Konsideraha ang tubag sa Bibliya.

Ang Buhat 24:15 nag-ingon nga “duna unyay pagkabanhaw sa mga matarong ug sa mga dili matarong.” Ang mga matarong mao kadtong nagmasinugtanon sa Diyos sa wala pa sila mamatay, busa ang ilang ngalan nasulat sa basahon sa kinabuhi. (Mal. 3:16) Ang mga dili matarong naglakip niadtong namatay nga wala kaayoy kahigayonan nga makakat-on bahin kang Jehova, busa ang ilang ngalan wala masulat sa basahon sa kinabuhi.

Ang Juan 5:28, 29 nagtumong sa mao ra gihapong duha ka grupo nga gihisgotan sa Buhat 24:15. Si Jesus miingon nga ‘kadtong nagbuhat ug maayo banhawon ngadto sa kinabuhi ug kadtong nagbuhat ug daotan pagahukman.’ Ang mga matarong naghimog maayo sa wala pa sila mamatay. Sila banhawon ngadto sa kinabuhi kay ang ilang ngalan naa gihapon sa basahon sa kinabuhi. Pero ang mga dili matarong naghimog daotan sa wala pa sila mamatay. Banhawon sila ngadto sa paghukom. Ang ilang ngalan wala pa masulat sa basahon sa kinabuhi, ug sila hukman, o obserbahan, sulod sa usa ka yugto sa panahon. Nianang panahona, duna silay kahigayonan nga makakat-on bahin kang Jehova ug kahigayonan nga masulat ang ilang ngalan sa basahon sa kinabuhi.

Ang Pinadayag 20:12, 13 nag-ingon nga ang tanang binanhaw kinahanglang mosunod sa “mga nasulat sa mga linukot nga basahon,” sa ato pa, sa bag-ong mga balaod nga ihatag sa Diyos sa bag-ong kalibotan. Kadtong dili mosunod laglagon.​—Isa. 65:20.

Ang Daniel 12:2 nagtagna nga ang uban nga nangatulog sa kamatayon momata “ngadto sa kinabuhing walay kataposan ug ang uban ngadto sa kaulawan ug sa walay kataposang pagdumot.” Kini nga teksto naghisgot sa dangatan sa mga binanhaw​—“kinabuhing walay kataposan” o “walay kataposang pagdumot.” Busa sa kataposan sa 1,000 ka tuig, ang uban makadawat ug kinabuhing walay kataposan ug ang uban bug-os nga laglagon.​—Pin. 20:15; 21:3, 4.

Ang kahimtang sa duha ka grupo sa mga binanhaw puwede natong ipakasama sa kahimtang sa mga foreigner (o langyaw) nga gustong magpuyo sa laing nasod. Ang maong mga foreigner hatagag work visa o resident visa, o kaha temporary visa o visitor’s visa. Ang mga matarong parehas niadtong nakadawat ug work visa o resident visa, mao nga mas dako silag kagawasan ug mas daghag katungod ug benepisyo. Sa laing bahin, ang mga dili matarong parehas niadtong mga foreigner nga nakadawat ug temporary visa o visitor’s visa. Kinahanglang pamatud-an una niini nga mga foreigner nga masinundanon sila sa mga balaod sa nasod aron tugotan sila nga padayong magpuyo didto. Ingon ana pod ang dili matarong nga mga binanhaw. Kinahanglan silang mosunod sa mga balaod ni Jehova ug magmatinumanon aron makapabilin sa Paraiso. Ug bisan unsa man nga visa ang madawat sa mga foreigner pagsulod nila sa laing nasod, ang uban tingali sa ngadtongadto makadawat ug citizenship pero ang uban tingali ideport. Magdepende ni sa ilang binuhatan sa nasod nga ilang balhinan. Ingon ana pod ang mahitabo sa tanang binanhaw. Ang ilang dangatan magdepende sa ilang pagkamatinumanon ug sa ilang binuhatan sa bag-ong kalibotan.

Si Jehova dili lang kay Diyos sa gugma, kondili Diyos sab siya sa hustisya. (Deut. 32:4; Sal. 33:5) Siya magpakitag gugma pinaagi sa pagbanhaw sa mga matarong ug sa mga dili matarong. Pero gidahom niya nga ang tanan mosunod sa iyang mga sukdanan sa husto ug sayop. Kadto lang mga nahigugma niya ug nagsunod sa iyang mga sukdanan ang tugotan nga padayong magpuyo sa bag-ong kalibotan.