1-2. Unsay makahatag ug kalipay sa mga alagad sa Diyos? (Santiago 1:​22-25)

 GUSTO ni Jehova ug sa iyang Anak nga magmalipayon ta. Ang magsusulat sa Salmo 119:2 nag-ingon: “Malipayon kadtong nagtuman sa iyang mga pahinumdom, nga nangita kaniya sa tibuok nilang kasingkasing.” Si Jesus nagpasalig pod nato: “Malipayon kadtong namati sa pulong sa Diyos ug nagsunod niini!”—Luc. 11:28.

² Kita nga mga alagad ni Jehova maoy malipayon nga katawhan. Ngano? Naay daghang rason, pero ang usa niana mao ang atong regular nga pagbasa sa Pulong sa Diyos ug ang atong paningkamot nga ipadapat ang atong nakat-onan.—Basaha ang Santiago 1:​22-25.

3. Unsay mga kaayohan dihang ipadapat nato ang atong nabasa sa Pulong sa Diyos?

³ Daghan ug kaayohan kon kita “mahimong mga magtutuman sa pulong.” Pananglitan, mapalipay nato si Jehova ug malipay pod ta. (Eccl. 12:13) Samtang sundon nato ang tambag sa Pulong sa Diyos, mas masuod pod ta sa atong pamilya ug sa mga igsoon, ug tingali mao nay imong naeksperyensiyahan. Dugang pa, malikayan nato ang mga problema nga resulta sa dili pagsunod sa mga sukdanan ni Jehova. Seguradong mouyon ta sa giingon ni Haring David bahin sa mga balaod, sugo, ug hukom ni Jehova. Siya miingon: “Sa pagtuman niini, adunay dakong ganti.”—Sal. 19:​7-11.

4. Nganong lisod usahay ang pagbasa ug pagpadapat sa Pulong sa Diyos?

⁴ Pero dili kanunayng sayon ang pagbasa sa Pulong sa Diyos  ug ang pagpadapat sa atong nakat-onan. Kay busy kaayo ta, nagkinahanglan gyod ug paningkamot ang paggahin ug panahon sa pagbasa ug pagtuon sa Bibliya aron masabtan nato kon unsay gusto ni Jehova nga atong himoon. Busa hisgotan nato ang pipila ka sugyot nga makatabang aron regular nato ning mabasa. Ato pong hisgotan kon unsay makatabang nato nga pamalandongon ang atong nabasa ug ipadapat ang atong nakat-onan.

PAGGAHIN UG PANAHON SA PAGBASA SA PULONG SA DIYOS

5. Unsang mga responsibilidad ang gihatagan natog dakong panahon?

⁵ Kadaghanan sa mga alagad ni Jehova busy kaayo. Naggahin tag dakong panahon sa pag-atiman sa lainlaing mga responsibilidad. Pananglitan, daghan kanato ang nagtrabaho aron matagan-an ang atong kaugalingon ug ang atong pamilya. (1 Tim. 5:8) Daghan pod ang nag-atiman sa ilang membro sa pamilya nga nagsakit o tigulang na. Ug kitang tanan kinahanglang mogahin ug panahon sa pag-atiman sa atong panglawas. Gawas pa niini nga mga responsibilidad, naa pod tay mga asaynment sa kongregasyon. Importanteng responsibilidad pod nato ang pagsangyaw. Busa sa kadaghan sa kinahanglan nimong himoon, unsaon nimo paggahin ug panahon aron regular nga mabasa ang Bibliya, mapamalandong ang imong gibasa, ug mapadapat ang imong nakat-onan?

6. Sa unsang paagi maseguro nimo nga regular kang makabasag Bibliya? (Tan-awa sab ang hulagway.)

⁶ Ingong mga Kristohanon, ang pagbasa sa Bibliya maoy usa sa “mas importanteng mga butang” nga kinahanglan natong himoong prayoridad sa atong kinabuhi. (Filip. 1:10) Bahin sa malipayong tawo, ang pinakaunang salmo nag-ingon: “Ang iyang kalipay anaa sa balaod ni Jehova, ug ginabasa niya ang Iyang balaod sa hinayng tingog adlaw ug gabii.” (Sal. 1:​1, 2) Busa klarong gipakita niini nga kinahanglan tang mogahin ug panahon sa pagbasa sa Bibliya. Kanus-a ang pinakamaayong panahon sa pagbasa sa Bibliya? Nagdepende ni nato ug sa atong kahimtang. Pero  importante nga mopili tag oras nga regular gyod natong mabasa ang Bibliya. Ang brader nga si Victor miingon: “Ganahan kong magbasa ug Bibliya sa buntag. Bisan pag dili ko ganahang mobangon ug sayo, nakita nako nga gamay rag disturbo kon sayo pa. Wala pa kaayo koy daghang gihunahuna ug mas makapokus ko.” Posible kaha ni sa imong kahimtang? Pangutan-a ang imong kaugalingon, ‘Kanus-a ang pinakamaayong panahon para nako nga basahon ang Bibliya?’

PAMALANDONGA ANG IMONG GIBASA

7-8. Unsa tingali ang hinungdan nga dili kaayo ta makabenepisyo sa atong gibasa? Iilustrar.

⁷ Nakasulay na ba ka nga daghan kaayo kag gibasa pero wala kay nasabtan o nahinumdoman? Kitang tanan nakasulay na tingali ana. Puwede pod ning mahitabo sa atong pagbasa sa Bibliya. Tingali tumong nato nga magbasag pipila ka kapitulo kada adlaw, ug maayo kaayo na. Angay tang magtakdag tumong ug maningkamot nga kab-oton kana. (1 Cor. 9:26) Pero ang pagbasa sa Bibliya maoy sinugdanan pa lang. Naa pa tay kinahanglang himoon aron makabenepisyo gyod ta sa atong pagbasa sa Pulong sa Diyos.

⁸ Hunahunaa ni nga ilustrasyon: Ang ulan gikinahanglan aron mabuhi ang mga tanom. Pero kon kusog kaayo ang ulan sa mubo lang nga panahon, dili na masuhop sa yuta ang tubig. Kon mahitabo na, dili makahatag ug kaayohan kon magsige pag ulan. Ang yuta nagkinahanglan ug panahon aron masuhop niini ang tubig nga makatabang aron motubo ang mga tanom. Sa samang paagi, likayan nato nga dalidalion ug basa ang Bibliya kay dili na hinuon nato masabtan, mahinumdoman, ug mapadapat ang atong gibasa.—Sant. 1:24.

9. Unsay angay natong buhaton kon nabatasan na nato nga dalidalion pagbasa ang Bibliya?

⁹ Naa bay mga panahon nga gidalidali ra nimog basa ang Bibliya? Unsay angay nimong buhaton? Hinayhinay lang. Paningkamoti nga makagahin kag panahon nga hunahunaon o pamalandongon ang imong ginabasa o ang bag-o lang nimong nabasa. Dili ni lisod himoon. Puwede nimong patas-an ang imong panahon sa pagtuon aron makapamalandong  ka, o kaha puwede kang mobasa ug pipila lang ka bersikulo ug gamiton ang nahibiling panahon aron hunahunaon ang imong nabasa. Si Victor, nga gihisgotan ganina, miingon: “Mubo lang ang akong ginabasa, usahay usa lang ka kapitulo. Kay sayo sa buntag man kong magbasa, mapamalandong nako ni sa tibuok adlaw.” Bisag unsa mang paagi ang imong pilion, importante nga hatagan nimog panahon ang imong kaugalingon nga mamalandong aron makabenepisyo gyod ka sa imong ginabasa.—Sal. 119:97; tan-awa ang kahong “ Mga Pangutana nga Puwedeng Pamalandongon.”

10. Unsaon nimo pagpadapat ang imong mga nakat-onan? Paghatag ug pananglitan. (1 Tesalonica 5:​17, 18)

¹⁰ Bisag unsang orasa man ka magbasa sa Bibliya ug bisan unsa pay gidugayon niini, paningkamoti nga mapadapat nimo ang imong gibasa. Samtang magbasa ka sa Pulong sa Diyos, pangutan-a ang imong kaugalingon, ‘Unsaon nako ni pagpadapat karon o sa umaabot?’ Pananglitan, ibutang ta nga sa imong pagbasa sa Bibliya, naa na ka sa 1 Tesalonica 5:​17, 18. (Basaha.) Human nimo mabasa kining duha ka bersikulo, hunong usa ug hunahunaa kon unsa ka regular ang imong mga pag-ampo ug kon kinasingkasing ba gyod ni. Puwede pod nimong hunahunaon ang mga butang nga mapasalamaton ka. Tingali magplano ka nga pasalamatan si Jehova sa tulo ka espesipikong butang. Bisag pipila lang ka minuto ang imong igahin sa paghunahuna sa imong nakat-onan, makatabang ni nimo nga masabtan ang Pulong sa Diyos ug mapadapat kini. Hunahunaa lang ang kaayohan niini para nimo kon imo ning himoon kada adlaw sa dihang magbasa ka sa Bibliya. Oo, mouswag gyod ka ug mahimong maayo kaayo nga alagad ni Jehova! Pero unsay imong himoon kon nakita nimo nga morag daghan kag kinahanglang pauswagon?

PAGTAKDAG MGA TUMONG NGA KAYA NIMONG KAB-OTON

11. Nganong malisdan tingali ta usahay sa pagpadapat sa atong mga nakat-onan? Paghatag ug pananglitan.

¹¹ Malisdan tingali ta usahay sa pagpadapat sa atong nakat-onan sa pagbasa sa Bibliya. Hunahunaa ni: Ibutang ta nga karon naa kay nabasa nga pasidaan bahin sa pagpakitag paboritismo. (Sant. 2:​1-8) Imong nakita nga kinahanglan nimong pauswagon ang imong pagtratar sa uban, ug midesisyon ka nga mohimog mga kausaban. Maayo kaayo na! Dayon pagkaugma, nakabasa kag teksto nga nagpasiugda kon unsa ka importante nga kontrolon nimo ang imong sinultihan. (Sant. 3:​1-12) Naamgohan nimo nga usahay dili maayo o dili makapadasig ang imong sinultihan. Maong nakaingon ka nga kinahanglan kang mahimong mas positibo ug makapadasig. Pagkasunod adlaw, nakabasa kag pasidaan bahin  sa pagpakighigala sa kalibotan. (Sant. 4:​4-12) Namatikdan nimo nga kinahanglan kang mas mag-amping sa pagpilig kalingawan. Maong sa ikaupat nga adlaw, tingali nabug-atan na ka sa kadaghan sa kinahanglan nimong pauswagon.

12. Nganong dili ka angayng madismayar kon sa imong pagbasa sa Bibliya nakita nimo nga daghan kag kinahanglang pauswagon? (Tan-awa sab ang footnote.)

¹² Kon nakita nimo nga daghan kag kinahanglang usbon o pauswagon, ayawg kadismayar. Nagpakita lang ni nga naa kay mapainubsanong kasingkasing. Ang tawo nga mapainubsanon ug matinud-anon sa kaugalingon mobasag Bibliya kay gusto niyang makita kon unsay angay niyang pauswagon. a Hinumdomi pod nga ang pagsul-ob sa “bag-ong personalidad” nagkinahanglag padayong paningkamot. (Col. 3:10; itandi ang study note sa “is being made new.”) Unsay makatabang nimo nga padayong ipadapat ang Pulong sa Diyos?

13. Unsay imong himoon aron makatakda kag mga tumong nga kaya nimong kab-oton? (Tan-awa sab ang hulagway.)

¹³ Imbes nga himoon dayon ang tanan nimong nakat-onan sa imong pagbasa sa Bibliya, pagpili lang unag pipila ka tumong nga kaya nimong kab-oton. (Prov. 11:2) Puwede nimo ning sulayan: Ilista ang tanan nga gusto nimong pauswagon, ug pagpilig usa o duha nga gusto nimong unahon sa pagpadapat. Dayon sa sunod na pod ang uban. Asa kaha ka puwedeng magsugod?

14. Unsa nga mga tumong ang puwede nimong unahon?

¹⁴ Puwede nimong unahon ang tumong nga dali ra nimong makab-ot. O kaha puwede nimong unahon kadtong nakita nimo nga ilabinang kinahanglan nimong pauswagon. Kon naa na kay napili nga tumong, pag-research sa atong mga publikasyon, sama sa Watch Tower  Publications Index o Giya sa Pagpanukiduki Para sa mga Saksi ni Jehova. Iampo ang imong tumong ug hangyoa si Jehova nga hatagan kag “tinguha ug kusog sa pagbuhat sa mga butang nga gusto niya.” (Filip. 2:13; footnote) Dayon ipadapat ang imong nakat-onan. Kon molampos ka sa una nimong tumong, posibleng mas madasig ka nga mohimog lahi na pod nga tumong. Gani, kon molampos ka sa paghimog kausaban o sa pag-ugmad ug espesipikong hiyas, posibleng mas sayon na para nimo ang paghimog uban pang kausaban o ang pag-ugmad ug uban pang hiyas.

TUGOTI ANG PULONG SA DIYOS NGA ‘MAGLIHOK DIHA KANIMO’

15. Nganong ang mga alagad ni Jehova lahi kay sa uban nga nagabasa pod ug Bibliya? (1 Tesalonica 2:13)

¹⁵ Ang uban nag-ingon nga kadaghan na nilang nabasa ang Bibliya. Pero nagtuo ba gyod sila sa gitudlo niini? Gisunod ba gyod nila ang pagtulon-an sa Bibliya ug mihimog mga kausaban sa ilang kinabuhi? Makapaguol nga wala nila ni himoa. Pero lahi gyod kaayo ang mga alagad ni Jehova! Sama sa mga Kristohanon sa unang siglo, gidawat nato ang Bibliya “kon unsa gyod kini, ingong pulong sa Diyos.” Dugang pa, naningkamot ta nga makita sa atong pagkinabuhi nga gipadapat nato ang atong mga nakat-onan.—Basaha ang 1 Tesalonica 2:13.

16. Unsay makatabang nato nga mahimong magtutuman sa Pulong sa Diyos?

¹⁶ Dili kanunayng sayon ang pagbasa ug pagpadapat sa Pulong sa Diyos. Naa tingali mga higayon nga malisdan ta sa paggahin ug panahon sa pagbasa. O usahay basin magdalidali tag basa maong wala kaayo tay masabtan. Tingali nabug-atan pod ta kay daghan kaayo tag kinahanglang pauswagon. Bisag unsa pang kalisdanan ang atong giatubang, madaog nato ni sa tabang ni Jehova. Hinaot nga magmadeterminado ta nga dawaton ang iyang tabang ug mahimong magtutuman sa Pulong, dili tigpaminaw lang. Kon kanunay natong basahon ang Pulong sa Diyos ug ipadapat ni sa atong kinabuhi, magmalipayon gyod ta.—Sant. 1:25.