TUN-ANANG ARTIKULO 40
“Nagdala sa Daghan Ngadto sa Pagkamatarong”
“Kadtong mga nagdala sa daghan ngadto sa pagkamatarong [mosidlak] samag mga bituon, hangtod sa kahangtoran.”—DAN. 12:3.
AWIT 151 Ang Diyos Motawag
SUMARYO a
1. Unsang makapalipay kaayo nga mga hitabo ang atong gikahinaman panahon sa Usa ka Libo ka Tuig nga Pagmando?
PAGKANINDOT nga panahon dihang magsugod na ang pagpamanhaw dinhi sa yuta panahon sa Usa ka Libo ka Tuig nga Pagmando sa Kristo! Ang tanang namatyan nangandoy nga makita pag-usab ang ilang minahal. Mao pod nay gibati ni Jehova. (Job 14:15) Imadyina kon unsa ka malipayon ang tanan dinhi sa yuta dihang mabanhaw na ang ilang mga minahal. Sa ato nang nakat-onan sa miaging artikulo, ang “mga matarong” kansang ngalan nasulat sa basahon sa kinabuhi ‘banhawon ngadto sa kinabuhi.’ (Buh. 24:15; Juan 5:29) Tingali daghan sa atong mga minahal ang apil niadtong mga unang banhawon dinhi sa yuta. b Ug ang “mga dili matarong,” sama niadtong walay kahigayonan nga mailhan si Jehova o mag-alagad nga matinumanon kaniya sa wala pa sila mamatay, ‘mabanhaw ngadto sa paghukom.’
2-3. (a) Base sa Isaias 11:9, 10, unsa unya ang kinadak-ang programa sa pagpanudlo sukad masukad? (b) Unsay atong hisgotan niini nga artikulo?
2 Ang tanang banhawon kinahanglang tudloan. (Isa. 26:9; 61:11) Busa kinahanglang himoon ang kinadak-ang programa sa pagpanudlo sukad masukad. (Basaha ang Isaias 11:9, 10.) Ngano? Ang usa ka rason mao nga ang mga dili matarong nga banhawon kinahanglang makakat-on bahin kang Jesu-Kristo, sa Gingharian, sa lukat, ug sa isyu maylabot sa ngalan ug pagkasoberano ni Jehova. Bisan ang mga matarong kinahanglang makakat-on kon unsay anam-anam nga gipadayag ni Jehova bahin sa iyang katuyoan sa yuta. Ang ubang matinumanong mga alagad namatay sa wala pa makompleto ang Bibliya. Busa daghag angayng makat-onan ang mga dili matarong ug mga matarong.
3 Niini nga artikulo, atong tubagon ang mosunod nga mga pangutana: Unsaon paghimo kining dakong programa sa pagpanudlo? Unsay mahitabo sa mga tawo kon modawat sila niini nga pagtudlo? Unsay mahitabo kon dili sila modawat niini? Ang tubag sa maong mga pangutana importante kanato karon. Sa atong mahisgotan unya, ang ubang makapahinganghang mga tagna sa basahon sa Daniel ug Pinadayag motabang nga mas masabtan nato kon unsay mahitabo dihang banhawon ang mga patay. Hisgotan una nato ang makapalipay nga mga hitabo nga gitagna sa Daniel 12:1, 2.
‘KADTONG NATULOG SA ABOG MOMATA’
4-5. Unsay giingon sa Daniel 12:1 bahin sa panahon sa kataposan?
4 Basaha ang Daniel 12:1. Gipakita sa basahon sa Daniel ang pagkasunodsunod sa makapalipayng mga hitabo panahon sa kataposan. Pananglitan, ang Daniel 12:1 nag-ingon nga si Miguel, nga mao si Jesu-Kristo, ‘nagtindog alang sa katawhan [sa Diyos].’ Kana nga bahin sa tagna nagsugod pagkatuman niadtong 1914 dihang si Jesus gitudlo ingong Hari sa langitnong Gingharian sa Diyos.
5 Pero si Daniel giingnan sab nga si Jesus “motindog” “panahon sa kasakitan nga wala pa mahitabo sukad nga naa nay nasod nga natukod.” Kini nga “panahon sa kasakitan” mao ang “dakong kasakitan” nga gihisgotan sa Mateo 24:21. Si Jesus motindog, o molihok aron depensahan ang katawhan sa Diyos, sa kataposan niini nga panahon sa kasakitan, sa ato pa sa Armagedon. Kini nga katawhan ang gitumong sa basahon sa Pinadayag ingong “dakong panon” nga “nakalabang sa dakong kasakitan.”—Pin. 7:9, 14.
6. Unsay mahitabo human nga ang dakong panon maluwas sa dakong kasakitan? Ipatin-aw. (Tan-awa sab ang “Mga Pangutana Gikan sa mga Magbabasa” bahin sa pagkabanhaw ngadto sa kinabuhi dinhi sa yuta, nga makita niini nga isyu.)
6 Basaha ang Daniel 12:2. Unsay mahitabo human nga ang dakong panon maluwas niini nga panahon sa kasakitan? Kini nga tagna wala magtumong sa simbolikong pagkabanhaw, ang espirituwal nga pagpasig-uli sa mga alagad sa Diyos panahon sa kataposang mga adlaw, nga maoy atong pagsabot kaniadto. c Hinuon, kini nagtumong sa pagkabanhaw sa mga patay nga mahitabo sa umaabot nga bag-ong kalibotan. Nganong makaingon ta ana? Ang pulong nga “abog” gigamit sab sa Job 17:16 sa pagtumong sa “Lubnganan.” Gipakita niini nga ang Daniel 12:2 nagtumong sa literal nga pagkabanhaw nga mahitabo human sa kataposang mga adlaw ug human sa gubat sa Armagedon.
7. (a) Unsay gipasabot sa giingon sa Bibliya nga ang uban banhawon ngadto sa “kinabuhing walay kataposan”? (b) Nganong ‘mas maayo ni nga pagkabanhaw’?
7 Pero unsay gipasabot sa giingon sa Daniel 12:2 nga ang uban banhawon ngadto sa “kinabuhing walay kataposan”? Nagpasabot ni nga kadtong mga gibanhaw ug nakaila, o padayong moila, ug mosunod kang Jehova ug Jesus panahon sa 1,000 ka tuig makadawat ug kinabuhing walay kataposan. (Juan 17:3) ‘Mas maayo ni nga pagkabanhaw’ kay sa pagkabanhaw nga nahitabo kaniadto. (Heb. 11:35) Ngano? Kay kadtong dili hingpit nga mga tawo nga gibanhaw kaniadto namatay ra gihapon.
8. Unsay gipasabot sa giingon sa Bibliya nga ang uban banhawon “ngadto sa kaulawan ug sa walay kataposang pagdumot”?
8 Pero dili tanang binanhaw ang modawat sa pagtudlo ni Jehova. Sumala sa tagna ni Daniel, ang uban banhawon “ngadto sa kaulawan ug sa walay kataposang pagdumot.” Sila morebelde, mao nga ang ilang ngalan dili masulat sa basahon sa kinabuhi ug dili sila makadawat ug kinabuhing walay kataposan. Hinuon, madawat nila ang “walay kataposang pagdumot,” o kalaglagan. Busa ang Daniel 12:2 nagtumong sa mahitabo unya sa tanang binanhaw base sa ilang binuhatan human sa ilang pagkabanhaw. d (Pin. 20:12) Ang uban makadawat ug kinabuhing walay kataposan, ang uban dili.
“NAGDALA SA DAGHAN NGADTO SA PAGKAMATARONG”
9-10. Unsa pay mahitabo human sa dakong kasakitan, ug kinsa ang “mosidlak sama sa kahayag sa kalangitan”?
9 Basaha ang Daniel 12:3. Unsa pay mahitabo human sa umaabot nga “panahon sa kasakitan”? Gawas pa sa giingon sa Daniel 12:2, ang bersikulo 3 naghisgot kon unsay mahitabo human sa dakong kasakitan.
10 Kinsa ang “mosidlak sama sa kahayag sa kalangitan”? Aron atong mahibaloan, makatabang ang giingon ni Jesus sa Mateo 13:43: “Nianang panahona ang mga matarong mosidlak nga sama ka hayag sa adlaw diha sa Gingharian sa ilang Amahan.” Sumala sa konteksto, si Jesus naghisgot bahin sa “mga anak sa Gingharian,” ang iyang dinihogang mga igsoon, nga kauban niyang magmando sa langitnong Gingharian. (Mat. 13:38) Busa ang Daniel 12:3 dayag nga nagtumong sa mga dinihogan ug sa ilang buluhaton panahon sa Usa ka Libo ka Tuig nga Pagmando.
Ang 144,000 motabang kang Jesu-Kristo sa pagdumala sa buluhatong pagpanudlo nga mahitabo panahon sa 1,000 ka tuig (Tan-awa ang parapo 11)
11-12. Unsay buhaton sa 144,000 panahon sa 1,000 ka tuig?
11 Sa unsang paagi ang mga dinihogan ‘magdala sa daghan ngadto sa pagkamatarong’? Ang mga dinihogan motabang kang Jesu-Kristo sa pagdumala sa programa sa pagpanudlo nga himoon dinhi sa yuta panahon sa 1,000 ka tuig. Ang 144,000 dili lang kay magmando ingong mga hari kondili mag-alagad sab ingong mga saserdote. (Pin. 1:6; 5:10; 20:6) Busa motabang sila sa ‘pagtambal sa kanasoran,’ sa ato pa, tabangan nila ang mga tawo nga anam-anam nga mabalik sa kahingpitan. (Pin. 22:1, 2; Ezeq. 47:12) Makapalipay gyod nâ sa mga dinihogan!
12 Kinsa ning “daghan” nga dad-on ngadto sa pagkamatarong? Sila ang mga binanhaw ug ang mga maluwas sa Armagedon, apil ang mga anak nga matawo sa bag-ong kalibotan. Sa kataposan sa 1,000 ka tuig, ang tanan dinhi sa yuta hingpit na. Busa kanus-a permanenteng masulat ang ilang ngalan sa basahon sa kinabuhi, nga samag gisulat pinaagig bolpen imbes lapis?
KATAPOSANG PAGSULAY
13-14. Unsay kinahanglang himoon sa tanang hingpit nga mga tawo sa yuta aron makadawat silag kinabuhing walay kataposan?
13 Angay natong hinumdoman nga ang pagkahingpit wala magpasabot nga ang usa ka tawo awtomatik na nga makadawat ug kinabuhing walay kataposan. Hinumdomi nga si Adan ug Eva hingpit, pero kinahanglan una nilang ipakita nga masinugtanon sila kang Jehova nga Diyos aron makadawat silag kinabuhing walay kataposan. Pero makapaguol kay ilang gisupak si Jehova.—Roma 5:12.
14 Unsa unyay kahimtang sa katawhan dinhi sa yuta sa kataposan sa 1,000 ka tuig? Ang tanan hingpit na. Kini bang tanang hingpit nga mga tawo bug-os nga mosuportar sa pagmando ni Jehova hangtod sa hangtod? O ang uban mosundog ba kang Adan ug Eva nga bisag hingpit wala magmatinumanon? Kini nga mga pangutana kinahanglang matubag, pero unsaon man?
15-16. (a) Kanus-a makadawat ug kahigayonan ang tanang tawo nga ipakita ang ilang pagkamaunongon kang Jehova? (b) Unsa unyay resulta niini nga pagsulay?
15 Si Satanas bilanggoon sulod sa 1,000 ka tuig. Nianang panahona, dili na siya makapahisalaag sa mga tawo. Pero sa kataposan sa 1,000 ka tuig, si Satanas buhian. Maningkamot siya nga mapahisalaag ang hingpit nga mga tawo. Panahon sa maong pagsulay, ang tanang hingpit nga tawo sa yuta dunay kahigayonan nga klarong ipakita ang ilang baroganan sa isyu bahin sa ngalan ug pagkasoberano sa Diyos. (Pin. 20:7-10) Ang ilang baroganan nianang panahona maoy basehan kon ang ilang ngalan permanente bang masulat sa basahon sa kinabuhi.
16 Ang uban dili magmatinumanon sama kang Adan ug Eva, ug dili sila magpasakop sa pagmando ni Jehova. Unsay mahitabo nila? Ang Pinadayag 20:15 nag-ingon: “Si bisan kinsa nga wala masulat sa basahon sa kinabuhi gitambog ngadto sa linaw nga kalayo.” Oo, kadtong morebelde bug-os nga malaglag. Pero ang kadaghanan sa hingpit nga mga tawo magmatinumanon panahon niining kataposang pagsulay. Dayon ang ilang ngalan permanente nang masulat sa basahon sa kinabuhi.
“PANAHON SA KATAPOSAN”
17. Unsay giingon sa anghel kang Daniel nga mahitabo sa atong panahon? (Daniel 12:4, 8-10)
17 Naghinamhinam na ta niining umaabot nga mga hitabo! Pero nakadawat pod si Daniel ug importanteng impormasyon gikan sa usa ka anghel bahin sa atong panahon, sa “panahon sa kataposan.” (Basaha ang Daniel 12:4, 8-10; 2 Tim. 3:1-5) Ang anghel miingon kang Daniel: “Ang tinuod nga kahibalo modagaya.” Oo, ang mga tagna sa basahon ni Daniel mas masabtan na sa katawhan sa Diyos. Miingon pod ang anghel nga niining panahona, “ang mga daotan magbuhat ug daotan, ug wala gayoy daotan nga makasabot.”
18. Unsay hapit nang mahitabo sa mga daotan?
18 Karon ang mga daotan morag pirmeng makaikyas sa silot sa ilang daotang binuhatan. (Mal. 3:14, 15) Pero hapit nang hukman ni Jesus ang samag kanding nga mga tawo ug ilain sila gikan sa samag karnero nga mga tawo. (Mat. 25:31-33) Kini nga mga daotan dili maluwas sa dakong kasakitan, ug dili sila banhawon sa bag-ong kalibotan. Ang ilang ngalan dili masulat sa “basahon sa handomanan” nga gihisgotan sa Malaquias 3:16.
19. Unsay angay natong himoon karon, ug ngano? (Malaquias 3:16-18)
19 Panahon na karon nga pamatud-an nato nga dili ta apil sa mga daotan. (Basaha ang Malaquias 3:16-18.) Ginatigom ni Jehova kadtong giisip niya nga “espesyal nga katigayonan,” o kadtong mga bililhon kaniya. Seguradong gusto nato nga apil ta nila.
Eksayted gyod ta nga makita si Daniel, ang atong mga minahal, ug ang daghan pa nga “motindog” aron modawat sa ilang bahin sa bag-ong kalibotan! (Tan-awa ang parapo 20)
20. Unsay kataposang gisaad kang Daniel, ug nganong eksayted ka nga matuman ang maong saad?
20 Nagkinabuhi gyod ta sa eksayting nga panahon. Pero daghan pang nindot nga mga butang ang hapit nang mahitabo. Hapit na natong makita nga malaglag ang tanang daotan. Dayon makita nato ang katumanan sa saad ni Jehova kang Daniel: “Motindog ka aron modawat sa imong bahin sa kataposan sa mga adlaw.” (Dan. 12:13) Nangandoy ba ka sa panahon nga si Daniel ug ang imong mga minahal “motindog” pag-usab? Kon mao, buhata ang tanan nimong maarangan karon nga magmatinumanon, ug makaseguro ka nga dili papason ni Jehova ang imong ngalan sa iyang basahon sa kinabuhi.
AWIT 80 “Tilawi ug Tan-awa nga si Jehova Maayo”
a Kini nga artikulo maghisgot sa kausaban sa atong pagsabot bahin sa dakong programa sa pagpanudlo nga gihisgotan sa Daniel 12:2, 3. Atong susihon kon kanus-a ni mahitabo ug kon kinsay apil niini. Hisgotan sab nato kon sa unsang paagi kini nga pagpanudlo motabang niadtong mabuhi dinhi sa yuta aron maandam sila alang sa kataposang pagsulay sa kataposan sa Usa ka Libo ka Tuig nga Pagmando sa Kristo.
b Tingali unahon ug banhaw kadtong namatay nga matinumanon sa kataposang mga adlaw, dayon banhawon ang sunodsunod nga henerasyon paatras. Kon kini ang mahitabo, ang matag henerasyon naay kahigayonan nga maabiabi ang ilang mga kaila. Bisag unsa pa man, ang Kasulatan nag-ingon nga kadtong banhawon sa langit banhawon “diha sa iyang kaugalingong turno.” Busa makaingon ta nga hapsay pod ang himoong pagpamanhaw dinhi sa yuta.—1 Cor. 14:33; 15:23.
c Kini nga eksplinasyon maoy kausaban sa giingon sa librong Patalinghogi ang Tagna ni Daniel! kapitulo 17, ug sa Bantayanang Torre, Hulyo 1, 1987, panid 21-25.
d Sa laing bahin, ang giingon sa Buhat 24:15 bahin sa “mga matarong” ug “mga dili matarong” ug sa Juan 5:29 bahin niadtong “nagbuhat ug maayo” ug “nagbuhat ug daotan” nagtumong sa binuhatan sa mga binanhaw sa wala pa sila mamatay.
