1. Unsaon nato pagkahibalo nga kasaligan ang usa ka tawo?

 ANG tawong kasaligan maningkamot nga motuman sa iyang saad ug mosulti sa tinuod. (Sal. 15:4) Ang mga tawo makasalig niya. Gusto nato nga mao pod nay bation sa mga igsoon kanato. Unsay atong himoon aron mosalig sila kanato?

2. Unsaon nato pagpakita nga kasaligan ta?

² Dili nato mapugos ang uban nga mosalig nato. Kinahanglang pamatud-an nato nga kasaligan ta. Ang pagsalig samag kuwarta. Lisod ning mabatonan, pero dali ra ning mawala. Sa way duhaduha, gipakita gyod ni Jehova nga makasalig ta niya. Kanunay gyod tang makasalig niya kay “ang tanan niyang ginabuhat kasaligan.” (Sal. 33:4) Ug nagdahom siya nga sundogon nato siya. (Efe. 5:1) Hisgotan nato ang mga pananglitan sa mga alagad ni Jehova nga nahimong kasaligan kay gisundog nila ang ilang langitnong Amahan. Hisgotan sab nato ang lima ka hiyas nga makatabang nato nga mahimong kasaligan.

3-4. Giunsa pagpakita ni propetang Daniel nga kasaligan siya, ug unsay angay natong ipangutana sa kaugalingon?

³ Si propetang Daniel maayo kaayong ehemplo sa pagkahimong kasaligan. Bisag gibihag siya sa mga Babilonyanhon, nabatonan dayon niya ang reputasyon ingong tawong kasaligan. Misalig pa gyod niya ang mga tawo dihang iyang gihubad ang mga damgo ni Haring Nabucodonosor sa Babilonya pinaagi sa tabang ni Jehova. Dihay higayon nga kinahanglang sultihan ni Daniel ang hari nga wala malipay si Jehova kaniya ​—mensahe nga dili gyod gustong madunggan sa usa ka hari. Nagkinahanglan tog kaisog kay si Nabucodonosor masuk-anon kaayo! (Dan. 2:12; 4:20-22, 25) Daghang tuig sa ulahi, gipakita pag-usab ni Daniel nga kasaligan siya dihang tukma niyang gihubad ang kahibulongang mensahe diha sa bungbong sa palasyo sa Babilonya. (Dan. 5:5, 25-29) Sa ulahi, si Dario nga Medianhon ug ang iyang mga opisyales nakamatikod sab nga si Daniel ‘labaw kaayog kaalam ug kahibalo.’ Ilang giila nga si Daniel “kasaligan ug wala magpasagad o maghimog daotan.” (Dan. 6:3, 4) Busa bisan ang pagano nga mga magmamando miila nga kini nga magsisimba ni Jehova kasaligan!

⁴ Samtang pamalandongon nato ang ehemplo ni Daniel, pangutan-a ang kaugalingon: ‘Unsay panglantaw sa mga dili Saksi kanako? Nailhan ba ko nga motuman sa akong mga responsibilidad ug kasaligan?’ Nganong importante kini nga mga pangutana? Kay kon kasaligan ta, makahatag tag kadayeganan kang Jehova.

5. Nganong nailhan si Hananias nga kasaligan?

⁵ Niadtong 455 B.C.E., human matukod pag-usab ni Gobernador Nehemias ang mga paril sa Jerusalem, nangita siyag kasaligang mga lalaki nga moatiman sa siyudad. Apil sa gipili ni Nehemias ang pangulo sa Kuta nga si Hananias. Sumala sa Bibliya, si Hananias “mas kasaligan ug mahinadlokon sa matuod nga Diyos kay sa uban.” (Neh. 7:2) Tungod sa gugma kang Jehova ug kahadlok nga  mapaguol siya, nagkugi si Hananias sa bisan unsang asaynment nga iyang nadawat. Kini nga mga hiyas makatabang sab nato nga mahimong kasaligan sa atong pag-alagad sa Diyos.

6. Giunsa pagpakita ni Tiquico nga siya kasaligang higala ni apostol Pablo?

⁶ Matikdi ang ehemplo sa kasaligang higala ni apostol Pablo, si Tiquico. Dihang gipriso si Pablo sa balay, iyang gisaligan si Tiquico ug gitawag siya nga “matinumanong ministro.” (Efe. 6:21, 22) Gisaligan siya ni Pablo dili lang sa paghatod ug mga sulat sa Efeso ug Colosas, kondili sa pagdasig ug paghupay pod kanila. Si Tiquico nagpahinumdom nato sa matinumanon ug kasaligang mga brader nga nag-atiman sa atong espirituwal nga panginahanglan karon.​—Col. 4:7-9.

7. Unsay imong makat-onan sa kasaligang mga ansiyano ug ministeryal nga mga alagad sa inyong kongregasyon?

⁷ Karon mapasalamaton kaayo ta sa atong kasaligang mga ansiyano ug ministeryal nga mga alagad. Sama kang Daniel, Hananias, ug Tiquico, gituman gyod nila ang ilang mga responsibilidad. Pananglitan, dihang motambong tag midweek nga tigom, nahibalo ta nga naa nay nakaasayn sa tanang bahin sa programa. Maapresyar gyod sa mga ansiyano kon ang mga giasaynan mangandam ug mohatag sa ilang mga bahin sa tigom. Ug dihang mangimbitar ta sa atong mga Bible study sa pagtambong sa atong weekend nga tigom, makaseguro ta nga dunay mohatag sa pakigpulong publiko. Makasalig pod ta nga naa tay mga publikasyon nga magamit sa ministeryo. Kini nga matinumanong mga brader nag-atiman gyod nato, ug mapasalamaton ta kang Jehova kay naa sila! Pero unsaon nato pagpakita nga kasaligan ta?

8. Unsaon nato pagpakita nga balanse ta sa pagpakitag interes sa uban? (Proverbio 11:13)

⁸ Gimahal nato ang mga igsoon, ug interesado ta sa ilang kahimtang. Pero kinahanglan tang magmabalanse ug tahoron ang ilang pribasiya. Ang pipila diha sa unang siglong Kristohanong kongregasyon mga ‘tabian ug hilabtanon sa kalihokan sa ubang tawo, nga manulti sa mga butang nga dili nila angayng isulti.’ (1 Tim. 5:13) Seguradong dili nato gustong maparehas nila. Pero ibutang ta nga dihay misulti natog personal nga impormasyon ug giingnan ta nga dili ni isulti sa uban. Pananglitan, gisultihan ta sa usa ka sister bahin sa iyang problema sa panglawas o pagsulay nga iyang giatubang, ug mihangyo siya nga isekreto lang ni. Angay natong sundon ang iyang hangyo. b (Basaha ang Proverbio 11:13.) Karon, konsiderahon nato ang uban pang mga kahimtang nga dili nato angayng isulti ang kompidensiyal nga impormasyon.

9. Unsaon pagpakita sa mga membro sa pamilya nga kasaligan sila?

⁹ Sa pamilya. Responsibilidad sa matag membro sa pamilya nga dili isulti ang kompidensiyal nga impormasyon bahin sa ilang pamilya. Pananglitan, ang asawa naa tingali batasan nga mahimuot ang iyang bana, pero maulawan ang asawa kon mahibaloan ni sa uban. Ipanulti ba ni sa bana ngadto sa uban? Siyempre dili! Iyang gihigugma ang iyang asawa, ug dili gyod siya mohimog bisan unsa nga makapasakit niya. (Efe. 5:33)  Ang mga tin-edyer gusto pod nga tahoron, ug angay nang hinumdoman sa mga ginikanan. Dili angayng ipanulti sa mga ginikanan ang sayop sa ilang mga anak aron dili mapakaulawan ang mga anak. (Col. 3:21) Ang mga anak pod kinahanglang mag-amping nga dili isulti sa uban ang mga impormasyon nga makahatag ug kaulawan sa ubang membro sa ilang pamilya. (Deut. 5:16) Kon ang matag membro sa pamilya mag-amping nga dili isulti sa uban ang kompidensiyal nga impormasyon bahin sa ilang pamilya, mas magkasuod sila.

10. Unsaon nimo pagpakita nga tinuod ka nga higala? (Proverbio 17:17)

¹⁰ Sa panaghigalaay. Dunay mga panahon nga kinahanglan natong isulti sa atong suod nga higala ang atong gibati. Pero usahay dili nâ sayon. Wala tingali ta maanad nga mosulti sa atong gibati, ug mahugno ta kon mahibaloan nato nga gisulti ni sa atong higala ngadto sa uban. Pero mapasalamaton kaayo ta kon ang atong higala kasaligan ug dili manabi. Siya “tinuod nga higala.”​—Basaha ang Proverbio 17:17.

11. (a) Unsaon pagpakita sa mga ansiyano ug sa ilang asawa nga kasaligan sila? (b) Unsay atong makat-onan sa ansiyano nga dihay giatiman nga kompidensiyal nga butang sa kongregasyon ug sa ulahi nakig-uban sa iyang pamilya? (Tan-awa ang hulagway.)

¹¹ Sa kongregasyon. Ang mga ansiyano nga kasaligan sa kompidensiyal nga mga butang maoy “tagoanan gikan sa hangin, usa ka salipdanan” para sa mga igsoon. (Isa. 32:2) Dili ta magduhaduha nga moduol nila kay nahibalo ta nga dili nila isulti sa uban ang atong gisulti kanila. Dili pod ta mamugos nga sultihan ta nilag kompidensiyal nga impormasyon. Maapresyar sab nato ang mga asawa sa mga ansiyano kay dili sila magsukitsukit sa ilang bana. Naay kaayohan nga dili sila sultihan ug personal nga impormasyon bahin sa mga igsoon. Ang asawa sa usa ka ansiyano miingon: “Mapasalamaton ko nga dili ko sultihan sa akong bana bahin sa ilang  shepherding o niadtong nanginahanglag espirituwal nga tabang. Dili gani ko niya sultihan sa ilang ngalan. Tungod ana, dili ko mabug-atan sa mga problema nga wala koy ikatabang. Ug dili ko bakikawan nga makig-estorya sa mga igsoon. Makasalig pod ko nga dihang isulti nako sa akong bana ang akong gibati o problema, dili pod niya ni isulti sa uban.” Siyempre, gusto natong tanan nga mailhan tang kasaligan. Unsa nga mga hiyas ang makatabang nato? Hisgotan nato ang lima niini.

12. Nganong gugma ang pundasyon sa pagsalig? Paghatag ug pananglitan.

¹² Gugma ang pundasyon sa pagsalig. Si Jesus miingon nga ang duha ka kinalabwang sugo mao ang paghigugma kang Jehova ug paghigugma sa atong isigkatawo. (Mat. 22:37-39) Kay gihigugma nato si Jehova, gusto natong sundogon ang iyang hingpit nga ehemplo sa pagkakasaligan. Pananglitan, tungod sa atong gugma sa mga igsoon, dili nato isulti sa uban ang impormasyon bahin sa ilang pribadong kinabuhi. Dili gyod nato gusto nga madaot, maulawan, o masakitan sila.—Juan 15:12.

13. Sa unsang paagi ang pagkamapaubsanon makatabang nato nga mahimong kasaligan?

¹³ Ang pagkamapaubsanon makatabang nato nga mahimong kasaligan. Ang mapainubsanong Kristohanon dili magpabilib nga siyay unang nakasulti sa uban bahin sa usa ka impormasyon. (Filip. 2:3) Dili niya ipakita nga morag naa siyay nahibaloan nga dili niya angayng isulti. Kon mapainubsanon ta, dili ta magpakaylap sa atong mga opinyon bahin sa mga butang nga wala hisgoti sa Bibliya o sa atong mga publikasyon.

14. Sa unsang paagi ang katakos sa pag-ila makatabang nato nga mahimong kasaligan?

¹⁴ Ang katakos sa pag-ila makatabang sa usa ka Kristohanon nga mahibaloan kon kanus-a ang “panahon sa paghilom ug panahon sa pagsulti.” (Eccl. 3:7) Sumala sa panultihon sa ubang kultura, “ang pagsulti samag plata, pero ang paghilom bulawanon.” Sa ato pa, dunay mga panahon nga mas maayong magpakahilom kay sa mosulti. Mao nay rason nga ang Proverbio 11:12 nagtambag: “Kadtong may tinuod nga katakos sa pag-ila magpakahilom.” Konsideraha ang usa ka pananglitan. Naay eksperyensiyadong ansiyano nga sagad hangyoon nga tabangan ang ubang kongregasyon nga masulbad ang lisod nga mga problema. Matikdi ang giingon sa iyang kaubang ansiyano, “Kanunay siyang nag-amping nga dili gyod niya masulti ang kompidensiyal nga impormasyon bahin sa ubang kongregasyon.” Kay ang maong ansiyano naay katakos sa pag-ila, gitahod siya sa iyang kaubang mga ansiyano sa kongregasyon. Segurado sila nga dili niya isulti sa uban ang kompidensiyal nga impormasyon bahin sa ilang kongregasyon.

15. Paghatag ug pananglitan nga nagpakita nga kon matinud-anon ka, mosalig nimo ang uban.

¹⁵ Ang pagkamatinud-anon makatabang sab aron mahimo tang kasaligan. Mosalig ta sa matinud-anong tawo kay mosulti gyod siyag tinuod. (Efe. 4:25; Heb. 13:18) Pananglitan, gusto nimong mouswag sa imong pagpanudlo. Nagplano ka nga mohangyog igsoon nga maminaw sa imong bahin ug mohatag nimog sugyot. Sa imong hunahuna, kinsay imong masaligan nga mohatag nimog matinud-anon nga tambag? Kadto bang mosulti nimo sa gusto nimong madungog, o kadtong mahigugmaong mosulti nimo sa tinuod? Klaro  kaayo ang tubag. Ang Bibliya nag-ingon: “Maayo pa ang dayag nga pagbadlong kay sa tinago nga gugma. Ang maunongong higala mohatag ug tambag bisan pag kini sakit paminawon.” (Prov. 27:5, 6) Bisag sa primero sakit paminawon ang matinud-anong tambag sa usa ka higala, kini makahatag ug kaayohan sa ulahi.

16. Giunsa pagpasiugda sa Proverbio 10:19 nga nagkinahanglan tag pagpugong sa kaugalingon?

¹⁶ Importante kaayo ang pagpugong sa kaugalingon aron mahimo tang kasaligan. Motabang ni nato nga dili matental sa pagsultig kompidensiyal nga impormasyon. (Basaha ang Proverbio 10:19.) Masulayan ang atong pagpugong sa kaugalingon dihang mogamit tag social media. Kon dili ta mag-amping, basin dili tinuyo nga makapasa tag kompidensiyal nga impormasyon sa daghang tawo. Ug sa dihang mapasa na nato ni, wala na tay kontrol kon unsaon ni paggamit sa uban ug kon unsa ka dako nga kadaot ang moresulta. Ang pagpugong sa kaugalingon motabang sab nato nga dili magpadala sa mga magsusupak dihang bitkon ta nila nga mosultig impormasyon nga makapameligro sa mga igsoon, pananglitan dihang sukitsukiton ta sa mga polis. Lagmit mahitabo ni sa lugar diin gidili o dunay restriksiyon ang atong buluhaton. Niini ug sa uban pang kahimtang, atong mapadapat ang prinsipyo nga ‘busalan nato ang atong baba.’ (Sal. 39:1) Kinahanglang mahimo tang kasaligan sa tanan, sa ato mang pamilya, mga higala, mga igsoon, o kang bisan kinsa. Ug aron mahimo tang kasaligan, nagkinahanglan tag pagpugong sa kaugalingon.

17. Unsay atong himoon aron ang mga igsoon sa kongregasyon may pagsalig sa usag usa?

¹⁷ Mapasalamaton ta nga gikabig ta ni Jehova sa iyang organisasyon, nga ang mga sakop niini mahigugmaon ug kasaligan! Kitang tanan naay responsibilidad nga ipakita nga kasaligan ta sa mga igsoon. Kon maningkamot ta sa pagpakitag gugma, pagkamapaubsanon, katakos sa pag-ila, pagkamatinud-anon, ug pagpugong sa kaugalingon, makatabang ta nga molig-on ang pagsalig sa mga igsoon sa usag usa. Hinaot sundogon nato ang atong Diyos, si Jehova, ug padayon natong ipakita nga kasaligan ta.