1-2. Nganong maayong tun-an ang kinabuhi ni Samson?

 UNSAY imong mahunahunaan dihang makadungog ka sa ngalang Samson? Makahunahuna tingali kag tawong kusgan kaayo. Tinuod na. Pero si Samson nakahimog sayop nga desisyon, nga pait kaayog mga resulta. Bisan pa niana, nagpokus si Jehova sa katibuk-ang rekord sa pagkamatinumanon ni Samson, ug Iya ning gipasulat sa Bibliya para sa atong kaayohan.

² Gigamit ni Jehova si Samson sa paghimog makapahinganghang mga butang aron tabangan ang Iyang piniling katawhan, ang Israel. Gatosan ka tuig human mamatay si Samson, gigiyahan ni Jehova si apostol Pablo nga iapil paglista ang ngalan ni Samson sa mga lalaki nga nagpakitag talagsaong pagtuo. (Heb. 11:​32-34) Madasig gyod ta sa ehemplo ni Samson. Misalig siya kang Jehova, bisan sa lisod nga mga kahimtang. Atong hisgotan kon unsay atong makat-onan kang Samson ug kon sa unsang paagi ang iyang ehemplo makadasig nato.

3. Unsang asaynment ang nadawat ni Samson?

³ Dihang gipanganak si Samson, ang nasod sa Israel gimandoan ug gidaogdaog sa mga Filistehanon. (Maghu. 13:1) Grabe gyod ang pag-antos sa mga Israelinhon tungod sa ilang pintas nga pagmando. Gipili ni Jehova si Samson nga “manguna sa pagluwas sa Israel gikan sa kamot sa mga Filistehanon.” (Maghu. 13:5) Di gyod to lalim nga asaynment! Kinahanglan siyang mosalig kang Jehova aron iya ning matuman.

4. Giunsa pagtabang ni Jehova si Samson aron makaikyas siya sa mga Filistehanon? (Maghuhukom 15:​14-16)

 ⁴ Konsideraha kon sa unsang paagi si Samson misalig kang Jehova ug sa Iyang tabang. Dihay higayon nga miabot ang kasundalohan sa mga Filistehanon aron dakpon si Samson sa Lehi, nga posibleng naa sa Juda. Nahadlok ang mga tawo sa Juda maong midesisyon sila nga itugyan si Samson sa mga kaaway. Sila mismo ang migapos kang Samson gamit ang duha ka bag-ong pisi ug gidala siya ngadto sa mga Filistehanon. (Maghu. 15:​9-13) Pero “ang espiritu ni Jehova naghatag niyag kusog” maong nabugto niya ang mga pisi. Dayon, “nakakita siyag bukog sa apapangig sa asno” ug gigamit niya kini sa pagpatay sa 1,000 ka Filistehanong lalaki!—Basaha ang Maghuhukom 15:​14-16.

5. Nganong ang paggamit ni Samson sa bukog sa apapangig sa asno nagpakita sa iyang pagsalig kang Jehova?

⁵ Nganong gigamit ni Samson ang bukog sa apapangig sa asno? Kon buot hunahunaon, dili man ni hinagiban sa pagpakiggubat! Seguradong nahibalo si Samson nga ang iyang kalamposan nagdepende kang Jehova, dili sa bisan unsang hinagiban. Busa gigamit niining matinumanong lalaki kon unsay naa niadtong higayona aron mahimo niya ang kabubut-on ni Jehova. Klaro nga milampos si Samson tungod sa iyang pagsalig kang Jehova.

6. Sa paghimo sa atong mga asaynment, unsay atong makat-onan kang Samson?

⁶ Palig-onon pod ta ni Jehova aron mahimo nato ang atong mga asaynment, bisan pag morag lisod kaayo ning himoon. Puwede nang himoon sa Diyos sa makapahinganghang paagi. Makasalig ka nga si Jehova, kinsa naghatag kang Samson ug kusog, motabang pod nimo sa pagbuhat sa Iyang kabubut-on basta mosalig lang ka Niya.—Prov. 16:3.

7. Paghatag ug pananglitan kon nganong importante kaayo nga mangayog giya kang Jehova.

⁷ Daghang igsoon nga mitabang sa mga proyekto sa pagpanukod sa organisasyon ang nagpakitag pagsalig kang Jehova. Kaniadto, ang mga igsoon maoy sagad nga magdisenyo ug magtukod sa bag-ong mga Kingdom Hall ug ubang pasilidad. Pero kay nagkadako man ang  organisasyon ni Jehova, gikinahanglan ang mga kausaban. Ang mga brader nga nagdumala sa buluhaton nangayog giya kang Jehova ug misulay ug bag-ong mga pamaagi, sama sa pagpalit ug mga pasilidad ug pag-renovate niini. “Sa primero, dili sayon para sa uban nga dawaton ning bag-ong pamaagi,” miingon si Robert, kinsa sa milabayng mga tuig mitabang sa daghang proyekto sa pagpanukod sa tibuok kalibotan. Siya mipadayon: “Lahi ra kaayo ni sa among ginahimo sulod sa daghang tuig. Pero ang mga igsoon andam kaayong mosunod, ug nakita namo ang panalangin ni Jehova sa maong mga kausaban.” Usa ra ni sa mga pananglitan kon giunsa paggiya ni Jehova ang iyang katawhan aron matuman ang iyang kabubut-on. Matag karon ug unya, maayong pangutan-on ang kaugalingon, ‘Nangita ba ko sa direksiyon ni Jehova ug andam ba gihapon kong mosunod sa mga kausaban aron makaalagad pag-ayo niya?’

8. Sa usa ka higayon nga giuhaw pag-ayo si Samson, unsay iyang gihimo?

⁸ Tingali nabasa nimo ang uban pang kuyaw nga mga butang nga gihimo ni Samson. Nakig-away siya sa usa ka leyon ug gipatay kini, ug sa ulahi gipatay niya ang 30 ka Filistehanong lalaki sa siyudad sa Askelon. (Maghu. 14:​5, 6, 19) Nahibalo si Samson nga dili gyod to niya mahimo kon wala ang tabang ni Jehova. Klaro ni sa usa ka higayon dihang giuhaw siya pag-ayo human niya patya ang 1,000 ka Filistehanon. Unsay iyang gihimo? Imbes mosalig sa iyang kaugalingon sa pagpangitag tubig, nangayo siyag tabang kang Jehova.—Maghu. 15:18.

9. Giunsa pagtubag ni Jehova ang hangyo ni Samson? (Maghuhukom 15:19)

⁹ Gitubag ni Jehova ang pagpangayog tabang ni Samson pinaagi sa milagrosong pagpatunghag tubod sa tubig. Dihang si Samson miinom niini, “mibalik ang iyang kusog ug naulian siya.” (Basaha ang Maghuhukom 15:19.) Dayag nga kining bag-ong tubod sa tubig naa pa gihapon dihang gisulat ni propetang Samuel ang basahon sa Maghuhukom daghang tuig sa ulahi. Dihang makita sa mga Israelinhon kining tubod sa tubig, seguradong mahinumdom sila nga si Jehova motabang gyod sa iyang matinumanong mga alagad sa lisod nga mga kahimtang.

10. Unsay kinahanglan natong himoon aron madawat ang tabang ni Jehova? (Tan-awa sab ang hulagway.)

¹⁰ Kita pod kinahanglang mangayog tabang kang Jehova bisag unsa pay atong talento, abilidad, o nalampos sa pag-alagad. Kinahanglang mapainubsanon natong dawaton nga molampos lang ta kon mosalig ta kang Jehova. Sama nga nalagsik si Samson dihang miinom siya sa tubig nga gitagana ni Jehova, mapalig-on pod ta sa espirituwal dihang pahimuslan nato ang tanang gitagana ni Jehova kanato.—Mat. 11:28.

11. Sa unsang paagi mapahimuslan nato pag-ayo ang tabang ni Jehova? Paghatag ug pananglitan.

¹¹ Konsideraha ang pananglitan ni Aleksey, usa sa atong mga igsoon sa Russia nga nag-atubang ug grabeng paglutos. Unsay nakatabang niya nga magpabiling lig-on bisan niining lisod kaayong kahimtang? Siya ug ang iyang asawa naay maayong espirituwal nga rutina. Siya miingon: “Naningkamot ko nga padayong himoon ang akong espirituwal nga rutina sa personal nga pagtuon ug pagbasa sa Bibliya kada adlaw. Kada buntag, maghisgot mi sa akong asawa sa daily text ug mag-ampo kang Jehova nga magkauban.” Unsay atong makat-onan niini? Imbes mosalig sa atong kaugalingon, angay tang mosalig kang Jehova. Unsaon nato na paghimo? Mahimo nato na  kon palig-onon nato ang atong pagtuo pinaagi sa maayong rutina sa personal nga pagtuon sa Bibliya ug ubang espirituwal nga kalihokan. Kon ato nang buhaton, panalanginan pag-ayo ni Jehova ang atong mga paningkamot sa pag-alagad kaniya. Iyang gipalig-on ug gihatagag kusog si Samson, ug seguradong palig-onon pod ta Niya.

12. Unsang sayop nga desisyon ang gihimo ni Samson, ug nganong lahi tingali ni sa iyang mga gihimo kaniadto?

¹² Si Samson dili hingpit parehas nato, maong dihay mga higayon nga nakahimo siyag sayop nga mga desisyon. Ang usa niana makapaguol kaayog resulta. Human sa taastaas nga panahon nga nag-alagad si Samson ingong maghuhukom, “nahigugma siya sa usa ka babaye sa Walog sa Sorek nga ginganlag Delila.” (Maghu. 16:4) Kaniadto, minyoonon si Samson sa usa ka babayeng Filistehanon, pero kadto maoy ‘paagi ni Jehova,’ kinsa ‘nangitag higayon batok sa mga Filistehanon.’ Sa ulahi, si Samson miadto sa balay sa usa ka pampam sa Filistehanong siyudad sa Gaza. Niadtong higayona, gihatagan sa Diyos si Samson ug kusog sa pagtangtang ug pagpas-an sa mga pultahan sa ganghaan sa siyudad, maong mihuyang ang depensa sa siyudad. (Maghu. 14:​1-4; 16:​1-3) Pero lahi tingali ang kahimtang ni Delila kay posible nga Israelinhon siya.

13. Unsay gihimo ni Delila nga miresultag kadaot kang Samson?

¹³ Si Delila midawat ug dakong kantidad sa kuwarta gikan sa mga Filistehanon baylo sa iyang pagluib kang Samson. Sobra ra ba ang gugma ug pagsalig ni Samson maong wala siya kabantay sa motibo ni Delila? Wala ta mahibalo. Pero balikbalik siyang gipresyur ni Delila nga isulti kon nganong kusgan kaayo siya. Ug  sa ulahi, mitug-an si Samson. Makapaguol kay ang sayop nga desisyon ni Samson miresulta sa temporaryong pagkawala sa iyang kusog ug sa pag-uyon ni Jehova.—Maghu. 16:​16-20.

14. Unsay nahitabo kang Samson tungod sa iyang pagsalig kang Delila?

¹⁴ Nag-antos si Samson sa pait nga resulta sa iyang pagsalig kang Delila imbes kang Jehova. Nadakpan si Samson sa mga Filistehanon ug gibutaan siya. Gipriso siya sa Gaza, diin sa miagi gipakaulawan niya ang mga tawo didto, ug gihimo siyang makaluluoy nga tiggaling ug lugas. Dayon, gidala siya sa mga Filistehanon sa usa sa ilang mga selebrasyon ug gipakaulawan siya. Nagtanyag silag daghang halad sa ilang bakak nga diyos nga si Dagon, nga maoy ilang gituohan nga nagtabang nila nga madakpan si Samson. Gikuha nila si Samson sa prisohan aron naa silay “kalingawan”—aron yagayagaan siya.—Maghu. 16:​21-25.

15. Giunsa pagpakita ni Samson nga misalig siya pag-usab kang Jehova? (Maghuhukom 16:​28-30) (Tan-awa ang hulagway sa atubangan sa magasin.)

¹⁵ Si Samson nakahimog seryosong sayop, pero wala siya mohunong sa pag-alagad kang Jehova. Nangita siyag kahigayonan nga tumanon ang asaynment nga gihatag sa Diyos kaniya nga pildihon ang mga Filistehanon. (Basaha ang Maghuhukom 16:​28-30.) Si Samson nagpakiluoy kang Jehova: “Tugoti kong makapanimalos sa mga Filistehanon.” Gitubag sa matuod nga Diyos ang hangyo ni Samson ug gibalik ang iyang talagsaong kusog. Ingong resulta, si Samson mas daghag napatay nga Filistehanon niining higayona kay sa nangaging mga panahon.

16. Unsay atong makat-onan sa sayop ni Samson?

¹⁶ Bisag nag-antos si Samson sa pait nga resulta sa iyang sayop, naningkamot gihapon siya nga himoon ang kabubut-on ni Jehova. Busa kon makahimo tag sayop ug tul-iron ta o mawad-ag pribilehiyo, dili ta angayng mosurender. Hinumdomi nga si Jehova andam mopasaylo nato. (Sal. 103:​8-10) Bisan pa sa atong mga sayop, puwede gihapon tang gamiton ni Jehova, sama kang Samson.

17-18. Nganong makapadasig ang eksperyensiya ni Michael? (Tan-awa sab ang hulagway.)

¹⁷ Konsideraha ang eksperyensiya sa batan-ong brader nga si Michael. Busy siya sa espirituwal nga mga kalihokan, nga nag-alagad ingong ministeryal ug regular payunir. Pero makapaguol kay nakahimo siyag sayop, ug tungod ana, nawad-an siyag mga pribilehiyo sa kongregasyon. Siya miingon: “Busy kaayo ko  sa pag-alagad kang Jehova, pero sa kalit lang, nawad-an kog mga pribilehiyo. Wala man ko maghunahuna nga biyaan ko ni Jehova, pero nagduhaduha ko kon mabalik pa ba ang akong suod nga relasyon kaniya o kon bug-os pa ba kong makaalagad sa kongregasyon parehas sa una.”

¹⁸ Makapalipay kay wala mosurender si Michael. Siya midugang: “Nagpokus ko sa pagpalig-on pag-usab sa akong relasyon kang Jehova pinaagi sa regular nga pag-ampo ug pagsulti kaniya sa akong gibati, pagtuon, ug pagpamalandong.” Sa ngadtongadto, nabalik ang mga pribilehiyo ni Michael. Nag-alagad siya karon ingong ansiyano ug regular payunir. Siya miingon: “Ang tabang ug pagdasig nga akong nadawat, ilabina sa mga ansiyano, nakatabang nako nga makita nga gimahal gihapon ko ni Jehova. Makaalagad na ko pag-usab sa kongregasyon uban ang hinlong konsensiya. Ang akong eksperyensiya nagtudlo nako nga pasayloon gyod ni Jehova kadtong tinuod nga maghinulsol.” Makasalig ta nga gamiton ug panalanginan pod ta ni Jehova bisan pag nakahimo tag mga sayop, basta himoon nato ang atong maarangan sa pagtul-id sa atong mga sayop ug padayong mosalig kaniya.—Sal. 86:5; Prov. 28:13.

19. Sa unsang paagi napalig-on ka sa ehemplo ni Samson?

¹⁹ Niining artikuloha, atong nahisgotan ang pipila sa makapainteres nga mga hitabo sa kinabuhi ni Samson. Dili siya hingpit, pero padayon siyang naningkamot sa pag-alagad kang Jehova, bisan pag nakahimo siyag sayop nga desisyon maylabot kang Delila. Ug wala mosurender si Jehova kaniya. Gigamit siya pag-usab sa Diyos sa talagsaong paagi. Giisip gihapon siya ni Jehova ingong tawo nga may lig-ong pagtuo, ug apil siya sa matinumanong mga tawo nga gihisgotan sa Hebreohanon kapitulo 11. Makapalipay gyod ang pagkahibalo nga nag-alagad ta sa usa ka mahigugmaong langitnong Amahan nga gusto kaayong mopalig-on nato, ilabina dihang luya ta! Busa sama kang Samson, mohangyo ta kang Jehova: “Palihog hinumdomi ko, ug palihog himoa kong kusgan.”—Maghu. 16:28.