1. Unsay reaksiyon ni Pedro dihang nakakuha silag daghang isda tungod sa milagro ni Jesus?

 SI Pedro nangisda sa tibuok gabii, pero wala gyod siyay kuha. Makapatingala kay giingnan siya ni Jesus: “Mangadto ta sa lawom, ug itaktak ang inyong pukot aron makakuha mo.” (Luc. 5:4) Nagduhaduha si Pedro kon makakuha siyag isda, pero misunod gihapon siya sa giingon ni Jesus. Si Pedro ug ang iyang mga kauban nakakuhag daghan kaayong isda, nga gani ang ilang mga pukot nagisi. Naamgohan nila nga usa kini ka milagro, maong sila “nahingangha.” Si Pedro miingon: “Pahilayo kanako Ginoo, kay makasasala ko.” (Luc. 5:​6-9) Tingali gibati ni Pedro nga dili siya takos nga makauban ni Jesus.

2. Nganong maayong konsiderahon nato ang ehemplo ni Pedro?

² Husto si Pedro—siya “makasasala.” Gipakita sa Bibliya nga dihay mga higayon nga nakasulti ug nakahimo siyag mga butang nga gimahayan niya sa ulahi. Nahitabo pod ba na nimo? Naa ba kay kinaiya nga nalisdan ka sa pagbag-o o kahuyangan nga dugay na nimong ginasuklan? Kon mao, madasig ka kon imong tun-an ang ehemplo ni Pedro. Ngano? Konsideraha ni: Puwede ra untang dili ipasulat diha sa Bibliya ang mga sayop ni Pedro. Pero gipasulat ni sa Diyos aron makakat-on ta. (2 Tim. 3:​16, 17) Ang pagkat-on bahin kang Pedro, kinsa may mga kahuyangan ug pagbati nga sama nato, makatabang aron atong masabtan nga si Jehova wala magdahom ug kahingpitan kanato. Gusto niya nga molahutay ta—nga padayong maningkamot sa pag-alagad—bisan pa sa atong mga kahuyangan.

3. Nganong kinahanglan tang molahutay?

³ Nganong kinahanglan tang molahutay? Dunay panultihon, Kon magsige kag praktis, mahanas ka. Pananglitan, dangtan tingalig  daghang tuig ayha mahimong hanas ang usa ka musikero sa paggamit sa iyang instrumento. Nianang panahona, kadaghan gyod tingali siyang masayop. Pero kon padayon siyang magpraktis, mahanas siya. Ug bisag mahimo na siyang hanas nga musikero, naa tingali mga panahon nga masipyat siya. Pero dili siya mosurender. Padayon siyang magpraktis aron mas mohanas. Sa susama, bisag mobati ta nga nadaog na nato ang usa ka kahuyangan, tingali masipyat gihapon ta. Pero padayon gihapon tang maningkamot nga mouswag. Kitang tanan makasulti o makahimog mga butang nga atong mahayan sa ulahi; pero kon dili ta mosurender, tabangan ta ni Jehova nga padayong mouswag. (1 Ped. 5:10) Konsiderahon nato ang ehemplo ni Pedro sa paglahutay. Ang kaluoy nga gipakita ni Jesus kaniya, bisan pa sa iyang mga sayop, makadasig nato nga padayong mag-alagad kang Jehova.

4. Sumala sa Lucas 5:​5-10, unsay giingon ni Pedro bahin sa iyang kaugalingon, pero unsay gihimo ni Jesus aron pasaligan siya?

⁴ Ang Bibliya walay gisulti kon nganong miingon si Pedro nga “makasasala” siya o kon unsang mga sala ang iyang gitumong. (Basaha ang Lucas 5:​5-10.) Pero posible nga nakahimo siyag seryosong mga sayop. Namatikdan ni Jesus nga nahadlok si Pedro, tungod tingali kay gibati ni Pedro nga dili siya takos. Nahibalo sab si Jesus nga kaya ni Pedro nga magpabiling matinumanon. Busa giingnan ni Jesus si Pedro nga ‘dili na mahadlok.’ Ang pagsalig nga gipakita ni Jesus kang Pedro nakapausab gyod sa iyang kinabuhi. Gibiyaan ni Pedro ug sa iyang igsoong si Andres ang ilang negosyo nga pagpangisda ug nahimong bug-os panahong mga sumusunod sa Mesiyas, desisyon nga miresultag daghang panalangin.—Mar. 1:​16-18.

5. Unsang mga panalangin ang nadawat ni Pedro kay nadaog niya ang iyang mga kahadlok ug gidawat ang imbitasyon ni Jesus?

⁵ Si Pedro daghag nindot kaayo nga mga eksperyensiya tungod sa iyang pagkahimong sumusunod sa Kristo. Nakita niya nga giayo ni Jesus ang mga masakiton, gipalayas ang mga demonyo, ug gibanhaw pa gani ang mga patay. b (Mat. 8:​14-17; Mar. 5:​37, 41, 42) Nakita pod ni Pedro ang makapahinganghang panan-awon sa umaabot nga papel ni Jesus ingong Hari sa Gingharian sa Diyos—hitabo nga wala gyod niya malimti sa tibuok niyang kinabuhi. (Mar. 9:​1-8; 2 Ped. 1:​16-18) Dili gyod unta makita ni Pedro kining tanan kon wala pa siya mahimong sumusunod ni Jesus. Seguradong nalipay kaayo siya nga wala niya tugoti ang bisan unsang  negatibong pagbati nga makapugong niya sa pagdawat niini nga mga panalangin!

6. Nadaog ba dayon ni Pedro ang iyang mga kahuyangan? Ipatin-aw.

⁶ Bisan pa sa iyang mga nakita ug nadungog, nalisdan gihapon si Pedro sa pagdaog sa iyang mga kahuyangan. Konsideraha ang pipila ka pananglitan. Dihang gisulti ni Jesus kon sa unsang paagi siya mag-antos ug mamatay ingong katumanan sa tagna sa Bibliya, gibadlong siya ni Pedro. (Mar. 8:​31-33) Balikbalik pod nga naglalis si Pedro ug ang ubang apostoles kon kinsay labaw nila. (Mar. 9:​33, 34) Ug sa gabii una mamatay si Jesus, gitigbas ni Pedro ang dalunggan sa usa ka ulipon. (Juan 18:10) Niana pong gabhiona, nagpadaog si Pedro sa kahadlok ug katulo niya gilimod ang iyang higala nga si Jesus. (Mar. 14:​66-72) Tungod ana, si Pedro mihilak pag-ayo.—Mat. 26:75.

7. Unsang kahigayonan ang gihatag kang Pedro human mabanhaw si Jesus?

⁷ Si Jesus wala mawad-ig paglaom sa iyang naluya nga apostol. Human mabanhaw si Jesus, gihatagan niyag kahigayonan si Pedro nga ipakita ang iyang gugma kaniya. Gidapit ni Jesus si Pedro nga mapainubsanong mag-alagad ingong magbalantay sa iyang mga karnero. (Juan 21:​15-17) Gidawat kana ni Pedro. Busa didto siya sa Jerusalem sa adlaw sa Pentekostes, ug apil siya sa mga unang gidihogan sa balaang espiritu.

8. Unsang seryosong sayop ang nahimo ni Pedro sa Antioquia?

⁸ Bisag dinihogang Kristohanon na si Pedro, nakigbisog gihapon siya sa iyang mga kahuyangan. Niadtong 36 C.E., presente si Pedro dihang gidihogan sa Diyos ug balaang espiritu ang dili tinuling Hentil nga si Cornelio. Kini klarong nagpakita nga “ang Diyos dili mapihigon” ug ang mga dili Hudiyo puwede nga mahimong bahin sa Kristohanong kongregasyon. (Buh. 10:​34, 44, 45) Human adto, si Pedro mikaon na uban sa mga Hentil, nga wala pa niya himoa kaniadto. (Gal. 2:12) Pero naay pipila ka Hudiyong Kristohanon nga mibati nga ang mga Hudiyo ug Hentil dili angayng mag-uban sa pagpangaon. Dihang ang uban nga ingon anag panghunahuna miabot sa Antioquia, si Pedro wala mokaon uban sa Hentil nga mga igsoon. Lagmit nahadlok siya nga masuko ang Hudiyong mga Kristohanon. Dihang nakita ni apostol Pablo ang pagpakaaron-ingnon ni Pedro, iya siyang gibadlong atubangan sa daghang tawo. (Gal. 2:​13, 14) Bisag nasayop si Pedro, wala siya mohunong sa pag-alagad. Unsay nakatabang niya?

9. Sumala sa Juan 6:​68, 69, sa unsang paagi gipakita ni Pedro ang iyang pagkamaunongon?

⁹ Si Pedro maunongon; wala niya tugoti nga naay makapahunong niya sa pag-alagad. Pananglitan, dihay higayon nga naay gisulti si Jesus nga wala masabti sa iyang mga tinun-an. (Basaha ang Juan 6:​68, 69.) Daghan ang wala mangutana kon unsa gyoy gipasabot ni Jesus ug mihunong sa pagsunod kaniya. Pero lahi si Pedro. Giila niya nga si Jesus lang ang dunay “mga pulong nga motultol sa kinabuhing walay kataposan.”

10. Sa unsang paagi gipakita ni Jesus ang iyang pagsalig kang Pedro? (Tan-awa sab ang hulagway.)

¹⁰ Wala talikdi ni Jesus si Pedro. Sa kataposang gabii ni Jesus sa yuta, nahibalo siya nga biyaan siya ni Pedro ug sa ubang apostoles. Bisan pa niana, gipahayag ni Jesus ang iyang pagsalig nga si Pedro mobalik ug magpabiling matinumanon. (Luc. 22:​31, 32) Nakasabot si Jesus nga “andam ang espiritu, apan luya ang unod.” (Mar. 14:38) Busa bisag gilimod siya ni Pedro, wala mawad-ig paglaom si Jesus kaniya. Human mabanhaw si Jesus, nagpakita siya kang Pedro—dayag nga dihang nag-inusara si Pedro.  (Mar. 16:7; Luc. 24:34; 1 Cor. 15:5) Seguradong nakadasig gyod to sa naguol kaayo nga apostol!

11. Sa unsang paagi gipasaligan ni Jesus si Pedro nga tabangan siya ni Jehova?

¹¹ Gipasaligan ni Jesus si Pedro nga tabangan siya ni Jehova. Ang nabanhawng si Jesus naghatag kang Pedro ug sa iyang kaubang mga apostoles ug usa pa ka milagro—nakakuha na pod silag daghan kaayong isda. (Juan 21:​4-6) Kini nga milagro seguradong nagpasalig kang Pedro nga si Jehova makatagana gyod sa iyang materyal nga panginahanglan. Tingali nahinumdoman ni Pedro ang giingon ni Jesus nga si Jehova motagana niadtong ‘nag-una kanunay sa pagpangita sa Gingharian.’ (Mat. 6:33) Nakatabang ni kang Pedro nga himoong prayoridad ang ministeryo, dili ang negosyo nga pagpangisda. Maisogon siyang nagsangyaw sa adlaw sa Pentekostes 33 C.E., ug linibo ang iyang natabangan nga modawat sa maayong balita. (Buh. 2:​14, 37-41) Human niana, iyang gitabangan ang mga Samarianhon ug mga Hentil sa pagdawat sa Kristo. (Buh. 8:​14-17; 10:​44-48) Seguradong gigamit ni Jehova si Pedro sa talagsaong paagi aron tabangan ang tanang klase sa tawo nga mahimong bahin sa kongregasyon.

12. Sa unsang paagi ang pananglitan ni Pedro makatabang nato kon naa tay kahuyangan nga padayon natong gisuklan?

¹² Tabangan ta ni Jehova nga makapadayon sa pag-alagad kaniya. Tingali dili ni sayong himoon, ilabina kon naa tay kahuyangan nga padayon natong gisuklan. Usahay, ang atong mga kahuyangan mas lisod tingaling suklan kay sa mga kahuyangan ni Pedro. Pero si Jehova makahatag sa kusog nga atong gikinahanglan aron makapadayon ta. (Sal. 94:​17-19) Pananglitan, sa wala pa makakat-on sa kamatuoran, dihay brader nga homoseksuwal ug pagkinabuhi sa daghang tuig. Bug-os siyang nagbag-o ug gibiyaan niya ang iyang imoral nga pagkinabuhi. Pero usahay, motungha gihapon ang iyang sayop nga mga tinguha. Unsay nakatabang niya nga molahutay? Siya miingon: “Ginapalig-on ta ni Jehova.” Siya midugang: “Sa tabang sa espiritu ni Jehova . . . , nakita nako nga kaya gyod diay natong magkinabuhi sumala sa iyang mga sukdanan . . . Gigamit ko ni Jehova, ug bisan pa sa akong pagkadili-hingpit, padayon ko niyang gipalig-on.”

13. Unsaon nato pagsundog ang pananglitan ni Pedro, sumala sa giingon sa Buhat 4:​13, 29, 31? (Tan-awa sab ang hulagway.)

¹³ Sama sa atong nahisgotan, si Pedro nakahimog seryosong mga sayop tungod sa iyang  kahadlok sa tawo. Pero kay miampo siya alang sa kaisog, si Pedro milihok nga maisogon. (Basaha ang Buhat 4:​13, 29, 31.) Madaog sab nato ang atong mga kahadlok. Konsideraha ang nahitabo kang Horst, batan-ong brader nga nagpuyo sa Nazi Germany. Nadala siya sa presyur sa eskuwelahan ug miingon ug “Heil Hitler!” Ug dili lang to kausa nahitabo. Imbes kasab-an siya, ang mga ginikanan ni Horst nag-ampo uban niya ug mihangyo kang Jehova nga hatagan siyag kaisog. Sa tabang sa iyang mga ginikanan ug pinaagi sa pagsalig kang Jehova, si Horst sa ngadtongadto nakabatog kaisog nga dili magpadala sa presyur. Sa ulahi, siya miingon: “Wala gayod ako biyai ni Jehova.” c

14. Sa unsang paagi mapasaligan sa mahigugmaong mga magbalantay ang mga naluya?

¹⁴ Si Jehova ug Jesus dili gyod mobiya kanato. Human ilimod ni Pedro si Jesus, kinahanglan siyang mohimog importanteng desisyon. Mohunong ba siya, o magpadayon ingong tinun-an sa Kristo? Si Jesus nag-ampo kang Jehova nga unta ang pagtuo ni Pedro dili moangka. Gisultihan ni Jesus si Pedro bahin niana nga pag-ampo, ug gipahayag ni Jesus ang iyang pagsalig nga sa ulahi, mapalig-on ni Pedro ang iyang mga igsoon. (Luc. 22:​31, 32) Seguradong nadasig gyod si Pedro dihang mahinumdom siya sa giingon ni Jesus! Dihang kinahanglan tang mohimog importanteng desisyon, gamiton tingali ni Jehova ang mahigugmaong mga magbalantay aron pasaligan ta nga makapabilin tang matinumanon. (Efe. 4:​8, 11) Si Paul, nga dugay nang ansiyano, naningkamot sa paghupay sa uban. Iyang hangyoon kadtong mga naluya nga pamalandongon kon giunsa sila pagkabig ni Jehova sa kamatuoran. Dayon pasaligan niya sila nga tungod sa maunongong gugma ni Jehova, dili  gyod Siya mobiya kanila. Siya miingon, “Nakita nako nga daghan niadtong mga naluya ang nakalahutay sa pag-alagad tungod sa tabang ni Jehova.”

15. Sa unsang paagi ang ehemplo ni Pedro ug ni Horst nagpakita nga tinuod ang Mateo 6:33?

¹⁵ Sama nga gitagana ni Jehova ang materyal nga panginahanglan ni Pedro ug sa ubang apostoles, itagana pod Niya ang atong materyal nga panginahanglan kon unahon nato ang ministeryo sa atong kinabuhi. (Mat. 6:33) Human sa Gubat sa Kalibotan II, si Horst, nga gihisgotan ganina, naghunahuna nga magpayunir. Pero pobre kaayo siya, maong nagduhaduha siya kon masuportahan ba niya ang iyang kaugalingon ug kon makapabilin ba siya sa bug-os panahong pag-alagad. Unsay iyang gibuhat? Midesisyon siya nga sulayan si Jehova, ug nakigbahin siya sa ministeryo sa tibuok semana panahon sa duaw sa tigdumala sa sirkito. Sa hinapos sa semana, nakurat siya dihang ang tigdumala sa sirkito mitunol niyag sobre, pero wala siya sultihi kon kang kinsa ni gikan. Naa ni igong kuwarta nga makasuportar sa iyang pagpayunir sa pipila ka bulan. Para kang Horst, pasalig ni nga dili gyod siya pasagdan ni Jehova. Busa gigamit niya ang iyang kinabuhi sa pag-una sa Gingharian.—Mal. 3:10.

16. Nganong maayo nga mokat-on tag dugang bahin kang Pedro ug sa iyang mga sinulat?

¹⁶ Seguradong nalipay si Pedro nga wala mobiya si Jesus kaniya, bisag dihay higayon nga mihangyo siya nga mopahilayo si Jesus! Padayong gibansay sa Kristo si Pedro aron mahimong matinumanong apostol ug maayo kaayong ehemplo para sa mga Kristohanon. Makakat-on tag daghang bililhong leksiyon sa maong pagbansay. Ang pipila niana nga mga leksiyon ug ang uban pa mabasa sa duha ka sulat ni Pedro nga iyang gipadala sa mga kongregasyon sa unang siglo. Hisgotan sa sunod nga artikulo ang pipila ka pahinumdom niini nga mga sulat ug kon unsaon nato ni pagpadapat karon.