on ang among paglaom.”

19. Nganong makasalig ta kanunay kang Jehova?

¹⁹ Kanunay tang makasalig kang Jehova. Dili gyod siya maghatag ug sugo nga makadaot nato. Siya mahinatagon ug maluluy-ong Amahan kinsa nahigugma pag-ayo sa tanan nga nahigugma ug nagsimba kaniya. Makasalig ka nga dili ka biyaan ni Jehova sa panahon nga magul-anon ka. (Heb. 13:5, 6) “Wala gyod mi biyai ni Jehova,” miingon si Mark, nga gihisgotan ganina. “Tabangan gyod ta niya dihang makasinati tag mga problema.” Si Jehova padayong maghatag nimog “gahom nga labaw sa kasarangan.” (2 Cor. 4:7) Oo, makapabilin kang matinumanon ug malaomon bisan dihang ang imong minahal mobiya kang Jehova.