1. Sa hapit nang mamatay si apostol Pedro, gigiyahan siya ni Jehova sa paghimo sa unsa?

 SI APOSTOL Pedro nahibalo nga hapit na siyang mamatay. Sulod sa daghang tuig nga matinumanon siyang nag-alagad, nakauban niya si Jesus sa ministeryo, gisugdan niya ang pagsangyaw ngadto sa mga dili Hudiyo, ug nag-alagad siya ingong membro sa nagamandong lawas. Pero dili ra diha kutob ang iyang pag-alagad. Niadtong mga 62-64 C.E., gigiyahan siya ni Jehova sa paghimog duha ka sulat—ang mga basahon sa Bibliya nga 1 ug 2 Pedro. Naglaom siya nga kini nga mga sulat makatabang sa mga Kristohanon human sa iyang kamatayon.—2 Ped. 1:​12-15.

2. Nganong ang mga sulat ni Pedro haom sa panahon?

² Gihimo ni Pedro ang iyang mga sulat sa dihang ang mga Kristohanon sa unang siglo ‘nag-antos tungod sa lainlaing pagsulay.’ (1 Ped. 1:6) Ang daotang mga tawo misulay sa pagpasulod ug bakak nga mga pagtulon-an ug hugawng panggawi diha sa Kristohanong kongregasyon. (2 Ped. 2:​1, 2, 14) Sa dili madugay, maeksperyensiyahan sa mga Kristohanon nga nagpuyo sa Jerusalem “ang kataposan sa tanang butang”—laglagon sa kasundalohan sa Roma ang maong siyudad ug ang Hudiyong sistema sa mga butang. (1 Ped. 4:7) Seguradong ang mga sulat ni Pedro nakatabang sa mga Kristohanon nga mahibalo kon unsay himoon aron makalahutay sa presenteng mga kalisdanan ug makapangandam sa umaabot nga mga pagsulay. b

3. Nganong angay natong tun-an ang mga sulat ni Pedro?

 ³ Bisag ang mga sulat ni Pedro maoy para sa mga Kristohanon sa unang siglo, gipaapil kini ni Jehova diha sa iyang Pulong. Busa makakat-on ta karon sa mga sulat ni Pedro. (Roma 15:4) Kay nagpuyo ta sa kalibotan nga hugaw kaayog panggawi, makaatubang pod tag mga pagsulay nga makapalisod sa atong pag-alagad kang Jehova. Dugang pa, hapit na natong maeksperyensiyahan ang dakong kasakitan, nga mas grabe pa sa kasakitan nga miresulta sa pagtapos sa Hudiyong sistema. Naay pipila ka importanteng pahinumdom sa duha ka sulat ni Pedro. Makatabang ni nato nga padayong magpaabot sa adlaw ni Jehova, madaog ang kahadlok sa tawo, ug maugmad ang lawom nga gugma para sa usag usa. Kini nga mga pahinumdom makatabang pod sa mga ansiyano nga mahibalo kon sa unsang paagi maatiman nila pag-ayo ang panon.

4. Base sa 2 Pedro 3:​3, 4, unsay makapahuyang sa atong pagtuo?

⁴ Gipalibotan tag mga tawo nga dili motuo sa mga tagna sa Bibliya. Bugalbugalan pod tingali ta sa mga magsusupak kay daghang tuig na tang nagsigeg ingon nga hapit na ang kataposan. Ang uban moingon pod nga dili gyod moabot ang kataposan. (Basaha ang 2 Pedro 3:​3, 4.) Kon makadungog tag ingon ana nga mga komento gikan sa atong mga masangyawan, katrabaho, o membro sa pamilya, ang atong pagtuo posibleng mohuyang. Gisulti ni Pedro kon unsay makatabang nato.

5. Unsay makatabang nato nga mapailobong maghulat sa kataposan niining sistemaha? (2 Pedro 3:​8, 9)

⁵ Ang uban wala makasabot kon nganong wala pa taposa ni Jehova kining daotang sistema. Ang giingon ni Pedro makatabang nato nga mapailobong magpaabot ug magpahinumdom nato nga ang panglantaw ni Jehova sa panahon lahi kaayo kay sa mga tawo. (Basaha ang 2 Pedro 3:​8, 9.) Para kang Jehova, ang usa ka libo ka tuig sama rag usa ka adlaw. Si Jehova mapailobon ug dili niya gusto nga naay malaglag. Pero inig-abot sa iyang adlaw, kini nga sistema matapos. Pribilehiyo gyod nato nga gamiton ang nahibiling panahon aron sangyawan ang mga tawo sa tanang kanasoran.

6. Unsay atong himoon aron ‘maghunahuna ta kanunay’ sa adlaw ni Jehova? (2 Pedro 3:​11, 12)

⁶ Gidasig ta ni Pedro nga ‘maghunahuna kanunay’ sa adlaw ni Jehova. (Basaha ang 2 Pedro 3:​11, 12.) Unsaon nato na paghimo? Pinaagi sa pagpamalandong—kada adlaw, kon posible—sa mga panalangin nga atong madawat sa bag-ong kalibotan. Imadyina nga naghanggab kag hinlo kaayo nga hangin, nagkaon ug makapahimsog kaayo nga pagkaon, nag-abiabi sa imong mga minahal nga nabanhaw, ug nagtudlo sa mga tawo nga nabuhi linibo ka tuig kanhi bahin sa katumanan sa mga tagna sa Bibliya. Ang pagpamalandong niana makatabang nimo nga padayong magpaabot ug dili magduhaduha nga hapit na gyod ang kataposan. Kay ‘nahibalo na ta’ kon unsay mahitabo sa umaabot, dili ta ‘mapahisalaag’ sa bakak nga mga pagtulon-an.—2 Ped. 3:17.

7. Sa unsang paagi ang kahadlok sa tawo makaapektar nato?

⁷ Samtang padayon tang maghunahuna sa adlaw ni Jehova, mapalihok ta sa pagsangyaw sa maayong balita ngadto sa uban. Pero naa tingali mga panahon nga magduhaduha ta sa pagsangyaw. Ngano? Kay posibleng madaog ta sa atong kahadlok sa tawo. Kanay nahitabo kang Pedro. Sa gabii nga gihusay si Jesus, si Pedro wala magpaila nga tinun-an siya ni Jesus ug balikbalik siyang miingon nga wala siya  makaila niya. (Mat. 26:​69-75) Pero nadaog ni Pedro ang iyang kahadlok, maong sa ulahi siya misulti nga may kombiksiyon: “Ayaw kahadloki ang ilang gikahadlokan ug ayawg kabalaka.” (1 Ped. 3:14) Ang giingon ni Pedro nagpasalig nato nga kaya natong madaog ang kahadlok sa tawo.

8. Unsay makatabang nato nga madaog ang atong kahadlok sa tawo? (1 Pedro 3:15)

⁸ Unsay makatabang nato nga madaog ang atong kahadlok sa tawo? Si Pedro miingon: “Balaana ang Kristo ingong Ginoo diha sa inyong kasingkasing.” (Basaha ang 1 Pedro 3:15.) Apil niini ang pagpamalandong sa posisyon ug gahom sa atong Ginoo ug Hari, si Kristo Jesus. Kon makulbaan ka o mahadlok dihang naay kahigayonan nga isangyaw ang maayong balita, hinumdomi ang atong Hari. Imadyina siya nga nagmando sa langit ug gipalibotan ug daghan kaayong anghel. Hinumdomi nga naa kaniya “ang tanang awtoridad sa langit ug sa yuta” ug nga siya “magauban [kanimo] sa tanang adlaw hangtod sa hinapos sa sistema sa mga butang.” (Mat. 28:​18-20) Si Pedro nagdasig nato nga mahimong “andam kanunay” sa pagdepensa sa atong pagtuo. Gusto ba kang mosangyaw sa trabahoan, sa eskuwelahan, o sa uban pang impormal nga paagi? Hunahunaa daan kon kanus-a na nimo mahimo ug andama kon unsay imong isulti. Pag-ampo alang sa kaisog ug salig nga tabangan ka ni Jehova nga madaog ang imong kahadlok sa tawo.—Buh. 4:29.

9. Sa unsang higayon nga si Pedro wala makapakitag gugma? (Tan-awa sab ang hulagway.)

⁹ Si Pedro nakakat-on kon unsaon pagpakitag gugma. Presente siya dihang si Jesus miingon: “Hatagan mo nakog bag-ong sugo, nga kamo maghigugmaay; sama sa akong paghigugma kaninyo, kamo usab maghigugmaay.” (Juan 13:34) Bisan pa niana, si Pedro sa ulahi nagpadaog sa presyur ug wala siya mokaon uban sa dili Hudiyong mga igsoon. Ang gihimo ni Pedro gitawag ni apostol Pablo nga “pagpakaaron-ingnon,” o pagkasalingkapaw. (Gal. 2:​11-14) Gidawat ni Pedro ang maong pagtul-id ug nakakat-on siya niana. Sa iyang duha ka sulat, gipasiugda niya nga dili igo nga mobati lang tag gugma sa atong mga igsoon, kinahanglang ipakita pod nato ang atong gugma.

10. Ang “sinserong inigsoong pagmahal” maoy resulta sa unsa? Ipatin-aw. (1 Pedro 1:22)

¹⁰ Si Pedro miingon nga kinahanglang naa tay “sinserong inigsoong pagmahal” sa atong mga igsoon sa kongregasyon. (Basaha ang 1 Pedro 1:22.) Ang maong pagmahal maoy resulta sa atong “pagsunod sa kamatuoran.” Apil niini nga kamatuoran ang pagtulon-an nga “ang Diyos dili mapihigon.” (Buh. 10:​34, 35) Dili nato masunod ang sugo ni Jesus bahin sa gugma kon pipila lang ka igsoon sa kongregasyon ang atong pakitaag gugma. Tinuod, mas suod tingali ta sa ubang igsoon, sama sa kahimtang ni Jesus. (Juan 13:23; 20:2) Pero gipahinumdoman ta ni Pedro nga kinahanglang maningkamot ta nga magpakitag “inigsoong pagmahal” sa tanan natong igsoon, nga samag pamilya nato sila.—1 Ped. 2:17.

11. Unsay gipasabot sa giingon ni Pedro nga ‘higugmaon pag-ayo ang usag usa nga kinasingkasing’?

¹¹ Gidasig ta ni Pedro nga ‘higugmaon pag-ayo ang usag usa nga kinasingkasing.’ Niini nga konteksto, ang paghigugma “pag-ayo” nagpasabot nga higugmaon nato ang usa ka tawo bisag lisod ning himoon. Pananglitan, komosta kon napasakitan ka sa usa ka igsoon? Sa primero, basin gusto natong mobalos imbes magpakitag gugma. Pero nakakat-on si Pedro kang Jesus nga ang pagbalos dili makapalipay sa Diyos. (Juan 18:​10, 11) Si Pedro misulat: “Ayaw balosig kadaot ang kadaot o balosig insulto ang insulto. Hinuon, balosi kinig panalangin.” (1 Ped. 3:9) Kon naa kay dakong gugma, mapalihok ka nga magpakitag kaayo ug konsiderasyon bisan niadtong nakapasakit nimo.

12. (a) Unsa pay atong mahimo kon naa tay dakong gugma? (b) Unsay paningkamotan nimong himoon sama sa makita sa video nga Panalipdi ang Bililhong Gasa sa Panaghiusa?

¹² Sa iyang unang sulat, gigamit ni Pedro ang ekspresyong “init nga gugma.” Kana nga gugma magtabon, dili lang sa pipila ka sala, kondili sa “daghang sala.” (1 Ped. 4:8) Tingali nahinumdoman ni Pedro ang leksiyon bahin sa pagpasaylo nga gitudlo ni Jesus kaniya pipila ka tuig na ang milabay. Niadtong panahona, nagtuo tingali si Pedro nga mapinasayloon na kaayo siya kay andam siyang mopasaylo sa iyang igsoon “hangtod sa 7 ka beses.” Pero si Jesus nagtudlo kaniya—ug kanato—nga magpasaylo “hangtod sa 77 ka beses,” sa ato pa, walay limitasyon. (Mat. 18:​21, 22) Kon nalisdan ka sa pagpadapat niini nga tambag, ayawg kaluya! Ang tanang dili hingpit nga alagad ni Jehova maglisod usahay sa pagpasaylo. Ang importante nga maningkamot ka karon nga pasayloon ang imong igsoon ug makigdait kaniya. c

13. Nganong dili sayon para sa mga ansiyano nga atimanon ang mga igsoon?

¹³ Seguradong wala malimot si Pedro sa giingon ni Jesus kaniya human sa iyang pagkabanhaw: “Bantayi ang akong gagmayng mga  karnero.” (Juan 21:16) Kon ansiyano ka, nahibalo ka nga kinahanglan pod na nimong himoon. Pero dili tingali sayon para sa usa ka ansiyano nga mogahin ug panahon sa pag-atiman niining importanteng asaynment. Kinahanglang atimanon una sa mga ansiyano ang pisikal, emosyonal, ug espirituwal nga panginahanglan sa ilang pamilya. Manguna pod sila sa buluhatong pagsangyaw ug mag-andam ug maghatag sa ilang mga bahin sa tigom, asembliya, ug kombensiyon. Ang uban pod naay mga responsibilidad ingong membro sa Hospital Liaison Committee o mga asaynment gikan sa Local Design/Construction Department. Busy gyod ang mga ansiyano!

14. Unsay makadasig sa mga ansiyano nga bantayan ang panon? (1 Pedro 5:​1-4)

¹⁴ Gidasig ni Pedro ang iyang mga isigkaansiyano: “Bantayi ang panon sa Diyos.” (Basaha ang 1 Pedro 5:​1-4.) Kon ansiyano ka, nahibalo mi nga gimahal nimo ang mga igsoon ug gusto nimong atimanon sila. Pero usahay, bation tingali nimo nga tungod sa imong ka-busy o kakapoy, dili na nimo matuman ang maong responsibilidad. Unsay imong mahimo? Isulti kang Jehova ang imong mga kabalaka. Si Pedro misulat: “Kon ang usa moalagad, kinahanglang mosalig siya sa kusog nga ginahatag sa Diyos.” (1 Ped. 4:11) Ang imong mga igsoon nag-atubang tingalig mga problema nga dili bug-os masulbad samtang nia pa ta niining sistemaha. Pero hinumdomi nga ang “pangulong magbalantay,” si Jesu-Kristo, makatabang nila nga labaw pa sa imong mahimo. Iya nang mahimo karon ug sa bag-ong kalibotan. Ang gusto lang sa Diyos mao nga higugmaon sa mga ansiyano ang mga igsoon, atimanon ug bantayan sila, ug mahimong “mga ehemplo sa panon.”

15. Sa unsang paagi gibantayan sa usa ka ansiyano ang panon? (Tan-awa sab ang hulagway.)

¹⁵ Si William, nga dugay nang ansiyano, nahibalo nga importante kaayo ang pag-shepherding. Pagsugod sa COVID-19 nga pandemic, giseguro niya ug sa iyang kaubang mga ansiyano nga makontak ang matag indibiduwal sa ilang mga grupo kada semana. Iyang gisulti ang rason: “Daghang igsoon ang nag-inusara sa ilang balay, ug posibleng dali ra mahimong negatibo ang ilang panghunahuna.” Dihang ang usa ka igsoon naay mga problema, si William maminaw pag-ayo aron  mahibaloan niya kon unsay gikinahanglan ug gikabalak-an sa igsoon. Dayon mangita siyag haom nga reperensiya, kasagaran mga video sa atong website, aron matabangan ang maong igsoon. Siya miingon: “Mas gikinahanglan karon ang pag-shepherding. Kon naningkamot ta pag-ayo nga tabangan ang mga tawo nga makakat-on bahin kang Jehova, kinahanglang maningkamot pod ta pag-ayo nga bantayan ang panon ni Jehova aron makapabilin sila sa kamatuoran.”

16. Sa unsang mga paagi nato mapadapat ang mga leksiyon nga atong nakat-onan sa mga sulat ni Pedro?

¹⁶ Nahisgotan nato ang pipila lang ka leksiyon gikan sa duha ka sulat ni Pedro. Tingali naa kay nakita nga gusto nimong pauswagon. Pananglitan, gusto ba nimong mas mapamalandong kanunay ang mga panalangin nga atong madawat sa bag-ong kalibotan? Gihimo ba nimong tumong nga mosangyaw sa trabahoan, eskuwelahan, o sa uban pang impormal nga paagi? Naa ba kay nahunahunaang mga paagi nga mas makapakita kag gugma sa mga igsoon? Mga ansiyano, determinado ba mo nga bantayan ang mga karnero ni Jehova nga kinabubut-on ug kinasingkasing? Kon matinud-anon nimong susihon ang imong kaugalingon, naa tingali kay makita nga mga kahuyangan, pero ayawg kadismayar. ‘Maayo ang Ginoo,’ ug tabangan ka niya nga mouswag. (1 Ped. 2:3) Si Pedro nagpasalig kanato: “Ang Diyos . . . magtapos mismo sa inyong pagbansay. Palig-onon mo niya, hatagan mo niyag kusog, ibutang mo niya sa lig-ong pundasyon.”—1 Ped. 5:10.

17. Unsay resulta kon molahutay ta ug magpabansay kang Jehova?

¹⁷ Dihay higayon nga mibati si Pedro nga dili siya takos nga makig-uban sa Anak sa Diyos. (Luc. 5:8) Pero tungod sa mahigugmaong tabang ni Jehova ug Jesus, si Pedro nakalahutay ingong sumusunod sa Kristo. Busa si Pedro gitugotan nga “makasulod sa walay kataposang Gingharian sa atong Ginoo ug Manluluwas nga si Jesu-Kristo.” (2 Ped. 1:11) Pagkadakong panalangin! Kon molahutay ka sama kang Pedro ug magpabansay kang Jehova, madawat pod nimo ang ganti nga kinabuhing walay kataposan. ‘Ang imong pagtuo moresulta sa imong kaluwasan.’—1 Ped. 1:9.