1. Sumala sa Malaquias 3:16, unsa nga basahon ang padayong gisulat ni Jehova, ug unsay nasulat dinhi?

 SA LIBOLIBO na ka tuig, si Jehova padayong nagsulat ug espesyal nga basahon. Kini nga basahon dunay mga ngalan, ug ang unang nasulat dinhi mao ang ngalan sa unang matinumanong saksi, si Abel. b (Luc. 11:50, 51) Sukad adto, si Jehova padayong nagdugang ug mga ngalan sa maong basahon, ug karon minilyon na nga ngalan ang nasulat dinhi. Sa Bibliya, ang maong basahon gitawag ug “basahon sa handomanan,” “basahon sa kinabuhi,” ug “linukot nga basahon sa kinabuhi.” Niining artikuloha, gamiton nato ang terminong “basahon sa kinabuhi.”​—Basaha ang Malaquias 3:16; Pin. 3:5; 17:8.

2. Kang kinsang ngalan ang nasulat sa basahon sa kinabuhi, ug unsay atong himoon aron masulat ang atong ngalan sa maong basahon?

² Nasulat niining espesyal nga basahon ang mga ngalan sa tanang nagsimba kang Jehova uban ang kahadlok, o dakong pagtahod, ug nahigugma sa iyang ngalan. Duna silay kahigayonan nga makadawat ug kinabuhing walay kataposan. Karon, posible pod nga masulat ang atong ngalan niana nga basahon kon naa tay suod nga relasyon kang Jehova pinasukad sa halad lukat sa iyang Anak, si Jesu-Kristo. (Juan 3:16, 36) Gusto natong tanan nga masulat ang atong ngalan niana nga basahon​—sa langit man o sa yuta ang atong paglaom.

3-4. (a) Mabuhi ba ta hangtod sa hangtod kon ang atong ngalan nasulat na sa basahon sa kinabuhi? Ipatin-aw. (b) Unsay atong hisgotan niini nga artikulo ug sa sunod nga artikulo?

³ Nagpasabot ba ni nga kadtong tanan nga ang ngalan nasulat  niini nga basahon segurado nang makadawat ug kinabuhing walay kataposan? Ang tubag makita sa giingon ni Jehova kang Moises sa Exodo 32:33. Si Jehova miingon: “Bisan kinsa nga nakasala nako, papason nako sa akong basahon.” Busa ang mga ngalan nga naa niini nga basahon puwedeng papason. Mora bag sa pagkakaron, gisulat ni Jehova ang mga ngalan pinaagig lapis. (Pin. 3:5) Angay natong paneguroon nga ang atong ngalan magpabilin sa maong basahon, hangtod nga permanente ning masulat, nga samag gisulat ni pinaagig bolpen.

⁴ Tingali naay mga pangutana nga motungha. Pananglitan, unsay giingon sa Bibliya bahin niadtong nasulat ang mga ngalan sa basahon sa kinabuhi ug niadtong wala masulat didto? Kanus-a man makadawat ug kinabuhing walay kataposan kadtong nasulat ang ngalan sa maong basahon? Komosta kadtong mga namatay nga wala makabaton ug kahigayonan nga mailhan si Jehova? Posible ba nga masulat ang ilang ngalan sa maong basahon? Tubagon ni niini nga artikulo ug sa sunod nga artikulo.

KANG KINSANG MGA NGALAN ANG NAA SA BASAHON?

5-6. (a) Base sa Filipos 4:3, kang kinsang mga ngalan ang apil sa mga nasulat sa basahon sa kinabuhi? (b) Kanus-a permanenteng masulat ang ilang ngalan sa basahon sa kinabuhi?

⁵ Kang kinsang mga ngalan ang nasulat niini nga basahon? Aron matubag nâ, hisgotan nato ang lima ka grupo sa mga tawo. Ang uban nila naa nay ngalan diha sa basahon sa kinabuhi, ang uban wala.

⁶ Ang unang grupo mao kadtong gipili nga magmando uban ni Jesus sa langit. Nasulat na ba ang ilang ngalan sa basahon sa kinabuhi? Oo. Sumala sa giingon ni apostol  Pablo ngadto sa iyang mga “isigkamagbubuhat” sa Filipos, ang ngalan sa mga dinihogan, nga gidapit nga magmando uban ni Jesus, nasulat na sa basahon sa kinabuhi. (Basaha ang Filipos 4:3.) Pero aron dili mapapas ang ilang ngalan niana nga basahon, kinahanglang magpabilin silang matinumanon. Dayon dihang madawat na nila ang ilang kataposang selyo, sa dili pa sila mamatay o kaha sa dili pa magsugod ang dakong kasakitan, ang ilang ngalan permanente nang masulat niini nga basahon.​—Pin. 7:3.

7. Base sa Pinadayag 7:16, 17, kanus-a permanenteng masulat sa basahon sa kinabuhi ang mga ngalan sa dakong panon sa ubang mga karnero?

⁷ Ang ikaduhang grupo mao ang dakong panon sa ubang mga karnero. Ang ila bang ngalan nasulat na sa basahon sa kinabuhi? Oo. Magpabilin ba ang ilang ngalan sa basahon sa kinabuhi human sila maluwas sa Armagedon? Oo. (Pin. 7:14) Si Jesus miingon nga kini sila nga samag karnero “makadawat ug kinabuhing walay kataposan.” (Mat. 25:46) Pero kadtong maluwas sa Armagedon dili dihadiha makadawat ug kinabuhing walay kataposan. Ang ilang ngalan nasulat sa basahon sa kinabuhi, pero samag lapis pa ang gigamit sa pagsulat. Panahon sa Usa ka Libo ka Tuig nga Pagmando, si Jesus “magbantay kanila ug magtultol kanila ngadto sa mga tubod sa mga tubig sa kinabuhi.” Kon mosunod sila sa paggiya sa Kristo ug sa ulahi mahukmang matinumanon kang Jehova, ang ilang ngalan permanente nang masulat sa basahon sa kinabuhi.​—Basaha ang Pinadayag 7:16, 17.

8. Kang kinsang mga ngalan ang dili masulat sa basahon sa kinabuhi, ug unsay mahitabo nila?

⁸ Ang ikatulong grupo mao ang samag mga kanding, nga malaglag sa Armagedon. Ang ilang ngalan wala sa basahon sa kinabuhi. Si Jesus miingon nga sila “mamatay hangtod sa hangtod.” (Mat. 25:46) Ubos sa paggiya sa Diyos, si Pablo miingon nga “kini sila sentensiyahan ug kalaglagan nga hangtod sa hangtod ug mahanaw.” (2 Tes. 1:9; 2 Ped. 2:9) Mao pod ni ang dangatan niadtong tinuyong nagpakasala batok sa balaang espiritu. Sila pod dili makadawat ug kinabuhing walay kataposan, kondili laglagon sila hangtod sa hangtod. Klaro nga dili sila banhawon. (Mat. 12:32; Mar. 3:28, 29; Heb. 6:4-6) Hisgotan nato karon ang duha ka grupo sa mga tawo nga banhawon dinhi sa yuta.

KADTONG PAGABANHAWON

9. Sumala sa Buhat 24:15, unsang duha ka grupo ang banhawon dinhi sa yuta, ug unsa ang kalainan niining duha?

⁹ Ang Bibliya naghisgot ug duha ka grupo sa mga tawo nga banhawon nga may paglaom nga mabuhi hangtod sa hangtod sa yuta—ang “mga matarong” ug “mga dili matarong.” (Basaha ang Buhat 24:15.) Ang “mga matarong” mao kadtong matinumanong nag-alagad kang Jehova niadtong buhi sila. Pero kadtong “mga dili matarong” wala mag-alagad nga matinumanon kang Jehova. Gani, kadaghanan nila dili matarong ug binuhatan. Kay ang duha ka grupo banhawon man, makaingon ba ta nga ang ilang ngalan nasulat sa basahon sa kinabuhi? Aron matubag nâ, hisgotan nato ang matag grupo.

10. Nganong ang “mga matarong” banhawon, ug unsang pribilehiyo ang madawat sa pipila kanila? (Tan-awa sab ang “Mga Pangutana Gikan sa mga Magbabasa” bahin sa pagkabanhaw dinhi sa yuta, nga makita niini nga isyu.)

¹⁰ Ang ikaupat nga grupo mao ang “mga matarong.” Niadtong buhi pa sila, ang ilang ngalan nasulat na sa basahon sa kinabuhi. Napapas ba ang ilang ngalan niana nga basahon pagkamatay nila? Wala, kay “buhi” gihapon sila sa panumdoman ni Jehova. Si Jehova ‘Diyos  sa mga buhi, ug dili sa mga patay, kay para niya silang tanan buhi.’ (Luc. 20:38) Nagpasabot ni nga dihang ang mga matarong banhawon dinhi sa yuta, ang ilang ngalan naa sa basahon sa kinabuhi, pero samag “lapis” pa ang gigamit sa pagsulat niini. (Luc. 14:14) Segurado nga ang pipila niining pagabanhawon makadawat ug pribilehiyo nga mag-alagad ingong “mga prinsipe sa tibuok yuta.”​—Sal. 45:16.

11. Unsay kinahanglang makat-onan sa “mga dili matarong” aron masulat ang ilang ngalan sa basahon sa kinabuhi?

¹¹ Ang ikalimang grupo nga atong hisgotan mao ang “mga dili matarong.” Lagmit tungod kay wala sila mahibalo sa mga balaod ni Jehova, dili matarong ang ilang pagkinabuhi sa wala pa sila mamatay. Busa ang ilang ngalan wala masulat sa basahon sa kinabuhi. Pero banhawon sila sa Diyos aron mahatagag kahigayonan nga masulat ang ilang ngalan niana nga basahon. Magkinahanglan unya silag dakong tabang tungod kay sa wala pa sila mamatay, ang uban nila daotan kaayog mga buhat. Busa kinahanglan silang tudloan kon unsaon pagkinabuhi sumala sa matarong nga mga sukdanan ni Jehova. Aron mahimo nâ, ipahigayon sa Gingharian sa Diyos ang kinadak-ang programa sa pagpanudlo sukad masukad.

12. (a) Kinsay magtudlo sa mga dili matarong? (b) Unsay mahitabo niadtong dili magpadapat sa ilang makat-onan?

¹² Kinsay motudlo sa mga dili matarong? Ang dakong panon ug ang gibanhaw nga mga matarong. Aron ang ngalan sa mga dili matarong masulat sa basahon sa kinabuhi, kinahanglang duna silay suod nga relasyon kang Jehova ug magpahinungod kaniya. Si Jesu-Kristo ug ang iyang kaubang mga maghuhukom interesado kaayo sa pag-uswag unya sa tanang dili matarong. (Pin. 20:4) Si bisan kinsa nga dili magpadapat sa ilang nakat-onan dili tugotang mabuhi​—bisag 100 na ang ilang pangedaron. (Isa. 65:20) Si Jehova ug Jesus makabasag kasingkasing, ug  ilang paneguroon nga walay makapahinabog bisan unsang kadaot sa bag-ong kalibotan.​—Isa. 11:9; 60:18; 65:25; Juan 2:25.

PAGKABANHAW NGADTO SA KINABUHI UG NGADTO SA PAGHUKOM

13-14. (a) Unsay atong pagsabot kaniadto sa giingon ni Jesus sa Juan 5:29? (b) Unsay angay natong matikdan bahin sa iyang giingon?

¹³ Si Jesus naghisgot sab bahin niadtong banhawon dinhi sa yuta. Pananglitan, siya miingon: “Moabot ang panahon nga ang tanang anaa sa handomanang mga lubnganan makadungog sa iyang tingog ug mangabanhaw. Kadtong nagbuhat ug maayo mabanhaw ngadto sa kinabuhi ug kadtong nagbuhat ug daotan pagahukman.” (Juan 5:28, 29) Unsay gipasabot ni Jesus?

¹⁴ Kaniadto, nagtuo ta nga ang giingon ni Jesus nagtumong sa binuhatan sa mga binanhaw human sa ilang pagkabanhaw; sa ato pa, ang uban mabanhaw ug mohimog maayo, samtang ang uban mabanhaw ug mohimog daotan. Pero matikdi nga wala mag-ingon si Jesus nga kadtong mabanhaw magbuhat unyag maayo o magbuhat unyag daotan. Past tense ang iyang gigamit. Siya naghisgot niadtong “nagbuhat ug maayo” ug “nagbuhat ug daotan.” Nagpakita ni nga gihimo nila ni sa wala pa sila mamatay. Rasonable ni, kay walay tugotan nga mohimog daotan sa bag-ong kalibotan. Ang mga dili matarong nagbuhat niining daotang mga butang sa wala pa sila mamatay. Busa unsay gipasabot ni Jesus sa ‘pagkabanhaw ngadto sa kinabuhi’ ug ‘pagkabanhaw ngadto sa paghukom’?

15. Kinsa ang ‘banhawon ngadto sa kinabuhi,’ ug ngano?

¹⁵ Ang mga matarong, nga naghimog maayo sa wala pa sila mamatay, ‘banhawon ngadto sa kinabuhi’ kay ang ilang ngalan nasulat na man sa basahon sa kinabuhi. Nagpasabot ni nga ang pagkabanhaw niadtong “nagbuhat ug maayo” nga gihisgotan sa Juan 5:29 parehas ra sa pagkabanhaw sa “mga matarong” nga gihisgotan sa Buhat 24:15. Kini nga eksplinasyon nahiuyon sa giingon sa Roma 6:7: “Siya nga namatay gipagawas na gikan sa iyang sala.” Busa dihang mamatay ang mga matarong, ang ilang mga sala napapas na, pero dili ang ilang rekord sa pagkamatinumanon. (Heb. 6:10) Siyempre, ang mga matarong nga banhawon kinahanglang magpabiling matinumanon aron ang ilang ngalan dili mapapas sa basahon sa kinabuhi.

16. Unsay gipasabot sa ‘pagkabanhaw ngadto sa paghukom’?

¹⁶ Komosta kadtong nagbuhat ug daotan sa wala pa sila mamatay? Bisan pag ang ilang mga sala napapas na pagkamatay nila, wala silay rekord sa pagkamatinumanon. Ang ilang ngalan wala masulat sa basahon sa kinabuhi. Busa ang pagkabanhaw niadtong “nagbuhat ug daotan” parehas ra sa pagkabanhaw sa “mga dili matarong” nga gihisgotan sa Buhat 24:15. Sila ‘mabanhaw ngadto sa paghukom.’ c Ang mga dili matarong hukman, sa ato pa, sila obserbahan ug susihon. (Luc. 22:30) Nagkinahanglag panahon nga mahibaloan kon ang ilang ngalan angayan ba nga isulat sa basahon sa kinabuhi. Kon ilang biyaan ang ilang daotang pagkinabuhi kaniadto ug ipahinungod ang ilang kaugalingon kang Jehova, ang ilang ngalan masulat sa basahon sa kinabuhi.

17-18. Unsay kinahanglang himoon sa tanan nga banhawon dinhi sa yuta, ug unsang “binuhatan” ang gitumong sa Pinadayag 20:12, 13?

 ¹⁷ Matarong man o dili matarong kaniadto ang pagabanhawon, kinahanglan silang mosunod sa mga balaod diha sa bag-ong mga linukot nga basahon nga buksan panahon sa 1,000 ka tuig. Si apostol Juan miingon bahin sa iyang nakita sa panan-awon: “Nakita nako ang mga patay, mga halangdon ug mga timawa, nga nagbarog sa atubangan sa trono, ug dihay gibuksan nga mga linukot nga basahon. Apan dihay laing linukot nga basahon nga gibuksan; kini ang linukot nga basahon sa kinabuhi. Ang mga patay gihukman base sa mga nasulat sa mga linukot nga basahon sumala sa ilang binuhatan.”​—Pin. 20:12, 13.

¹⁸ Base sa unsang “binuhatan” nga ang mga banhawon pagahukman? Sa ila bang binuhatan sa wala pa sila mamatay? Dili! Hinumdomi nga dihang namatay sila, gipasaylo na ang ilang kanhi nga mga sala. Busa ang “ilang binuhatan” wala magtumong sa binuhatan sa wala pa sila mamatay. Nagtumong ni sa ilang binuhatan sa dihang gibansay sila sa bag-ong kalibotan. Bisan ang matinumanong mga tawo sama kang Noe, Samuel, David, ug Daniel kinahanglang makakat-on bahin kang Jesu-Kristo ug magpakitag pagtuo sa iyang halad. Labaw na nga kinahanglan ning himoon sa mga dili matarong!

19. Unsay mahitabo niadtong mosalikway niining nindot kaayo nga kahigayonan?

¹⁹ Unsay mahitabo niadtong mosalikway niining nindot kaayo nga kahigayonan? Ang Pinadayag 20:15 nag-ingon: “Si bisan kinsa nga wala masulat sa basahon sa kinabuhi gitambog ngadto sa linaw nga kalayo.” Oo, sila bug-os nga laglagon. Busa importante gyod nga paneguroon nato nga ang atong ngalan masulat sa basahon sa kinabuhi ug nga kini magpabilin didto!

20. Unsang makapalipay nga buluhaton ang himoon panahon sa Usa ka Libo ka Tuig nga Pagmando? (Tan-awa ang hulagway sa atubangan sa magasin.)

²⁰ Makapalipay kaayo nga panahon ang Usa ka Libo ka Tuig nga Pagmando! Nianang panahona, ipahigayon ang kinadak-ang programa sa pagpanudlo sukad masukad. Pero panahon sab ni nga obserbahan ug susihon ang binuhatan sa mga matarong ug dili matarong. (Isa. 26:9; Buh. 17:31) Sa unsang paagi himoon kini nga programa sa pagpanudlo? Ang sunod nga artikulo motabang nato nga masabtan ug maapresyar kining nindot nga tagana.